“Epril 20–26. ‘Mipela bai Bihainim Stret Olgeta Tok bilong Bikpela’: Kisim Bek 19–20; 24; 31–34,” Kam, Bihainim Mi—Bilong Haus na Sios: Olpela Testamen 2026 (2026)
“Epril 20–26. ‘Mipela bai Bihainim Stret Olgeta Tok bilong Bikpela,’” Kam, Bihainim Mi: Olpela Testamen 2026
Moses and the Tablets, Jerry Harston i mekim (detail)
Epril 20–26: “Mipela bai Bihainim Stret Olgeta Tok bilong Bikpela”
Kisim Bek 19–20; 24; 31–34
Ol pikinini bilong Israel i bin toktok planti na gat tupela tingting long bipo, tasol taim Moses ritim lo i go long ol aninit long Maunten Sainai, ol i mekim promis olsem: “Mipela bai bihainim stret olgeta tok bilong Bikpela” (Kisim Bek 24:7). God singautim Moses go antap long maunten na Em i tokim Moses long sanapim wanpela haus sel bilong lotu, bai “mi ken i stap namel long ol” (Kisim Bek 25:8).
Tasol taim Moses i stap antap long maunten long save long wanem rot bai God i ken stap namel long ol lain bilong Israel, ol Israel aninit long maunten i wok long mekim wanpela piksa bilong bulmakau wantaim gol long lotuim. Bihain long ol promis long “noken bihainim ol giaman god,” “kwiktaim tru ol lusim” tingting long promis bilong ol (Kisim Bek 20:3; 32:8; lukim tu Kisim Bek 24:3). Em wanpela samting bilong kirap nogut long en, tasol yumi save olsem sampela taim pasin bilong les long weit, bel hevi, na tupela tingting i save karamapim bilip na pasin bilong mekim wok. Taim yumi laikim Bikpela long stap wantaim yumi, em i gutpela long save olsem Bikpela i no givim baksait long ol Israel long bipo na em bai i no inap givim baksait long yumi na husat yumi laikim tu—long wanem, Em “as bilong marimari na sori. [Em] i no save belhat kwik. [Em] save laikim tru olgeta manmeri, na [Em] save bihainim olgeta tok bilong [Em]” (Kisim Bek 34:6).
Ol Sampela Tingting bilong Lainim long Haus na long Sios
Kisim Bek 19:3–6
Bikpela i save laikim tumas ol manmeri husat i mekim kontrak wantaim Em.
Presiden Russell M. Nelson i skulim yumi olsem: “Insait long Olpela Testamen, tokples Hibru bilong dispela tok bilong mi wanpela em segullah. As bilong dispela tok em ‘samting bilong wanpela we i dia tumas.’ … Long ol wokman bilong God i luksave long yumi olsem ol manmeri bilong em wanpela em wanpela bikpela samting tru” (“Children of the Covenant,” Ensign, Mei 1995, 34). Toktok bilong Presiden Nelson i helpim yu klia gut moa long tok insait long Kisim Bek 19:3–6 olsem wanem? Bikpela i soim yu olsem yu dia tumas long Em olsem wanem?
Kisim Bek 19:10–11, 17
Yu mas redim yu yet long lukim na kisim ol samting i holi.
Bikpela i tokim Moses olsem ol lsrael i mas redim ol yet pastaim na ol i ken “bung wantaim God” (Kisim Bek 19:10–11, 17) na holimpasim kontrak bilong Em (lukim Kisim Bek 19:5). Yu bai redim yu yet long lukim ol samting bilong spirit olsem wanem? Kain olsem long taim yu laik kisim sakramen o mekim wok insait long tempel. Yu bai helpim ol narapela long redim ol yet olsem wanem? Yu lainim wanem samting long pasin bilong redim yu yet, long Luk 6:12–13; Inos 1:2–6; Alma 17:2–3?
Ol i save ting olsem dispela maunten long kantri Isip em Maunten Sainai.
Kisim Bek 20:1–17
God bai blesim mi sapos mi harim na bihainim ol lo bilong Em.
Taim ol Israel i bung aninit long Maunten Sainai, ol harim nek bilong God i givim ol Tenpela Lo bilong Em (lukim Lo 4:12–13). I gat planti moa lo bilong God insait long tok bilong Em. I no dispela 10-pela tasol. Olsem na taim yu ritim Kisim Bek 20:1–17, askim yu yet bilong wanem na God toktok strong long dispela 10-pela moa long ol narapela. Yu ken mekim dispela kain lista bilong skelim wanem as na dispela Tenpela Lo i bikpela samting long yu:
|
Lo |
Bikpela i askim mi long mekim wanem samting? |
Bai mi kisim wanem ol blesing sapos mi bihainim dispela lo? |
|---|---|---|
-
Taim yu bihainim dispela Tenpela Lo, em i helpim yu long bihainim dispela tupela bikpela lo Jisas givim, long Matyu 22:34–40, olsem wanem?
