Exodo 19–20; 24; 31–34

Si Presidente Russell M Nelson mitudlo: “Diha sa Daang Tugon, ang pulong nga Hebreohanon diin ang talagsaon gihubad og segullah, nga nagkahulugan og ‘bililhon nga kabtangan,’ o ‘bahandi.’ … Aron kita mailhan sa mga sulugoon sa Ginoo isip iyang talagsaon nga mga katawhan mao ang usa ka labing taas nga pagdayeg” (“Children of the Covenant,” Ensign, Mayo 1995, 34). Giunsa pag-apekto sa mga pulong ni Presidente Nelson ang paagi sa imong pagsabot sa Exodo 19:3–6?? Giunsa sa pagpakita sa Ginoo kanimo nga Siya nagmahal nimo?

Ang Ginoo misulti ni Moises nga ang mga anak sa Israel nagkinahanglan nga paandamon sa dili pa sila makahimo sa “pagsugat sa Dios” (Exodo 19:10–11, 17) ug maghimo og pakigsaad uban Kaniya (tan-awa sa Exodo 19:5). Unsaon nimo pag-andam alang sa mga espirituhanong kasinatian, lakip na ang sakramento ug mga ordinansa sa templo? Unsaon nimo sa pagtabang sa uban nga maandam? Unsa ang imong makat-onan mahitungod sa pag-andam gikan sa Lucas 6:12–13; Enos 1:2–6; Alma 17:2–3?

Samtang ang mga Israelita nagtigom diha sa tiilan sa Bukid sa Sinai, nadungog nila ang tingog sa Dios nga naghatag sa Napulo ka Sugo (tan-awa sa Deuteronomio 4:12–13). Kini, sa tinuod, dili lamang mao ang mga sugo sa Diyos—daghan pang uban nga mga sugo diha sa mga kasulatan. Busa samtang imong basahon ang Exodo 20:1–17, pangutan-a ang imong kaugalingon ngano nga gihatagan sa Dios kining napulo og linain nga gibug-aton. Ania ang usa ka ehemplo sa talaan nga imong magamit samtang magpamalandong ka sa importansya sa Napulo ka Sugo sa imong kinabuhi:

• Unsaon ang pagsunod niining napulo ka sugo magtabang kanimo sa pagsunod sa duha ka dagkong sugo nga gihatag ni Jesus diha sa Mateo 22:34–40?

• Unsa ang mga butang nga mahimo kang matintal nga unahon kay sa Dios? Unsa nga mga panalangin ang imong nakita gikan sa pagbutang sa Dios og una?

• Unsaon nimo pagtubag ang usa ka tawo kinsa nag-ingon nga ang Napulo ka mga Sugo gihatag sa dugay na kaayong panahon nga milabay ug dili na magamit karon? Unsa nga mga pananglitan gikan sa imong kinabuhi ang imong ipakigbahin isip bahin sa imong tubag? Unsaon sa himno nga “Unsa Kalumo ang Sugo sa Dios” (Himno, nu. 71) pag-apekto sa paagi sa imong pagpasabot sa mga sugo sa Dios ngadto sa uban?

• Giunsa sa Ginoo pagtuman sa saad sa Exodo 20:6 diha sa imong kinabuhi?

Tan-awa usab sa “Ang Dakong Sugo—Higugmaa ang Ginoo,” diha sa Mga Pagtulun-an sa mga Presidente sa Simbahan: Ezra Taft Benson (2014), 43–53; Dallin H. Oaks, “Walay Lain nga mga Dios,” Liahona, Nob. 2013, 72–75; Mga Hilisgotan ug mga Pangutana, “Mga Sugo,” Librarya sa Ebanghelyo.

Samtang imong basahon ang Exodo 24:3–8, pamalandonga ang mga pakigsaad nga imong gihimo uban sa Dios. Samtang ang pakigsaad sa Israel naglakip ug mga ritwal nga lahi sa gikinahanglan sa Dios karon, mahimong mamatngonan nimo ang pipila ka pagkaparehas. Sama pananglit, ang mga bersikulo 4, 5, ug 8 naghisgot og halaran, mga pagsakripisyo og hayop, ug dugo. Unsa ang girepresentar niini nga mga butang, ug unsay kalabotan niini sa imong mga pakigsaad?

Sulayi ang pagbutang sa imong kaugalingon sa kahimtang sa mga Israelita—anaa ka sa kamingawan, si Moises wala sulod sa 40 ka adlaw, ug adunay umaabot nga panagbangi uban sa mga Canaanhanon bahin sa yutang gisaad anaa sa imong umaabot (tan-awa diha sa Exodo 32:1–8). Ngano kaha nga ang mga Israelita gusto og bulawan nga dios-dios? Unsa ang nakadasig kanimo mahitungod sa pangamuyo ni Moises ngadto sa Ginoo diha sa Exodo 33:11–17?

Samtang bug-at ang sala sa mga Israelita, kini nga istorya naglakip usab og mensahe sa Dios sa kaluoy ug pagpasaylo. Unsa ang gitudlo sa Exodo 34:1–10 kanimo mahitungod sa Manluluwas? (tan-awa diha sa Exodo 32:30–32; Mosiah 14:4–8; 15:9; Doktrina ug Mga Pakigsaad 45:3–5).

