Exodo 1–6

Unsa ang nagdani kanimo mahitungod sa mga babaye nga gihulagway diha sa Exodo 1–2? Giunsa nila pagtabang sa pagtuman ang plano sa Dios alang sa Iyang katawhan? Unsa ang gitudlo sa ilang mga paningkamot mahitungod sa serbisyo diha sa buluhaton sa Dios?

Sa dili pa ikaw magsugod sa pagbasa sa Exodo, mahimo kang maghunahuna mahitungod sa kalisod nga ikaw nagsinati—usa ka butang nga ikaw naglaom ang Ginoo moluwas kanimo. Unsa nga mga pulong ug mga hugpong sa mga pulong diha sa Exodo 1–3 ang sama og tunog ngadto sa espirituhanong pagkabihag o ubang mga butang nga atong giatubang karon? Tan-awa usab kon giunsa sa mga anak sa Israel pagpangita og kaluwasan ug giunsa sa Ginoo pagtubag (tan-awa, sama pananglit, ang Exodo 2:23–25; 3:7–8). Sa unsang paagi ang Ginoo “nanaog sa pagluwas” kanimo?

Sa tibuok basahon sa Exodo, mahimo usab nga ikaw makakita og pagkasusama tali ni Moises ug ni Jesukristo (tan-awa diha sa Deuteronomio 18:18–19; 1 Nephi 22:20–21). Sama pananglit, unsa nga mga pagkasusama ang imong makita tali sa Exodo 1:22; 2:1–10 ug Mateo 2:13–16? O tali sa Exodo 24:18 ug Mateo 4:1–2? Unsa ang imong gibati nga gusto sa Ginoo nga imong masabtan mahitungod sa Iyang Kaugalingon ug sa Iyang gahom?

Ikaw ba makahunahuna og panahon sa dihang usa ka butang nagpuno kanimo sa kakulba ug sa katingala? Giunsa nimo pag-atubang? Unsaon nimo paghulagway ang mga emosyon nga imong gibati?

Uban niana nga anaa sa hunahuna, basaha ang Exodo 3:1–6. Unsa ang nakapadani kanimo sa makadasig nga kasinatian ni Moises? Unsay gibuhat ni Moises sa pagpakita og balaang pagtahod alang sa Dios? Unsa nga mga koneksyon ang imong makita tali sa iyang mga lihok ug balaang pagtahod alang sa sagradong mga butang?

Ang pagbasa niini nga mga bersikulo mahimong mag-aghat kanimo sa paghunahuna mahitungod sa sagradong mga butang ug sagradong mga dapit sa imong kinabuhi. Nganong sagrado kini nganha kanimo? Usaon nimo kini pagtagad sa lahi nga paagi sa mga butang nga mga komon? Sa paggiya sa imong pagpamalandong, mahimo kang modangop ngadto sa seksiyon nga giulohan og “Naghinumdom sa mga Saad” sa mensahe ni Elder David A. Bednar “Bililhon ug Dagko Uyamot nga mga Saad” (Liahona, Nob. 2017, 91–93). Kamo mahimo usab nga manganta o maminaw ngadto sa usa ka himno nga nagdasig og kahingangha, sama sa “Ako Nagpabilin nga Natingala” (Mga Himno, nu. 114) ug pamalandonga kon unsa kining mahitungod sa ebanghelyo nga nakapatingala kanimo.

Sa tinuod, bisan kon kita dihay talagsaong espirituhanong mga kasinatian, adunay peligro nga mahimong wala kaayoy pagtagad mahitungod sa sagradong mga butang. unsaon nimo sa paglikay niini? Aniay duha ka mensahe nga motubag niini nga isyu; pagpili og usa, ug pangita og mga pahayag nga magtabang kanimo: Ulisses Soares, “Nagdayeg Kang Kristo ug sa Iyang Ebanghelyo” (Liahona, Mayo 2022, 115–17); Gerald Caussé, “Katingalahan Pa Ba Gihapon Kini alang Kaninyo (Liahona,, Mayo 2015, 98–100).

Tan-awa usab sa Doktrina ug mga Pakigsaad 6:10–12; 63:64.

Karon kita nakaila ni Moises isip usa ka halangdon nga propeta ug lider. Apan si Moises wala magtan-aw sa iyang kaugalingon niana nga paagi sa unang pagtawag sa Ginoo kaniya. Samtang imong gibasa ang Exodo 3–4, ilista ang mga kabalaka ni Moises ug giunsa pagtubag sa Ginoo ang matag usa. Unsa ang imong nakaplagan dinhi niini nga mga kapitulo nga mahimong modasig kanimo kon ikaw mobati og kakulang? Kanus-a nimo nakita ang Dios nga mihatag kanimo o sa uban og gahom sa pagbuhat sa Iyang buluhaton?

