“Epril 13–19. ‘Sanap Strong Na Nau Bai Yupela i Lukim Olgeta Samting Bikpela i laik Mekim bilong Helpim Yupela: Kisim Bek 14–18,” Kam, Bihainim Mi—Bilong Haus na Sios: Olpela Testamen 2026 (2026)
“Epril 13–19. ‘Sanap Strong Na Nau Bai Yupela i Lukim Olgeta Samting Bikpela i laik Mekim bilong Helpim Yupela,’” Kam, Bihainim Mi: Olpela Testamen 2026
Epril 13–19: “Sanap Strong Na Nau Bai Yupela i Lukim Olgeta Samting Bikpela i laik Mekim bilong Helpim Yupela”
Kisim Bek 14–18
Ol Israel i hat long go het. Ret Si i pasim rot bilong ol, na ol soldia bilong kantri Isip i bihainim long baksait. Ating ranawei bilong ol kamaut long Isip bai kam inap olsem. Tasol God i tokim ol Israel Em laikim ol tingim olgeta taim olsem: “Maski pret. … Bikpela bai i pait bilong helpim yupela” (Kisim Bek 14:13–14).
Long dispela taim kam inap nau, ol manmeri bilong God i save tok dispela stori taim ol laik kisim strong na bilip moa. Taim Nifai i laik strongim ol brata bilong em, em tok, “Yumi mas sanap strong olsem Moses. Tru tumas, em i toktok na wara bilong Ret Si i buruk long namel, na ol tumbuna bilong yumi i wokabaut long graun i drai long ranawei long kalabus” (1 Nifai 4:2). Taim King Limhai laik ol manmeri bilong em husat i stap long kalabus long “hapim het bilong [ol] na amamas,” em tokim ol long dispela stori tu (Mosaia 7:19). Alma tu i toktok long dispela stori taim em laik tokaut long strong bilong God long pikinini man bilong em (lukim Alma 36:28). Na taim yumi pilim olsem yumi hat long go het—taim yumi nidim moa bilip long “lukim olgeta samting Bikpela i laik mekim bilong helpim [yumi]”—yumi ken tingim wanem rot “Bikpela i kisim bek ol Israel” (Kisim Bek 14:13, 30)
Ol Sampela Tingting bilong Lainim long Haus na long Sios
Kisim Bek 14; Kisim Bek 15:1–21
Bikpela i ken mekim wanpela “bikpela wok” insait long laip bilong mi.
Taim yu ritim Kisim Bek 14:1–10, skelim ol Israel bai pilim olsem wanem taim ol lukim ol soldia bilong king bilong Isip kam klostu long hap ol i stap. Ating yu pilim olsem yu nidim wanpela mirakel long helpim yu stap strong long taim bilong bikpela hevi. Yu painim wanem insait long Kisim Bek 14:13–31, we i kirapim bel bilong yu long painim strong bilong God insait long laip bilong yu? Skelim wanem rot yu lukim strong bilong Em long bipo. Yu lainim wanem long Em, taim yu tingim ol dispela samting i kamap long yu?
Kisim Bek 15:1–19 em wanpela song bilong litimapim God ol Israel i singim bihain long Em brukim Ret Si long namel. Wanem ol sampela hap tok insait long dispela song i helpim yu? Ating i gat wanpela song yu laik long singim taim God i mekim wanpela bikpela samting long yu, kain olsem “Redeemer of Israel” (Hymns, no. 6). Yu ken singim o harim dispela song insait long lotu bilong yu long nau.
Lukim tu Doktrin na ol Kavanen 8:2–3.
Kisim Bek 15:22–27; 16:1–15; 17:1–7
Bikpela ken mekim ol samting nogut i kamap gutpela.
