Pasko sa Pagkabanhaw

Daghang mga tudling diha sa Daang Tugon nagtudlo ngadto sa pangalagad ug maulaong sakripisyo sa Manluluwas. Ang lista sa ubos naglista sa pipila niini nga mga tudling. Samtang ikaw nagbasa niini nga mga bersikulo, unsa nga mga pagbati ang moabot kanimo mahitungod sa Manluluwas?

Ang mga panagna ug mga pagtulun-an mahitungod sa Manluluwas gani mas daghan pa ug tataw diha sa Basahon ni Mormon. Hunahunaa giunsa paglig-on ang imong hugot nga pagtuo pinaagi niini nga mga tudling nga sama niini: 1 Nephi 11:31–33; 2 Nephi 25:13; Mosiah 3:2–11; Alma 7:10–13.

Mga propeta sa ulahing mga adlaw nagpadayon sa paghatag og gamhanang saksi ni Jesukristo ug sa Iyang maulaong misyon. Samtang kamo maminaw ngadto sa kinatibuk-ang komperensiya niining hinapos nga semana sa Pasko sa Pagkabanhaw, timan-i ang mga pagpamatuod kabahin ni Kristo nga imong madungog. Unsa ang gitudlo niini kanimo mahitungod Kaniya?

Ang Pasko sa Pagkabanhaw usa ka malipayong panahon, tungod kay kini panahon sa pagsaulog sa Pag-ula ug Pagkabanhaw sa Manluluwas. Ug gani, bisan sa panahon sa Pasko sa Pagkabanhaw, adunay daghang tawo kinsa wala mobati nga malipayon tungod sa nagkalainlaing mga rason. Unsa ang imong mahimo sa pagpakaylap sa kalinaw sa Manluluwas niining Pasko sa Pagkabanhaw?

Usa ka ideya mao ang pagpangita og mga mensahe diha sa mga kasulatan mahitungod sa kalinaw ug hingpit nga kalipay nga gitanyag ni Jesukristo, sama niini: Salmo 16:8–11; 30:2–5; Isaias 12; 25:8–9; 40:28–31; Juan 14:27; 16:33; Alma 26:11–22. Hunahunaa kon unsaon nimo pagpakigbahin kini nga mga mensahe ngadto sa uban. Sama pananglit, tingali ikaw makamugna nga makigbahin og mga kard sa Pasko sa Pagkabanhaw gibase diha niini nga mga mensahe. Pagmainampoon mahitungod kon kinsa ang nanginahanglan nga padawaton sa imong pahalipay sa Pasko sa Pagkabanhaw. Mahimo ka usab nga mohukom sa pagpakigbahin sa imong mga mensahe diha sa social media, diin daghang tawo makakita niini.

Mga himno mahitungod ni Kristo ug sa Pagkabanhaw, sama sa “Siya Nabanhaw!” (Mga Himno, nu. 118), makatabang usab kanato nga mobati og kalinaw ug hingpit nga kalipay sa Pasko sa Pagkabanhaw. Pangita og mga hugpong sa mga pulong diha sa himno nga, sa imong opinyon, nakahatag sa hingpit nga kalipay sa Pasko sa Pagkabanhaw.

Tan-awa usab sa Jeffrey R. Holland, “Dili Sama sa Hinatagan sa Kalibotan,” Liahona, Mayo 2021, 35–38; Mark S. Palmer, “Mahimong Kalipay ang Atong Kaguol,” Liahona, Mayo 2021, 88–90.

Aniay usa ka kalihokan nga makatabang kanimo sa pagtan-aw sa daghang panalangin nga moabot pinaagi ni Jesukristo ug sa Iyang Pag-ula. Basaha ang mga kasulatan sa ubos mahitungod sa unsay mga gitabang ni Jesukristo kanato sa pagbuntog. Sulayi ang paghan-ay sa mga tudling ngadto sa mga kategoriya nga: sala, kamatayon, mga pagsulay, ug mga kahuyang (pipila ka tudling mahimong mohaom sa labaw sa usa ka kategoriya). Samtang ikaw magbasa, unsa nga mga pagbati ikaw aduna mahitungod sa gahom sa Manluluwas?

• Isaias 61:1–3

• Ezequiel 36:26–28

• Mateo 11:28–30

• Lucas 1:46–55

• Mga Taga-Roma 8:35–39

• Alma 7:10–13

• Alma 11:42–45

• Alma 58:11

• Moroni 10:32–33

• Doktrina ug mga Pakigsaad 19:15–19

• Moises 5:9–12

Unsaon nimo sa pagpasabot ngadto sa usa ka higala kinsa dili Kristiyano kon nganong si Jesukristo importante nganha kanimo? Mensahe ni Elder Ahmad S. Corbitt “Nahibalo Ka Ba Ngano Ako isip usa ka Kristiyano Nagtuo ni Kristo?” (Liahona, Mayo 2023, 119–21) makatabang.

