Reirei ao Berita aika Tabu 3–5

I nanon moan ana mwakuri Iotebwa Timiti, a rangi ni kangaanga karekeaia raoraona aika a tamaroa—riki raoraona n aron Martin Harris, ae karineaki, nakoraoi arona are e karaoa te anganano ae korakora ni boutokaa ana mwakuri Iotebwa. Ma ngaia are ngke e anga te kariaia Martin bwa e na kaota te moan 116 n iteranibaan ana Boki Moomon ake a rairaki nakon buuna, e tangiria ni karinea ana bubuti Iotebwa, e ngae ngke e a tia n kauringaki iroun te Uea bwa e naaki karaoia. Te kananokawaki, a bua taian iteranibaa are a mena iroun Martin, ao a katuaeaki n ae matoatoa Iotebwa ao Martin iroun te Uea (taraa Aomata aika Itiaki,, 1:51–53).

Ngkai ko wareka Reirei ao Berita aika Tabu 3:1–15, iangoia bwa tera ae tangiria te Uea bwa ko na reiakinna man are a rinanona. Te katooto, tera ae ko reiakinna n taekan:

• Ana mwakuri te Atua? (taraa kiibu 1–3, 16).

• Karekean mwiin maakakin te aomata nakon onimakinan te Atua? (taraa kiibu 4–8).

• Kakabwaia ake a roko man teimatoan te kakaonimaki? (taraa kibu 8).

• Te kawai mairoun te Uea ake a kaai ni kaeta ao n kaungaa Iotebwa? (taraa kiibu 9–16).

N ana rongorongo Unimwaane Lynn G. Robbins ae “Which Way Do You Face?,” e anga katooto n tamnei irouia aomata aika a mwaiti ake a maemaeka te Atua ao aomata ake a rootaki mai irouia tabeman (Riaona, Nobembwa. 2014, 9–11). Bairea warekan katooto aikai n koroboki aika a tabuake e katerei nakon. Tera ae ko reiakinna man rongorongo aikai? Tera ae ko a tia n rinanona ike ko onimakina iai te Uea ngke ko kaitaraaki ma aroaro aika ko rootaki iai bwa ko na karaoa te waaki teuana ae kaokoro? Tera bwaai aika a riki man mwiin am mwakuri?

Taraa naba Dale G. Renlund, “Te Kainibaire ibukin Kaotioti nakon Temanna,” Riaona, Nobembwa. 2022, 16–19; “The Contributions of Martin Harris,” i nanon Revelations in Context (2016), 1–9; Atuun Rongorongo ao Titiraki, “Seeking Truth and Avoiding Deception,” Gospel Library; “How Gentle God’s Commands,” Boki n anene n Taromauri, nambwa. 125.

Mwakoro 4 e bon kaineti nakoia mitinare ake a bwanin aia tai. Ma, e rang kakaongora n ataakina bwa te kaotioti aei e anganaki Iotebwa Timiti te ikawai, are e aki weteaki nakon te mition ma e teimatoa n “tangiria ni beku nakon te Atua” (kiibu 3).

Teuana te kawai ni wareka te mwakoro aei bon iangoana n aron kabwarabwaran te mwakuri ibukin temanna are e tangiria ni ibuobuoki ma ana mwakuri te Uea. Tera ae taraia te Uea? Tera kabwaia ake E anga?

Tera ae ko reiakinna n taekan te mwakuri ibukin te Uea man te kaotioti aei?

E taekina ikotakiia Iteraera Beretitenti Russell M. Nelson bwa “te kabanea ni kangaanga ni kakaewenako, te kabanea ni korakora ni waaki, ao te kabanea ni korakora ni mwakuri i aon te aba” (“Hope of Israel” [worldwide youth devotional, Tuun 3, 2018], Gospel Library). Tera ae ko kunea n ana rongorongo are e anga ae e kaungaa nanom bwa ko na ira buakon te mwakuri aei?

Ni Maati 1829, buun Martin Harris, ae Lucy, e karina te tang n te boowi bwa e mwamwanaia aomata Iotebwa Timiti man arona ni kewe bwa aongkoa e rairii bwaatua koora (taraa Saints, 1:56–58). Ngaia are Martin e tuanga Iotebwa kakoaua riki tabeua bwa a bon koaua bwaatua koora. Reirei ao Berita aika Tabu 5 bon te kaotioti ni kaekaan ana bubuti Martin. Tera ae ko reiakinna man te mwakoro aei i aon aika a taekinaki i nano:

• Tera ae taekinna te Uea ae na kona n riki ngke a kaotaaki bwaatua koora bwa e na nooria te aonaaba (taraa Reirei ao Berita aika Tabu 5:7). Tera n am iango bwa bukin tera e riki aei?

