Genesis 42–50

May namatikdan ba kamong bisan unsa nga pagkasama tali sa kinabuhi ni Jose ug sa maulaong misyon ni Jesukristo? Aron makita ang pipila ka pananglitan sa mga pagkasama niini, sulayi ang pagtandi:

• Genesis 37:3 ngadto sa Mateo 3:17.

• Genesis 37:26–28 ngadto sa Mateo 26:14–16.

• Genesis 45:5–7 ngadto sa Lucas 4:18.

• Genesis 47:12 ngadto sa Juan 6:35.

Unsa nga mga pagbati ikaw aduna mahitungod sa Manluluwas ug sa Iyang misyon samtang ikaw nagbasa niini nga mga tudling?

Ang pagbasa mahitungod sa pagpasaylo ni Jose sa iyang igsoong mga lalaki alang sa grabing mga butang nga ilang gihimo mahimong moaghat kanimo sa paghunahuna mahitungod sa usa ka tawo nga sa karon ikaw nanlimbasog sa pagpasaylo. Ang mosunod nga mga pangutana mahimong motabang kanimo samtang ikaw maningkamot sa paggamit niini nga baroganan:

• Ngano kaha unta kini malisod alang ni Jose sa pagpasaylo sa iyang igsoon nga mga lalaki? (sa pagrebyo unsa ang ilang gibuhat ngadto kaniya, tan-awa ang Genesis 37). Unsa nga mga kasinatian o mga kinaiya nga nakahatag ni Jose og kalig-on sa pagpasaylo? (tan-awa, sama pananglit sa, Genesis 45:1–15 o 50:15–21).

• Unsa ang mga panalangin nga miabot gikan sa pagpasaylo ni Jose sa iyang igsoon nga mga lalaki? Sama pananglit, itandi ang mga relasyon diha sa pamilya ni Jacob sa sinugdanan sa istorya (tan-awa, sama pananglit sa, Genesis 37:3–11) ngadto sa mga relasyon diha sa kataposan (tan-awa sa Genesis 45:9–15; 50:15–21). Unsa kaha ang lahi nga nahitabo kon dili pa andam si Jose nga mopasaylo?

• Hunahunaa ang pagsulat sa ngalan sa usa ka tawo nga nagkinahanglan sa imong pagpasaylo—bisan sila nangayo o wala alang sa kapasayloan. Unsa ang imong mabuhat sa pagdapit sa makaalim nga gahom sa Manluluwas ngadto niana nga sitwasyon? Kon ang pagpasaylo ingon og malisod, hunahunaa ang pagrebyo sa tambag ni Elder Gerrit W. Gong sa ulahing unom ka parapo sa iyang mensahe nga “Malipayon ug Kahangturan” (Liahona, Nob. 2022, 85). Unsa ang imong makita nga maghatag kanimo og paglaom nga ikaw makapasaylo?

Tan-awa usab sa Doktrina ug ma Pakigsaad 64:9–11; “Forgiveness: My Burden Was Made Light” [“Pagpasaylo: Akong Palas-anon Nahimong Magaan”] (video), Gospel Library.

8:26

Ang mga panalangin ni Jacob ngadto sa iyang kaliwatan naglangkob ug tataw nga paghulagway, apan kini dili sayon nga masabtan. Sa mapasalamatong paagi, ang gipahiuli nga ebanghelyo naghatag kanato og pipila ka pagtabang. Kon imong basahon ang panalangin ngadto ni Jose diha sa Genesis 49:22–26, basaha usab ang mosunod nga mga bersikulo, ug tan-awa unsa nga mga panabot ang gihatag niini: 1 Nephi 15:12; 2 Nephi 3:4–5; Jacob 2:25; Doktrina ug mga Pakigsaad 50:44.

Samtang ikaw nagbasa mahitungod sa panalangin ni Juda diha sa Genesis 49:8–12, hinumdomi nga si Jesukristo usa ka kaliwat ni Juda. Unsa ang imong makaplagan niini nga mga bersikulo nga magpahinumdom kanimo sa Manluluwas? (tan-awa usab sa Gipadayag 5:5–6, 9; 1 Nephi 15:14–15; Doktrina ug mga Pakigsaad 45:59; 133:46–50).

Ang pagbasa niini nga mga panalangin tingali makapadasig kanimo sa pagrebyo sa imong patriyarkal nga panalangin—o, kon wala ka pa niini, nga modawat og usa. Unsa nga mga pulong ug hugpong sa pulong diha sa imong panalangin ang nagpahinumdom kanimo ni Jesukristo?

Tan-awa usab Randall K. Bennett, “Ang Imong Patriyarkal nga Panalangin—Dinasig nga Direksiyon gikan sa Langitnong Amahan,” Liahona, Mayo 2023, 42–44.

