Ang Pakigsaad

Si Abraham gusto nga “mahimo nga usa ka labaw nga sumusunod sa pagkamatarung”(Abraham 1:2), busa ang Dios midapit kaniya ngadto sa usa ka pakigsaad nga relasyon. Si Abraham dili ang una nga nagbaton niini nga tinguha, ug dili siya ang una nga nakadawat og usa ka pakigsaad. Sa kataposan, bisan unsa pa, kini usa ka mahangturong pakigsaad. Gitinguha ni Abraham “ang mga panalangin sa mga amahan” (Abraham 1:2)—mga panalangin nga gihatag pinaagi sa pakigsaad ngadto ni Adan ug ni Eva ug human niana ngadto sa katawhan kinsa naningkamot sa makugihong paagi niini nga mga panalangin.

Ang pakigsaad sa Dios uban ni Abraham misaad og talagsaong mga panalangin: usa ka panulundon nga yuta, usa ka dakong kaliwatan, makagamit sa mga ordinansa sa pagkapari, ug usa ka ngalan nga pasidunggan sulod sa mga henerasyon nga umaabot. Apan ang gihatagan og gibug-aton niini nga pakigsaad dili lamang diha sa mga panalangin nga madawat ni Abraham ug sa iyang pamilya apan diha usab sa panalangin nga sila mahimo ngadto sa nahibilin sa mga anak sa Dios. “Mahimo ikaw nga usa ka panalangin,” mipadayag ang Dios, “ug diha kanimo pagapanalanginan ang tanang mga kabanayan sa yuta” (Genesis 12:2–3).

Kini ba nga pakigsaad naghatag ni Abraham, ni Sara, ug sa ilang mga kaliwat og usa ka pribilihiyo nga kahimtang taliwala sa mga anak sa Dios? Diha lamang sa katarongan nga kini usa ka pribilihiyo sa pagpanalangin sa uban. Ang pamilya ni Abraham “modala niini nga pagpangalagad ug Pagkapari ngadto sa tanan nga mga nasod,” makigbahin “sa mga panalangin sa Ebanghelyo, diin mao ang mga panalangin sa kaluwasan, gani sa kinabuhi nga dayon” (Abraham 2:9, 11). Ingon nga katawhan sa Dios sa pakigsaad wala magpasabot nga sila mas labaw kaysa uban; nagpasabot kini nga aduna sila’y katungdanan sa pagtabang sa uban nga mahimong mas maayo.

Kini nga pakigsaad mao ang panalangin nga gihandom ni Abraham. Human kini madawat, miingon si Abraham diha sa iyang kasingkasing, “Ang imong sulugoon nangita kanimo sa dako nga tinguha; karon ako nakakaplag kanimo” (Abraham 2:12).

Kana mga liboan ka tuig ang milabay, apan kini nga pakigsaad gipahiuli sa atong panahon. Ug kini sa karon natuman diha sa mga kinabuhi sa mga katawhan sa Dios. Ang pagkatuman sa pakigsaad nakaangkon og gahom ug kalig-on sa ulahing mga adlaw samtang nag-uswag ang buhat sa Dios, nagpanalangin sa mga pamilya sa tibuok kalibotan. Ug bisan kinsa, sama ni Abraham, gusto nga mahimo nga usa ka mas labaw nga sumusunod sa pagkamatarong, bisan kinsa nga naningkamot sa Ginoo sa dakong kakugi—mahimong kabahin niini.

Ikaw anak sa pakigsaad. Ikaw naghimo og pakigsaad ngadto sa Dios sa dihang ikaw gibunyagan ug kon ikaw moambit sa sakramento. Ug imong madawat ang kahingpitan sa pakigsaad uban sa sagradong mga ordinansa sa templo.

Pinaagi niining mga pakigsaad ug mga ordinansa, kita mahimong katawhan sa Dios. Kita gihiusa Kaniya “uban sa mahangturong mga bugkos.” “Sa higayon nga kita maghimo og usa ka pakigsaad uban sa Dios,” gitudlo ni Presidente Russell M. Nelson, “kita mobiya sa walay gidapigan nga kahimtang hangtod sa kahangtoran. Ang Dios dili mobiya sa Iyang relasyon niadtong kinsa mimugna sa ingon nga bugkos uban Kaniya. Sa pagkatinuod, ang tanan niadtong kinsa mihimo og usa ka pakigsaad sa Dios adunay agianan ngadto sa usa ka espesyal nga matang sa gugma ug kaluoy. … Tungod sa atong pakigsaad sa Dios, Siya dili gayod kapuyon sa Iyang mga paningkamot sa pagtabang kanato, ug kita dili gayod makabsan sa Iyang maloloy-on nga pailob ngari kanato.” Imo kining makita sa kasaysayan sa katawhan sa pakigsaad sa Dios diha sa Daang Tugon, ug imo usab kining makita sa imong kaugalingon nga kinabuhi isip usa sa Iyang mga anak sa pakigsaad.

Kini mao ang bililhong pagsabot nga gihatag ngari kanato tungod sa Pagpahiuli sa pakigsaad ni Abraham pinaagi ni Propeta Joseph Smith. Busa kon ikaw magbasa mahitungod sa mga pakigsaad diha sa Daang Tugon, ayaw paghunahuna lamang mahitungod sa relasyon sa Dios ngadto ni Abraham, Isaac, ug Jacob. Paghunahuna usab mahitungod sa Iyang relasyon diha kanimo. Kon ikaw magbasa mahitungod sa saad sa dili maihap nga kaliwatan, ayaw paghunahuna lamang mahitungod sa mga minilyon kinsa karon nagtawag ni Abraham nga ilang amahan. Paghunahuna usab mahitungod sa saad sa Dios diha kanimo kabahin sa mahangturong pamilya ug walay kataposang pagpadaghan. Kon ikaw magbasa mahitungod sa saad nga usa ka yutang panulundon, ayaw lamang paghunahuna mahitungod sa yuta nga gisaad ngadto ni Abraham. Paghunahunaa usab sa celestial nga padulngan sa yuta mismo—usa ka panulundon nga gisaad ngadto sa “mapainubsanon” kinsa “nagpaabot sa Ginoo” (Mateo 5:5; Salmo 37:9, 11). Ug kon basahon nimo ang mahitungod sa saad nga ang katawhan sa pakigsaad sa Dios mopanalangin sa “tanang mga pamilya sa yuta” (Abraham 2:11), ayaw lamang paghunahuna mahitungod sa pagpangalagad ni Abraham o sa mga propeta kinsa gikan kaniya. Paghunahuna usab mahitungod sa unsay imong mabuhat—isip sumusunod sa pakigsaad ni Jesukristo—nga mahimong panalangin ngadto sa mga pamilya nga naglibot kanimo.