• Te katabeaki ni kakoaua i nanon ana mwakuri te Uea (taraa kiibu 11–15; taraa naba 2 I-Korinto 13:1).

• Ko na kanga ni karekea te kakoaua man ana Boki Moomon ibukim (taraa kiibu 16, 24; taraa naba Moronaai 10:3–5).

Tera ae e reireiniko Reirei ao Berita aika Tabu 5:1–10 n taekan katabean Iotebwa Timiti i nanon ara bong—ao i nanon maiura? (Taraa naba 2 Nibwaai 3:6–24.)

• Ni moanan te marooro ibukin reiakinan onimakinan Tamara are i Karawa, ko na tangiria n manga rinanon karakinan buan iteranibaa (taraa Karaki man Reirei ao Berita aika Tabu, 18–21). Ko kona i mwiina n karaoa te kaotioti ma am ataei ni kaoti taai ake a kona n kaririaki bwa a na karaoa te bwai ae aki eti. Tera taeka ke mwakoro n taeka i nanon Reirei ao Berita aika Tabu 3:5–8; 5:21–22 aika a kona ni buokiia i nanon aaro aikai?

  

  4:39

• Ni kabane kiibu i nanon Reirei ao Berita aika Tabu 4 a kaoti koaua aika a kakawaki ake a kona ni buokiia am ataei n reiakina riki taekan te mwakuri ibukin te Atua. Aikai tabeua iango ake a kona ni buokiia ni kunei koaua aikai:

  • Kam kona ni kaai ni wareka Reirei ao Berita aika Tabu 4:1 ao ni kaotii tamnei ake a kaota ana “mwakuri ae kamiimi” te Atua ni boong aikai (n ai aroia mitinare, tembora, ao ana Boki Moomon).

  • A konaa am ataei ni iangoi mwakuri ke ni korei tamnei ni kaota te kibuntaeka “beku irouna ma nanomi, marurungimi, ami iango ao korakorami ni kabane” (Reirei ao Berita aika Tabu 4:2).

  • Kam kona ni kaai n tarai bwaai ni mwakuri ake a kabonganaaki n te tawaana ni mwakuri. A kanga bwaai ni mwakuri aikai ni kamanoira? I mwiina a kona ni kunei bwaai am ataei i nanon Reirei ao Berita aika Tabu 4:5–6 ake a titebo ma bwaai ni mwakuri ni karaoan ana mwakuri te Atua.

  • A kona ataei ake a ikawai riki n ukora Reirei ao Berita aika Tabu 4 i bon irouia ao ni karinani bwaai ake a reiakin bwa tera ae nanonaki n beku ibukin te Atua.

  • Kam kona n kaai n anenea te anene ae taekan te mwakuri ni mitinare, n aron “I Want to Be a Missionary Now” (Aia Boki n Anene Ataei, 168).

• N aron reiakinaia am ataei ibukiia taan kakoaua, ko kona n tuangiia bwa a na katamneia n aia iango bwa a tuangaki iroun raraoia bwa a kona n noora te katamwa n nakonako n waena ake mai moa. A na kakoaua anne? Ao ngkana e a manga tuangiia naba temanna aekan anne? Taekinna bwa tera te “kakoaua” ao bukin tera a kakawaki taan kakoaua. Ko kona ni buokiia am ataei n rinanon Reirei ao Berita aika Tabu 5:1–3, 7, 11 ibukin kaeka nakon titiraki n aron aikai:

  • Tera ae kan ataia Martin Harris?

  • Antai ae konaa ni kaotii nakoia bwaatua koora Iotebwa Timiti?

  • Bukin tera nooran bwaatua e na bae n aki angan temanna te kakoaua bwa e koaua ana Boki Moomon?

  • Tera ae ti kona ni karaoia bwa ti na riki bwa taan kakoaua n ana Boki Moomon? (taraa Reirei ao Berita aika Tabu 5:16; Moronaai 10:3–5).