Ẹ́ksódù 1– 6

Kínni ó wọ̀ yín lọ́kàn nípa àwọn obìnrin tí a júwe nínú Ẹ́ksódù 1–2? Báwo ni wọ́n ṣe ṣèrànwọ́ láti mú ètò Ọlọ́run fún àwọn ènìyàn Rẹ̀ ṣẹ? Kínni ìtiraka wọn kọ́ yín nípa iṣẹ́ ìsìn nínú iṣẹ́ Ọlọ́run?

Ṣíwájú kí ẹ tó bẹ̀rẹ̀ sí nka Ẹ́ksódù, ẹ lè ronú nípa ìnira tí ẹ̀ nlà kọjá—ohunkan tí ẹ nírètí pé Olúwa yíò túu yín sílẹ̀ kúrò nínú rẹ̀. Kínni àwọn ọ̀rọ̀ àti gbólóhùn ọ̀rọ̀ nínú Ẹ́ksódù 1–3 tí ó dún bákannáà sí ìgbèkùn ti ẹ̀mí tàbí àwọn ohun míràn tí a nkojú ní òní? Bákannáà ṣe àkíyèsí bí àwọn ọmọ Isráẹ́lì ṣe wá ìdándè àti bí Olúwa ṣe fèsì (fún àpẹrẹ, wo, Ẹ́ksódù 2:23–25; 3:7–8). Báwo ni Olúwa “ti ṣe ìdándè” yín?

Ní gbogbo inú ìwé Ẹ́ksódù, bákannáà ẹ lè kíyèsí àwọn ìjọra ní àárín Mósè àti Jésù Krístì (wo Deuterónómì 18:18–19; 1 Néfì 22:20–21). Fún àpẹrẹ, kínni ìjọra tí ẹ rí ní àárín Ẹ́ksódù 1:22; 2:1–10 àti Matteu 2:13–16? Tàbí ní àárín Ẹ́ksódù 24:18 àti Matteu 4:1–2? Kínni ìmọ̀lára tí ẹ ní pé Olúwa nfẹ́ kí ẹ ní òye nípa Ararẹ̀ àti agbára Rẹ̀?

Njẹ́ ẹ lè ronú nípa àkokò tí ohunkan ti kún inú yín pẹ̀lú ọlá àti ìyanu bí? Báwo ni ẹ ṣe fèsì? Báwo ni ẹ ó ṣe júwe àwọn ẹ̀dùn ọkàn tí ẹ mọ̀lára?

Pẹ̀lú èyí ní inú, ẹ ka Ẹ́ksódù 3:1–6. Kínní ó wọ̀ yín lọ́kà nípa ìrírí onimisi ti Mósè? Kínni Mósè ṣe láti fi ọ̀wọ̀ fún Ọlọ́run hàn? Kínni àwọn ìsopọ̀ tí ẹ rí ní àárín àwọn ìṣe rẹ̀ àti ọ̀wọ̀ fún àwọn ohun mímọ́?

Kíka àwọn ẹsẹ wọ̀nyí lè ṣí yín létí láti ronú nípa àwọn ohun mímọ́ àti ibi mímọ́ nínú ayè yín. Kínni ìdí tí wọ́n fi jẹ́ mímọ́ sí yín? Báwo ni ẹ ṣe ntọ́jú wọn ní ọ̀tọ̀ọ̀tọ̀ kúrò nínú àwọn ohun tí ó wọ́pọ̀? Láti ṣe tọ́ ìjíròrò yín sọ́nà, ẹ lè tọ́ka sí ìpín tí àkọlé rẹ̀ jẹ́ “Rírántí àwọn Ìlérí” nínú ọ̀rọ̀ Alàgbà David A. Bednar “Títayọ àwọn Ìlérí Iyebíye àti Nlá” (Làìhónà, Oṣù Kọkànlá. 2017, 91–93). Bákannáà ẹ lè kọrin tàbí fetísílẹ̀ sí orin ìsìn tí ó nmú ìmísí ọlá wá, bíiti “Mo Dúró nínú Gbogbo Ìyanu” (Àwọn Orin Ìsìn, nọ́mbà 193) kí ẹ sì jíròrò ohun tí ó yà yín lẹ́nu nípa ìhìnrere.

