Ang Balay ni Israel

Diha sa usa ka dapit sa kamingawan sa silangan sa Canaan, si Jacob mabalak-ong nagpaabot sa pakigkita sa iyang kaluha nga igsoong lalaki, si Esau. Ang kataposang higayon si Jacob nakakita ni Esau, mga 20 ka tuig ang milabay, si Esau gustong mopatay kaniya. Gigahin ni Jacob ang tibuok gabii sa pakigbisog, naninguha og panalangin gikan sa Dios. Isip resulta sa hugot nga pagtuo, paglahutay, ug determinasyon ni Jacob, ang Dios mitubag sa iyang mga pag-ampo. Niadtong gabhiona, ang ngalan ni Jacob giusab ngadto sa Israel, nga nagkahulogan, lakip sa uban pa, “siya naglahutay uban sa Dios” (Genesis 32:28, footnote b).

Kini ang unang higayon nga ang ngalang Israel makita diha sa Biblia, ug kini usa ka ngalan nga nagpabilin sa tibuok nga basahon ug sa tibuok nga kasaysayan. Ang ngalan sa wala madugay nagpasabot ngadto sa labaw pa kay sa usa ka tawo lamang. Si Israel may 12 ka anak nga lalaki, ug ang ilang mga kaliwat sa kinatibuk-an nailhan isip ang “balay ni Israel,” ang “mga tribo ni Israel,” ang “mga anak ni Israel,” o ang “mga Israelita.”

Sa tibuok kasaysayan, ang mga anak ni Israel naghatag og dako kaayong kamahinungdanon sa ilang kagikanan gikan sa usa sa napulog duha ka mga tribo ni Israel. Ang ilang kaliwatan usa ka importanting bahin sa ilang ilhanan sa pakigsaad. Mipahayag si Apostol Pablo nga siya “sakop sa banay ni Benjamin” (Mga Taga-Roma 11:1). Usa ka rason si Lehi mipadala sa iyang mga anak nga lalaki ngadto sa Jerusalem sa pagkuha sa mga palid nga tumbaga mao nga ang mga palid naglangkob sa “sa kasaysayan sa kagikanan sa iyang mga amahan” (1 Nephi 5:14). Nadiskobrehan ni Lehi nga siya usa ka kaliwat ni Joseph, ug ang pagsabot sa iyang kaliwatan sa ilang koneksyon ngadto sa balay ni Israel nakita nga importante ngadto kanila sa mga katuigang moabot.

Sa Simbahan karon, ikaw makadungog mahitungod sa Israel diha sa mga panultihon sama sa “ang pagpundok sa Israel.” Nagkanta kita mahitungod sa “Manunubos sa Israel,” sa “Paglaom sa Israel,” ug sa “Kamong mga Elder sa Israel.” Niini nga mga kahimtang, kita wala lamang magsulti o magkanta mahitungod sa karaang gingharian sa Israel o sa bag-ong nasod nga gitawag og Israel. Hinoon, kita nagpasabot ngadto sa mga tawo kinsa gipundok gikan sa mga nasod sa kalibotan ngadto sa Simbahan ni Jesukristo. Kita nagpasabot ngadto sa mga tawo kinsa naglahutay ngadto sa Dios, kinsa makugihong nagtinguha sa Iyang mga panalangin, ug kinsa, pinaagi sa bunyag, nahimo nga Iyang mga tawo sa pakigsaad. Sa mga pulong ni Presidente Russell M. Nelson, ang pagka-Israel nagpasabot nga “himoon ang Dios nga magpatigbabaw sa atong mga kinabuhi, … himoon ang Dios nga labing gamhanang impluwensya sa atong mga kinabuhi.”

Ang imong patriyarkal nga panalangin nagpahayag sa imong koneksyon ngadto sa usa sa mga tribo sa balay ni Israel. Kana mas labaw pa kay sa usa ka makapadani nga piraso nga impormasyon sa kasaysayan sa pamilya. Kini may kalabotan usab sa imong karon ug sa umaabot. Ingon nga kabahin sa balay ni Israel nangahulogan nga ikaw adunay pakigsaad nga relasyon uban sa Langitnong Amahan ug ni Jesukristo. Kini nangahulogan nga ikaw, sama ni Abraham, gitakda nga “mahimong usa ka panalangin” ngadto sa mga anak sa Dios (Genesis 12:2; Abraham 2:9–11). Kini nangahulogan, sa mga pulong ni Pedro, nga “kamo maoy usa ka kaliwatan nga pinili, ang kahugpungan sa harianong pagkapari [sacerdote], ang nasod nga balaan, ang katawhan nga iyang kaugalingon sa Dios, aron kamo magamantala sa kahibulongang mga buhat niya nga nagtawag kaninyo gikan sa kangitngit ngadto sa iyang katingalahang kahayag” (1 Pedro 2:9). Kini nangahulogan nga ikaw “nagapatigbabaw sa Dios”—nga ikaw usa kinsa “naglahutay uban sa Dios” samtang ikaw nagtahod sa imong mga pakigsaad uban Kaniya.