“Mas 30–Epril 5. ‘Em i Winim na Daunim Strong Bilong Dai’: Ista,” Kam, Bihainim Mi—Bilong Haus na Sios: Olpela Testamen 2026 (2026)
“Mas 30–Epril 5. ‘Em i Winim na Daunim Strong Bilong Dai,’” Kam, Bihainim Mi: Olpela Testamen 2026
Piksa bilong matmat bilong Jisas
Mas 30–Epril 5: “Em i Winim na Daunim Strong Bilong Dai”
Ista
Laip bilong Jisas Krais “em nambawan samting long ol manmeri long bipo na long nau tu” (“The Living Christ: The Testimony of the Apostles”, Gospel Library). Wanem as bilong dispela tok? Wanpela as em i olsem, laip bilong Jisas Krais i save mekim senis long laip bilong olgeta husat i bin stap laip o i bai stap laip bihain, long kisim laip oltaim. Yu ken tok tu olsem Kirap Bek bilong Jisas Krais long dispela nambawan Ista Sande, i bungim wantaim olgeta manmeri bilong God long bipo na long nau: husat ol i kamap bipo long Kirap Bek bilong Em i bilip strong olsem dispela bai kamap (lukim Jekop 4:4), na husat i kamap bihain long dispela i tingting go bek long dispela wantaim bilip. Taim yumi ritim ol stori na tok profet long Olpela Testamen, yumi i no inap lukim dispela nem Jisas Krais, tasol yumi ken lukim olsem ol bilipmanmeri long dispela taim long bipo i bilip na laik tru long lukim dispela Mesaia husat bai kisim bek ol. Olsem na yumi nau husat tok bilong God i tokim yumi long tingim Em i ken pilim wankain olsem ol lain husat i bin laik long lukim Em. Tru tumas, Jisas Krais i karim “pen yumi yet i mas karim” (Aisaia 53:6; ol i putim mak bilong strongim tok), na long “Krais bai ol i kisim laip” (1 Korin 15:22; ol i putim mak bilong strongim tok).
Ol Sampela Tingting bilong Lainim long Haus na long Sios
Ol profet bilong bipo na bilong nau i save tokaut long ofa Jisas Krais i mekim bilong baim bek yumi long sin.
Planti ol ves insait long Olpela Testamen i toktok long wok bilong Jisas Krais, na ofa em mekim bilong baim bek yumi long sin. Sampela bilong ol dispela ves i stap aninit. Taim yu ritim dispela ol ves, yu kisim wanem ol tingting long wok bilong Jisas Krais?
|
Olpela Testamen |
Nupela Testamen |
|---|---|
Olpela Testamen Sekaraia 9:9 | Nupela Testamen Matyu 21:1–11 |
Olpela Testamen Sekaraia 11:12–13 | Nupela Testamen Matyu 26: 14–16; 27:3–8 |
Olpela Testamen Aisaia 53:4 | Nupela Testamen Matyu 8:16–17; 26:36–39 |
Olpela Testamen Aisaia 53:7 | Nupela Testamen Mak 14:60–61 |
Olpela Testamen Buk Song 22:16 | Nupela Testamen Jon 19:17–18; 20:25–27 |
Olpela Testamen Buk Song 22:18 | Nupela Testamen Matyu 27:35 |
Olpela Testamen Buk Song 69:21 | Nupela Testamen Matyu 27:34, 48 |
Olpela Testamen Buk Song 118:22 | Nupela Testamen Matyu 21:42 |
Olpela Testamen Aisaia 53:9,12 | Nupela Testamen Matyu 27:57–60; Mak 15:27–28 |
Olpela Testamen Aisaia 25:8 | Nupela Testamen Mak 16:1–6; Luk 24:6 |
Olpela Testamen Daniel 12:2 | Nupela Testamen Matyu 27:52–53 |
I gat planti ol tok profet insait long Buk bilong Momon i skulim yumi long Jisas Krais, na ol dispela i stap klia tru. Yu skelim, ol dispela ves i strongim bilip bilong yu olsem wanem: 1 Nifai 11:31–33; 2 Nifai 25:13; Mosaia 3:2–11; Alma 7:10–13.