-
Wanem sampela samting bai traim yu long putim em go paslain abrusim God? Taim yu save putim God go pas, wanem ol blesing yu save lukim?
-
Yu bai bekim tok bilong wanpela husat i tok dispela Tenpela Lo em bilong bipo na i no samting bilong yumi bihainim long nau olsem wanem? Taim yu bekim tok bilong em, yu bai toktok long wanem sampela samting i kamap long laip bilong yu taim yu bihainim dispela Tenpela Lo? Dispela song “How Gentle God’s Commands” (Hymns, no. 125) bai helpim yu long mekim tok klia long ol lo bilong God long ol narapela olsem wanem?
-
Bikpela i inapim dispela promis long Kisim Bek 20:6 insait long laip bilong yu olsem wanem?
Lukim tu “The Great Commandment—Love the Lord,” insait long Teachings of Presidents of the Church: Ezra Taft Benson (2014), 37–45; Dallin H. Oaks, “No Other Gods,” Liahona, Nov. 2013, 72–75; Topics and Questions, “Commandments,” Gospel Library.
Kisim Bek 24:1–11
Taim mi mekim ol kontrak wantaim God, mi soim olsem mi laik tru long bihainim lo bilong Em.
Taim yu ritim Kisim Bek 24:3–8, tingim ol kontrak yu mekim wantaim God. Taim ol kontrak bilong Israel i kam wantaim sampela wok bilong mekim we i no wankain olsem samting God i laikim yumi mekim long nau, yu ken luksave olsem ol i wankain liklik. Kain olsem, ves 4, 5, na 8 i toktok long alta, ofa bilong animal, na blut. Ol dispela samting i makim wanem ol samting, na ol i wankain long ol samting long kontrak yu mekim olsem wanem?
Kisim Bek 32–34
Taim mi mekim sin, mi givim baksait long God; taim mi tanim bel, mi go bek ken long God na mi givim baksait long pasin nogut.
Traim putim yu yet long ples bilong ol Israel—yu stap long ples drai, Moses i lusim yupela inap long 40-pela dei, na bihain bai yupela pait wantaim ol Kenan long kisim graun God promis long givim yupela (lukim Kisim Bek 32:1–8). Bilong wanem yu ting ol Israel laikim wanpela piksa ol i mekim long gol bilong lotuim? Taim yu ritim krai bilong Moses i go long Bikpela long Kisim Bek 33:11–17, wanem samting i kirapim bel bilong yu?
Asua bilong ol Israel i bikpela tru, tasol dispela stori i tokaut tu long marimari bilong God, long lusim sin bilong ol. Kisim Bek 34:1–10 i skulim yu wanem samting long Jisas Krais? (lukim Kisim Bek 32:30–32; Mosaia 14:4–8; 15:9; Doktrin na ol Kavanen 45:3–5).
Kisim Bek 31:12–16
De Sabat em i wanpela mak.
Presiden Russell M. Nelson i tok klia olsem: “Taim mi yangpela man yet, mi bin ritim wok bilong sampela husat i mekim lista bilong ol samting yu ken mekim na ol samting yu mas noken mekim long de Sabat. Bihain tok bilong God i lainim mi olsem pasin na tingting bilong mi long de Sabat i kamapim wanpela mak namel long mi na Papa long Heven [lukim Kisim Bek 31:13; Esekiel 20:12, 20]. Taim mi save gut long dispela, mi no nidim moa lista bilong ol samting mi ken mekim na ol samting mi noken mekim. Taim mi tingting sapos samting mi laik mekim i orait o nogat long mekim long de Sabat, mi save askim mi yet, ‘Wanem mak bai mi givim go long God?’ Dispela askim i save stiaim mi long wanem samting mi mas mekim long de Sabat” (“The Sabbath Is a Delight,” Liahona, Mei 2015, 130). Yu skelim wanem mak bai yu givim long God long taim bilong Sabat.
Kisim Bek 34:1–4
Wanem samting i narakain namel long tupela ston Moses i katim bilong God raitim lo antap?
Taim Moses kam daun long maunten, em kisim kam ol dispela ston God i raitim ol lo antap long en. Bihain long em painimaut olsem ol Israel i no bihainim kontrak bilong ol wantaim God, Moses i brukim ston lo i stap antap long en (lukim Kisim Bek 31:18; 32:19). Bihain, God tokim Moses long katim narapela ston gen na karim go bek antap long maunten (lukim Kisim Bek 34:1–4). Joseph Smith Translation of Exodus 34:1–2 (insait long Bible appendix) i tok klia olsem antap long ston Moses i katim pastaim i gat ol bikpela wok bilong Prishud bilong Melkisedek. Long ston Moses i katim namba tu taim, i gat ol “lo bilong ol samting bilong bodi.” Dispela em i no ol bikpela lo, na husat i gat “prishud i no bikpela” tasol i ken go pas long ol (lukim Doktrin na ol Kavanen 84:17–27). Dispela i kamap bilong redim ol Israel long kisim ol bikpela lo na bikpela prishud, na dispela i ken larim ol go long ples bilong God.
