Moises 7

Sa dihang si Propeta Joseph Smith unang nakakat-on mahitungod ni Enoch ug sa iyang Siyudad sa Pagkabalaan, nadasig siya. Siya “nasayod nga miabot na ang adlaw nga ang Ginoo moestabilisar pag-usab sa Zion dinhi sa yuta” (Mga Santos, 1:124), ug iyang gisugdan ang dugay nang gipangita sa kinabuhi ang pagtukod og Zion. Ang pagbasa sa Moises 7 makadasig kanimo sa pagpadayon niana nga paningkamot karon.

Ikaw mahimong magsugod pinaagi sa pagsuhid sa mga pangutana “Unsa ang Zion?” ug “Unsa kini ka lahi gikan sa ubang kalibotan?” Hunahunaa ang paglista sa mga tubag nga moabot kanimo samtang ikaw nagtuon sa Moises 7, ilabi na sa mga bersikulo 16–21, 27, 53, 62–69.

Ang imong mga tubag ngadto niini nga mga pangutana mahimong mopatin-aw nga kita sa gihapon adunay daghang buluhaton nga pagahimoon sa pagtukod sa Zion. Busa unsaon nato sa paghimo niini? Mahimong kini makatabang sa paghunahuna mahitungod sa mga panahon nga ikaw mibati nga ikaw “usa sa kasingkasing ug usa sa hunahuna” ngadto sa usa ka tawo (Moises 7:18). Tingali diha sa usa ka ward, pamilya, o grupo sa trabahoan o sa eskwelahan. Unsa ang gibuhat sa mga tawo sa pagmugna og matarong nga panaghiusa?

Ania ang pipila sa ubang mga kapanguhaan nga imong masuhid sa pagpangita og mga ideya ug mga pagdasig. Pagpili og usa o dugang pa nga tun-an, ug dayon isulat kon unsay imong gibati nga nadasig sa pagbuhat sa pagtukod og Zion:

• Mga Taga-Filipos 2:1–4; 4 Nephi 1:15–18; Doktrina ug mga Pakigsaad 97:21; 105:5.

• Ulisses Soares, “Mga Igsoon nga Lalaki ug Mga Igsoon nga Babaye diha ni Kristo,” Liahona, Nob. 2023, 71.

• D. Todd Christofferson, “Nahiusa kang Kristo,” Liahona, Mayo 2023, 78.

Unsa ang kahulogan niini diha kanimo nga magbaton ni Jesukristo isip imong Hari? Timan-i ang ubang titulo ni Jesukristo dinhi niini nga bersikulo. Unsa ang gitudlo niini kanimo mahitungod Kaniya? Unsa sa imong hunahuna ang kahulogan sa mosulod “diha sa ganghaan ug [mosaka] pinaagi [Kaniya]”?

Tan-awa usab ang “Dali, O Hari sa mga Hari,” Mga Himno, nu. 30.

Ang ubang mga katawhan nagtan-aw sa Dios isip usa ka layo nga binuhat kinsa dili mobati sa unsay mahitabo kanato. Si Enoch nakakuha og lahi nga panglantaw sa Dios diha sa panan-awon nga girekord diha sa Moises 7. Unsa ang iyang nakat-onan mahitungod sa Dios—ug unsa ang imong nakat-onan—diha sa mga bersikulo 28–40? Ngano sa imong hunahuna natingala si Enoch sa pagkakita nga ang Dios naghilak? Nganong importante kini nganha kanimo nga mahibalo nga Siya maghilak?

Samtang ang panan-awon mipadayon, si Enoch mihilak usab. Apan ang Dios mipakigbahin usab kaniya og mga rason sa pagmaya. Pangita alang niini diha sa Moises 7:41–69. Unsa ang imong nakat-onan gikan sa panan-awon ni Enoch nga makatabang kanimo sa “pagmaya sa imong kasingkasing, ug pagmalipayon, bisan sa “kapait” sa imong kinabuhi (bersikulo 44)?

Tan-awa usab sa Jeffrey R. Holland, “Ang Kahalangdon sa Dios,” Liahona, Nob. 2003, 70–73.

Ang panan-awon ni Enoch, ilabi na sa unsay narekord diha sa Moises 7:59–67, maoy usa sa unang kasaysayan sa mga panagna kabahin sa Ikaduhang Pag-anhi sa Manluluwas. Unsa ang nakapadani kanimo mahitungod sa paagi kini nga mga bersikulo naghulagway sa katapusang mga adlaw? Pananglit, hunahunaa kon unsay imong gibati sa mga panagna gikan sa bersikulo 62 nga natuman. Unsa ang gitudlo niining mga hugpong sa mga pulong mahitungod sa buhat sa Dios sa ulahing mga adlaw?

