Reirei ao Berita aika Tabu 2; Iotebwa Timiti—Rongorongo 1:27–65

Bon te bwai teuana kakoauaana bwa iai ana mwakuri te Atua ibukin Iotebwa Timiti ae na karaoia—ti kona n tanrikaaki n taraa maiuna ao nooria raoi bwa teraa ake e a tia ni kakoroi nanoia. Ma ko a tia n iangoia bwa iai ana mwakuri naba te Atua ibukim ae ko na karaoia? Ngkana ko wareka Iotebwa Timiti—Rongorongo 1:27–33, iangoia bwa tera te mwakuri anne. E kanga ni ibuobuoki nakon Kaokan ana Ekaretia te tia Kamaiu ae waaki nako?

E reirei Unimwaane Gary E. Stevenson: “Ngkana ti roko nakon Kristo ao ni buokia aomata bwa a na karaoa aekan anne, ti ira buakon ana mwakuri ni kamaiu te Atua ao ni karietataa, are e boboto i aon katabeaki mai karawa. … A bebete taian mwioko aikai, a kairaki mai ieta, a kaunganano, ao a kai karaoaki. Aikai mwiioko akanne:

• Maiuakinan ana euangkerio Iesu Kristo

• Tararuakiia naake iai kainnanoia

• Kaoakiia ni kabane bwa ana karekea te euangkerio

• Katiteuanakiia utu n te maiu ae akea tokina” (“E Bon Tamaroa—Tamaroa man Bebete,” Riaona, Nobembwa. 2021, 47).

Iangoi taneiai ake ko a tia n waaki i nanona ni karaoan mwiioko mai karawa aikai ni kabane. Tera ae tangiria te Tia Kamaiu bwa ko na karaoia i mwiina? Iai te iteranibaa n Atuun Rongorongo ao Titiraki ibukin mwiioko aikai n tatabeua (taraa “Our Role in God’s Work of Salvation and Exaltation,” Gospel Library). Ko kona ni ukorii iteranibaa aikai bwa a na buokiko ni kaekaa te titiraki aei.

Ko kona n namakinna n taai tabetai bwa e aki kona ni kabonganako te Uea ibukin kaairua ake ko a tia ni karaoia. Tera ae ko reiakinna man ake e rinanona Iotebwa Timiti i nanon Iotebwa Timiti—Rongorongo 1:28–29? Ko na kanga n ataa “teim i matan te [Atua]”?

Taraa naba “Youth Responsibility in the Work of Salvation” (witeo), ChurchofJesusChrist.org; “Te Mwakuri ni Kamaiu ao ni Karietataaki,” Aeniboki ni Kabuta, 1.2.

3:15

Ngke e kaoti Moronaai nakon Iotebwa Timiti, e taekinii tabeua taetae ni burabeti man te O Tetemanti ao te Nutetemanti, n aron Itaia 11; Mwakuri 3:22–23; ao Ioera 2:28–32. Ngkana ko wareka Iotebwa Timiti—Rongorongo 1:34–47, iangoia bwa bukin tera taetae ni burabeti aikai a rangi ni bongana bwa e na atai Iotebwa. Bukin tera a kakawaki ibukim bwa ko na atai?

Ko kona naba n warekia bwa tera ae reireia Unimwaane David A. Bednar ibukin Moronaai ngke moan kawaran Iotebwa Timiti i nanon “Ma Mwaakan te Atua ao te Mimitong ae Korakora” (Riaona, Nobembwa. 2021, 28).

13:16

Taraa naba “An Angel from on High,” Boki n Anene n Taromauri, nambwa. 13.

Ai tibwa 17 ana ririki Iotebwa Timiti ngke e moan noorii bwaatua koora. E onimakinaki ni kawakinana, ma, ni karokoa aua te ririki i mwiina. Wareka Iotebwa Timiti—Rongorongo 1:48–60, nooria bwa tera ae riki ni maiun Iotebwa n te tai anne. Tera am iango ni bwaai aika a riki aikai a katauraoia nakon ana mwakuri te Atua are e weteaki bwa e na karaoia? Tera bwaai aika ko a tia n rinanona ake a tia n riki iroum ake a katauraoiko n beku ibukin te Atua ao aomata? Tera ae e a tibwa riki ni maium ae kona ni buokiko ni katauraoiko nakon te mwakuri ni ibuobuoki nakon taai aika a na roko?