Long kisim sampela moa tingting, lukim Liahona na For the Strength of Youth megesin bilong dispela mun.
Ol Sampela Tingting bilong Lainim ol Pikinini
Kisim Bek 20:3–17
God i givim mi ol lo, long wanem, Em laik mi mas amamas.
-
Yu bai lainim ol pikinini bilong yu long ol Tenpela Lo, long rot bilong pilai olsem wanem? Taim yupela ritim Kisim Bek 20:3–17 wantaim, larim ol pikinini bilong yu helpim yu long painim, o droim piksa bilong makim wan wan bilong ol Tenpela Lo. Bihain wan wan bilong ol pikinini bilong yu ken makim wanpela piksa na toktok long wanem rot ol bai bihainim dispela lo. Toktok namel long yupela long taim yu bihainim dispela lo, em bai mekim yu amamas olsem wanem.
-
Yupela ken singim tu wanpela song olsem “Keep the Commandments” (Children’s Songbook, 146–47). Helpim ol pikinini bilong yu painim ol sampela hap toktok insait long dispela singsing we i skulim ol bilong wanem na God i laik bai yumi bihainim ol lo bilong Em.
Taim ol pikinini i toktok long ol samting bilong spirit, testimoni bilong ol bai kamap bikpela. Ol samting yu askim i ken helpim ol pikinini bilong yu long toktok long wanem samting ol pilim lomg Jisas Krais, na taim ol stap insait long gutnius, dispela i blesim ol olsem wanem? (lukim Teaching in the Savior’s Way, 32) Taim ol mekim olsem, ol i tokaut long testimoni bilong ol. Skelim wanem rot yupela ken mekim dispela taim yupela toktok long ol blesing yu bai kisim taim yu bihainim Tenpela Lo bilong God.
Kisim Bek 20:12
Bikpela i laikim mi long stap aninit long papamama bilong mi.
-
Helpim ol pikinini bilong yu lainim dispela tok “Yupela i mas stap aninit long papamama bilong yupela na bihainim tok bilong ol” (Kisim Bek 20:12). Yu ken tok klia olsem long stap “aninit” long wanpela, em yu rispektim em o mekim em amamas. Jisas i mekim wanem long stap aninit long mama bilong Em long dispela graun na Papa bilong Em long heven? (lukim Luk 2:48–51; Jon 19:26–27). Ating ol pikinini bilong yu ken mekim drama bilong ol samting ol i ken mekim long stap aninit long papamama bilong ol, na ol narapela pikinini i ken ges long wanem ol i mekim.
Kisim Bek 31:13, 16–17
Taim mi tingim de Sabat, mi soim olsem mi laikim tru Bikpela.
-
Ol pikinini bilong yu ken lukluk long ol sampela ol mak—kain olsem ol mak long rot o long ol haus. Wanem wok bilong ol mak? Ol pikinini bilong yu ken painim dispela tok “mak” insait long Kisim Bek 31:13, 16–17. Bikpela i tok wanem samting em stap olsem mak namel long Em na yumi? Toktok namel long yupela long sampela rot yu na famili bilong yu i save laikim bilong yupela long Bikpela long de Sabat.
Piksa bilong Moses i holim dispela Tenpela Lo, Sam Lawlor i mekim (detail)
Kisim Bek 32:1–8, 19–24; 34:6–7
Mi no inap “givim baksait” long pasin God laikim mi long bihainim.
-
Yu ken yusim “Moses on Mount Sinai” (insait long Old Testament Stories, 77–82) long helpim ol pikinini bilong yu save gut long stori insait long Kisim Bek 32:1–8, 19–24. Bilong wanem na em wanpela bikpela asua, taim ol Israel lotuim piksa bilong bulmakau na i no lotuim God?
2:55Moses on Mount Sinai
-
Yupela ken mekim dispela pilai long soim tok i stap long Kisim Bek 32:8: “Kwiktaim tru ol i lusim rot mi bin tokim ol long bihainim.” Yupela ken mekim wanpela rot long flo bilong haus (o painim wanpela rot arere long haus bilong yu). Taim ol wokabaut long dispela rot, ol pikinini bilong yu ken toktok long ol traim i save kamap long yumi long rausim yumi go longwe long God. Wanem samting i save helpim yumi stap long rot bilong God—na kam bek long em taim yumi lusim dispela rot na go nabaut? (lukim Kisim Bek 34:6–7).
Long kisim sampela moa tingting, lukim Friend piksa buk bilong dispela mun.