Exodo 14–18

Samtang ikaw nagbasa sa Exodo 14:1–10, handurawa kon unsa kaha ang gibati sa mga Israelita samtang ilang nakita ang kasundalohan ni Paraon nga nagkaduol. Tingali gibati nimo nga ikaw nanginahanglan og milagro aron maluwas sa usa ka malisod nga hagit nga imong giatubang. Unsa ang imong nakaplagan diha sa Exodo 14:13–31 nga nagdasig kanimo sa pagtinguha sa gahom sa Dios diha sa imong kinabuhi? Pamalandonga kon giunsa nimo pagkakita sa Iyang gahom sa nanglabay nga panahon. Unsa ang imong nakat-onan mahitungod Kaniya gikan niini nga mga kasinatian?

Ang Exodo 15:1–19 mao ang usa ka awit sa pagdayeg nga gi-awit sa mga Israelita human gibahin sa Ginoo ang Pulang Dagat. Hain nga mga hugpong sa mga pulong niini nga awit ang imong nakita nga ilabi ka makahuloganon? Tingali adunay usa ka himno nga gusto nimong kantahon kon ang Ginoo nakabuhat og talagsaong butang alang kanimo, sama sa “Manunubos sa Israel” (Mga Himno, nu. 6). Hunahunaa ang pagkanta o pagpaminaw ngadto niini isip kabahin sa imong pagsimba karong adlawa.

Tan-awa usab sa Doktrina ug mga Pakigsaad 8:2–3.

Ang pagbasa bahin sa panaw sa Israel mahimong makapahunahuna kanimo mahitungod sa mga butang sa imong kinabuhi nga ingon og “pait” sama sa tubig sa Mara (tan-awa diha sa Exodo 15:23–27). Giunsa sa Ginoo paghimo ang mga pait nga butang sa imong kinabuhi nga matam-is? Unsa ang bili niini nga mga kasinatian diha sa imong kinabuhi?

Makabantay ka og daghang mga ehemplo sa pait nga mga kasinatian alang sa mga Israelita diha sa Exodo 16 ug 17. Makatintal ang manaway sa ilang pagbagulbol o pagreklamo, apan samtang nagbasa ka, hunahunaa kon nakabuhat ka ba sukad og sama nga butang. Unsa ang imong nakat-onan gikan sa mga kasinatian sa mga Israelita nga makatabang kanimo nga dili kaayo magbagulbol ug mas mosalig diha sa Dios? Unsa ang gitudlo niini nga mga bersikulo kanimo mahitungod sa Dios?

Tan-awa usab sa 1 Nephi 2:11–12.

Kay kitang tanan nanginahanglan nga mokaon, ang Ginoo sagad nagtandi sa espirituhanong mga butang ngadto sa pagkaon. Pangita alang sa Iyang espirituhanon nga mga leksiyon diha sa mga kasinatian sa mga Israelita sa mana diha sa Exodo 16. Sama pananglit, unsa ang imong makaplagan sa panudlo sa Ginoo diha sa Exodo 16:16, 19, 22–26 nga magamit nganha sa imong espirituhanong pagkaon?

Aron masuta ang ubang mga leksiyon nga gusto sa Ginoo nga imong makat-onan gikan niini nga milagro, pamalandonga ang mga pangutana sama niini:

• Unsa ang gihatag sa Ginoo kanako nga sama sa inadlaw nga mana nga Iyang gihatag sa mga Israelita?

• Unsay akong mabuhat nga susama sa pagpamonit og mana?

Mahimong makakaplag ka og dugang nga mga panabot sa usa o labaw pa niini nga mga bidyo: “Daily Bread: Pattern,” “Daily Bread: Experience,” ug “Daily Bread: Change” (Gospel Library).

2:52

3:12

3:0

Hunahunaa ang uban pang mga butang, gawas sa pagkaon, nga imong gibuhat sa matag-adlaw. Ngano nga ang ubang mga butang kinahanglang buhaton sa matag-adlaw aron mahimong epektibo? Unsa ang imong gibati nga nadasig buhaton sa pagpaninguha og matag adlaw nga espirituhanong mga kasinatian?

Tan-awa usab sa Dieter F. Uchtdorf, “Inadlaw nga Pagpahiuli,” Liahona, Nob. 2021, 77–79; “Daily Restoration” (video), Gospel Library.