Ol profet bilong nau, ol las de, i go het long tokaut Jisas Krais na wok bilong Em long kisim bek yumi long sin. Taim yu harim jenerol konferens long dispela taim bilong Ista, raitim go daun ol testimoni bilong Krais yu harim long en. Ol i skulim yu wanem samting long Em?
Jisas Krais save givim mi bel isi na amamas.
Ista em taim bilong amamas, long wanem, yumi amamas long Dai na Kirap Bek bilong Jisas Krais. Dispela i baim bek yumi long sin. Tasol long taim bilong Ista tu, i gat planti lain husat i no pilim amamas. Yu ken mekim wanem long autim bel isi na laikim bilong Jisas Krais long olgeta long dispela Ista?
Wanpela tingting em olsem, yu ken painim ol ves insait long tok bilong God i toktok long bel isi na amamas Jisas Krais i save givim, olsem ol dispela: Buk Song 16:8–11; 30:2–5; Aisaia 12; 25:8–9; 40:28–31; Jon 14:27; 16:33; Alma 26:11–22. Skelim wanem rot bai yu toktok long ol dispela tok wantaim ol narapela. Kain olsem, ating yu ken mekim ol kad wantaim ol dispela tok, long givim ol narapela long Ista. Beten long husat yu bai givim dispela toktok bilong Ista, na bai helpim em tru. Yu ken toktok long ol dispela toktok tu long intanet, we planti manmeri i ken lukim ol.
Ol singsing i toktok long Krais na Kirap Bek bilong Em, kain olsem “He Is Risen!” (Hymns, no. 199), i ken helpim yumi pilim bel isi na amamas long Ista. Painim ol hap toktok insait long dispela singsing, we yu ting i soim aut amamas bilong Ista.
Lukim tu Jeffrey R. Holland, “Not as the World Giveth,” Liahona, Mei 2021, 35–38; Mark S. Palmer, “Our Sorrow Shall Be Turned into Joy,” Liahona, Mei 2021, 88–90.
Why Weepest Thou, Simon Dewey i mekim (detail)
Jisas Krais i gat strong bilong helpim mi winim sin, dai, ol traim, na ol samting mi hat long mekim, long wanem, Em karim pen bilong baim bek mi.
Hia em wanpela samting yu ken mekim long helpim yu lukim ol blesing i kam long yumi, long Jisas Krais na Dai na Kirap Bek bilong Em. Ritim ol dispela ves stap aninit. Ol dispela ves i toktok long ol samting Jisas Krais i helpim yumi long winim. Putim wan wan ves go aninit long ol dispela het tok: sin, dai, ol traim, na ol samting yumi hat long mekim (sampela bilong ol dispela ves i ken stap aninit long ol narapela het tok tu) Taim yu ritim dispela ol ves, yu kisim wanem ol tingting long strong bilong Jisas Krais?
-
Aisaia 61:1–3
-
Esekiel 36:26–28
-
Matyu 11:28–30
-
Luk 1:46–55
-
Rom 8:35–39
-
Doktrin na ol Kavanen 19:15–19.
-
Moses 5:9–12
Bai yu tok klia long wanpela poro bilong yu, husat i no Kristen, bilong wanem na Jisas Krais i dia tumas long yu olsem wanem? Toktok bilong Elda Ahmad S. Corbitt “Do You Know Why I as a Christian Believe in Christ?” (Liahona, Mei 2023, 119–21) i ken helpim yu.
Lukim tu Reyna I. Aburto, “The Grave Has No Victory,” Liahona, Mei 2021, 85–87; Topics and Questions, “Atonement of Jesus Christ,” “Resurrection,” Gospel Library.
Jisas Krais,i peim bikpela prais tru long kisim bek mi.
Insait long ol dispela ves, yu lainim wanem samting long dispela prais Jisas Krais i baim long kisim bek yu: Aisaia 53:3–5; Mosaia 3:7; Doktrin na ol Kavanen 19:16–19? Papa long Heven i peim wanem prais tru? (lukim Jon 3:16).
Long kisim sampela moa tingting, lukim Liahona na For the Strength of Youth megesin bilong dispela mun.
