Ekkewe Puken Uruo non ewe Testamen Noom

Ren pwisin ururun, ekkei porous ra katou seni eu sokkun napanapen ekiek. Usun chok ese tufich ne nennengeni epa ponira, foun fau, ika ira seni chommongun neni fan eu, epwe wesen fisino pwe eu uruo epwe affataano ewe ekiek an ewe aramas ika mwichen aramas ra makkei. Ei ekiek mi pachenong ewe muu ika nongonong ekkewe chon mak ir mi pachengeni me orenien nonnomur me nuku. Ach sinei ei a tongeni anisi kich ach sipwe weweiti pwe ekkewe chon mak me chon ochufengeni ekkewe puken uruo ra onomu ar ekiek won ekkoch tichikin nupwen ra nikitau ekkoch. Ra esuku pwe ekkoch resap resap fori. Me ra asopwano ren ar anongonong won ekkei tichik me esukusuk. Kich mi pwan tongeni kuna sokopaten ekiek non ekkewe puken ewe Paipen (me fan ekkoch non ewe pwan chok puk). Ren napenon ach apareni ekkei ekiek, a ina murinonon ach sia tongeni weweiti ekkewe puken uruo.

Eu ekiek mi sinneno ngeni meinisin ekkewe puken uron Testamen Noom ina ewe ekiek an ekkewe semiriten Israel, noun Kot aramas pwon. Ar nuku non ewe Samon a anisir ar repwe kun Poun non manauer me non mwokutukutun muur we. Nupwen puken uruo esap minen namanam rese kan kuna mettoch non ei napanap, ei ekiekin pekin ngun eu kinikinin met a fori ekkewe puken uruon Testamen Noom epwe fokkun auchea ngeni aramas ekkewe ra kukutta ne forata ar pwisin nuku non Kot.

Ekkewe puken uruo ra poputa ikewe ewe puken Deuteronomy a kouno me ie, ren an ekkewe chon Israel ierin fetan fein non ewe fonu pon. Ewe puken Joshua a pwarano ekkewe semiriten Israel ra monneta ne tonong non Canaan, fonuer we fonuen pwon, me awewei ifa usun ra angei. Ekkewe puk mi tapweto, Sou-Apung ngeni 2 Chronicles, ra enikiniki met a fis ngeni Israel non ewe fonuen pwon, seni ewe fansoun ra nomwetiw tori ewe fansoun ra kuf me ren Assyria me Babylon. Ekkewe puken Ezra me Nehemiah ra aporousa usun ewe niwin an ekkoch mwichen ekkewe chon Israel ngeni ar we capital, Jerusalem, chommong ier mwirin. Omuchunon, ewe puken Esther a awewei eu porousen ekkewe chon Israel ar nonnom ekis ren ar katou fan an chon Persia nemenem.

Me ina ikewe ewe etettenin ewe Testamen Noom a muchuno. Ekkoch chon aewin annea ewe Paipen ra mairu ar kuna pwe ra fen awesano ne aneani ewe porousen ewe Testamen Noom me mwen ra fen aneani nap seni nesopun peichan kewe. Mwirin Esther, sise chiwen pwan angei chommong porous usun ewe uruon ekkewe chon Israel. Nge, ekkewe puk mi tapweto— akkaewin ekkewe puken ekkewe soufos—ra masenong non ewe tettenin fansoun minne ekkewe puken uruo ra tupuni. Ewe angangen afanafan an ewe soufos Jeremiah, ren awewe, a fis fansoun ekkewe mettoch mi fis mi rekotutiw non 2 Kings 22–25 (me ewe uruo mi nonno non 2 Chronicles 34–36). Om sinei ei a tongeni siwini ewe napanap ka anneani ir me ru ekkewe porousen uruo me ekkewe puken an soufos osini.

Nupwen ka anneani ewe Testamen Noom, usun ren och uruo, meni kopwe anneani usun aramas ra fori ika apasa mettoch usun epwe sokkono ika enuokus, ngeni mesach ikenai. Sipwe esukusuku ei—chon makkei Testamen Noom ra kuna ewe fonufan seni eu ekiek me nom, non ekkoch napanap, epwe fokkun sokkono seni ach. Efeiengaw, nefinen mwichen aramas, me ewe wisen fefin ir ekkoch chok ekkewe osukosuk non mak me nom repwe kuna pwe a sokkono seni met sia fori ikenai.

Iwe met sipwe fori nupwen sia sereta won ekkoch porous non ekkewe pukefel usun ir mi anuokus? Aewin, epwe aninisoch ne ekieki eu me eu porous non eu watten awewen. Ifa usun an masenong non an Kot kokkotun amanau? Ifa usun a masenong ngeni met ka sinei usun ewe nonnomun Samach won Nang me Jises Kraist? Ifa usun a masenong ngeni ennet mi pwano non ekkoch pukefel ika ngeni ekkewe afanafanen soufos mi manau? Me ifa usun a masengeni ekkewe mongunungun an ewe Ngun ngeni pwisin netipom me om ekiek?

Non ekkoch napanap, ewe porous meni esap maseoch ngeni me nein ekkei. Fan ekkoch ewe porous meni epwe usun eu kinkinin kapachen sasing ewe nikinikin pwe ese wor nenian me nein ekkewe kinikinin ra fen pachefengen. Achocho ne oumwesanong ena och epwe masenong esap ina ewe aan mi murino. Nge fangeta won unusen ewe kapachen sasing esap pwan ina murinon. Nge, meni epwe namot kopwe eimueno ena och ren e fawnsoun. Nupwen ka pwan kaeo ekkoch me apachafengeni ekkoch ewe kapachen sasing, meni kopwe tufichin kunaochu ifa usun ekkewe kinikinin ra masefengen.

A pwan tongeni anisi ne chechemeni pwe ren kapachetan ach aukuk ngeni och sokkun ekiek, uruon pukefel epwe wor muanin aramas non. Awewe ren, non ekkewe fite puku ier, “chommong ekkewe mettoch mi fatafatoch me fokkun auchea ra angeireno seni ewe [Paipen],” mi pachenong auchean ennet usun nongonong, angangepin, me pwon mi pin (1 Nifai 13:28; nengeni pwan uwokisin 26, 29, 40). Pwan non ewe chok fansoun, sipwe mochen fangeta pwe ach pwisin ekiek ir mi kouk: epwe wor mettoch fansoun meinisin sisap ennetin weweiti me kapaseis sisap tongeni ponuweni iei.

Nge non ewe fansoun, kapaseis rese ponu resap eppeti kich seni ekkewe auchean foun nesenin ennet esemuch ekkewe ra pwa me non ewe Testamen Noom—ika mwo ekkei auchean nesen ir fan ekkoch mi opono non foufoun ousukosuk me ekkewe ngawen finata an aramas rese unusosch. Meni ewe me nein ekkei nesen a kon auchea ir ekkewe tutunap me porous ra pwrata usun an Kot tong—akkewin ekkewe ra awena ach ekiek ngeni ewe asor an Jises Kraist. Katon seni eu neni, auchean foun nesen usun ekkei ir mi chok saram ikenai usur chok me nom. Me pokiten ekkei uruo ra kapas usun ekkewe aramas pwon noun Kot—mwan me fefin kewe mi wor ar apwangapwangen aramas nge ir mi chok tongei me angang ngeni ese Samon—auchean foun nesenin ennet ra chommong non ekkewe puken uruon ewe Testamenin Noom.