Tan-awa usab sa Henry B. Eyring, “Managsuon nga mga Babaye,” Liahona, Nob. 2020, 67–69.

• Unsay ipasabot nga ang “binhi ni Cain mga itum?”

• Unsay ipasabot nga “ang Kordero gipatay gikan sa katukoran sa kalibotan”?

• Sa unsang paagi nakatabang ang Hubad ni Joseph Smith aron mouswag ang atong pagsabot sa pakigsaad sa Dios ngadto ni Enoch ug Noe?

Iklik aron makakita pa og dugang.

• Sa pagtabang sa imong mga bata nga makakat-on mahitungod ni Enoch ug sa Zion, ikaw makagamit sa “Enoch ang Propeta” diha sa Mga Istorya sa Daang Tugon (22–25) o ang ikaduhang bersikulo sa “Sunda ang Propeta” (Songbook sa mga Bata, 41). Dayon ikaw makahangyo sa imong mga bata sa pagtabang kanimo sa pag-istorya og balik sa istorya diha sa ilang kaugalingong mga pulong. Ang hulagway ni Enoch dinhi niini nga latid mahimong makatabang.

• Ania ang usa ka paagi sa pagtabang sa imong mga bata pagsabot sa unsay kahulogan nga mahimong “usa sa kasingkasing ug usa sa hunahuna” (Moises 7:18): Paghimo og kasingkasing nga papel ug guntinga kini ngadto sa piraso, igo alang sa matag bata nga adunay usa ka piraso. Ipasulat ang ilang ngalan diha sa ilang piraso dayon magdungan sa pagbutang og tingub sa kasingkasing. Samtang ilang gibuhat, mahimong ikaw mosulti mahitungod sa mga butang nga imong nagustohan mahitungod sa matag bata.

• Tabangi ang imong mga bata sa pag-ihap kon kapila ang pulong nga “Zion” makita diha sa Moises 7:18–21, 62–63, 68–69. Sa matag higayon ilang makaplagan ang pulong, tabangi sila sa pagdiskobre unsay gisulti sa bersikulo mahitungod sa Zion (tan-awa usab ang Giya ngadto sa mga Kasulatan, “Zion,” Librarya sa Ebanghelyo). Sa unsang paagi kita mas mahisama sa katawhan nga gihulagway niini nga mga bersikulo?

• Sa pagpaila sa Moises 7:32–33 ngadto sa imong mga bata, mahimo kang mosulti kanila mahitungod sa usa ka pagpili nga ilang gihimo bag-ohay. Dayon kamo makabasa sa mga bersikulo og dungan aron mahibaloan kon unsay gusto sa Langitnong Amahan kanato nga pilion. Unsa nga mga pagpili kita makahimo sa pagpakita nga kita nagpili Kaniya? Tingali ang imong mga bata makapuli-puli sa pag-aksyon sa usa sa mga gipili samtang ang uban magtagna unsa ang girepresentar sa aksyon.

• Sa Moises 7:59, nangutana si Enoch sa Ginoo. Dapita ang imong mga bata sa pagpangita niini, ug dayon hangyoa sila sa pagpangita sa tubag diha sa bersikulo 60. Mahimo usab nga ikaw makigsulti kanila mahitungod sa usa ka panahon nga sila nagpaabot og usa ka tawo sa pagbalik sa panimalay. Pangutan-a sila kon unsay ilang gibati ug unsay ilang gibuhat sa pagpangandam. Unsaon nato sa pagpangandam alang sa pagbalik ni Jesus?

• Hunahunaa ang pagpakita og mga hulagway sa mga panahon sa dihang ang Manluluwas mipakita sa katawhan (sama sa Libro sa mga Hulagway sa Ebanghelyo, mga nu. 60, 82, 83, ug 84). Unsay gibuhat sa mga tawo diha sa hulagway? Unsa kaha ang gibati sa mga tawo sa dihang nahimamat nila si Jesus? Makahimo kamo sa pagkanta og usa ka awit mahitungod sa Ikaduhang Pag-anhi sa Manluluwas, sama sa “Kon Siya Moanhi Pag-usab” (Songbook sa mga Bata, 33), ug pangutan-a ang mga bata unsa sa ilang hunahuna kini ka sama kon si Jesus mobalik pag-usab. Tugoti ang mga bata sa pagpakigbahin unsa ilang bation nga makakita ni Jesus kon Siya mobalik pag-usab.