Ol Lain bilong Israel

Sampela hap insait long graun bilong ol Kenan, Jekop i weit long bungim brata bilong em, Iso. Laspela taim Jekop i lukim Iso em long 20-pela yia i go pinis. Long dispela taim Iso i laik kilim Jekop. Jekop i pait inap long moning, long wanem, em laik kisim blesing long God. Jekop i gat bikpela bilip, strong, na bikpela laik long kisim, olsem na God i ansarim beten bilong em. Long dispela nait, nem bilong Jekop i senis go Israel. As bilong dispela nem em “em i strong wantaim God” (Stat 32:28, liklik toktok b).

Em nambawan taim tru dispela nem Israel i kamap long Buk Baibel, na dispela em wanpela nem we i stap strong insait long Baibel na long histri. Bihaintaim, ol i no kolim wanpela man tasol long dispela nem. Israel i gat 12-pela pikinini, na ol i kolim lain tumbuna bilong ol “ol lain bilong Israel,” “ol lain famili bilong Israel,” o ol “pikinini bilong Israel.”

Ol pikinini bilong Israel i save holim pas dispela blut bilong ol olsem ol kamap long wanpela bilong 12-pela lain bilong Israel. Dispela em bikpela samting long ol, long nem na kontrak bilong ol i bin mekim wantaim God. Aposel Pol i tokaut olsem em bilong “lain bilong Benjamin” (Rom 11:1). Wanpela as bilong Lihai i salim ol pikinini bilong em go bek long Jerusalem long kisim ol plet bras em i olsem, ol plet bras i gat “stori bilong famili bilong ol tumbuna papa bilong em” (1 Nifai 5:14). Lihai i painimaut olsem em kamap long lain bilong Josep. Ol pikinini bilong em i luksave olsem ol lain bilong Israel, na dispela em bikpela samting long ol, long ol yia i kam bihain.

Insait long Sios, yumi save harim ol tok olsem “wok bilong bungim ol manmeri bilong Israel.” Yumi save singim ol dispela song, “Redeemer of Israel,” “Hope of Israel,” na “Ye Elders of Israel.” Insait long ol dispela, yumi ino singsing long kingdom bilong Israel bilong bipo, o kantri Israel bilong nau. Tasol yumi wok long toktok long ol manmeri bilong olgeta kantri bilong graun husat i bung insait long Sios bilong Jisas Krais. Yumi i wok long toktok long ol manmeri husat i save stap strong wantaim God, husat i laik tru long kisim blesing bilong Em, na husat i kisim baptais na kamap manmeri husat i mekim kontrak wantaim Em. Presiden Russell M. Nelson i tok olsem, taim yumi stap olsem Israel, em i olsem yumi mas “larim God stap strong long laip bilong yumi, … larim God stap nambawan long laip bilong yumi.”

Patriakol blesing bilong yu i tokaut long yu, yu bilong wanem lain bilong Israel. Dispela em antap moa long wanpela naispela stori bilong famili. Dispela em samting bilong stap bilong yu nau na bihaintaim. Taim yu stap olsem lain bilong Israel, yu mekim kontrak wantaim Papa God na Jisas Krais, na yu stap wantaim tupela. As bilong dispela em yu, olsem Abraham, i mas stap olsem “blesing” long ol pikinini bilong God (Stat 12:2; Abraham 2:9–11). As bilong dispela tu i olsem, olsem Pita i tok, “God i makim yupela pinis, na yupela i stap lain manmeri bilong em stret. Yupela i stap ol pris bilong lain bilong king. Yupela i stap lain manmeri i holi, em ol lain manmeri tru bilong God. Yupela i stap lain manmeri God i makim bilong em yet, bai yupela i ken tokaut long olgeta gutpela pasin em bin mekim long yupela. Yupela i ken tokaut long em i bin singautim yupela long lusim tudak yupela i bin stap long en, na em i bringim yupela i kam insait long lait bilong em, em lait i gutpela moa yet.” (1 Pita 2:9). Yu mas “larim God go pas”—na yu mas “stap strong wantaim God” taim yu bihainim kontrak yu mekim wantaim Em.