5:27

Paghunahuna mahitungod sa Manluluwas samtang ikaw nagbasa sa Exodo 17:1–7. Sa unsa nga paagi si Jesukristo sama sa usa ka bato nganha kanimo? (tan-awa sa Salmo 62:6–7; Helaman 5:12). Sa unsa nga paagi Siya sama sa tubig? (tan-awa sa Juan 4:10–14; 1 Mga Taga-Corinto 10:1–4; 1 Nephi 11:25).

Adunay mga panahon sa imong kinabuhi nga ikaw mahimong magpakisama ngadto ni Moises—kon ang ubang mga tawo nagsalig kanimo, apan ang imong “mga kamot [mobati] og kabug-at” (Exodo 17:12). Sa uban nga mga higayon, mahimo ka nga mas sama ni Aaron, Hur, ug Jetro, nga nagsuporta ni Moises. Ibutang ang imong kaugalingon diha sa kahimtang sa matag usa niini nga mga tawo samtang nagbasa ka sa Exodo 17:8–16; 18:13–26, ug tan-awa kon unsa ang itudlo sa Ginoo kanimo mahitungod sa Iyang buluhaton.

Tan-awa usab sa Mosiah 4:27; 18:8–9.

• Sa dihang gibahin sa Ginoo ang Pulang Dagat, nakita ni Moises ug sa mga Israelita kon unsa Siya ka gamhanan. Patabanga ang imong mga bata kanimo sa paghunahuna og makalingaw nga paagi aron dulaon ang istorya gikan sa Exodo 14:5–22 (tan-awa usab sa “Ang Pagpalabay” diha sa Mga Istorya sa Daang Tugon, 70–74). Tingali makapahimutang mo og mga lingkuranan o mga habol ug “bahinon” kini sama sa Pulang Dagat. Unya, mahimo ninyong ipakigbahin sa usag-usa kon giunsa ninyo pagkakita sa gahom sa Dios diha sa inyong mga kinabuhi.

  

  2:54

• Unsa ang gikadugang sa Doktrina ug mga Pakigsaad 8:2–3 diha sa atong pagsabot sa istorya sa Exodo 14? Hunahunaa ang pag-istorya sa imong mga bata mahitungod sa usa ka kasinatian dihang ang Espiritu Santo misulti kanimo og usa ka butang nga diha sa imong hunahuna o kasingkasing, ug dapita sila sa pagsulti mahitungod sa ilang mga kasinatian. Mahimo usab kamong mokanta og usa ka awit bahin sa Espiritu Santo, sama sa “Paggiyaha ang Espiritu” (Mga Himno, nu. 85).

• Tingali kamo ug ang imong mga bata makahimo sa pag-inom og usa ka butang nga tam-is ug usa ka butang nga pait samtang nagtuon sa Exodo 15:22–25 og dungan. Giunsa sa Manluluwas paghimo sa “pait” nga mga kasinatian sa atong kinabuhi nga “matam-is”?

• Samtang ikaw ug ang imong mga bata nagbasa sa Exodo 15:23–25; 16:14–15; 17:1–6, patabanga sila kanimo sa pagpangita og mga butang nga makatabang sa pagsaysay sa matag istorya—sama sa usa ka sanga (aron sa pag-ayo sa tubig sa Mara), usa ka garapon o kulon (aron pun-on og mana), ug usa ka bato (alang sa tubig sa Horeb). Giunsa niini nga mga istorya pagpahinumdom kanato mahitungod sa unsay nabuhat ni Jesukristo alang kanato? Isip kabahin sa inyong panaghisgot, kamo mahimong mobasa sa Mateo 7:24–27; Juan 4:10–14; 6:29–35, 48–51; Helaman 5:12; Doktrina ug mga Pakigsaad 20:77, 79.

• Samtang nagbasa ka sa Exodo 17:8–16, makahimo ka sa pagdapit og usa ka bata sa pagpataas sa iyang mga kamot sa kahanginan. Kon gikapoy na ang bata, ang ubang mga bata makatabang, sama sa pagtabang ni Aaron ug Hur ni Moises. Unsa ang gitudlo niini nga istorya mahitungod kon unsaon nato nga makatabang sa gingharian sa Dios nga magmalampuson? Mahimo usab nimong basahon ang Exodo 18:13–26 ug maghisgot mahitungod sa bug-at nga mga responsibilidad sa mga tawo kinsa nagaserbisyo sa inyong ward. Unsay atong mabuhat karon sa pagtabang sa atong mga lider sa Simbahan, sama lamang nga si Aaron ug si Hur mitabang sa propeta nga si Moises?