Reirei ao Berita aika Tabu 1

Te moan taeka e kabwarabwara te boki. E kakoauai ana botoniango te boki ao oin bukina ao ni buokiia taan wareware n tauraoi ni warekia. Ngkai ko wareka mwakoro 1—ana “moan taeka” te Uea ibukin Reirei ao Berita Aika Tabu (te kibu 6)—tarai botoniango ao oin bukina are e anga te Uea ibukin Ana kaotioti. Tera ae ko reiakinna are e na buokiko n am kamatebwai n Reirei ao Berita aika Tabu n te ririki aei? Ibukin te katooto, ko riai n iangoia raoi bwa tera ae e nanonaki n “ongo bwanaan te Uea” i nanon kaotioti aikai (kiibu 14) ke ni “ukori tuua aikai ” (kibu 37).

Taraa naba kabwarabwaraan Reirei ao Berita aika Tabu.

Mwakoro 1 e moanaki ao ni kainaki ma ana katanoata te Uea bwa E taetae rinanon Ana tia mwakuri ake e rineiia (tarai kiibu 4–6, 23–24, 38). Koreia bwa tera are ko reiakinna man te kaotioti aei:

• Te Uea ao Bwanaana.

• Bukin tera a kainnanoaki burabeti n ara bong.

Tera ae ko namakinna bwa ko na karaoia mai i mwin baike ko kunei?

Ningai ae ko a tia n ongo iai bwanaan te Uea rinanon bwanaan Ana tia mwakuri? (taraa te kibu 38).

Ko kona naba ni iangoa ae raraom are e aki ataa taekan te burabeti ae maiu e wareka mwakoro 1 ma ngkoe. Tera titiraki ae tao iai irouia raoraom? Tera kiibu aeko tangiria ni maroroakin ma raoraom ni buoka teuanne ke neienne ni mataata bwa tera am namakin iaon ae a na iai burabeti n ara bong?

Ko na bae n tangiria n ataia bwa ngke a bowi kauntira n unimwaane n 1831 ni maroroakina boretiakin ana kaotioti Iotebwa Timiti, tabeman kaain te kauntira a totokoa te iango. A rangi ni maama n aron ana aki konabwai Iotebwa ni koroboki, ao a raraoma bwa boretiakin te kaotioti e na kona ni karekea riki te kangaanga nakoia Aomata aika Itiaki (taraa Saints, 1:140–43). Ngke tao ngkoe kaain te kauntira, e na tera arom ni kaeka nakon raraoma aikai? Tera nonori aika ko kunei ni mwakoro 1 aika a na kona n ibuobuoki? (ibukin te katooto, tarai, kiibu 6, 24, 38).

Iangoia ni kaaira te anene n taromauri n aron “Come, Listen to a Prophet’s Voice” (Anene n Taromauri, nambwa 21) n am kamatebwai ao n am nebonebo. Kakaei mwakoro n taeka i nanon te anene are e reireia te moan tua ae ti tearona ma ake i nanon kiibu ni mwakoro 1.

Tarai naba Atuun Reirei ao Titiraki, “Prophets,” Gospel Library.

N Reirei ao Berita aika Tabu mwakoro 1, e kabwarabwaraa te Uea bwa bukin tera E kaoka Ana euangkerio. Noria bwa mwaitira bukina ae ko kona ni karinani ngkai ko wareki kiibu 12–23. N am taneiai, a kanga Ana kaantaninga te Uea ibukin Kaokan Bwai ni kakoroaki nanoia?

E ataia te Uea bwa e na iai te kangaanga aika a korakora n ara bong (taraa kibu 17). Tera ae ko kunea ni kiibu 17–30, 34–36 are e buokiko n namakina te rau ao n nanomatoa e ngae ngke iai kangaanga aikai?

Taraa naba Russell M. Nelson, “Butimwaai Taai Aika a na Roko ma Te Onimaki,” Riaona, Nob. 2020, 73–76.

Ngkai ko wareka Reirei ao Berita aika Tabu 1:19–28, ko na iangoia bwa tera ae nanonaki bwa te riki bwa a na toro te Uea. Tera anua ae e tangiria te Uea bwa e na reke irouia Ana toro? Tera ae e kakoroa nanona te Uea rinanoia Ana toro? A kanga taeka ni burabeti i nanon kiibu aikai n tia ni koro bukiia ni kabutaa te aonaaba ao ni maium?

• Ni moana te marooro n taekan kauring mairoun te Uea, ko kona n taekina taekan kauring ake ti karekei mairouia tabeman n taekan kangaanga ake ti aki noori. Tabeua katooto n aron maranranin aontano, te angibuaka ae na roko, ke te kaa ae e a roko. Tao ngkoe ao am ataei kam kona n noori katooton kanikina ni kauring ao noora kaokoron kanikina ni kauring aikai ma kauring mairoun te Uea are e anganiira. Ni kaineti nakon Reirei Ao Berita aika Tabu 1:4, 37–39, e kanga te Uea ni kauringiira? Tera are E a tibwa tia ni kauringiira ibukin taai aika? Tao ko kona ni mataku ke ni wareka te rongorongo n te maungatabu ni kabuta ae nako ao tarai ana katoto te Atua ni “bwanaa ni kauring.”

• Uaia n anenea te anene n taekaia burabeti, n aekan te kabanea ni kibu n “Follow the Prophet” (Aia Boki n Anene Ataei, 111). Tibwa am koaua bwa te burabeti e taekin ana taeka te Atua.

• Ni kaungaa te marooro i aon Reirei ao Berita aika Tabu 1:17, ngkoe ao am ataei kam kona ni iangoia ae kam katauraoi ibukin te mwananga. Tera ae kona katauraoia? Ngkana ko a kaman ataia bwa e na kakarau ke e nako angin rabwan am kaa ke te bwati, e na kanga aio n roota aron am katauraoi ibukin te mwananga? Uaia wareka kibu 17, ao maroroakina te bwai are e ataia te Uea bwa e na riki nakoira. E na kanga ni katauraoi ibukin aio? (Ngkana e riai, kabwarabwara bwa te “kabuanibwai” bon te urubekebeke ke te bwai ae kakamaaku.) A kanga ana tua te Atua ni buokiira n tabeakina te kangaanga n ara tai?

• N reiakina aron mwiokoan Iotebwa Timiti ni kaokan Ana euangkerio te Tia Kamaiu, ngkoe ao am ataei kam kona n tarai tamnein te Tia Kamaiu ao tamnein Iotebwa Timiti (tarai tamnei inanon te kabwarabwara aei) ao marooro bwa tera ae e anganiira te Tia Kamaiu rinanon Iotebwa Timiti. A kona am ataei n kakaei katooto i nanon Reirei ao Berita aika Tabu 1:17, 29. Tuangiia am ataei bwa ko kanga ni ataia ae te Atua e “wetea au tia mwakuri Iotebwa Timiti te Ataei, ao n taetae nakoina mai karawa” (kibu 17).

• Tera ae nanonaki n taekinna bwa te Ekaretia e bon “koaua ao e maiu”? N anganiia am ataei bwa a na iangoa te titiraki aio, tao ko kona n kaota nakoia tamnein bwaai aika maiu ao bwaai aika aki maiu—n aron te aroka ae maiu ao te aroka ae mate. Ti kanga n ata te bwai ae e maiu? I mwiina ko kona ni wareka Reirei ao Berita aika Tabu 1:30 ao maroroakinna bwa tera ae nanonaki n te Ekaretia bwa e “koaua ao e maiu.”