Si Presidente Russell M. Nelson mipasabot: “Niadtong mas batan-on pa ko, gitun-an nako ang trabaho sa uban nga kinsa nakahugpong og mga lista sa mga butang nga buhaton ug mga butang nga dili buhaton sa Igpapahulay. Ulahi na nakong nasayran gikan sa mga kasulatan nga ang akong binuhatan ug kinaiya panahon sa Igpapahulay naglangkob og usa ka timailhan tali kanako ug sa akong Langitnong Amahan [tan-awa sa Exodo 31:13; Ezequiel 20:12, 20]. Uban niana nga pagsabot, wala na ako magkinahanglan og mga lista sa buhaton ug dili buhaton. Kon kinahanglan nakong modesisyon kon ang usa ka kalihokan angay ba o dili angay alang sa Igpapahulay, mangutana lamang ko sa akong kaugalingon, ‘Unsa nga timailhan ang gusto nakong ihatag ngadto sa Dios?’ Kana nga pangutana nakapaklaro og maayo sa akong mga pagpili sa adlaw nga Igpapahulay” (“Ang Igpapahulay usa ka Kahimut-an,” Liahona, Mayo 2015, 130). Pamalandong kon unsa nga timailhan ang gusto nimong ihatag sa Dios pinaagi sa imong pag-obserba sa Igpapahulay.

Sa dihang milugsong si Moises gikan sa bukid, gidala niya ang balaod nga nakasulat sa mga papan nga bato. Human mahibaloi nga gilapas sa mga Israelita ang ilang pakigsaad, gipusgay ni Moises ang mga papan (tan-awa sa Exodo 31:18; 32:19). Wala madugay, ang Dios misugo ni Moises sa paghimo og laing hugpong sa mga papan nga bato ug dad-on kini og balik ngadto sa bukid (tan-awa diha sa Exodo 34:1–4). Ang Hubad ni Joseph Smith sa Exodo 34:1–2 (diha sa Giya ngadto sa mga Kasulatan) nagklaro nga ang unang hugpong sa mga papan nga bato naglakip sa mga ordinansa sa “balaan nga kapunongan” sa Dios, o sa Melchizedek nga Pagkapari. Ang ikaduhang hugpong naglakip sa “kasugoan mahitungod sa lawasnon nga kagikanan.” Ubos kini nga balaod nga gidumala sa “ubos nga pagkapari” (tan-awa diha sa Doktrina ug mga Pakigsaad 84:17–27) nga gituyo aron sa pag-andam sa mga Israelita alang sa mas taas nga balaod ug mas taas nga pagkapari aron sila makasulod ngadto sa presensya sa Dios.

• Unsaon nimo paghimo sa pagtuon mahitungod sa Napulo Ka mga Sugo nga makalingaw alang sa imong mga bata? Samtang inyong basahon ang Exodo 20:3–17 nga magdungan, patabanga ang imong mga bata kanimo sa pagpangita o sa pagdrowing og usa ka hulagway nga magrepresentar sa matag usa sa Napulo ka mga Sugo. Unya ang imong mga bata makapuli-puli sa pagpili og usa ka hulagway ug sa pagsulti mahitungod kon unsaon nga sila makapuyo niana nga sugo. Ipakigbahin sa usag usa kon unsaon ang pagpuyo niana nga sugo magdala kanimo og kalipay.

• Mahimo usab kamong mokanta og usa ka awit sama sa “Sunda ang Kasugoan” (Songbook sa mga Bata, 68–69). Tabangi ang imong mga bata sa pagpangita ug mga pulong diha sa awit nga magtudlo kanila kon nganong gusto ang Dios nga sundon nato ang Iyang mga sugo.

• Tabangi ang imong mga bata pagkat-on sa mga pulong nga “Tahuron mo ang imong amahan ug ang imong inahan” (Exodo 20:12). Mahimo nga gusto nimong ipasabot nga ang “pagtahod” og usa ka tawo nagpasabot sa pagpakita og respeto kanila o sa paghatag kanila og kalipay. Unsa ang gibuhat ni Jesus aron mapasidunggan ang Iyang mortal nga inahan ug ang Iyang Langitnong Amahan? (tan-awa sa Lucas 2:48–51; Juan 19:26–27). Tingali ang imong mga bata magpuli-pulihay sa pagpakita sa mga butang nga ilang mahimo aron mapasidunggan ang ilang mga ginikanan, samtang ang ubang mga bata motag-an kon unsa ang ilang gibuhat.

• Ang imong mga bata tingali malingaw sa pagtan-aw sa mga ehemplo sa mga timailhan—sama sa mga timailhan sa dalan o mga timailhan sa usa ka gambalay. Unsa ang mga katuyoan sa mga timailhan? Ang imong mga bata mahimong mangita sa pulong nga “timailhan” diha sa Exodo 31:13, 16–17. Unsa ang gisulti sa Ginoo nga usa ka timailhan tali kanato ug Kaniya? Pakigbahin sa usag-usa og pipila ka paagi nga ikaw ug ang imong pamilya naninguha sa pagpakita sa inyong gugma alang sa Ginoo diha sa Igpapahulay.

• Hunahunaa ang paggamit sa “Moises sa Bukid sa Sinai” (sa Mga Istorya sa Daang Tugon, 77–82) aron matabangan ang imong mga bata nga makakat-on sa istorya diha sa Exodo 32:1–8, 19–24. Nganong kini sayop alang sa mga Israelita ang pagsimba sa usa ka estatuwa kay sa Dios?

  

  2:55

• Tingali makalingaw ang paghimo og usa ka dalan diha sa salog (o pangita og usa duol sa inyong panimalay) aron ihulagway kining mga pulong gikan sa Exodo 32:8: “Sila nahisimang sa hinanali gikan sa dalan nga akong gisugo kanila.” Samtang naglakaw diha sa dalan, ang imong mga bata mahimo nga maghisgot mahitungod sa mga pagtintal nga atong giatubang aron mapahilayo gikan sa Dios. Unsa ang nagtabang kanato nga magpabilin diha sa dalan sa Dios—ug mobalik ngadto niini kon kita nahisalaag? (tan-awa diha sa Exodo 34:6–7).