Genesis 5; Moises 6

Samtang ikaw nagtuon sa Moises 6:26–36, unsa ang imong nakat-onan mahitungod sa mga epekto sa sala? Sa unsang paagi nakita nimo kini nga mga epekto? Unsa nga mga kinaiya si Enoch aduna nga mitabang kaniya sa pagbuntog niini nga mga epekto? Sa unsa nga paagi nga gipanalanginan siya sa Dios isip resulta?

Kon ikaw mibati nga nasanapan sa unsay gitawag sa Ginoo kanimo nga ipabuhat, wala ka mag-inusara. Bisan si Enoch mibati niana nga paagi sa dihang siya gitawag sa Ginoo nga mahimong usa ka propeta. Samtang ikaw magbasa sa Moises 6:26–36, pangitaa kon nganong si Enoch mibati nga nasanapan ug unsa ang gisulti sa Ginoo sa paghatag kaniya og kaisog.

Sa mga bersikulo 37–47, ikaw makapangita og mga paagi nga ang Ginoo misuporta ni Enoch ug mihatag kaniya og gahom sa paghimo sa Iyang buhat (tan-awa usab sa Moises 7:13). Mahimo nimong itandi ang kasinatian ni Enoch ngadto nianang uban nga mga propeta kinsa mibati og pagkadili sarang sama ni Moises (tan-awa sa Exodo 4:10–16), Jeremias (tan-awa sa Jeremias 1:4–10), Nephi (tan-awa sa 2 Nephi 33:1–4), ug Moroni (tan-awa sa Ether 12:23–29). Unsa sa imong paminaw ang gusto sa Dios kanimo nga makat-onan gikan niini nga mga kasulatan mahitungod sa buhat nga Siya mihatag kanimo nga buhaton?

Daghang apostoles ug mga propeta sa modernong panahon ang mipahayag og mga pagbati nga sama sa kang Enoch sa dihang ilang gihulagway kon unsay ilang gibati sa dihang nadawat nila ang ilang mga tawag. Sama pananglit, tan-awa ang pagpamatuod ni Elder Ulisses Soares diha sa “Ang mga Propeta Mamulong pinaagi sa Gahom sa Balaang Espiritu” (Liahona, Mayo 2018, 98–99).

Unsa ang imong makat-onan gikan niini nga mga propeta ug apostoles mahitungod sa imong mga pagbati sa kakulangan? Kanus-a nimo gibati ang tabang sa Manunubos kanimo sa dihang mihangyo Siya kanimo sa pagbuhat og malisod nga mga butang? Hunahunaa ang pagsulat og pipila ka kasinatian sa imong umaabot kon ikaw manginahanglan sa pagsalig diha sa tabang sa Manluluwas. Sa unsang paagi imong atubangon kini nga mga panghitabo uban sa hugot nga pagtuo diha ni Jesukristo?

Tan-awa usab sa David A. Bednar, “Magpuyo ngari Kanako, ug Ako nganha Kanimo; Busa, Paglakaw uban Kanako,” Liahona, Mayo 2023, 123–25; “Moadto Ako Bisan Asa sa Pagbuot Mo,” Mga Himno, nu. 168.

Tungod kay kita aduna sa basahon ni Moises, nahibalo kita nga ang Dios nagtudlo kanunay sa Iyang mga anak unsaon pagkakaplag og katubsanan sukad pa ni Adan ug ni Eva. Samtang ikaw magtuon sa Moises 6:48–68, pagsiksik alang sa unsay kinahanglan gayod natong mahibaloan ug buhaton aron matubos. Tan-awa ang pangutana ni Adan diha sa bersikulo 53. Nahibulong ka ba sukad niana? Unsay imong nakat-onan gikan sa tubag sa Ginoo diha sa mga bersikulo 53–65? Mahimong imong hunahunaon kini nga mga bersikulo isip ang mensahe sa Ginoo diha sa serbisyo sa bunyag ni Adan. Unsa ang imong nakat-onan mahitungod sa bunyag gikan sa Iyang mensahe? Ngano sa imong hunahuna Iyang gitandi ang bunyag ngadto sa “matawo pag-usab”? (bersikulo 59). Unsa ang imong mabuhat sa pagpadayon nga “matawo pag-usab” sa tibuok nimong mga kinabuhi?

Human magtudlo ni Adan sa mga kamatuoran sa ebanghelyo ni Jesukristo, diha sa Moises 6:51–63, ang Ginoo misulti ngadto ni Adam sa pagtudlo niini ngadto sa umaabot nga mga henerasyon. Hunahunaa ang paghimo og lista niini nga mga kamatuoran. (Mahimo kining makatabang sa pagbahin sa tudling ngadto sa gagmay nga mga grupo sa bersikulo, sama sa mga bersikulo 51–52, 53–57, 58–60, 61–63). Nganong bililhon man kini nga mga kamatuoran sa bag-o nga henerasyon karon? Unsa pa ang imong makat-onan gikan sa mga panudlo sa Ginoo ngadto sa mga ginikanan diha sa Mosiah 4:14–15 ug diha sa Doktrina ug mga Pakigsaad 68:25–28; 93:40–50?

