Genesis 18–23

Naghimo ang Ginoo og mahimayaon nga mga saad ngadto sa matinud-anon, apan usahay ang mga sitwasyon sa atong mga kinabuhi makapatingala kanato kon sa unsa nga paagi kini nga mga saad posible nga matuman. Si Abraham ug si Sara tingali mibati niana nga paagi. Unsa ang imong nakat-onan gikan sa ilang mga kasinatian? Tingali mahimong makatabang ang pagsugod sa imong pagtuon pinaagi sa pagrebyo unsa ang gisaad sa Ginoo diha sa Genesis 17:4, 15–22. Sa unsa nga paagi mitubag si Abraham ug si Sara? (tan-awa diha sa Hubad ni Joseph Smith, Genesis 17:23 [diha sa Genesis 17:17, footnote b]; Genesis 18:9–12). Giunsa pagtubag sa Ginoo aron sa pagtabang kanila sa pagbaton og mas dako nga hugot nga pagtuo diha sa Iyang mga saad? (tan-awa sa Genesis 18:14).

Unsa ang imong nakaplagan dinhi niini nga mga bersikulo nga nagtukod sa imong hugot nga pagtuo? Unsa ang ubang mga kasinatian—sa imong kinabuhi o sa laing tawo—ang nakapalig-on sa imong hugot nga pagtuo nga ang Ginoo motuman sa Iyang mga saad nganha kanimo sa Iyang kaugalingong panahon ug paagi? Mahimo usab nimong hunahunaon kung giunsa nimo nga nakapadayon ang imong hugot nga pagtuo kon ang mga gisaad nga panalangin wala madawat dinhi niini nga kinabuhi. Unsa nga tambag ang imong nakaplagan diha sa Mga Hebreohanon 11:8–13 ug sa mensahe ni Presidente Russell M. Nelson nga “Si Kristo Nabanhaw; Ang Hugot nga Pagtuo Diha Kaniya Makabalhin og Bukid”? (Liahona, Mayo 2021, 101–4).

Tan-awa usab sa Doktrina ug mga Pakigsaad 88:68.

Unsa nga mga leksiyon ang imong nakat-onan mahitungod sa paglayas gikan sa pagkadaotan samtang ikaw nagbasa mahitungod ni Lot ug sa iyang pamilya? Sama pananglit, unsa ang nakapadani kanimo mahitungod sa unsay gisulti ug gibuhat sa mga anghel sa pagtabang ni Lot ug sa iyang pamilya sa pag-eskapo sa kalaglagan? (tan-awa diha sa Genesis 19:12–17). Giunsa pagtabang sa Ginoo kanimo ug sa imong pamilya sa paglayas o pagpangita og proteksyon gikan sa dautan nga mga impluwensya sa kalibotan? Paghunahuna og mga sitwasyon diin ikaw mahimong tintalon sa “[paglingi] sa luyo” (bersikulo 26) nga ikaw angay untang motan-aw sa unahan uban ang hugot nga pagtuo diha sa Manluluwas. Unsa ang ikadugang sa Lucas 9:62 sa imong pagsabot bahin niini nga konsepto?

Tan-awa usab sa Hubad ni Joseph Smith, Genesis 19:9–15 (diha sa apendiks sa Biblia).

Si Elder Jeffrey R. Holland mitudlo:

“Sa klaro, unsa ang sayop sa asawa ni Lot mao nga wala lamang siya milingi sa luyo; diha sa iyang kasingkasing siya gusto nga mobalik. Kini makita nga bisan sa wala pa siya milapas sa mga utlanan sa siyudad, siya gimingaw na sa unsa ang nahatag sa Sodoma ug Gomorra kaniya. …

“Posible kini nga ang asawa ni Lot milingi sa luyo nga may kasuko ngadto sa Ginoo tungod sa unsay Iyang gisugo kaniya nga ipabilin. … Busa wala lamang siya milingi sa luyo; siya milingi sa luyo nga may kamingaw. Sa mubo nga pagkasulti, ang iyang pagbati ngadto sa nangagi mas bug-at pa kay sa iyang pagsalig sa umaabot. Kana, klaro, sa labing minos kabahin sa iyang sala.

