Ewe Tabernacle me Asor

Nupwen Kot a annuku Moses epwe aueta eu tabernacle non ewe nenien ekkewe chon Israel, A affata ewe popun: “pwe upwe tongeni nonnom rer” (Exodus 25:8). Non ewe tabernacle, nonnomun Kot a pwano me ren ewe pworun ewe pwon mi pin—eu pwor ira, mi pwonuno ren gold, mi masoweni makken uruon an Kot pwon ren Noun kewe aramas. Ewe pwor a nom non ewe mi kon pin, ewe anonnonongeni rum, mi keimuno seni unusen ewe tabernacle me ren eu pwonupwon. Ei pwonupwon a tongeni esisinata ach keimufesen seni me mwen Kot pokiten ewe Turutiw, usun chok ren ach niwin sefan ngeni I—me ren ewe Chon Amanau.

Me nukun Moses, sia sinei usun chok emon aramas ewe a tongeni tonong non ena “neni mi kon pin” (Exodus 26:34)—ewe prist mi nap. Usun ekkewe ekkoch prist, i akkom epwe tutu me kepit ufouf non uf mi pin esisinen wisan. Fan eu non eu ier, non eu ran a iteni Ranin Achasefan, ewe prist mi nap epwe asorata eu asor fan iten ekkewe aramas me mwen epwe anamon ne tonong non ewe tabernacle. Ren ewe pwonupwon, i epwe keni insens. Ewe otuot mi pwopwon a feita nang a tupuni ekkewe iotek an ekkewe aramas a feita ngeni Kot. Mwirin ewe prist mi nap, a uwei cha seni asoren emon man, epwe feinniu seni ewe pwonupwon me feinno ngeni ewe nenien mottun Kot, mi esisineno me ren ewe pworun ewe pwon mi pin.

Om sinei met en mi sinei usun Jises Kraist me Wisan non an Samach non Nang kokkot, ka tongeni kuna ifa usun ewe tabernacle a itini ngeni kich ewe Chon Amanau? Usun chok ewe tabernacle, me ewe pwoor non, a tupuni an Kot nom nein noun aramas, Jises Kraist mi an Kot nom nein Noun aramas. Usun ewe prist mi nap, Jises Kraist i ewe Chon Affor nefinach me Kot ewe Sam. A feinniu seni ewe pwonupwon an epwe fori affor fan itach me ren nimenimochun chan pwisin An asor.

Ekkoch kinikinin an Israel we tabernacle meni usun en mi rorongorong, akkaewin ika ka fen pin no ngeni ewe tempel om kopwe angei pwisin om angangepin. Ewe tempel ina ewe imwen ewe Samon—Nenian ne nonnom me nein Noun aramas. Usun an ewe tabernacle we neni mi kon pin, an ewe temple rumwen selestial a tupuni an Kot nonnom. Ach sipwe tonong non, mi auchea sipwe tutu me kepit. Sia ufouf uf mi pin. Sia fori pwon mi pin. Sia iotek ren ewe rong seni ikewe ekkewe iotek ra feita ngeni Kot. Me omuchunon sia feinniu seni eu pwonupwon ngeni me mwen Kot.

Meni ewe akkaewin auchean mi nonno fengen nefinen tempel ikenai me tabernacle nom pwe ir me ru, ika sipwe weweochuti, ra apochokuna ach nuku non Jises Kraist me ourakicheno ren emwen ren An asoren achasefan. Kot a mochen Noun semirit repwe tonong fan mesan; I a mochen “eu muun prist” me finesamon (Exodus 19:6). Nge ach tipis ra eppeti kich seni ach sipwe angei ena feioch, pun “ese wor mettoch mi nimengaw epwe tongeni nonnom ren Kot” (Nifai 10:21). Iwe Kot ewe Sam a tinato Jises Kraist, nouch “prist mi nap ren mettoch mi murino repwe feito” (Hebrew 9:11). A sukano ewe pwonupwon me apochokuna meinisin noun Kot aramas ar repwe “pwaracho ne feinno ngeni ewe mottun chen, pwe sipwe tongeni angei umoumoch” (Hebrew 4:16).

