“Mas 23–29. ‘Mi Tingim Gen Dispela Kontrak bilong Mi’: Kisim Bek 1–6,” Kam, Bihainim Mi—Bilong Haus na Sios: Olpela Testamen 2026 (2026)
“Mas 23–29. ‘Mi Tingim Gen Dispela Kontrak bilong Mi’,” Kam, Bihainim Mi: 2026
Moses and the Burning Bush, Jerry Thompson i mekim
Mas 23–29: “Mi Tingim Gen Dispela Kontrak bilong Mi”
Kisim Bek 1–6
Taim femili bilong Jekop i go stap long kantri Isip, dispela i bin helpim ol tru. Tasol bihain long planti yia, kantri Isip i gat nupela king. Dispela nupela king “i no save long Josep” (Kisim Bek 1:8) na em i save mekim nogut long ol Israel na em mekim ol i kamap wokboi bilong em. Ating ol lain Israel i tingting bilong wanem na God larim dispela samting i kamap long ol, husat i mekim kontrak wantaim Em pinis. Em tingim yet dispela kontrak Em mekim wantaim ol pinis, o nogat? Ol stap manmeri bilong em yet, o nogat? Em lukim bikpela hevi na pen ol kisim, o nogat?
Ating sampela taim yu tu laik mekim ol wankain askim. Ating yu tingting olsem, “God save long samting i kamap long mi, o nogat? Em bai harim krai bilong mi, long em bai helpim mi, o nogat?” Taim God i rausim ol Israel kam aut long kantri Isip, Em bekim ol dispela askim, olsem: Em i no save lusim tingting long ol manmeri bilong Em. Bikpela i save tingim kontrak Em mekim wantaim yumi, na Em bai inapim ol long taim na long rot bilong Em yet. “Long strong bilong mi bai mi mekim save tru long ol, na bai mi kisim bek yupela,” Bikpela i tok. “Bihain bai mi lusim yupela long dispela wok kalabus … na bai yupela i fri. Na long dispela taim bai yupela i save tru olsem, mi Bikpela, mi God bilong yupela” (Kisim Bek 6:6–7).
Long lukim wanem ol samting stap insait long buk bilong Kisim Bek, lukim “Exodus, book of” insait long Bible Dictionary.
Ol Sampela Tingting bilong Lainim long Haus na long Sios
Kisim Bek 1–2
God i ken yusim mi long mekim ol wok bilong Em.
Wanem gutpela tingting i kamap long yu, taim yu lukim stori bilong ol meri long Kisim Bek 1–2? Samting ol i mekim i bihainim plen bilong God long ol manmeri bilong Em olsem wanem? Wok ol i mekim i skulim wanem samting, long mekim wok bilong God?
Kisim Bek 1–3
Jisas Krais em Man bilong rausim mi long taim nogut.
Bipo long yu ritim buk bilong Kisim Bek, tingim wanpela hevi i kamap long yu—samting we yu gat strongpela tingting olsem Bikpela bai rausim long yu. Wanem sampela samting long Kisim Bek 1–3 i wankain olsem sol bilong yumi stap long kalabus bilong sin, na ol narapela samting i save kamap long yumi tude? Lukim tu wanem rot ol lain bilong Israel i painim bilong ranawei long kalabus na wanem rot Bikpela i helpim ol (kain olsem long Kisim Bek 2:23–25; 3:7–8). Bikpela i “kam daun bilong kisim bek” yu olsem wanem?
Long buk bilong Kisim Bek, yu ken painim tu olsem sampela wok God i givim Moses i mekim i wankain olsem Jisas Krais (lukim Lo 18:18–19; 1 Nifai 22:20–21). Kain olsem, wanem samting yu lukim i wankain namel long Kisim Bek 1:22; 2:1–10 na Matyu 2:13–16? O namel long Kisim Bek 24:18 na Matyu 4:1–2? Yu pilim Bikpela i laikim yu long save gut long Em na strong bilong Em?