“… Ako maghangyo kaninyo nga dili magpuyo sa mga adlaw nga nangagi ni mangandoy sa kawang sa mga kagahapon, bisan pa unsa pa ka maayo kadtong mga kagahapon nga nangagi. Ang nangagi angay nga makat-onan apan dili puy-an. Kita motan-aw sa kagahapon aron sa pag-angkon sa mga baga gikan sa nagdan-ag nga mga kasinatian apan dili ang mga abo. Ug kon kita nakakat-on kon unsa ang kinahanglan nga makat-onan ug gidala uban kanato ang atong labing maayo nga atong nasinati, niana kita motan-aw sa unahan ug mohinumdom nga ang hugot nga pagtuo kanunay nagtudlo padulong sa umaabot. …

“… Ang pagpuyo sa nangagi, lakip ang nangaging mga sayop, dili gayod husto! Dili kini ang ebanghelyo ni Jesukristo. …

“Ngadto sa tanang [katawhan] sa matag henerasyon, ako nagtawag, ‘Hinumdomi ang asawa ni Lot’ [Lucas 17:32]. Ang hugot nga pagtuo alang sa umaabot. Ang hugot nga pagtuo nagtukod diha sa nangagi apan wala gayod magtinguha nga magpabilin dinha. Ang hugot nga pagtuo nagsalig nga ang Dios adunay dagkong mga butang nga gitagana alang sa matag usa kanato ug nga si Kristo sa tinuod mao ang ‘halangdong pari [labawng sacerdote] sa maayong butang nga managpangabot’ (Mga Hebreohanon 9:11)” (“Ang Labing Maayo Moabot Pa,” Ensign, Jan. 2010, 24, 26–27).

Bisan wala kita mahibalo sa tanan nga mga rason sa pagsugo sa Dios ni Abraham sa paghalad ni Isaac isip usa ka sakripisyo; kita nahibalo nga kadto usa ka pagsulay sa iyang hugot nga pagtuo diha sa Dios. Kita usab nahibalo nga kini usa ka “simbolo sa Dios ug sa iyang Bugtong Anak” (Jacob 4:5). Samtang ikaw nagbasa sa Genesis 22:1–19, makahimo ka sa pagpangita alang sa mga simbolo o mga pagkasusama tali sa paghalad ni Abraham kay Isaac ug sa paghalad sa Amahan sa Iyang Anak, si Jesukristo. Hunahunaa ang pagsulat sa unsay imong nakaplagan sa usa ka tsart sama niini:

Unsa nga mga simbolo o mga pagkasama sa halad nga pag-ula sa Manluluwas ang imong makita nga labing makahuloganon? Hunahunaa ang pag-awit o pagbasa sa mga liriko sa usa ka himno nga nagpakita sa gugma sa Langitnong Amahan alang kanato, sama sa “Kita sa Dios Gihigugma, Anak Niya Gipadala,” Mga Himno, nu. 109. Mahimo usab nimong i-rekord ang imong mga pagbati mahitungod sa Langitnong Amahan ug ni Jesukristo ug sa Ilang sakripisyo alang kanimo.

Kon gusto nimo nga magtuon pa mahitungod sa sakripisyo sa atong Manluluwas, hunahunaa ang pagbasa sa mensahe ni Presidente Jeffrey R. Holland nga “Tan-awa ang Kordero sa Dios” (Liahona, Mayo 2019, 44–46). Ngano nga ang nati nga karnero usa ka gamhanang simbolo alang sa Anak sa Dios? Unsa ang gitudlo ni Presidente Holland nga nagdugang sa imong balaang pagtahod alang sa gasa sa Langitnong Amahan?

Tan-awa usab sa “Akedah (The Binding)” (video), Gospel Library.

