“Bwanaa man Kaokan Bwai: Rairan Ana Boki Moomon,” Nakomai, Iriirai—Ibukin te Mweenga ao te Taromauri: Reirei ao Berita aika Tabu 2025 (2025)
Rairan Ana Boki Moomon,” Nakomai, Iriirai—Ibukin te Mweenga ao te Taromauri: 2025
Bwanaa man Kaokan Bwaai
Rairan Ana Boki Moomon
I nanon Eberi 1829, te namakaina ngke mwakoro 6–9 man Reirei ao Berita aika Tabu a karekeaki, oin ana mwakuri Iotebwa Timiti bon rairan Ana Boki Moomon. Tiaki atai kabwarabwara ibukin te aro n rairairi are kamiimi, ma ti ataia bwa te tia mamata bon Iotebwa Timiti, ae buokaki man bwai ni buobuoki are e katauraoia te Atua: uoua atibu aika a nooraki nanoia n itiaki aika a aranaki bwa te Urim ao te Tummim ao teuana riki te atibu ae arana te atibu ni mamata.
Ngke e titirakinaki rimwi bwa e na taekinna bwa e kanga te rekooti aei n rairaki, e taku Iotebwa “bwa e aki katauaki bwa e na tuangaki te aonaaba ni kabane taekana.” E taekinna ni kabebetea bwa e bon rairaki man “ana bwaintituaraoi, ao mwaakan te Atua.”
Te rongorongo ae i mwiina, man maata ni kakoaua nakon te waaki n rairairi, e boutokaa ana kakoaua Iotebwa Timiti.
E bon kakoauaaki bwa te bwaoki aei, are bon ana bwaoki Hyrum Smith, e bon kabonganaaki n te tai ae e uarereke ni kawakina te bwaatua koora.
Emma Timiti
“Ngke e raira Ana Boki Moomon kainabau , I korea tabeua kanoana, ngke e taetaekina n tatabeua taekana, te taeka teuana i mwiin teuana, ao ngke e roko i aon aara raoi ake e aki konaa ni katanga taekana, ke taeka ake abwabwaki, e tiberingiia, ao ngke I tabe ni koroi taekaia, ngkana I kaburea tiberingiana, e bon katokai ao e kaeta au tibering e ngae ngke e bon kangaanga irouna n nooria bwa e kanga are I koroi n te tai anne. Ao te taeka ae Sarah e aki kona n tiribwareia n te moan, ma e bon tiberingiia, ao I katirebarea ibukina.”
“A wene i aon te taibora n taai nako taian bwaatua n akea iangoan karabaakina, e niiraki n te kunikai ae bwain rabunan te taibora, are I anganna bwa e na niroaia i nanona. I a tia n te taina n ringii bwaatua, ngke a kaweneaki i aon te taibora, n namakinii i aan baiu ao n ataa aron teiia. A taraa n nimaonnon aiaron te beeba ae maten, ao ni kona n keruaatai n aron tangin biiti aika manii ngkana e kamwaingaki rarikina ma te aobuanibai, n aron tabetai temanna e kabuta waebuanibaina n taran te boki. …
“Au koaua bwa Ana Boki Moomon bon mairoun te Atua ni koaua—Akea au nanokokoraki iai. I bon rauaki bwa akea te aomata ae kona ni warekii koroboki aika a na rairaki ma ti ngkana e kairaki iroun te tamnei; ibukina bwa, ngke I bon mwakuri bwa a na tia koroboki, e kona [Iotebwa] ni warekia nakoiu teuana te aoa i mwin teuana; ao ngkana e oki i mwin amwarakena, ke i mwin motirawana, e na bon waekoa ni moanna man are e a tia n toki iai, man aki manga taraa te beeba are korobokiaki ke n tangira warekan mwakorona nakoina. Aio te bwai ae e teimatoa ngaia ni karaoia. E na bon aki kona n reke aio nakon te aomata ae reiakinaki bwa e na kona ni karaoa aei; ao, ibukin temanna ae aki ataa te bwai ae e na karaoia ao n aki reiakinaki n ai arona , e a bon taraa ni kangaanga.”
Oliver Cowdery
“I koroboki ma oin au been ni kabwanina korean Ana Boki Moomon (katukui tabeua baana) ngkai e bon nako mai wiin te burabeti, ngkai e rairia man ana bwai n tutuaraoi ao mwaakan te Atua, man kabonganaan te Urim ao Thummiim, ke, ngkai e bon aranaki man te boki, bwaai n raitaeka aika tabu. I bon noori n oin matau, ao n taui n oin baiu, tenaan bwaatua koora are karaoaki te rairairi mai iai. I noori bwaai n raitaeka.”