Ikenai, ewe popun ekkewe tempel a kon nap ach angei manau mi tekia fan itach pwisin. Mwirin ach angei pwisin ach angangepin me fori pwon mi pin ren Kot, sia tongeni uta non nenien ach kewe neuo me angei angangepin fan iter. Non och napanap, sia tongeni winiti och mettoch usun ewe prist mi nap me nom—me ewe Prist mi Napanap—a suki ewe aan ngeni me mwen Kot fan iten ekkoch.

Ewe nongonongun achasefan me niwinsefanin nefin ra kait non unusen manaman me non mwokutukutun asoren man me nom, minne a fis fansoun nakatam me mwen ewe annukun Moses. Adam me Eve ra asorata asor. Ra weweiti esisinan porousen an ewe Chon Amanau asor. Me ra osukuna ei ngeni nour kewe semirit.

Ewe esisinen asoren man meni epwe akkaewin enetipengaw won an Israel Ranin Achasefan me nom (“Yom Kippur” non Hebrew). Ewe namotan ei ceremony mi fifis iteiten ier a affatetiw non Leviticus 16:30: “Non ena ran ekkewe prist repwe fori eu achasefan fan itom, an epwe nimetuk, pwe kopwe tongeni nimoch seni om kewe tipis meinisin me mwen ewe Samon.” Ei a mutata nonnomun Kot epwe nom nein ekkewe aramas. Ei achasefan a wesino me ren ekkoch sokkun angangen efisi mettoch mi auchea. Non eu me nein ekkei, emon sike a ninnino pwe eu asoren tipisin ekkewe aramas, me ewe prist mi nap a wano chan ewe sike non ewe neni mi kon pin. Mwirinon, ewe prist mi nap a watiw poun won emon sike mi manau me pwarata tipisin ekkewe aramasen Israel—esisinen ar wano ekkena tipis ngeni ewe sike. Ewe sike mwirin a katuruu seni ewe neninen Israel.

Non ekkei fenin namanam, ekkewe sike ra esisina Jises Kraist, a angei nenien ekkewe aramas mi tipis. Tipis esap mumuta fan mesen Kot. Nge ren an epwe nieno ika asueno ekkewe mi tipis, Kot a fen awora pwan eu aan—emon sike epwe ninino me fen kasuu. “Me ewe sike epwe uweiano tipisir kewe meinisin” (Leviticus 16:22).

Ekkei fenin namanam ra itini ngeni ewe aan Kot a fen awora an epwe uweikicheno sefan ngeni fan Mesan—Jises Kraist me An Achasefan. Ewe Chon Amanau a “riaffouni ach riaffou me mwarei ach netipengaw,” pwan mwo“angangangawach meinisin” (Isaiah 53:4, 6). A uta non neniach, fangeno Manauan an epwe moni niwinin tipis, iwe mwirin okkufu mano ren An Manausefan. Ewe asor an Jises Kraist ina ewe eu “napanap me amwuchunon asor; esap ew asoren aramas, esap pwan asoren man mwacho” nge epwe “ew asor feinfeino chok me esemuch” (Alma 34:10). I a apwonueta mettoch meinisin ekkewe asoren nom ra itin ngeni.

Ren ei popun, mwirin An asor a weseino, A apasa, “Ousap chiwen asorata ngeniei ewe assuku cha; ewer, ami asor … repwe wesino. … Iwe oupwe asorata ew asor ngeniei ew asoren netipechou me netip niemam” (3 Nifai 9:19–20).

Iwe nupwen ka kuna porouse non ewe Testamen Noom usun asor me ewe tabernacle (ika, mwirinon, ewe tempel)—iwe kopwe kuna chommong ir—chechemeni pwe ewe akkaewin popun unusan pwe epwe apochokuna om nuku non ewe Messiah, Jises Kraist. Apacha fengeni met ka anneani me kaeo ngeni om fen ngeni non Imwan we. Mut ngeni netipom me om ekiek repwe kun ngeni I. Ekipwichi met I a fen fori ne uwesefanuk ngeni fan mesen Kot—me met kopwe fori ne tapweno mwirin I.