Bẹ́ẹ̀ni, àní nígbàtí a ti ní àwọn ìrírí yíyanilẹ́nu ti ẹ̀mí, ewu wà ní dída yẹpẹrẹ jù nípa àwọn ohun mímọ́. Báwo ni ẹ ó ti yẹra fún èyí? Ní ìhín ni àwọn ọ̀rọ̀ méjì tí ó yanjú ọ̀ràn yí: mú ọ̀kan, kí ẹ sì wá àwọn ẹ̀là ọ̀rọ̀ tí ó nràn yín lọ́wọ́: Ulisses Soares, “Nínú Ìyanu ti Krístì àti Ìhìnrere Rẹ̀” (Làìhónà, May 2022, 115–17); Gérald Caussé, “Njẹ́ Ó Ṣì Jẹ́ Ìyanu Sí Yín Bí?” (Làìhónà, Oṣù Karun 2015, 98-100).

Bákannáà wo Ẹ̀kọ́ àti Àwọn Májẹ̀mú 6:10–12; 63:64.

Ní òní a mọ Mósè bí wòlíì nlá àti olùdarí. Ṣùgbọ́n Mósè kò rí ara rẹ̀ ní ọ̀nà náà nígbàtí Olúwa kọ́kọ́ pè é. Bí ẹ ti nka Ẹ́ksódù 3–4, ẹ to àwọn àníyàn Mósè àti bí Olúwa ti fèsì sí ọ̀kọ̀ọ̀kan sílẹ̀. Kínni ẹ rí nínú àwọn orí wọ̀nyí tí ó lè mísí yín nígbàtí ẹ bá ní ìmọ̀lára àìkúnojú-ìwọ̀n. Ìgbà wo ni ẹ ti rí tí Ọlọ́run ro yín lágbára tàbí àwọn ẹlòmíràn láti ṣe iṣẹ́ Rẹ̀?

Bákannáà wo “Ìjọ Nfún Wa Ní Àwọn Ànfàní láti Ṣèrànwọ́ nínú Isẹ́ Olúwa” nínú “Ìṣètò Ìjọ” nínú àwọn Àkọlé àti Ìbèèrè, Ibi-ìkàwé Ìhìnrere.

Ó lè jẹ́ àìní-ìyànjú nígbàtí àwọn ìtiraka òdodo wa láti ṣe rere kò bá dàbí ó nṣiṣẹ́—nígbàtí a bá ngbìyànjú láti ṣe ìfẹ́ Olúwa ṣùgbọ́n tí a kò rí àwọn èsì tí à nretí. Láti kọ́ nípa ìrírí jíjọra tí Mósè ní, ẹ ka Ẹ́ksódù 5:4–9, 20–23. Báwo ni Olúwa ṣe ran Mósè lọ́wọ́ láti borí ìmọ̀lára rẹ̀ nípa àìní-ìyànjú? (wo Ẹ́ksódù 6:1–13). Báwo ni Olúwa ṣe ràn yín lọ́wọ́ láti tẹramọ́ ṣíṣe ìfẹ́ Rẹ̀?

Bákannáà wo Jeffrey R. Holland, “Dídúró de Olúwa,” Làìhónà, Oṣù Kọkànlá. 2020, 115–17.

