“Mas 2–8. ‘God i mas Stap Bikpela’,” Kam, Bihainim Mi—Bilong Haus na Sios: Olpela Testamen 2026 (2026)
“Mas 2–8. ‘God i mas Stap Bikpela’,” Kam, Bihainim Mi: 2026
Esau Sells His Birthright, Glen S. Hopkinson i mekim
Mas 2–8: “God i mas Stap Bikpela”
Stat 24–33
Yu bai kisim blesing i kam long God olsem wanem? Ating yu ken tok olsem stori bilong Jekop, husat em tumbuna pikinini bilong Abraham na Sara, em stori bilong wanpela man husat i painimaut ansa bilong dispela askim. Insait long wanpela kastom we namba wan pikinini man i save kisim namba na blesing, Jekop i kamap namba tu, na em holim lek bilong bikpela brata bilong em Iso. As bilong dispela nem “Jekop” em “man bilong kisim ples bilong narapela.” Planti taim, Jekop i traim long kisim namba bilong namba wan pikinini man long Iso, long wanem, Iso i no bin bihainim stretpela pasin (lukim Stat 25:30–34; 26:34–35; 27:36). Dispela i kirapim koros insait long famili, na Jekop i ranawei go hait long ples i nogat man long en.
Planti yia kam go na God tokim Jekop long go bek long ples bilong em. Namel long rot bilong go bek long ples bilong em, Jekop, wantaim daunpasin, askim God long givim blesing long em. Buk Baibel i stori olsem Jekop i “pait” long dispela taim, na em tok olsem em bai i no inap pinis long pait, inap “[yu] givim mi blesing pastaim” (Stat 32:26). Bihain, samting bilong skulim em, na blesing bilong em i kam. God senisim nem bilong Jekop i go Israel—as bilong dispela nem em “larim God i stap Bikpela.” Israel i lainim olsem sapos em laik kisim bikpela blesing bilong God, em i no nid long kisim ples bilong narapela. Dispela ol blesing em ol blesing bilong kontrak em mekim wantaim God. Blesing bilong God em i no bilong baim, winim, o kisim long narapela. Em save givim nating tru long husat i save karim nem bilong Israel—em ol manmeri husat i save larim God stap bikpela long laip bilong ol.
Ol Sampela Tingting bilong Lainim long Haus na long Sios
Stat 24
Marit insait long kontrak em bikpela samting long plen bilong God.
Taim yu ritim Stat 24, askim yu yet bilong wanem na Abraham i skelim olsem marit bilong pikinini bilong em Aisak i bikpela samting. Bilong wanem na marit em bikpela samting long ai bilong God?
Wanem ol gutpela pasin bilong Rebeka i save strongim marit na famili? (lukim long ves 15–28, 57–61).
Lukim tu Topics and Questions, “Marriage,” Gospel Library.
Stat 25:29–34
Ol samting bilong oltaim ken stap dia long mi, antap long ol samting bilong dispela graun.
Long kastom bilong Aisak na Rebeka, namba wan pikinini man i gat namba, na em bai kisim planti samting long papa bilong em, na tu, em i gat bikpela wok bilong lukautim famili bilong em. Taim yu ritim Stat 25:29–34, skelim wanem as na Iso i givim dispela namba bilong em i go, long kisim wanpela plet kaikai. Wanem sampela samting insait long dispela stori i skulim yu? Yu ken raitim go daun olsem lista: (1) ol blesing bilong oltaim God laik givim yu na (2) ol samting bilong graun bilong pulim tingting bilong yu. Bihain, yu ken ritim dispela ves, na putim “namba bilong namba wan pikinini” wantaim wanpela samting long namba wan lista na “plet sup” wantaim wanpela samting long namba tu lista. Yu bai lukluk long Jisas Krais na ol oltaim blesing bilong gutnius bilong Em olsem wanem?
Lukim tu Matyu 6:19–23; M. Russell Ballard, “Remember What Matters Most,” Liahona, Mei 2023, 105–7.
Jacob at Bethel, James Smetham i mekim
Stat 3
Ol kontrak mi mekim insait long haus bilong Bikpela i save bringim strong bilong God kam insait long laip bilong mi.
Taim Jekop putim het antap long ston olsem pilo na slip, em lukim wanpela driman we i senisim laip bilong em. Dispela em wanpela samting holi tru, olsem na Jekop i kolim nem bilong dispela ples olsem Betel, o “haus bilong God,” na Jekop i tokaut olsem “Tru tumas [Bikpela] i stap [long dispela ples]” (Stat 28:16).
Taim yu ritim Stat 28, yu ken askim yu yet bilong wanem na dispela samting i kamap i holi tru long Jekop. Wanem ol hevi, o sampela samting i wok long kamap long em long dispela taim? Em i pilim olsem wanem taim em lukim ol dispela? Yu ken painim ol sampela hap tok insait long ves 10–22 we i mekim yu tingim haus bilong Bikpela. Yu kisim wanem kain tingting, long God, haus bilong Em, na kontrak bilong Em?
Long pinis bilong dispela ol toktok i gat wanpela piksa i soim driman bilong Jekop; yu ken lukluk long em taim yu rit. Sapos yu yet laik droim piksa bilong driman bilong Jekop, bai yu mekim olsem wanem? Wanem ol tok tru insait long dispela stori bai yu soim insait long piksa yu droim?
