Genesis 24–33

Samtang magbasa sa Genesis 24, pangutan-a ang imong kaugalingon nganong gihunahuna ni Abraham nga ang kaminyoon sa iyang anak nga si Isaac importante kaayo. Nganong ang kaminyoon importante ngadto sa Dios?

Unsa nga mga kalidad ang imong makita diha ni Rebeca nga modugang sa usa ka lig-on nga kaminyoon ug pamilya? (tan-awa ilabi na ang mga bersikulo 15–28, 57–61).

Tan-awa usab sa Mga Hilisgotan ug mga Pangutana “Kaminyoon,” Librarya sa Ebanghelyo.

Sa kultura ni Isaac ug ni Rebeca, ang panganay nga anak nga lalaki ang makadawat sa katungod sa pagkapanganay, nga nagpasabot og mas dako nga panulundon, uban sa mas dako nga mga responsibilidad sa pag-atiman alang sa pamilya. Samtang ikaw magbasa sa Genesis 25:29–34, palandonga nganong si Esau nahimong andam nga motugyan sa iyang katungod sa pagkapanganay agi og ilis alang sa usa ka pagkaon. Unsa nga mga leksiyon ang imong nakaplagan alang sa imong kaugalingon dinhi niini nga asoy? Makatabang tingali ang paghimo ug duha ka lista: (1) mahangturong mga panalangin nga gustong ihatag sa Dios kanimo ug (2) mga kalibotanong mga butang nga mahimong makabalda kanimo. Dayon ikaw makabasa sa tudling, mag-ilis sa “katungod sa pagkapanganay” uban sa usa ka butang gikan sa unang lista ug sa “sabawng pula” uban sa usa ka butang gikan sa ikaduha. Unsaon nimo pagtutok diha sa Manluluwas ug sa mahangturong mga panalangin sa Iyang ebanghelyo?

Tan-awa usab diha sa Mateo 6:19–33; M. Russell Ballard, “Hinumdomi Unsa ang Labing Mahinungdanon,” Liahona, Mayo 2023, 105–7.

Samtang natulog sa usa ka unlan nga bato, si Jacob dihay usa ka makapabag-o sa kinabuhi nga damgo. Usa kini ka sagrado nga kasinatian nga ginganlan ni Jacob ang lugar og Bethel, o “balay sa Dios,” nagpahayag, “Sa pagkatinuod ania ang Ginoo niini nga dapit” (Genesis 28:16).

Samtang ikaw magbasa sa Genesis 28, tingali mangutana ka sa imong kaugalingon unsay naghimo niini nga kasinatian nga sagrado kaayo ngadto ni Jacob. Unsa ang iyang giatubang niadtong panahona? Unsa kaha ang iyang gibati? Mahimo ka usab mangita alang sa mga pulong ug hugpong sa mga pulong diha sa mga bersikulo 10–22 nga magpahinumdom kanimo sa balay sa Ginoo. Unsa nga mga panghunahuna ang imong nadawat mahitungod sa Dios, sa Iyang balay ug sa Iyang mga pakigsaad?

Sa kataposan niini nga latid may usa ka painting nga naghulagway sa damgo ni Jacob; mahimo nimong tan-awon kini samtang ikaw nagbasa. Kon ikaw pahimoon sa imong kaugalingong mabulukon nga paghulagway sa iyang damgo, unsa ang imong buhaton? Unsa nga mga kamatuoran gikan sa istorya ang imong paningkamotang ipakita?

Ang himno “Mas Magpaduol Ko Dios, Kanimo” (Mga Himno, nu. 55) gibase sa kasinatian ni Jacob. Unsa nga mga koneksyon ang imong makita tali niini nga awit ug sa Genesis 28:10–22? Sa unsa nga paagi ang templo nagtabang kanimo sa pagbati nga mas naduol ngadto sa Dios? Hunahunaa ang pagpangita ug mga tubag ngadto niini nga pangutana diha sa mensahe ni Presidente Russell M. Nelson nga “Ang Templo ug ang Imong Espirituwal nga Pundasyon” (Liahona, Nob. 2021, 93–96). Mahimo usab nimong rebyohon ang mga pakigsaad ug mga panalangin sa balay sa Ginoo diha sa Kinatibuk-ang Basahon, 27.2 (Librarya sa Ebanghelyo). Sa unsang paagi nga ang pagsunod niini nga mga pakigsaad nagdala og gahom sa Dios diha sa imong kinabuhi?

