Genesis 37–41

Matag karon ug unya, ang maayong kapalaran ingon og mibiya ni Jose, apan ang Ginoo wala gayod. Samtang ikaw nagbasa sa istorya ni Jose, pamalandonga ang mga pangutana sama niini: Unsa ang gibuhat ni Jose sa pagpabilin nga maduol ngadto sa Ginoo? Giunsa nga “uban kaniya” ang Ginoo? (tan-awa diha sa Genesis 39; 40:1–19; 41:9–45). Unsa ang imong makat-onan gikan sa istorya ni Jose nga makatabang kanimo sa pag-ila sa presensya sa Ginoo diha sa imong kinabuhi?

Mahimo ka usab nga mangutana og susama nga mga pangutana mahitungod sa imong kinabuhi. Unsa nga ebidensya ang imong nakita nga ang Ginoo wala mobiya kanimo sa mga panahon sa pagsulay? Hunahunaa kon unsaon nimo pagpakigbahin ang imong mga kasinatian ngadto sa mga sakop sa pamilya ug sa umaabot nga mga henerasyon (tan-awa sa 1 Nephi 5:14).

Sa tinuod, ikaw adunay mga pagsulay sa umaabot. Unsa ang imong mahimo karon sa pagtabang nga masiguro nga kini nga mga pagsulay dili makapalayo kanimo sa Ginoo? Hunahunaa ang pagsulat og usa ka sulat sa pag-awhag sa imong kaugalingon sa umaabot nga magpabiling duol Kaniya bisan unsay mahitabo. Mahimong apilan nimo og mga panabot gikan sa kinabuhi ni Jose o gikan sa mensahe ni Elder D. Todd Christofferson nga “Ang Atong Relasyon sa Dios” (Liahona, Mayo 2022, 78–81).

Tan-awa usab sa Juan 14:18; Mga Taga-Roma 8:28; Alma 36:3; Doktrina ug mga Pakigsaad 121:7–8; “Ubani Ako!,” Mga Himno, nu. 97.

Si Jose adunay gasa sa pag-ila sa mga mensahe gikan sa Ginoo pinaagi sa mga damgo. Unsa ang imong makat-onan gikan sa Genesis 37:5–11; 40:5–8; 41:14–25, 37–38 mahitungod sa pagdawat ug pagsabot sa pagpadayag gikan sa Ginoo? Sama pananglit, unsa ang imong nakat-onan gikan sa ehemplo ni Jose sa dihang ang pagpadayag ingon og malisod nga sabton? (tan-awa sa Genesis 40:8; 41:16).

Pamalandonga giunsa sa Ginoo pagpadayag sa Iyang kabubut-on nganha kanimo. Unsa ang imong gibuhat sa paglihok sa pagpadayag nga gihatag sa Niya kanimo? Giunsa nimo pagpangayo og dugang nga paggiya gikan Kaniya?

Kon maghatag og tambag si Jose kabahin sa paglikay sa tintasyon sa paghimo og sala sa pakighilawas, unsa sa imong hunahuna ang iyang isulti? Hunahunaa kini samtang ikaw magbasa mahitungod sa iyang kasinatian diha sa Genesis 39. Pananglitan, hunahunaa kon giunsa kaha pagtubag ni Jose ang mga kabalaka nga sama niini:

• Kon walay lain nga nahibalo unsay akong gibuhat, nganong problemahon ni? (tan-awa diha sa mga bersikulo 8–9).

• Naningkamot ako sa pagsukol, apan ang tintasyon ingon og dili mohunong (tan-awa diha sa bersikulo 10).

• Unsa ang akong kinahanglang buhaton sa panahon nga ako anaa sa sitwasyon diin ang tintasyon kusog? (tan-awa diha sa bersikulo 12).

Unsaon nimo pagpasabot kon nganong importante ang pagsunod sa balaod sa kaputli? (tan-awa ang Alang sa Kalig-on sa Kabatan-onan: Usa ka Giya alang sa Paghimo og mga Pagpili, 23–28).

Ang panig-ingnan ni Jose, sa tinuod, magamit ngadto sa ubang mga matang sa tintasyon. Maghinumdom sa ehemplo ni Jose, paghunahuna sa paghimo og plano alang sa paglikay ug pagbatok sa tintasyon. Pananglitan, makahimo ka sa paghunahuna og usa ka tintasyon ug sa pagsulat og mga sitwasyon nga likayan ug unsaon nimo ang “pagpalayo” kon moabot ang tintasyon.

Ania ang ubang mga kasulatan nga makatabang sa imong plano. Unsa ang imong makat-onan gikan sa matag usa mahitungod kon unsaon nga ang Manluluwas makatabang kanimo sa pagbatok sa tintasyon? Mateo 4:1–11; 1 MGa Taga-Corinto 10:13; 1 Nephi 15:23–24; 3 Nephi 18:17–18.

Samtang ikaw naghimo sa imong plano, mahimong makatabang usab nga hunahunaon ang mga higayon sa miaging panahon diin malampuson kang milikay o mibatok sa tintasyon. Giunsa ka pagtabang sa Manluluwas? (tan-awa diha sa 2 Nephi 4:18–33).

