Genesis 6–11; Moises 8

May nakita ka ba og bisan unsa diha sa paghulagway sa panahon ni Noe nga ingon og susama sa kahimtang sa atong panahon? Ilabi na, tan-awa diha sa Moises 8:15–24, 28. Unsa nga mga tema ang imong nakita nga gibalik-balik?

Usa ka importanting pagkahisama nga imong makita mao nga ang Dios mitawag ni Noe nga mahimong usa ka propeta, ug Siya nagtawag usab og usa ka propeta karon. Hunahunaa ang paghimo og lista sa mga kamatuoran nga imong nakat-onan mahitungod sa mga propeta gikan sa Moises 8:13–30. Sa unsang paagi nga ang atong buhing propeta sama ni Noe? Sa tinuod, ang propeta sa Ginoo karon wala magpasidaan kabahin sa usa ka Lunop o nagdapit kanato sa pagtabang sa pagtukod og arka. Apan mahitungod sa unsa ang iyang gipasidaan kanato? Ug unsa ang iyang gidapit kanato nga buhaton? Sa pagtabang og tubag niini nga mga pangutana, makarebyo ka og usa ka kapitulo gikan sa Mga Pagtulun-an sa mga Presidente sa Simbahan diha sa Librarya sa Ebanghelyo, ilabi ang ulohan nga “Mga Pagdapit ug mga Gisaad”. Tingali ikaw makapili og usa ka pasidaan ug usa ka pagdapit nga ingon og ilabi ka importante nganha kanimo.

Gitudlo ni Elder Allen D. Haynie, “Usa ka hingpit ug mahigugmaong Amahan sa Langit nagpili sa sundanan sa pagpadayag og kamatuoran ngadto sa Iyang mga anak pinaagi sa usa ka propeta” (“Buhing Propeta alang sa Ulahing mga Adlaw,” Liahona, Mayo 2023, 25). Hunahunaa ang pagtuon sa mensahe ni Elder Haynie, mangita sa mga rason nga ang pagbaton og propeta usa ka timaan sa gugma sa Langitnong Amahan. Giunsa nga ang pagsunod sa propeta sa Ginoo mitabang kanimo sa pagbati nga luwas ang pagpuyo sa ulahing mga adlaw?

Tan-awa usab sa Mga Hilisgotan ug mga Pangutana “Mga Propeta,” Librarya sa Ebanghelyo; “Nganong Kita Adunay mga Propeta?” (bidyo), Librarya sa Ebanghelyo.

1:38

Ang ubang mga tawo naghunahuna mahitungod sa kaangayan sa Dios sa pagpadala og Lunop aron “pagalaglagon ang tawo” (Genesis 6:7). Si Elder Neal A. Maxwell mipasabot nga nianang panahon sa Lunop, “ang kadaotan misangko na sa punto nga moguba sa kabubut-on nga ang mga espiritu dili, uban sa kaangayan, mapadala dinhi” (We Will Prove Them Herewith [1982], 58). Mahimo usab nimong hunahunaon kon sa unsang paagi ang Lunop usa ka lihok sa kalooy. Unsa ang imong nakaplagan diha sa Genesis 6:5–13 nga nagpakita sa malumong kalooy ug gugma sa Ginoo alang sa katawhan?

Sumala sa Genesis 9:8–17, unsa ang imong mahinumdoman kon adunay bangaw? Unsa ang gidugang sa Hubad ni Joseph Smith, Genesis 9:21–25 (diha sa apendiks sa Biblia) ngadto sa imong pagsabot? Mahimo usab kang maghunahuna sa paghimo og lista sa ubang mga butang (sama sa mga simbolo, mga butang, o bisan unsa pa) nga ang Dios nakahatag kanimo sa pagpahinumdom kanimo sa imong mga pakigsaad. Unsa ang gitudlo niini nga mga butang kanimo? Giunsa niini pagtabang kanimo sa paghinumdom?

Tan-awa usab sa Gerrit W. Gong, “Kanunay Mohinumdom Kaniya,” Liahona, Mayo 2016, 108–11; “Pagmatinahuron Na,” Mga Himno, nu. 108.