Ol Sampela Tingting bilong Lainim ol Pikinini
Jisas Krais i karim hevi na dai bilong mi.
-
Dispela wik bilong Ista em gutpela taim bilong skulim ol pikinini bilong yu long wanem samting Jisas Krais mekim bilong yumi long Getsemani na long diwai kros. Long stat, yu ken soim ol long ol piksa i stap aninit na larim ol toktok long wanem samting i kamap insait long ol dispela piksa. Taim ol pikinini bilong yu i lukluk long ol dispela piksa, yu ken ritim ol ves i toktok long ol dispela samting (lukim Matyu 26:36–46; 27:35–50; Luk 22:39–46; Jon 19:16–30). Ol pikinini bilong yu i ken poinim ol samting insait long ol piksa we ol i harim insait long dispela ves
Long ankais: Christ in GethsemaneHarry Anderson i mekim. Long ansut: The Crucifixion, Harry Anderson i mekim
-
Ofa bilong Jisas i blesim yumi olsem wanem? Helpim ol pikinini bilong yu painim ol toktok i bekim dispela askim long Aisaia 53:4–12; Alma 7:11–13; na Doktrin na ol Kavanen 19:16–19. Toktok namel long yupela long yupela pilim olsem wanem long Jisas Krais bihain long yupela i ritim ol dispela ves.
Jisas Krais i bin kirap bek bilong mi.
-
Yu ken yusim ektiviti pes bilong dispela wik o ol narapela piksa insait long dispela ol toktok long tokim ol pikinini bilong yu stori bilong Kirap Bek bilong Jisas (lukim tu “Jesus Is Risen,” in New Testament Stories, 139–44). Bihain larim ol pikinini bilong yu stori long yu.
-
Skelim wanem rot yu bai helpim ol pikinini bilong yu long painim amamas long Krais long dispela ista. Kain olsem, yupela ken singim wanpela song bilong Ista yupela save laikim tru, olsem “Christ the Lord Is Risen Today” (Hymns, no. 200) o “Gethsemane” (Gospel Library). Long painim ol narapela singsing i toktok long Kirap Bek bilong Jisas, yu ken lukim ol lista i stap long Hymns na Children’s Songbook. Yu wantaim ol pikinini bilong yu ken toktok namel long yupela wanem as yupela save laikim tru ol dispela song, na yupela i save pilim olsem wanem taim yupela i singim ol. Ol dispela song i skulim yumi wanem samting long Papa long Heven na Jisas Krais?
Ol pikinini i ken pilim Spirit tasol yu mas helpim ol long luksave long wok bilong Spirit. “Skulim ol pikinini long ol kainkain rot Spirit i save toktok wantaim yumi. Helpim ol long luksave long nek bilong Em taim Em toktok long ol. Dispela bai kamapim pasin bilong kisim na bihainim revelesen i kamap long ol yet olgeta taim laip bilong ol (Teaching in the Savior’s Way, 32). Kain olsem, taim yu singim ol song i toktok long Jisas Krais wantaim ol pikinini bilong yu, lukluk long ol piksa bilong Em, o ritim ol stori bilong Em, toktok namel long yupela ol samting yupela pilim long spirit bilong yupela.
-
Gospel Library i gat ol Easter videos we ol pikinini bilong yu bai laik long lukim. Ating yu ken larim ol lukim wanpela. Askim ol, ol lainim wanem samting long Jisas Krais insait long dispela vidio. Askim ol long tok sotpela stori long wanem samting dispela vidio i toktok long en.
Ol profet i save tokaut long Jisas Krais na Pen em karim long Baim Bek yumi long sin.
-
Taim yu wantaim ol pikinini bilong yu lukim jenerol konferens long dispela Ista, helpim ol long luksave taim ol spesol mausman bilong Jisas Krais i tokaut long Kirap Bek bilong Em. Ating yupela i ken pilai olsem—askim ol long sanap taim ol harim ol tok olsem Easter o Atonement o Resurrection. Toktok namel long yupela bilong wanem na yupela i belgut long ol testimoni bilong ol profet bilong nau long Jisas Krais.
Long kisim sampela moa tingting, lukim Friend piksa buk bilong dispela mun.