Ang paghubad ni Jose sa damgo sa Paraon miresulta sa usa ka maalamon ug praktikal nga tambag nga mabuhi sa panahon sa gutom (tan-awa diha sa Genesis 41:15–57). Pamalandongi kon unsang espirituwal nga mga mensahe ang mahimong ihatag sa Ginoo alang kanimo dinhi niini nga istorya. Unsa ang imong gibati nga Siya gusto kanimo nga mangandam alang sa mga kalisod sa imong umaabot?

Tan-awa usab sa David A. Bednar, “Kita Mosulay Kanila Dinhi,” Liahona, Nob. 2020, 8–11.

• Ang pagbasa mahitungod sa dili maayong mga pagbati sa pamilya ni Jose makaaghat og usa ka panaghisgot mahitungod sa unsaon nato pagtagad ang mga sakop sa pamilya. Sa pagsaysay sa istorya ni Jose ug sa iyang mga igsoon gikan diha sa Genesis 37, mahimo nimong gamiton ang mga hulagway dinhi niini nga latid o sa “Dinasig nga mga Damgo ni Jose” (diha sa Mga Istorya sa Daang Tugon, 54–57). Tugoti ang imong mga bata sa pagpakigbahin og mga detalye nga ilang nahibaloan mahitungod sa istorya. Mahimo nimo nga hangyoon ang imong mga bata nga maghanduraw sila nga apil sa pamilya ni Jose. Unsa kaha ang ilang isulti o buhaton aron mahimong usa ka tigpasiugda ug kalinaw sa pamilya? Pananglitan, unsa ang buot ipasabot sa “pagsulti nga malinawon” sa atong pamilya? (bersikulo 4). Sa unsang paagi si Jesukristo tigpasiugda og kalinaw sa pamilya sa Dios?

  

  2:17

• Kon ang imong mga bata makasinati ug malisod nga panahon, kinahanglan nilang mahibalo nga ang Ginoo mag-uban kanila, sama nga Siya nag-uban ni Jose. Tingali makatabang ka sa imong mga bata sa paghimo og lista sa lisod nga mga butang nga nahitabo ngadto ni Jose (tan-awa sa Genesis 37:23–28; 39:20; o “Dinasig nga mga Damgo ni Jose” ug “Jose sa Ehipto,” sa Mga Istorya sa Daang Tugon, 50–53 , 54–57). Human sa matag kalisdanan nga ilang makita, dapita ang imong mga bata nga mousab sa pagsulti, “Ang Ginoo nag-uban ni Jose” (Genesis 39:2).

  

  2:17

  

  2:50

• Tingali ang imong mga anak makasiksik diha sa Genesis 39:1–3, 20–23 alang sa matag higayon nga makita ang hugpong nga pulong nga “Ang Ginoo nag-uban ni Jose” ug mga susama nga hugpong sa mga pulong. Hangyoa sila sa pagpakigbahin kon unsa sa ilang hunahuna ang kahulogan niini nga hugpong sa mga pulong. Unsaon nato pagkahilabo nga ang Ginoo nag-uban kanato? Istoryahi ang usag usa mahitungod sa unsay imong gibati nga ang Dios nag-uban kanimo atol sa usa ka mahagitong panahon.

• Ania ang usa ka leksiyon gamit ang butang nga makatabang sa imong mga bata sa pagsunod sa panig-ingnan ni Jose sa pag-ikyas gikan sa asawa ni Potiphar: Gamita ang duha ka magnet sa pagrepresentar ni Jesukristo ug Satanas. Gamita ang usa ka gamay nga metal nga butang, sama sa paper clip, pagrepresentar kanato. Dayon pakit-a ang imong mga bata kon giunsa ang impluwensya sa magnet diha sa metal nga butang ka mas kusgan kon ibalhin nila ang butang nga mas duol niini. Giunsa sa kasinatian ni Jose diha sa Genesis 39:7–12 pagpakita niini nga kamatuoran? Unsa ang atong mabuhat sa pagpalayo gikan sa sala ug mas maduol ni Jesus? Ang bidyo nga “Temptation Fades as We Seek Christ in Every Thought” [Tintasyon Mawagtang samtang Maningkamot Kita ni Kristo sa Matag Hunahuna (Librarya sa Ebanghelyo) ug usa ka awit sama sa “Nagkinahanglan Ko Nimo sa Matag Takna” (Mga Himno, nu. 54) makatabang niini nga panaghisgot.

  

  2:58

  Paggamit og musika. “Ang mga himno ug sagradong mga awit makatabang sa mga bata nga mobati sa gugma sa Dios, mobati sa Espiritu, ug mokat-on sa mga kamatuoran sa ebanghelyo. Ang mga melodiya, mga ritmo, ug yano nga mga garay makatabang sa mga bata sa paghinumdom sa mga kamatuoran sa ebanghelyo sa mga katuigan nga moabot. Samtang kamo mokanta uban sa mga bata, tabangi sila sa pagdiskobre ug pagsabot sa mga baroganan nga gitudlo diha sa mga awit” (Pagtudlo sumala sa Pamaagi sa Manluluwas, 32).

• Tabangi ang imong mga bata sa paghunahuna sa mga tintasyon nga mahimo nilang masinati. Ipa-role-play nila kon unsaon nila ang “pag-ikyas” gikan niini nga mga tintasyon.