Samtang ikaw nagbasa sa Genesis 29:31–35 ug sa 30:1–24, pangita og mga pulong nga naghulagway sa kalooy sa Dios ngadto ni Raquel ug ni Lea. Palandonga kon giunsa sa Dios nga “natan-aw na ang [imong] kasakit” ug “nahinumdom” kanimo (Genesis 29:32; 30:22).

Samtang si Jacob mibalik ngadto sa Canaan, siya “nahadlok sa hilabihan gayod ug nagsubo” mahitungod kon unsaon sa iyang igsoong lalaki, si Esau, pagdawat kaniya (Genesis 32:7). Samtang ikaw nagbasa sa Genesis 32–33, pagpamalandong sa imong relasyon sa kaugalingong pamilya—tingali ilabi na ang usa nga nagkinahanglan ug pagkaayo. Tingali kini nga istorya makadasig kanimo sa pagtabang sa usa ka tawo. Mga pangutana sama niini makatabang og giya sa imong pagbasa:

• Giunsa ni Jacob pagpangandam sa pakigkita ni Esau?

• Unsa ang tataw nganha kanimo mahitungod sa pag-ampo ni Jacob nga makaplagan diha sa Genesis 32:9–12?

• Unsa ang imong nakat-onan mahitungod sa pagpasaylo gikan sa ehemplo ni Esau?

• Sa unsang paagi ang Manluluwas makatabang kanato sa pag-ayo og mga relasyon sa pamilya?

• Sa paghatag og gibug-aton sa kang Rebeka nga panig-ingnan sa pagkamabination, makahimo ka sa pagpakita sa imong mga bata sa hulagway sa ubos o sa pahina sa kalihokan niini nga semana samtang imong imubo ang istorya sa Genesis 24:10–21. Ang imong mga bata mahimong malingaw nga i-akting ang istorya. Kini makagiya ngadto sa usa ka panagsultihanay mahitungod sa mga lihok sa pagkamabination nga ikaw ug ang imong mga bata nakakita.

• Hunahunaa ang pagkanta sa usa ka awit mahitungod sa pagkamabination, sama sa “Pagkamabination Magagikan Kanako” (Songbook sa mga Bata, 83). Ang imong mga bata makapaminaw alang sa pulong nga “pagkamabination” (o sa susamang pulong) ug mobarog kon madungog nila kini. Sa unsang paagi kita mahimong mabination sama ni Rebeca?

• Hunahunaa ang paggamit sa “Jacob ug Esau” (diha sa Mga Istorya sa Daang Tugon, 42–44) aron matabangan ang imong mga bata nga masabtan ang istorya diha sa Genesis 25:21–34. Tingali mahimo nga maghanduraw ang imong mga bata nga si Esau nangayo sa ilang tambag mahitungod kon kinahanglan ba niyang pabayloan ang iyang katungod sa pagkapanganay alang sa sabawng pula. Unsay ilang isulti kaniya?

  

  2:5

• Unsa nga mga butang ang may mahangturong bili alang kanimo ug sa imong mga bata? Tingali makapangita ang imong mga bata ug mga hulagway o mga butang nga nagrepresentar niini nga mga butang. Unsaon nato pagpakita sa Ginoo nga kini nga mga butanga importante ngari kanato?

• Samtang magbasa kamo sa Genesis 28:10–22 mahimo ninyong gamiton ang usa ka hagdan o hagdanan(o usa ka litrato sama sa anaa sa kataposan niining latid) aron hisgotan kon sa unsang paagi ang atong mga pakigsaad sama sa usa ka hagdan. Dapita ang mga bata sa pagpakaaron-ingnon nga misaka sa hagdan, ug uban sa matag ang-ang, paghisgot mahitungod sa mga higayon sa dihang misaad kita nga mosunod sa Dios, sama sa dihang kita gibunyagan, nag-ambit sa sakramento, o miadto sa templo. Sa unsang paagi nga ang atong mga pakigsaad nagdala kanato nga mas duol sa Dios?

• Aron mapaila kini nga mga bersikulo, mahimo nimong ipasabot nga human sa daghang mga tuig nga daotan ang pagbati, si Jacob makigkita pag-usab ni Esau. Magdungan sa pagbasa sa Genesis 32:6–11. Unsay gibati ni Jacob? Unsay iyang gihimo aron makakuha og tabang? Pagdungan sa pagbasa sa Genesis 33:1–4 aron madiskobre giunsa pagtubag sa Ginoo ang pag-ampo ni Jacob. Kon si Jacob ug si Esau makasulti kanato karon, unsa kaha ang ilang isulti sa pagtabang kanato kon adunay panagbingkil sa atong pamilya?