Tan-awa usab “Ang Simbahan Naghatag Kanato og mga Oportunidad sa Pagtabang diha sa Buluhaton sa Dios” sa “Organisasyon sa Simbahan” sa Mga Hilisgotan ug mga Pangutana, Librarya sa Ebanghelyo.

Kini makawala og kadasig kon ang atong sinserong mga paningkamot sa paghimo og maayo ingon og wala moepekto—sa panahon nga kita naninguha sa pagbuhat sa kabubut-on sa Ginoo apan wala kita makakita sa resulta nga atong gipaabot. Aron makakat-on mahitungod sa susama nga kasinatian nga Moises aduna, basaha ang Exodo 5:4–9, 20–23. Giunsa sa Ginoo pagtabang si Moises nga makabuntog sa iyang mga pagbati sa pagkanawad-an og kadasig? (tan-awa sa Exodo 6:1–13). Sa unsang paagi ang Ginoo mitabang kanimo nga magpadayon sa pagbuhat sa Iyang kabubut-on?

Tan-awa usab Jeffrey R. Holland, “Naghulat sa Ginoo,” Liahona, Nob. 2020, 115–117.

• Si Moises adunay dako kaayo nga tahas sa pagpalingkawas sa Israel gikan sa pagka-ulipon sa Israel. Apan wala unta siya makahimo sa paglampos niini kon ang iyang inahan, ang iyang igsoong babaye, ang anak nga babaye ni Paraon, ug ubang matinud-anong mga babaye wala manalipod ug moatiman kaniya. Tabangi ang imong mga bata sa pagkat-on mahitungod niini nga mga babaye diha sa Exodo 1:15–20; Exodo 2:2–10 (tan-awa usab diha sa Numeros 26:59); ug Exodo 2:16-21. Makagamit ka usab sa pahina sa kalihokan niini nga semana ug sa “Batang gamay nga Moises” (sa Mga Istorya sa Daang Tugon, 61–63) sa pag-asoy sa ilang mga istorya. Giunsa niini nga mga babaye pagtabang sa pagtuman sa plano sa Dios? Pakigsulti sa usag usa mahitungod sa ubang mga tawo nga imong gidayeg kinsa nagtabang sa bulohaton sa Dios, lakip sa gagmay ug yanong mga paagi. Unsaon nga kita makasunod sa ilang ehemplo?

  

  1:36

• Human mabasa ang Exodo 3:1–5 og dungan, hangyoa ang imong mga bata sa pag-summarize niini nga mga bersikulo sa ilang kaugalingong mga pulong (tan-awa usab “Moises ang Propeta” diha sa Mga Istorya sa Daang Tugon, 64–66). Giunsa pagkakita ni Moises og balaang pagtahod diha sa presensya sa Ginoo? Sa unsa nga paagi ang Ginoo gusto kanato nga mopakitya og balaang pagtahod? Mahimo usab nimong hangyoon ang imong mga bata sa pagtabang kanimo sa pagpangita (o sa pagdrowing) og mga hulagway sa sagradong mga dapit o mga kalihokan diin kita kinahanghlan nga magtahod sa balaang paagi. Unsay atong mahimo sa paghimo sa atong panimalay nga sagrado nga dapit?

  

  1:26

• Pagdungan og kanta sa usa ka awit mahitungod sa balaang pagtahod, sama sa “Ang Pagtahod Usa ka Gugma” (Songbook sa mga Bata, 12). Samtang kamo nagbuhat, ang imong mga bata makakaplag og mga pulong o hugpong sa mga pulong nga nagpasabot nga magtahod sa balaang paagi. Kon kita nagdala og higala ngadto sa simbahan sa unang higayon, unsaon nato sa pagpasabot kon unsay kahulogan nga magtahod sa balaang paagi?

• Gamit ang asoy diha sa Exodo 3; 4:1–17, papuli-puliha ang mga bata sa pagpakaaron ingnon nga si Moises. Kini mahimong makalingaw sa paglakip og mga butang o yanong mga prop sama sa flashlight ug usa ka tanom sa pagrepresentar sa nagkayo nga sampinit. Tabangi ang imong mga bata sa pagdiskobre unsay gibati ni Moises mahitungod sa buhat nga gihatag sa Ginoo kaniya (tan-awa diha sa Exodo 3:11; 4:1, 10). Tingali mahimong makigbahin kamo sa usag usa og mga panahon nga kamo dihay susamang mga pagbati. Unsa nga tambag ang atong ikapakigbahin ni Moises sa pagtabang kaniya? Basaha ang mahitungod kon giunsa sa Ginoo pag-awhag si Moises diha sa Exodo 3:12; 4:2–9, 11–12. Sultihi ang mga bata giunsa sa Manluluwas sa pagtabang kanila sa pagtuman sa usa ka calling, pagsunod og pag-aghat, o sa pagbuhat og usa ka butang nga malisod alang kanila.