Dispela singsing “Nearer, My God, to Thee” (Hymns, no. 100) i toktok long wanem samting i kamap long Jekop. Wanem ol samting i wankain long dispela song na Stat 28:10–22? Tempel i helpim yu long go klostu long God olsem wanem? Yu ken painim sampela ansa insait long toktok bilong Presiden Russell M. Nelson “The Temple and Your Spiritual Foundation” (Liahona, Nov. 2021, 93–96). Yu ken lukim ol kontrak na ol blesing bilong haus bilong Bikpela, log General Handbook, 27.2 (Gospel Library) Taim yu bihainim dispela ol kontrak, dispela bai bringim strong bilong God kam insait long laip bilong yu olsem wanem?
Opim tingting bilong yu. I gat planti rot bilong lainim ol samting insait long ol tok bilong God. I no bilong ritim tasol. Sampela lain i save droim piksa long helpim ol klia gut long ol stori stap insait long tok bilong God. Sampela lain i save kisim gutpela save bilong tok bilong God taim ol singim ol singsing i holi. Noken pasim yu yet long wanpela rot bilong lainim samting; yu ken traim kain kain rot.
Stat 29:31–35; 30:1–24
Bikpela i save tingim mi long taim bilong hevi.
Taim yu ritim Stat 29:31–35 na 30:1–24, painim ol tok we i soim marimari bilong God long Resel na Lea. Skelim ol rot God i “lukim pinis bel hevi bilong [yu]” na “tingting” long yu (Stat 29:32; 30:22).
Stat 32–33
Bikpela i ken oraitim famili bilong mi.
Taim Jekop go bek long Kenan, “em i pret moa yet, na em i bel hevi na tingting planti” sapos brata bilong em Iso bai bel gut long em o nogat (Stat 32:7). Taim yu ritim Stat 32–33, tingim stap bilong famili bilong yu—ating wanpela i no stap gut. Dispela stori i ken kirapim bel bilong yu long helpim narapela. Ol kain askim olsem ken stiaim yu taim yu rit:
-
Jekop i redim em yet olsem wanem taim em laik go bungim Iso?
-
Wanem samting insait long beten bilong Jekop i stap plesklia long yu, long Stat 32:9–12?
-
Yu lainim wanem samting long pasin bilong lusim rong bilong narapela, taim yu ritim wanem samting Iso i mekim?
-
Bikpela bai helpim yumi stretim stap bilong famili bilong yumi olsem wanem?
Long kisim sampela moa tingting, lukim Liahona na For the Strength of Youth megesin bilong dispela mun.
Ol Sampela Tingting bilong Lainim ol Pikinini
Stat 14:10–21
Mi ken mekim gut long ol narapela.
-
Long soim gutpela pasin Rebeka i soim, yu ken soim ol pikinini bilong yu piksa i stap aninit o ektiviti pes bilong dispela wik, taim yu stori long Stat 24:10–21. Ol pikinini bilong yu i ken mekim drama bilong dispela stori. Yupela i ken toktok tu long ol pasin bilong mekim gut long narapela yu wantaim ol pikinini bilong yu i lukim.
-
Yupela ken singim wanpela song i toktok long pasin bilong mekim gut long ol narapela, kain olsem “Kindness Begins with Me” (Children’s Songbook, 145). Ol pikinini bilong yu ken harim dispela tok “kindness” (o wanpela wankain tok) na sanap taim ol i harim. Yumi bai mekim gut long ol narapela olsem Rebeka olsem wanem?
Old Testament Heroes, Dilleen Marsh i mekim (detail)
Stat 25:21–34
Ol samting bilong oltaim i bikpela tumas long ol samting bilong dispela graun.
-
Yupela ken yusim “Jacob and Esau” (insait long Old Testament Stories, 38–41) long helpim ol pikinini bilong yu save gut long stori insait long Stat 25:21–34. Yu ken askim ol pikinini bilong yu long tingim olsem Iso i askim ol long tok stia bilong ol, sapos em bai givim namba bilong em olsem namba wan pikinini long kisim wanpela plet sup o nogat. Bai ol i tok wanem long em?
2:5Jacob and Esau
-
Wanem ol samting bilong stap oltaim i bikpela tumas long yu wantaim ol pikinini bilong yu? Ating ol pikinini bilong yu ken painim ol samting o ol piksa i makim ol dispela toktok. Bai yumi soim Bikpela olsem ol dispela samting i dia long yumi olsem wanem?
Stat 28:10–22
Ol kontrak i helpim mi long go bek long Papa long Heven.
-
Taim yupela ritim Stat 28:10–22 wantaim, yupela ken yusim wanpela lata (o wanpela piksa kain olsem long pinis bilong ol dispela toktok) long toktok long wanem rot ol kontrak bilong yumi i olsem wanpela lata. Ating ol pikinini bilong i ken pilai olsem ol i wok long go antap long wanpela lata, na taim ol kisim wanpela step, ol i ken toktok long ol taim yumi promis long harim na bihainim tok bilong Bikpela, kain olsem long taim yumi kisim baptais, kisim sakramen, o taim yumi go long tempel. Ol kontrak bilong yumi bai bringim yumi go klostu long God olsem wanem?
Stat 32:6–11; 33:1–4
Papa long Heven na Jisas Krais ken helpim mi laikim tru famili bilong mi.
-
Long statim ol dispela ves, yu ken stori gut olsem Jekop bai bungim Iso gen, bihain long planti yia tupela i gat koros long en. Ritim wantaim Stat 32:6–11. Jekop i pilim olsem wanem? Em mekim wanem long kisim helpim? Ritim wantaim Stat 33:1–4 long painimaut Bikpela i inapim beten bilong Jekop olsem wanem. Sapos Jekop na Iso ken toktok wantaim yumi long nau, yupela ting ol bai tok wanem long helpim yumi taim i gat koros namel long famili bilong yumi?
Long kisim sampela moa tingting, lukim Friend piksa buk bilong dispela mun.