Ang pagbasa sa “basahon sa handumanan” nga gitago sa pamilya ni Adan ug ni Eva mahimong modasig kanimo o sa imong pamilya sa paghimo og inyong kaugalingong basahon sa handumanan. Unsa sa imong pagbati gusto sa Ginoo nga imong iapil? Hunahunaa ang paghipos og impormasyon gikan sa imong basahon sa handumanan diha sa FamilySearch.org.

Tan-awa usab sa Dieter F. Uchtdorf, “Si Jesukristo Mao ang Kalig-on sa mga Ginikanan,” Liahona, Mayo 2023, 55–59; “Parenting: Touching the Hearts of Our Youth,” “But Why?” [Pag-amuma: Nagtandog sa mga Kasingkasing sa atong mga Kabatan-onan, Apan Ngano?] (mga bidyo), Librarya sa Ebanghelyo.

• Unsay gitudlo kanato sa mga simbolo sa tubig, espiritu, ug dugo bahin sa pagkatawo pag-usab pinaagi ni Jesukristo?

• Sa unsang paagi si Adan nahimong “anak nga lalaki sa Dios”?

Iklik aron makakita pa og dugang.

• Dihang si Enoch gitawag sa pagsangyaw sa ebanghelyo, nabalaka siya nga mapakyas siya. Apan ang Dios mitabang kaniya. Basaha og dungan kini nga istorya diha sa Moises 6:26–34 (tan-awa usab sa “Enoch ang Propeta” diha sa Mga Istorya sa Daang Tugon, 19–21). Nganong gibati ni Enoch nga dili siya makasangyaw sa ebanghelyo? (tan-awa diha sa Moises 6:31). Giunsa sa Dios sa pagtabang si Enoch? (tan-awa diha sa Moises 6:32–34; 7:13).

• Ang imong mga bata mahimong malingaw sa pagpakigbahin o sa pag-akting sa ubang mga panig-ingnan sa dihang ang Dios mitabang sa mga tawo sa pagbuhat sa malisod nga mga butang—sama pananglit sila si, Noah, David, Ammon, o Samuel ang Lamanite (tan-awa diha sa Basahon sa Mga Hulagway sa Ebanghelyo, mga nu. 7, 19, 78, 81). Mahimo usab nga makapakigbahin ka og kasinatian nga imong kaugalingon ug pasultiha ang imong mga bata mahitungod kon giunsa sa Dios sa pagtabang kanila sa pagbuhat sa malisod nga mga butang.

• Ang Dios mitudlo ni Adan unsay angay natong buhaton aron makabalik ngadto Kaniya—magbaton og pagtuo, maghinulsol, magpabunyag, ug modawat sa gasa sa Espiritu Santo. Tabangi ang imong mga bata sa pagpangita niini nga mga baroganan diha sa Moises 6:52, 57. Dayon ikaw makatabang kanila sa pagsulat og mubo nga pakigpulong mahitungod sa usa ka baroganan. Ang matag pakigpulong maglakip og usa ka kasulatan gikan diha sa Moises 6, usa ka kasinatian, ug usa ka pagpamatuod. Tugoti sila sa pagpakigbahin sa ilang mga pakigpulong ngadto sa usag usa.

• Ikaw makahimo usab sa pagpakita sa mga litrato nga nagrepresentar sa unang mga baroganan sa ebanghelyo (tan-awa sa ikaupat nga artikulo sa hugot nga pagtuo). Ipahimutang kini sa usa ka linya nga nagpadulong ngadto sa usa ka litrato ni Jesukristo. Samtang ikaw nagbasa diha sa Moises 6:52, ang imong mga bata makabarog sunod sa husto nga litrato kon madungog nila ang mga pulong nga nagrepresentar sa litrato.

• Ang imong mga bata mahimong malingaw sa pagkanta sa mga awit nga nagtudlo sa mga baroganan diha sa Moises 6:52, sama sa “Hugot nga Pagtuo,” “Kon Ako Bunyagan,” ug “Ang Espiritu Santo” (Songbook sa mga Bata, 35, 37, 38). Tabang kanila sa pagpangita niini nga mga baroganan diha sa Moises 6:52.

• Sa pag-awhag sa imong mga bata sa pagsuporta sa ilang mga ginikanan sa ilang tahas isip mga magtutudlo sa ebanghelyo, hunahunaa ang paghangyo sa usa ka bata sa pagbasa diha sa Moises 6:58 ug sa pag-ila sa sugo nga gihatag sa Dios ngadto sa mga ginikanan. Dayon ikaw makapakita og usa ka hulagway ni Adan ug ni Eva nga nagtudlo sa ilang mga anak (sama sa usa nga anaa sa kataposan niini nga latid) ug pasultiha ang imong mga bata mahitungod sa unsay ilang nakita sa hulagway. Ang imong mga bata makadrowing og mga hulagway sa ilang mga pamilya nga nagbasa og dungan sa mga kasulatan, nag-uban sa pag-ampo, o nag-uban sa pagdula.