Ang asoy bahin sa katawhan sa Babel nga nagtukod og tore naghatag og makapainteresado nga kalainan sa asoy bahin ni Enoch ug sa iyang katawhan nga nagtukod sa Zion, nga inyong gitun-an sa miaging semana. Ang duha ka grupo sa katawhan naningkamot nga moabot sa langit apan sa managlahing mga paagi. Giunsa sa katawhan sa Zion pagkab-ot sa langit? (tan-awa diha sa Moises 7:18–19, 53, 62–63, 69). Unsa ang imong nakat-onan gikan sa Genesis 11:1–9 ug Helaman 6:26–28 mahitungod sa katawhan sa Babel? Unsay gitudlo niini kanato mahitungod sa atong kaugalingong mga paningkamot nga mobalik ngadto sa presensya sa Dios? Unsay gihatag sa Dios aron sa pagtabang kanato nga “moabut sa langit”? (Genesis 11:4; tan-awa usab sa Juan 3:16).

• Kadaghanan sa kabataan gusto sa istorya ni Noe ug sa arka. Hunahunaa ang paghatag sa imong mga bata og mga oportunidad sa pagpakigbahin unsay ilang nahibaloan mahitungod niini. Sa pagtabang kanila, ikaw makagamit sa mga hulagway dinhi niini nga latid, “Noe ug Iyang Pamilya” diha sa Mga Istorya sa Daang Tugon (26–29), ug ang ikatulong bersikulo sa “Sunda ang Propeta” (Songbook sa mga Bata, 41). Tabangi ang mga bata sa pag-aksyon sa mga bahin sa istorya—sama pananglit, pinaagi sa pagpakaaron-ingnon nga naggamit og himan sa pagtukod og arka o naglakaw sama sa mga hayop nga nagsulod sa arka.

• Samtang kamo nag-uban sa pagsulti mahitungod ni Noe, tabangi ang imong mga bata sa pagkakita kon unsa kita ka napanalanginan sa pagbaton og usa ka propeta sa Dios karon. Tabangi ang imong mga bata sa pagsiksik sa Moises 8:16–24 sa pagpangita sa mga butang nga gitudlo ni Noe nga gitudlo gihapon sa mga propeta sa Ginoo karon. Sa unsang paagi kita mapanalanginan kon kita mosunod niini nga mga pagtulun-an?

• Ang imong mga bata tingali malingaw sa pagdrowing o pagkolor og usa ka bangaw samtang ikaw nagsulti mahitungod sa unsa ang girepresentar niini (tan-awa usab sa Hubad ni Joseph Smith, Genesis 9:21–25 [diha sa apendiks sa Biblia]). Unsa ang gusto sa Dios ni Noe ug sa iyang pamilya nga hunahunaon kon sila makakita og bangaw?

• Makapakita ka usab sa imong mga bata og butang nga anaa kanimo nga magpahinumdom kanimo sa butang nga importante sa imong kinabuhi, sama sa singsing sa kasal, litrato, o journal. Papakigbahina ang imong mga bata sa ilang kaugalingon nga mga ehemplo. Kini makagiya ngadto sa usa ka panag-istoryahanay mahitungod sa mga butang nga nagtabang kanato sa paghinumdom sa atong mga pakigsaad, sama sa sakramento, diin nagtabang kanato sa paghinumdom sa atong pakigsaad sa bunyag sa pagsunod ni Jesukristo (tan-awa sa Doktrina ug mga Pakigsaad 20:75–79).

• Kini mahimong makalingaw sa pagtukod og tore gikan sa mga bloke o ubang mga butang uban sa imong mga bata. Samtang imong buhaton ang mao, ipasabot nga ang katawhan sa Babel mituo nga sila makaadto sa langit pinaagi sa pagtukod og taas nga tore. Kamo dayon makatan-aw og dungan sa usa ka hulagway sa Manluluwas ug pangutan-a ang imong mga bata kon giunsa kita Niya pagtabang nga makaadto sa langit. Dayon kamo mahimong magkaistoryahanay sa usag usa mahitungod sa mga butang nga ikaw makahimo sa pagsunod sa Manluluwas.

• Agi og dugang sa pagbasa sa istorya sa tore sa Babel diha sa Genesis 11:1–9,, ikaw ug ang imong mga bata makabasa diha sa Helaman 6:28. Sumala niini nga bersikulo, ngano nga ang katawhan sa Babel nagtukod og tore? Ngano nga ang pagtukod niini nga tore sayop nga paagi sa pagkab-ot sa langit? Dayon kamo makasiksik diha sa 2 Nephi 31:20–21 ug diha sa Helaman 3:28 sa pagpangita sa hustong paagi sa pagkab-ot sa langit. Unsa nga tambag ang atong ihatag sa katawhan sa Babel?