12:57

• Aron mahibaloan ang mahitungod sa pagsalig nila ni Abraham ug Sara sa mga saad sa Dios, kamo ug ang inyong mga bata mahimong maghisgot bahin sa usa ka panahon nga sila kinahanglang maghulat alang sa usa ka butang nga ila gayod nga nagustohan. Kamo makatan-aw dayon diha sa hulagway ni Sara ug Isaac sa sinugdanan niini nga latid ug sa paghisgot mahitungod sa saad sa Dios nga gihimo ngadto kaniya ug ni Abraham (tan-awa usab ang “Abraham ug Sara,” diha sa Mga Istorya sa Daang Tugon, 33–37). Tabangi ang mga bata sa paghunahuna og mga butang nga gisaad sa Dios kanato kon kita magmatinud-anon. Awhaga sila nga magmapailubon ug mosalig nga tumanon sa Dios ang Iyang mga saad.

  

  2:20

• Aron matabangan ang inyong mga bata nga mahibaloan ang importante nga kamatuoran sa Genesis 18:14, makahimo kamo sa pagsulat sa matag pulong sa unang kapahayag niana nga bersikulo sa lahi nga mga piraso sa papel. Dayon sagola ang mga papel, ug dapita ang inyong mga bata sa pagpahimutang sa mga pulong sa hustong pagkahan-ay. Ikaw ug ang imong mga bata makahimo sa pagbasa sa Genesis 17:15–21; 21:1–7 aron makakaplag og usa ka pananglitan sa usa ka butang nga gibuhat sa Ginoo nga ingon og imposible. Pakigbahin sa imong mga bata ang imong hugot nga pagtuo nga tumanon sa Ginoo ang Iyang mga saad, bisan pa og kini daw imposible o magkinahanglan ug dugay nga panahon.

• Pangutan-a ang imong mga bata mahitungod sa mga sitwasyon diin usa ka tawo mahimong modani kanila sa pagbuhat og usa ka butang nga sila nahibalo nga dili husto. Unsaon nato sa “pagpalayo” niini nga mga sitwasyon? I-summarize ang Genesis 19:15–26 pinaagi sa pagpasabot nga ang pamilya ni Lot mipuyo sa usa ka daotan kaayo nga siyudad, ug ang mga anghel mipasidaan kanila sa pagbiya. Samtang kamo ug ang imong mga bata magbasa og dungan sa mga bersikulo 15–17, 26, pangutan-a sila kung unsa kaha ang kahulogan alang kanato karon sa “pag-ikyas” sa kadaotan ug sa “dili paglingi sa luyo” (bersikulo 17).

• Maggamit og mga hulagway ni Abraham ug ni Isaac ug sa Paglansang (tan-awa sa Libro sa mga Hulagway sa Ebanghelyo, mga nu. 9,57) makatabang sa imong mga bata sa pagtandi sa istorya diha sa Genesis 22 ngadto sa sakripisyo sa Manluluwas (tan-awa sa Mateo 27:26–37). Unsa ang atong makat-onan mahitungod sa Langitnong Amahan ug ni Jesukristo gikan sa mga asoy bahin ni Abraham ug ni Isaac ug bahin sa Paglansang? (Tan-awa usab sa “Abraham ug Isaac,” diha sa Mga Istorya sa Daang Tugon, 38–41.)

  

  2:0

• Makahunahuna ka ba og usa ka yano nga dula nga dulaon sa inyong mga bata nga nagkinahanglan kanila nga mosunod sa mga direksyon? Tingali ang mga direksyon mahimong modala ngadto sa usa ka gitago nga hulagway sa Manluluwas. Ang dula mahimong mag-aghat og usa ka panag-istoryahanay mahitungod sa mga butang nga gisugo sa Langitnong Amahan kanato nga buhaton aron kita makapuyo uban Kaniya ug ni Jesukristo pag-usab. Hunahunaa ang pagkanta sa usa ka awit sama sa “Sundon ang Kasugoan” (Songbook sa mga Bata, 191). Ang pahina sa kalihokan niini nga semana makatabang usab.