• Mósè ní kókó ojúṣe ní títú Isráẹ́lì kúrò nínú ìdè. Ṣùgbọ́n òun kì bá ti lè ṣe àṣeyọrí èyí bí ìyá rẹ̀, arábìnrin rẹ̀, ọmọbìnrin Fáráò, àti àwọn obìnrin olódodo míràn kì bá ti dá ààbò bò kí wọ́n sì ṣe ìtọ́jú fún un. Ẹ ran àwọn ọmọ yín lọ́wọ́ láti kọ́ nípa àwọn obìnrin wọ̀nyí nínú Ẹ́ksódù 1:15–20; Ẹ́ksódù 2:2–10 (bákannáà wo Númérì 26:59); àti Ẹ́ksódù 2:16–21. Bákannáà ẹ lè lo ojú-ewé ṣíṣe ọ̀sẹ̀ yí àti “Ọmọ-ọwọ́ Mósè” (nínú àwọn Ìtàn Májẹ̀mú Láéláé, 61–63) láti sọ àwọn ìtàn yí. Báwo ni àwọn obìnrin wọ̀nyí ṣe ṣèrànwọ́ láti mú ètò Ọlọ́run ṣẹ? Ẹ sọ̀rọ̀ pẹ̀lú ara yín nípa àwọn ènìyàn míràn tí ẹ fẹ́ràn tí wọ́n ṣèrànwọ́ pẹ̀lú iṣẹ́ Ọlọ́run, pẹ̀lú ní àwọn ọ̀nà kékèké àti ìrọ̀rùn. Báwo ni a ṣe lè tẹ̀lé àpẹrẹ wọn?

  

  1:36

• Lẹ́hìn kíka Ẹ́ksódù 3:1–5 papọ̀, ẹ ní kí àwọn ọmọ yín ṣe àkópọ̀ àwọn ẹsẹ wọ̀nyí ní àwọn ọ̀rọ̀ ara wọn (bákannáà wo “Mósè Wolíì náà” nínú Àwọn Ìtàn Májẹ̀mú Láéláé, 64–66). Báwo ni Mósè ṣe fi ọ̀wọ̀ hàn ní iwájú Olúwa? Báwo ni Olúwa ṣe fẹ́ kí a fi ọ̀wọ̀ hàn? Bákannáà ẹ lè ní kí àwọn ọmọ yín ràn yín lọ́wọ́ láti rí (tàbí ya) àwọn àwòrán ti àwọn ibi mímọ́ tàbí ṣíṣe níbití a níláti ní ọ̀wọ̀. Kínni a lè ṣe láti mú kí ilé wa jẹ́ ibi mímọ́?

  

  1:26

• Ẹ kọ orin kan papọ̀ nípa ọ̀wọ̀, bí irú “Ọ̀wọ̀ Ni Ìfẹ́” (Ìwé-orin àwọn Ọmọdé, 31). Bí ẹ ti nṣe é, àwọn ọmọ yín lè rí àwọn ọ̀rọ̀ tàbí gbólóhùn ọ̀rọ̀ tí ó ṣe àlàyé ohun tí ó túmọ̀sí láti ní ọ̀wọ̀. Bí a bá nmú ọ̀rẹ́ kan wá sí ilé-ìjọsìn fún ìgbà àkọ́kọ́, báwo ni a ó ti ṣe àlàyé ohun tí ó túmọ̀sí láti ní ọ̀wọ̀?

• Lílo àkọsìlẹ̀ nínú Ẹ́ksódù 3; 4:1–17, ẹ jẹ́ kí àwọn ọmọ yín díbọ́n ní ọ̀kọ̀ọ̀kan láti jẹ́ Mósè. Ó lè jẹ́ ìgbádùn láti fi àwọn nkan pẹ̀lú tàbí àwọn prọ́pù rírọrùn, bí irú ìmọ́lẹ̀-fúláṣì àti ohun ọ̀gbìn kan láti rọ́pò jíjó ìgbẹ́. Ẹ ran àwọn ọmọ yín lọ́wọ́ láti ṣe àwárí bí Mósè ṣe ní ìmọ̀lára nípa ìyànsíṣẹ́ tí Olúwa fun (wo Ẹ́ksódù 3:11; 4:1, 10). Bóyá ẹ lè pin pẹ̀lú ara yín ní àwọn àkokò nígbàtí ẹ ti ní ìmọ̀lára jíjọra. Kínni ìmọ̀ràn tí a ó pín pẹ̀lú Mósè láti ràn án lọ́wọ́? Ẹ kà nípa bí Olùwa ti gba Mósè níyànjú nínú Ẹ́ksódù 3:12; 4:2–9, 11–12. Ẹ wí fún àwọn ọmọ bí Olùgbàlà ṣe ràn yín lọ́wọ́ láti mú ìpè yín ṣẹ, tẹ̀lé ìṣílétí, tàbí ṣe ohunkan míràn tí ó le fún yín.