Taim yu ritim stori bilong wokabaut bilong ol Israel, dispela i ken mekim yu tingim ol samting insait long laip bilong yu we i “pait” olsem wara bilong Mara (lukim Kisim Bek 15:23–27). Bikpela i mekim ol samting nogut insait long laip bilong yu kamap gutpela olsem wanem? Ol dispela samting i stretim laip bilong yu olsem wanem?
Yu bai lukim ol samting nogut i kamap long ol Israel long Kisim Bek 16 na 17. Bai yumi laik tru long mekim sampela toktok long toktok planti na kros bilong ol, tasol taim yumi ritim, skelim sapos yu mekim wankain pasin olsem ol. Yu lainim wanem long ol samting i kamap long ol Israel, we i ken helpim yu long lusim pasin bilong toktok planti na kros, na bilip moa long God? Ol dispela ves i skulim yu wanem samting long God?
Lukim tu 1 Nifai 2:11–12.
Ol Israelites bugim manna. Piksa bilong bipo tru, Trnava (detail)
Kisim Bek 16
Bikpela i save givim kaikai bilong strongim spirit bilong mi olgeta dei.
Yumi olgeta i save kaikai. Olsem na Bikpela i save toktok long ol samting bilong spirit olsem ol kaikai. Painim sampela samting Bikpela i skulim ol Israel taim em givim ol mana, long Kisim Bek 16. Kain olsem, yu painim wanem samting long ol toktok bilong Bikpela, long Kisim Bek 16:16, 19, 22–26 we i toktok long givim kaikai na strongim spirit bilong yumi?
Long painim sampela ol samting Bikpela i laikim yu long lainim insait long dispela mirakel, skelim ol dispela askim:
-
Bikpela i save givim mi wanem samting, olsem mana em i givim long ol Israel?
-
Wanem samting bai mi ken mekim, we i wankain olsem mi bungim mana?
Yu ken kisim moa tingting long ol dispela vidio: “Daily Bread: Pattern,” “Daily Bread: Experience,” na “Daily Bread: Change” (Gospel Library).
Daily Bread: Pattern
Daily Bread: Experience
Daily Bread: Change
Wanem ol narapela samting yu save mekim olgeta de? (Wankain olsem yu save kaikai olgeta dei) Bilong wanem na yu mas mekim sampela samting olgeta dei bai ol i ken karim kaikai? Bel bilong yu i kirap long mekim wanem, long kisim ol gutpela samting bilong spirit olgeta de?
Lukim tu Dieter F. Uchtdorf, “Daily Restoration,” Liahona, Nov. 2021, 77–79; “Daily Restoration” (vidio), Gospel Library.
Daily Restoration
Kisim Bek 17:1–7
Jisas Krais em ston bilong banisim sol bilong mi, na em dispela wara i gat laip.
Tingting long Jisas Krais taim yu ritim Kisim Bek 17:1–7. Jisas Krais i olsem ston olsem wanem? (lukim Buk Song 62:6–7; Hilaman 5:12). Em i olsem wara olsem wanem? (lukim John 4:10–14; 1 Korin 10:1–4; 1 Nifai 11:25).
Painim ol samting we i tokaut long Krais. Taim tok bilong God i toktok long ol mak na sain bilong Krais, olsem long Kisim Bek 17:1–7, ating yu ken yusim wanpela samting long soim as bilong dispela tok. Taim yu lukluk long, o holim wanpela ston o wara, dispela i ken mekim yu save gut long wanem rot ol dispela samting i olsem Jisas Krais. Sapos yu ken luksave long planti samting, em i ken helpim yu moa.
Kisim Bek 17:8–16; 18:13–26
Ol disaipel i save helpim ol yet “karim hevi” bilong mekim wok bilong God.
Ating i gat ol taim insait long laip bilong yu we yu pilim wankain olsem Moses—taim ol narapela lukluk long yu long mekim wok, tasol “han bilong [yu] i tait” (Kisim Bek 17:12). Ating sampela taim, yu bai pilim olsem pasin bilong yu i olsem Aron, Hur, Jetro, husat i helpim Moses. Taim yu ritim Kisim Bek 17:8–16; 18:13–26, tingim olsem yu dispela 3-pela man na lukim wanem samting Bikpela i skulim yu long wok bilong Em.
