“Bwanaa ni Kaokan Bwaai: Ana Utu Iotebwa Timiti,” Nakomai, Iriirai—Ibukin te Mweenga ao te Taromauri: Reirei ao Berita aika Tabu 2025 (2025)
“Ana Utu Iotebwa Timiti,” Nakomai, Iriirai—Ibukin te Mweenga ao te Taromauri: 2025
Bwanaa ni Kaokan Bwaai
Ana Utu Iotebwa Timiti
Ngaira n tatabemaniira e korakora rootakira n aron maiuia ara utu, ao bon akea kaokorona naba ma Iotebwa Timiti. Nanoia ana karo n nim ma te aro ao aroaroia e unika koraan te onimaki are e karika manga Kaokan Bwaai be e na riki. E koreia Iotebwa n ana tieno te taeka ni karinerine aio: “Taeka ao taetae [a bon] aki tau ni kaota te kakaitau are I tarau iai nakon te Atua ibukin anganakiu kaaro aika moan te karineaki.”
Te taeka ae i mwiina mai iroun tinana, Lucy Mack Smith; tarina William Smith; ao bon te Burabeti e anganiira teutana norakin te maiu n te aro i nanon mweengaia ana utu te Smith.
Ana Utu Iotebwa Timiti, iroun Dan Baxter
Lucy Mack Smith
“[Tao n 1802], E rotai te aoraki. … I taku i nanou, I tuai n tauraoi ni mate ibukina bwa I tuai atai ana kawain Kristo, ao e tara n ae kanga iai te marena ae e roo ao n akea kaina i marenau ma Kristo ae I aki tangiria n rinanona. …
“I tararake nakon te Uea ao n onon ao ni bubuti ma te Uea bwa e na kariaiaai n reitaanako maiu bwa I aonga ni karikirakeia natiu ao ni karaua nanon kainabau; ao I wene inanon te tairiki anne. … I berita ma te Atua [bwa] ngkana e na kamaiuai N na kataa au kabane n tamaroa ni karekea te aro are e na kona ni karikai bwa na beku ibukina ni koaua, bwa tao man te Baibara ke tao mai iia are n a kunea iai, ngkana tao e na karekeaki mai karawa man te tataro n onimaki. N tokina te bwana e taetae nakoiu ni kangai, ‘Kam na ukeuke, ao ane e na reke i roumi, kam na karebwerebwe, ao ane e e na kaukaki nakoimi. E na rau nanom. Ngkai ko kakoaua iroun te Atua; kakoaua naba irou.’ …
“Man te tai aei ni waerake I karekea korakorau ni katoa tai. I aki rang bati n tataekina taekan te aro ma I iangoa taekana n taainako, ao I iango bwa N na karaoa au kabanea ni kona n te tai are I kona ni karekea te aomata ae taua te aro are e ata aron te Atua bwa e na reireiai n aron bwain karawa ni kabane .”
William Smith
“Tinau, ae te aine ae kokoaua ao n nano n aro ao n rangi n tabe ma aroia natina, n te maiu ae mamate aei ao te maiu n are imwin te maiu aei, e kabonganai aanga are e kona ni karekei n arona n tangira n tina, ni karina iroura te nano ni mwakurii karekean kamaiuan tamneira , ke (n aron taekana are e kabonganaaki ngkekei) ‘n riki ni kaina te aro.’ E kaungaira bwa ti na kakaea te bootaki n taromauri, ao e bon kuri ae ni kabane kain te utu a bane n nano n taekan te aro, ao a ukeuke ibukin te koaua.”
“Ti aki toki ni kakaraoa ara tataro n utu n aron are I uringa. I rang uringa ae tamara e aki toki ni uouota matana ni wareware ni buuan ana kunikai, … ao ngaira ataeinimwaane ngkana ti nooria bwa e kakaea ana kirati ni wareware, ti ataia bwa anne te kanikinaa bwa ti na tauraoi nakon te tataro, ao ngkana ti aki nooria e kangai tinara, ‘William,’ ke antai are e aki rangi ni kakauongo, ‘tauraoi nakon te tataro.’ I mwiin te tataro ti anenea te anene are ti bane ni kona n aneneia.”
Joseph Sr. ao Lucy Smith a reireiniia aia utu ni kamatebwai booki aika tabu.
Iotebwa Timiti
“I kona ngkai n taekina, bwa [tamau] e tuai man karaoa te mwakuri ae na iangoia bwa e na aki akoi, i nanon maiuna, n aron au atatai. I tangira tamau ao aroarona; ao uringan aron ana mwakuri aika rine, a tiku n rangi ni matoa n au iango; ao mwaitin ana taeka n akoi ao ana taeka ni karo nakoiu, a koreaki iaon baban nanou. Ae moan te tabu irou, bon iango ake I rangi ni kakawakinii ibukin rongorongon maiuna, are a tia ni buti inanon au iango ao a tia ni katukai ikekei, inanon te bwai are I nonoria ma ngke I moan bungiaki. … Tinau naba bon temanna mai ibuakoia ake a karineaki, ao ae e rangi n tamaroa ibuakoia aine.”