Tera taian taeka n aron “unika” “naano,” ao “raira” n te mwakoro aio are e reiakiniko ibukin ana mition Eria ao te kakabwaia ni kiingn te nakoanibonga are e kaokia? Ko kanga n namakina nanom bwa e rairaki nakoia am bakatibu? Iangoi kawai ake ko konaa n rinanon te namakin ae ai aron akanne ni katoa tai. Kakaeakiia ami bakatibu ake a tia ni mate ao ni karaoi otenanti ibukiia n te tembora bon te kawai teuana (taraa FamilySearch.org). Tera katooto riki tabeua aika ko kona n iangoi?

Taraa naba Reirei ao Berita aika Tabu 110:13–16; Gerrit W. Gong, “Te Kukurei ae Akea Tokina,” Riaona, Nobembwa. 2022, 83–86.

• Ti bane ni kona n namakinna n tabetai bwa “ti kabuakaakaki ibukin [ara] mamaara ao aki kororaoira,” n aron ae riki naba nakon Iotebwa Timiti. Ngkoe ma natimi kam kona ni kamatebwaia Iotebwa Timiti—Rongorongo 1:29 n ikotaki, n nooria bwa tera ae karaoia Iotebwa ngke e namakin te aro anne. Tera ae ti kona n reiakinna man ana katooto Iotebwa are e kona ni buokiira ngkana ti karaoi kairua? Bukin tera e kakawaki ataakina bwa e weteaki Iotebwa iroun te Atua e ngae ngke e aki kororaoi?

• A kona ni karekea te kakukurei am ataei n riki ngaia bwa aongkoa Iotebwa Timiti ngke ko karakina rongorongon rokon Moronaai i nanon Iotebwa Timiti—Rongorongo 1:27–54 ke “Mwakoro 3: The Angel Moroni and the Gold Plates” (i nanon Karaki man Reirei ao Berita aika Tabu, 13–17, ke te tamnei are irekereke ma te reirei n teGospel Library). Te katooto, a kona n booti baia bwa ana tataro ke aongkoa a tamwarakea te Tabuki are Cumorah, ao a bati riki. I mwiina ko kona n tuangiia bwa a na marooroakinna bwa bukin tera e wetea Iotebwa Timiti te Atua bwa e na karaoia ao ti kanga ni kakabwaiaaki n uaan ana mwakuri. Te katooto, ti kanga n tia ni kakabwaiaaki ibukina bwa e raira ana Boki Moomon Iotebwa Timiti? A kangaa ni buokiira ana mwakuri n kaan riki nakon Tamara are i Karawa ao Iesu Kristo?

  

  2:29

• Tao kam na kukurei ngkoe ma am ataei n tarai tabeua tamneia ami utu, tao tamnein ami utu n te tembora (ke taraa Gospel Art Book, nambwa. 120). Kam kona ni wareka Reirei ao Berita aika Tabu 2 ao n tibwaia i marenamii ami iango bwa bukin tera iai ara tembora ao bukin tera e tangiriia utu Tamara are i Karawa bwa a na ikotaki n akea tokina. Bootaki anenea “Families Can Be Together Forever” (Aia Boki n Anene Ataei,, 188). Bukin tera e taekinna te anene aei bwa ti na kona n ikotaki ma ara utu n ae akea tokina?

• Ataei a konaa ni karekea te kukurei ao n namakina te kimwareirei man rongorongon te utu. Ni buokiia, ko kona n tibwauai karaki ke tamneia ami bakatibu. Marooro ma am ataei bwa aekakira maiuiia ami bakatibu ngke ataei ngkoa ngaiia. A kona naba ni kukurei ami ataei n tabeua waaki ni kakukurei n rongorongon te utu n FamilySearch.org/discovery.