Genesis 12–17; Abraham 1–2

“Kitang tanan na-impluwensya sa atong mga pamilya [ug] sa atong kultura,” gitudlo ni Elder Neil L. Andersen, “apan nagtuo gani ako nga adunay usa ka dapit sulod kanato nga kita sa talagsaon ug tinagsa-tagsa nga paagi nagpugong ug nagmugna. … Sa kadugayan, ang atong mga tinguha sa sulod nahatagan og kinabuhi ug nakita kini diha sa atong mga pagpili ug sa atong mga lihok” (“Educate Your Desires, Elder Andersen Counsels [Edukaha ang Imong mga Tinguha, Nagtambag si Elder Andersen],” ChurchofJesusChrist.org). Hunahunaa kung giunsa pagpakita sa Abraham 1:1–19 ang gitudlo ni Elder Andersen. Ang mga pangutana nga sama niini mahimong makatabang:

• Unsa ang gitinguha ni Abraham? Sa unsa nga paagi ang iyang mga tinguha klaro diha sa iyang mga lihok? Giunsa pagsuporta sa Dios ang iyang mga tinguha?

• Unsa ang imong mga tinguha? Sa unsa nga paagi kini klaro sa imong mga lihok? Giunsa ka pagsuporta sa Dios?

• Unsa nga mensahe aduna kini nga mga bersikulo alang sa mga tawo kinsa nga mga sakop sa pamilya wala magtinguha og pagkamatarong?

Usa sa labing dakong tinguha ni Abraham ug ni Sara—ang magka-anak—wala matuman sulod sa daghang katuigan (tan-awa sa Genesis 15:1–6). Unsa ang imong makat-onan gikan sa Hebreohanon 11:8–13 mahitungod kon giunsa pag-atubang ni Abraham ug Sara kini nga pagsulay? Unsaon pagtabang sa Manluluwas kanimo nga “gakson” ang Iyang mga saad, bisan pa kon kini “layo pa”?

Tan-awa usab sa “Deliverance of Abraham” (video), Gospel Library.

1:38

Nganong importante alang kanimo nga makahibalo mahitungod sa pakigsaad nga gihimo sa Dios uban ni Abraham? Tungod kay ang Dios gusto nga mohimo og sama nga pakigsaad uban kanimo. Misaad Siya nga kini nga pakigsaad mopadayon diha sa kaliwatan o “binhi” ni Abraham, ug nga “kutob sa modawat niini nga Ebanghelyo … pagaiphon nga imong binhi” (tan-awa diha sa Abraham 2:10–11). Sa laing pagkasulti, ang pakigsaad nagpadayon diha kanimo—sa dihang ikaw mabunyagan ug mas kompleto kon ikaw mohimo og mga pakigsaad diha sa templo (tan-awa diha sa Mga Taga-Galacia 3:26–29; Doktrina ug mga Pakigsaad 132:30–32).

Tungod niana nga rason, mahimong gusto nimong tun-an ang Abraham 2:6–11 ug maghimo og lista sa unsay, eksakto, nga saad sa Dios ni Abraham ug Sara (tan-awa usab diha sa Genesis 12:1–3; 13:15–16; 15:1–6; 17:1–8, 15–22). Unsaon kaha niini nga mga panalangin paggamit nganha kanimo?

Pipila niining saad adunay mahangturong mga panagsama. Unsaon pagkatuman sa mga saad sama sa yuta nga panulondon o daghang kaliwatan matuman hangtod sa kahangturan? (tan-awa diha sa Doktrina ug mga Pakigsaad 131:1–4; 132:20–24, 28–32).

Gawas sa pagsaad og mga panalangin, gisugo sa Dios si Abraham nga “mahimong panalangin” (Genesis 12:2). Unsa kaha ang gipasabot niana? Sa unsang paagi ikaw mahimong usa ka panalangin? (tan-awa sa Abraham 2:11).

Sa pagtudlo mahitungod sa mga pakigsaad, si Elder Dale G. Renlund misulti bahin sa mga balod nga dagko sa Suba sa Amazon, ug si Presidente Emily Belle Freeman misulti bahin sa paglakaw sa batohon nga dalan nga adunay bali nga bukong-bukong (tan-awa sa “Pag-angkon sa Gahom sa Dios pinaagi sa mga Pakigsaad,” Liahona, Mayo 2023, 35–37; “Paglakaw sa Pakigsaad nga Relasyon uban ni Kristo,” Liahona, Nob. 2023, 76–79). Siksika ang usa o duha niini nga mga mensahe alang sa mga kapahayag nga magtabang sa pagtubag sa pangutana, “Ngano nga gusto sa Dios nga mohimo ako og mga pakigsaad uban Kaniya?”

Tan-awa usab ang Mga Hilisgotan ug mga Pangutana, “Pakigsaad ni Abraham,” Librarya sa Ebanghelyo; “Thoughts to Keep in Mind: The Covenant,” dinhi niini nga kapanguhaan.