Tan-awa usab Reyna I. Aburto, “Ang Lubnganan Walay Kadaugan,” Liahona, Mayo 2021, 85–87; Mga Hilisgotan ug mga Pangutana, “Pag-ula ni Jesukristo,” “Pagkabanhaw,” Librarya sa Ebanghelyo.

Unsa ang imong makat-onan gikan sa mosunod nga mga bersikulo mahitungod sa gibayad ni Jesukristo alang sa imong kaluwasan: Isaias 53:3–5; Mosiah 3:7; Doktrina ug mga Pakigsaad 19:16–19? Unsa ang bili nga gibayad sa atong Langitnong Amahan? (tan-awa sa Juan 3:16).

• Ang semana sa Pasko sa Pagkabanhaw usa ka maayong panahon sa pagtudlo sa imong mga bata mahitungod sa unsay gibuhat sa Manluluwas alang kanato diha sa Getsemani ug diha sa krus. Makasugod ka pinaagi sa pagpakita kanila sa mga hulagway sa ubos ug sa pagpasulti kanila mahitungod sa unsay nahitabo diha sa mga hulagway. Samtang ang imong mga bata nagtan-aw sa mga hulagway, makabasa ka sa mga bersikulo nga naghulagway niini nga mga panghitabo (tan-awa diha sa Mateo 26:36–46; 27:35–50; Lucas 22:39–46; Juan 19:16–30). Ang imong mga bata makatudlo og mga detalye diha sa mga larawan nga ilang nadungog diha sa mga bersikulo.

• Giunsa kita pagpanalangin tungod sa sakripisyo ni Jesus alang kanato? Tabangi ang imong mga bata sa pagpangita sa mga pulong ug mga hugpong sa mga pulong nga nagtubag niini nga pangutana diha sa Isaias 53:4–12; Alma 7:11–13; ug Doktrina ug mga Pakigsaad 19:16–19. Pagpakigbahin sa usag usa kon unsa ang imong gibati mahitungod sa Manluluwas human mabasa kining mga kasulatan.

• Makagamit ka sa pahina sa kalihokan niini nga semana o sa ubang mga hulagway niini nga latid sa pagsulti sa imong kabataan sa istorya sa Pagkabanhaw (tan-awa usab ang “Si Jesus Nabanhaw,” diha sa Mga Istorya sa Bag-ong Tugon, 139–44). Dayon paistoryaha og balik ang imong mga bata sa istorya nganha kanimo.

• Hunahunaa kon unsaon nimo pagtabang sa imong mga bata sa pagkakaplag og hingpit nga kalipay diha ni Kristo niining Pasko sa Pagkabanhaw. Sama pananglit, makakanta kamo og dungan sa usa ka kinaham nga himno sa Pasko sa Pagkabanhaw, ingon sa “Kristo Nabanhaw Karon” (Mga Himno, nu. 119) o “Getsemani” (Librarya sa Ebanghelyo). Sa pagpangita sa ubang mga awit mahitungod sa Pagkabanhaw, makapangita ka diha sa indeks sa mga hilisgotan sa Mga Himno ug Songbook sa mga Bata. Ikaw ug ang imong mga bata makahimo sa pagpakigbahin ngadto sa usag-usa kon nganong kamo gusto niini nga mga awit ug giunsa ninyo pagbati sa dihang gikanta ninyo kini. Unsay gitudlo niini nga mga awit kanato mahitungod sa Langitnong Amahan ug ni Jesukristo?

• Ang Librarya sa Ebanghelyo adunay koleksyon sa mga Bidyo sa Pasko sa Pagkabanhaw nga ang imong mga bata mahimong malingaw. Tingali makapapili ka kanila og usa nga tan-awon. Pangutan-a sila kon unsay ilang nakat-onan mahitungod ni Jesukristo gikan sa bidyo. Mahimo ka usab mohangyo kanila sa pag-summarize sa mensahe sa bidyo ngadto sa usa ka kapahayag.

• Samtang ikaw ug ang imong mga bata magtan-aw sa kinatibuk-ang komperensiya og dungan niining hinapos nga semana sa Pasko sa Pagkabanhaw, tabangi sila sa pagmatikod kon ang talagsaong mga saksi sa Manluluwas nagpamatuod kabahin sa Pagkabanhaw. Tingali makahimo ka og usa ka dula kabahin niini—dapita sila sa pagtindog sa matag higayon madungog nila ang mga pulong sama sa Pasko sa Pagkabanhaw o Pag-ula o Pagkabanhaw. Pakigbahin ngadto sa usag usa kon nganong ikaw mapasalamaton alang mga pagpamatuod sa buhing mga propeta kabahin sa Manluluwas.