Painim ol mak na ol sain i tokaut long Jisas Krais. “Yu ken … painim olsem laip bilong Jisas Krais i wankain olsem laip bilong ol profet na ol narapela bilipmanmeri insait long ol tok bilong God. [Taim yu mekim olsem] ol tok tru i toktok long Jisas Krais bai kamap ples klia long ol samting yu bai abrusim long en” (Lukim Teaching in the Savior’s Way, 7; lukim tu Hosea 12:10).
Faith At Water’s Edge, Anne Marie Oborn i mekim
Kisim Bek 3:1–6
Mi ken soim daunpasin na pasin bilong lotu, long ol samting na ol ples i holi.
Yu ken tingim wanpela taim wanpela samting i mekim yu pilim gutpela tru insait long bel. Yu bin mekim wanem? Yu bai toktok long samting yu bin pilim olsem wanem?
Wantaim ol dispela tingting, ritim Kisim Bek 3:1–6. Wanem ol tingting yu kisim, long wanem samting i kamap long Moses? Moses i mekim wanem long soim daunpasin na pasin bilong lotu long God? Wanem samting yu lukim i wankain, namel long pasin em mekim na pasin bilong rispekim ol samting i holi?
Taim yu ritim ol dispela ves, em bai mekim yu tingting long ol samting i holi na ol ples holi long laip bilong yu. Bilong wanem na ol dispela samting i holi long yu? Yu save mekim wanem kain pasin long ol, na ol samting nating? Long stiaim tingting bilong yu lukim dispela hap “Remembering the Promises” bilong toktok bilong Elda David A. Bednar “Exceeding Great and Precious Promises” (Liahona, Nov. 2017, 91–93). Yu ken harim o singim wanpela song i mekim yu pilim gutpela long bel, kain olsem “I Stand All Amazed” (Hymns, no. 193) na tingim wanem samting bilong dispela gutnius i save mekim yu pilim gutpela long bel.
Tru tumas. Taim yumi lukim ol gutpela samting bilong spirit, yumi save abrus tu na mekim ol samting holi i kamap samting nating. Yu bai abrusim dispela samting olsem wanem? Dispela tupela toktok i toktok moa long rot bilong abrusim dispela samting. Ritim wanpela, na painim ol sampela liklik tok we i helpim yu, “In Awe of Christ and His Gospel” (Liahona, Mei 2022, 115–17); Gérald Caussé, “Is It Still Wonderful to You?” (Liahona, Mei 2015, 98–100).
Lukim tu Doktrin na ol Kavanen 6:10–12; 63:64.
Kisim Bek 3–4
God i save givim strong long husat em makim bilong mekim wok bilong Em.
Tude, yumi save long Moses olsem wanpela bikpela profet na hetman. Tasol Moses i no lukim em yet olsem kain taim God makim em nambawan taim tru. Taim yu ritim Kisim Bek 3–4, raitim go daun ol wari bilong Moses, na Bikpela i stretim olsem wanem. Yu painim wanem ol toktok insait long ol dispela sapta, bilong kirapim bel bilong yu taim yu pilim olsem yu bai hat long mekim wok bilong God. Wanem taim yu bin lukim God i strongim yu o narapela long mekim wok bilong Em?
Lukim tu “The Church Gives Us Opportunities to Assist in God’s Work” long “Church Organization” insait long Topics and Questions, Gospel Library.
Kisim Bek 5–6
Bikpela bai inapim ol samting Em tok long en, long taim bilong Em yet.
Sampela taim, taim yu mekim ol gutpela wok na ol dispela wok i no kamapim gutpela samting, yu bai bel hevi—taim yumi bihainim laik bilong God tasol dispela i no karim kaikai long rot yumi laikim long en. Wankain samting i kamap long Moses, long Kisim Bek 5:4– 9, 20-23. Bikpela i helpim Moses long winim dispela bel hevi olsem wanem (lukim Kisim Bek 6:1–13). Bikpela i helpim yu go het moa long bihainim laik bilong Em?
Lukim tu Jeffrey R. Holland, “Waiting on the Lord,” Liahona, Nov. 2020, 115–17.