Lukim tu Mosaia 4:27; 18:8–9.
Long kisim sampela moa tingting, lukim Liahona na For the Strength of Youth megesin bilong dispela mun.
Ol Sampela Tingting bilong Lainim ol Pikinini
Kisim Bek 14:5–22
Bikpela i ken mekim wanpela “bikpela wok” insait long laip bilong mi.
-
Taim Bikpela i brukim Ret Si i go tupela hap na ol Israel i lukim strong bilong Em. Larim ol pikinini bilong yu tingim wanpela rot bilong mekim drama bilong stori insait long Kisim Bek 14:5–22 (lukim tu “The Passover” insait long Old Testament Stories, 70–74). Ating yupela i ken sanapim ol sia o ol blanket na “tilim igo tupela hap” olsem Ret Si. Bihain, yupela ken toktok namel long yupela wanem rot yupela i lukim strong bilong God insait long laip bilong yupela.
2:54The Passover
-
Wanem samting insait long Doktrin na ol Kavanen 8;2–3 i mekim yumi klia moa long stori long Kisim Bek 14? Ating yu ken tokim ol pikinini bilong yu long wanpela taim Holi Spirit tokim yu wanpela samting insait long bel o tingting bilong yu, na askim ol long toktok tu long wankain samting i kamap long ol. Yupela ken singim wanpela song we i toktok long Holi Spirit, kain olsem “Let the Holy Spirit Guide” (Hymns, no. 143).
Kisim Bek 15:22–25
Bikpela ken mekim ol samting nogut i kamap gutpela.
-
Taim yupela ritim Kisim Bek 15:22–25 wantaim, yu wantaim ol pikinini bilong yu ken dringim wanpela samting i swit na wanpela samting i pait. Jisas Krais i mekim ol samting i “pait” insait long laip bilong yu kamap “swit” olsem wanem?
Kisim Bek 15:23–25; 16:14–15; 17:1–6
Jisas em Wara i gat Laip, Bret bilong Laip, na Ston bilong mi
-
Taim yu wantaim ol pikinini bilong yu ritim Kisim Bek 15:23–25; 16:14–15; 17:1–6, larim ol painim ol sampela samting long helpim long save long dispela ol stori—kain olsem wanpela han bilong diwai (long mekim orait wara long ples Mara), wanpela pot (bilong pulmapim wantaim mana), na wanpela ston (bilong wara long maunten Horep). Ol dispela stori i mekim yumi tingim wanem samting, long ol samting Jisas Krais i save mekim bilong yumi? Taim yupela i toktok, yupela ken ritim tu Matyu 7:24–27; Jon 4:10–14; 6:29–35, 48–51; Hilaman 5:12; Doktrin na ol Kavanen 20:77, 79.
Wanpela bifo long God, Joseph Brickey i mekim (detail)
Kisim Bek 17:8–16; 18:13–26
Mi ken helpim long “karim hevi” bilong mekim wok bilong God.
-
Taim yu ritim Kisim Bek 17:8– 16, yu ken askim wanpela pikinini long apim tupela han bilong em go antap. Taim han bilong em i tait, ol narapela pikinini ken helpim em long wankain rot Aron na Hur i helpim Moses. Dispela stori i skulim yu wanem samting, long yumi ken helpim kingdom bilong God antap long dispela graun kamap bikpela olsem wanem? Yupela ken ritim tu Kisim Bek 18:13–26 na toktok long ol bikpela wok bilong ol lain insait long wod bilong yu. Yumi ken mekim wanem samting long helpim ol hetman bilong Sios, kain olsem Aron na Hur i helpim profet Moses?
Long kisim sampela moa tingting, lukim Friend piksa buk bilong dispela mun.