Bisan kon dili kini klaro samtang nagsinati siya niini, sa kataposan si Jose nakahimo sa paghinumdom sa iyang kalisod didto sa Ehipto ug nakakita nga “tuyo kini sa Dios alang sa kaayohan” (Genesis 50:20). Kon nakabisita pa lamang kita ni Jose samtang didto siya sa gahong o sa bilanggoan, sa unsang paagi kaha nimo siya hupayon? Unsaon nga makatabang kanimo ang Genesis 50:19–21 sa imong mga panahon sa pagsulay?

Tan-awa usab ang Doktrina ug mga Pakigsaad 122; “Unsa Kalig-on ang Tukuran,” Mga Himno, nu. 44.

Samtang imong basahon ang Genesis 50:24–25 ug ang Hubad ni Joseph Smith, Genesis 50:24–38 (sa apendiks sa Biblia), pamalandonga nganong importante alang kang Jose nga mahibaloan ang mahitungod ni Moises ug Joseph Smith daghang mga siglo nga nag-una. Giunsa pagtuman ni Joseph Smith ang mga panagna ni Jose mahitungod kaniya? (tan-awa ang Doktrina ug mga Pakigsaad 1:17–23; 20:7–12; 39:11; 135:3).

• Mahimong malingaw ang imong mga bata sa pagdrama sa istorya ni Jose nga nahiusa sa iyang pamilya (tan-awa diha sa Genesis 42–44). O mahimo silang mogamit sa “Jose ug ang Gutom” (diha sa Mga Istorya sa Daang Tugon, 57–60) o mga hulagway dinhi niini nga latid aron itudlo ang istorya ngadto sa usag usa. Ania ang pipila ka pangutana nga makatabang sa imong mga bata nga makakat-on gikan sa istorya:

  • Unsa ang gibuhat ni Jose aron ipakita ang gugma alang sa iyang pamilya? (tan-awa sa Genesis 45:4–15).

  • Nganong imong gibati nga pasayloon ni Jose ang iyang mga igsoon?

  • Unsa sa imong hunahuna ang gibati sa mga igsoon ni Jose sa dihang nahibaloan nila nga gipasaylo sila ni Jose? Kinsa sa imong kinabuhi ang nanginahanglan nga pasayloon? Sa unsang paagi ikaw mapakita og gugma ug pagpasaylo?

  

  2:26

• Ikaw o ang imong mga bata mahimo nga gustong mopakigbahin og kasinatian sa dihang mipasaylo sila sa usa ka tawo o sa dihang ang usa ka tawo mipasaylo kanila. Mahimo dayon kamong manganta og usa ka awit sama sa “Maghigugmaay” (Songbook sa mga Bata, 74) o “Tabangi Ko, Mahal nga Amahan” (Songbook sa mga Bata, 52).

• Ikaw ug ang imong mga bata makahimo sa pagtan-aw sa hulagway ni Jacob nga nagpanalangin sa iyang anak nga mga lalaki sa kataposan niini nga latid ug maghisgot kon unsa ang nahitabo (tan-awa diha sa Genesis 48:8–9). Kon kinahanglan, ipasabot nga si Jacob, ang amahan ni Jose, gusto nga mohatag og mga panalangin sa pagkapari ngadto sa iyang pamilya. Tingali ikaw makahimo sa pagpakigbahin sa usag usa ang bisan unsa nga kasinatian nga ikaw aduna nga nakadawat og tabang gikan sa Dios pinaagi sa usa ka panalangin sa pagkapari. Unsa ang pipila ka rason nga mangayo kita og panalangin sa pagkapare?

• Unsaon nimo nga makatabang sa imong mga bata nga makakita sa Manluluwas diha sa istorya ni Jose nga nagluwas sa iyang pamilya gikan sa gutom? Sulayi ang paghimo og usa ka tsart nga adunay duha ka kolum nga ginganlan og Jose ug Jesukristo. Tabangi ang imong mga bata sa pagsiksik sa mosunod nga mga pares sa mga kasulatan ug isulat diha sa tsart ang mga butang nga komon nila ni Jose ug ni Jesus: Genesis 37:3 ug Mateo 3:17; Genesis 37:26–28 ug Mateo 26:14–16; Genesis 45:5–7 ug Lucas 4:18; ug Genesis 47:12 ug Juan 6:35.

• Pangutan-a ang imong mga bata kon unsay ipasabot sa pagluwas o pagsalbar og usa ka tawo. Kon bisan kinsa kanila adunay kasinatian nga naluwas o nasalbar gikan sa peligro, dapita sila sa pagpakigbahin. Giunsa ni Jose sa pagluwas ang iyang igsoong mga lalaki? (tan-awa sa Genesis 42:1–3; 45:5–7). Dayon makahimo ka sa pagtan-aw sa usa ka hulagway sa Manluluwas ug pangutan-a ang imong mga bata kon giunsa kita pagluwasa ni Jesus.