Long kisim sampela moa tingting, lukim Liahona na For the Strength of Youth megesin bilong dispela mun.
Ol Sampela Tingting bilong Lainim ol Pikinini
Dispela i namba 5 sande bilong dispela mun. Olsem na ol tisa bilong Praimeri mas lainim ol pikinini long ol samting i stap long “Appendix B: Preparing Children for a Lifetime on God’s Covenant Path
Kisim Bek 1–2
God i ken yusim mi long mekim ol wok bilong Em.
-
Moses i gat bikpela wok, long rausim ol Israel long kalabus na ol bai kamap fri. Tasol em bai i no inap long mekim dispela wok, sapos mama na susa bilong em, pikinini meri bilong king bilong Isip, na ol narapela bilipmeri i no sambai long em na lukautim em. Helpim ol pikinini bilong yu long lainim stori bilong ol dispela meri, long Kisim Bek 1:15–20; Kisim Bek 2:2–10 (lukim tu Namba 26:59); na Kisim Bek 2:16–21. Yu ken yusim tu ektiviti pes bilong dispela wik na “Baby Moses” (insait long Old Testament Stories, 61–63) long stori long ol dispela meri. Ol dispela meri i helpim plen bilong God long kamap olsem wanem? Toktok namel long yupela, long husat yupela i save laikim tru husat i save helpim long mekim wok bilong God. Wok ol i mekim i ken liklik na isi. Bai yumi bihainim piksa ol i soim olsem wanem?
1:36Baby Moses
Kisim Bek 3:1–5
Mi ken rispektim ol ples holi.
-
Bihain long yupela ritim Kisim Bek 3:1–5 wantaim, askim ol pikinini bilong yu long toktok long dispela ves long rot ol i pilim olsem i isi long ol (lukim tu “Moses the Prophet” insait long Old Testament Stories, 64–66). Moses i soim rispek long Bikpela olsem wanem? Bikpela i laikim yumi long soim rispek olsem wanem? Yu ken askim tu ol pikinini bilong yu long helpim yu painim (o droim) ol piksa bilong ol ples holi, o ol taim yumi mas soim daunpasin na pasin bilong lotu. Yumi ken mekim wanem long mekim haus bilong yumi kamap wanpela ples holi?
1:26Moses the Prophet
-
Singim wanpela song i toktok long daunpasin na pasin bilong lotu, olsem “Reverence Is Love” (Children’s Songbook, 31). Taim yupela i singsing, ol pikinini bilong yu ken painim ol sampela toktok we i tok klia daunpasin na pasin bilong lotu em wanem samting. Sapos yumi kisim wanpela poro bilong yumi go long lotu nambawan taim tru, bai yumi tok klia wanem em daunpasin na pasin bilong lotu olsem wanem?
Moses and Aaron Speak to the People, James J. Tissot i mekim
Kisim Bek 3–4
Taim Bikpela i askim mi long mekim wanpela samting, Em bai helpim mi long mekim.
-
Yusim dispela stori long Kisim Bek 3; 4:1–17, na larim ol pikinini bilong yu pilai olsem ol Moses. Yupela ken putim wanpela samting, olsem wanpela tos na wanpela flawa long makim dispela diwai paia i lait long en. Helpim ol pikinini bilong yu painimaut Moses i pilim olsem wanem long wok Bikpela i givim long em (lukim Kisim Bek 3:11; 4:1, 10). Ating yupela ken toktok namel long yupela yet, long ol taim yupela bin pilim wankain olsem. Wanem sampela tok stia bai yumi givim Moses bilong helpim em? Ritim dispela taim Bikpela i strongim Moses, long Kisim Bek 3:12; 4:2–9, 11–12. Tokim ol pikinini bilong yu Jisas Krais i helpim yu long mekim wanpela wok bilong Sios, mekim wanpela samting Holi Spirit i tokim yu long mekim, o mekim wanpela samting i hat long yu olsem wanem.
Long kisim sampela moa tingting, lukim Friend piksa buk bilong dispela mun.