Hunahunaa nga ikaw nagpaila ni Melchizedek ngadto sa usa ka tawo kinsa wala makaila kaniya. Unsay imong isulti? Pangita og mga ideya diha sa Hubad ni Joseph Smith, Genesis 14:26–27, 33–38 (diha sa apendiks sa Biblia); Alma 13:13–19; Doktrina ug mga Pakigsaad 107:1–4. Unsa nga mga kinaiya nga sama ni Kristo ang imong makita niini nga mga paghulagway kabahin ni Melchizedek? Unsaon sa imong pagtuon sa kinabuhi ni Melchizedek nag-apekto sa paagi sa imong pagtan-aw sa Melchizedek nga Pagkapari?

Unsa ang imong makat-onan mahitungod sa kinaiya ni Abraham bahin sa bahandi gikan sa Genesis 14:18–24 ug Hubad ni Joseph Smith, Genesis 14:36–40 (diha sa apendiks sa Biblia)? Sama pananglit, timan-i ang iyang tubag ngadto sa hari sa Sodoma diha sa Genesis 14:23. Giunsa sa pagsunod sa balaod sa ikapulo pag-apektar sa imong pagtan-aw sa kwarta?

Samtang ikaw nagbasa sa Genesis 16, mahimo nimong hunahunaon ang mahitungod sa usa ka panahon nga gibati nimo nga ikaw gitagad sa dili patas nga paagi, sama sa gibuhat ni Hagar. Timan-i nga ang “Ishmael” nagpasabot og “Nakadungog ang Dios.” Sa unsang paagi nga gipakita sa Dios kanimo nga nakadungog Siya kanimo?

Tan-awa usab sa “Hilom nga Pag-ampo,” Mga Himno, nu. 86.

• Samtang ikaw ug ang imong mga bata nagbasa sa Abraham 1:18 ug 2:8, ikaw makadapit kanila sa pagpaminaw sa malitok nga parte sa lawas diha sa duha ka bersikulo. Tingali makadula kamo og dula diin ang usa ka bata magpiyong sa iyang mga mata ug imo siyang giyahan ngadto sa usa ka dapit pinaagi sa pagkupot sa iyang kamot. Dayon ikaw makasulti mahitungod sa unsay bation nga si Jesukristo naggiya kanato pinaagi sa paggunit sa kamot o sa pagpanalipod kanato.

• Ang imong mga bata tingali malingaw sa pag-akting sa istorya gikan sa Genesis 13:5–12, nga magpaka-Abraham, Lot, ug mga magbalantay sa mga kahayopan. Unsaon nato pagsunod sa panig-ingnan ni Abraham nga tigpasiugda sa kalinaw uban sa atong pamilya o mga higala? Sulayi ang pag-role-play sa ilang mga tubag.

• Hunahunaa ang pagpakita sa imong mga bata og usa ka sudlanan sa balas, sa mga bitoon sa langit sa gabii, o ang litrato sa kataposan niini nga latid. Kini makatabang kanila nga masabtan ang mga saad sa Dios diha sa Genesis 13:16; 15:1–6. Hisgoti kon giunsa nimo pagkat-on og pagsalig sa mga saad sa Dios, bisan kon kini ingon og imposible.

• Aron matudloan ang imong mga bata mahitungod sa mga pakigsaad, hangyoa sila sa pagsulti kanimo mahitungod sa usa ka higayon nga sila mihimo og saad o adunay mihimo og saad ngadto kanila. Kon kini makatabang, pakigbahin og pipila ka pananglitan gikan sa imong kaugalingon—lakip ang mga pakigsaad nga imong gihimo uban sa Dios diha sa bunyag o sa templo. Giunsa sa imong mga pakigsaad pag-apektar sa imong relasyon sa Dios? Pagpili og pipila ka hugpong sa mga pulong gikan sa Genesis 15:1–6; 17:1–8; Abraham 2:9–11 aron sa pagpakigbahin og pipila ka mga panalangin nga gisaad sa Dios ngadto ni Abraham ug Sara.

• Aron matabangan ang imong mga bata nga mag-andam sa paghimo og pakigsaad uban sa Dios kon sila bunyagan, mahimo nimong gamiton ang pipila sa mga ideya sa kalihokan nga gisugyot diha sa apendiks A o apendiks B.

• Sa dihang namiligro ang kinabuhi ni Abraham, mitawag siya sa Dios. Sa dihang si Hagar nag-inusara sa kamingawan, nakakat-on siya nga nadungog siya sa Dios. Hunahunaa ang pagpakigbahin niining duha ka istorya ngadto sa imong mga bata: “Abraham ug Sara” ug “Hagar” diha sa Mga Istorya sa Daang Tugon, 28–31, 32–33. Unsay atong makat-onan mahitungod sa Dios gikan niini nga mga istorya? Dayon ikaw makigbahin ngadto sa usag-usa og mga kasinatian sa dihang imong gibati nga ang Dios nakadungog kanimo. Usa ka awit sama sa “Ampo sa Usa ka Bata” (Songbook sa mga Bata, 3) makalig-on niini nga baroganan.

2:20

1:23