Reirei ao Berita aika Tabu 10–11

E na tangiria Tatan ae ti na mwaninga ae bon iai ngaia—ke ti na aki ata ana anga ni kairoroira (taraa 2 Nibwaai 28:22–23). Ma ana taeka te Uea n Reirei ao Berita aika Tabu 10 e kamatoa bwa bon iai Tatan—are e mwamwakuri ni kaitaraa ana mwakuri te Atua. I nanon kiibu 1–33, katebenakoa bwa tera ae e ataia te Atua i aon ana mwakuri Tatan (taraa naba kiibu 62–63). Ko kona naba ni butiia te Uea bwa e na buokiko n nooria bwa e na kanga ni kariiiriko Tatan. Ngkai ko wareka mwakoro 10, iangoia bwa e kanga ni kona ni buokiko te tia Kamaiu n totokoa ana mwakuri Tatan.

E aki ataia Nibwaai bwa bukin tera e kairaki iroun te tamnei ni karaoi uoua tiete n rekooti ibukiia ana aomata. Ao e aki ataia Moomon bwa bukin tera e kairaki iroun te tamnei ni karina te kauoua n tiete ma te bwaatua koora. Ma burabeti aika uoman aikai a onimaki bwa iai te Atua “bukina ae wanawana” (1 Nibwaai 9:5; Ana Taeka Moomon 1:7). N te tai aei ti ataa teutana bukin te kantaninga anne: n onea mwiin iteraniba ake 116 ake a bua n Ana Boki Moomon. Tera n am iango bwa e tangiria te Uea bwa kona reiakinna man aikai ni kabane? Iangoa te titiraki anne ngkai ko wareka Reirei ao Berita aika Tabu 10:34–52. Ko na bae naba ni korei ni karinanii koaua ake ko reiakin i aon te Uea man kiibu aikai. A kanga koaua aikai n roota aron am reitaki ma Ngaia? Tera ae anaa nanom ni wanawanan te Uea ao ana kaman nonori ni katauraoi ibukin iteraniba ake 116 ake a bua?

Ko na bae naba ni namakina kairam iroun te tamnei n nori kakoauaan Wanawanana ao nonori i nanon maium. Wareka te karaki are n ana rongorongo Unimwaane Ronald A. Rasband “By Divine Design (Aronn Baireana mai Karawa)” —a na karokoi katooto nakon am iango (Riaona, Nobembwa 2017, 55–57). Iangoia ni korei n te tai are a roko iai iroum. E kanga n tia ni mwmwakuri i nanon maium te Uea? Te katooto, tera “baika a okioki rikiia” ae E katauraoi? Tera aan te kateitei ae E a tia ni kawenea ibukin kakabwaiam? Ningai ae E a tia ni kairiko nakon te aomata temanna ae kainnano bwa ko na buokia?

Taraa naba I-Rom 8:28; Reirei ao Berita aika Tabu 90:24; Topics and Questions, “Plan of Salvation,” Gospel Library.

Tarin Iotebwa ae te karimoa ae Hyrum e ingainga ni kan ataa nanon te Uea ibukina, ngaia are e tuanga Iotebwa bwa e na karekea te kaotioti ibukina. E kukurei te Burabeti ni karaoia, ma bon iai te rongorongo n te kaotioti anne (Reirei ao Berita aika Tabu 11) ae Hyrum e kona naba n ukora te kaotioti i bon irouna. Ngaia are a kona “ni kabane ake a raoiroi nanoia, ao n tia ni karina aia biti ni koro wiita n taia” (kibu 27). Ngkai ko wareka mwakoro 11, tera ae ko namakinna bwa e reireiniko te Uea n taekan te kaotioti i bon ibukim? E kanga te rongorongo aei n irekereke ma are e reiakina iai Oliver Cowdery i nanon mwakoro 6–9? Tera riki taian rongorongo aika iai Irouna ibukim?

Taraa naba “Let the Holy Spirit Guide,” Anene n Taromauri, nambwa 143.

Tao bon i mwain rairakin Ana Boki Moomon, e ingainga Hyrum Smith ni kan ibuobuoki n te mwakuri ni Kaokan Bwaai. Ngkai ko wareka ana kaeka te Uea ibukin nanona aei, iangoia bwa tera ae e nanonaki iroum ni “karekea ana taeka [te Atua]” (kibu 21). E kanga karekean ana taeka te Atua ni buokiko ni beku Ibukina ma te mwaakaa?

• Ni kabwarabwaraa te kibu aio nakoia am ataei, ko kona n titirakiniia ibukin bwaai ake a “aki toki” ni kakaraoi. Tera ae taekinna te Uea bwa ti riai ni aki toki ni kakaraoia n Reirei ao Berita aika Tabu 10:5? Bukin tera E tangiriira bwa ti na karaoa aio?

• Ko na kanga ni buokiia am ataei n uringnga n tataro n taainako? Tao a na kona n rikoi tabeua atiibu aika uarereke, maranran ao ni beeni “Reirei ao Berita aika Tabu 10:5” ke “Tataro n Tainako.” A kona ni katikui aia atiibu n taabo aika mwaiti ike a na kauringaki iai n tataro, n aron rarikin aia kainiwene, ma aia boki n reirei, ke n te tabo are a amwamwarake iai. Ni kaineti ma Reirei ao Berita aika Tabu 10:5, e kanga te Uea ni kakabwaiaira ngkana ti tataro? Am ataei a kona ni kunei kaekaaia riki tabeua n te anene n aron “A Child’s Prayer” (Aia Boki n Anene Ataei, 13).

• A konaaAtaei n reiakinna ni kinaa ngkana e taetae nakoia te Tamnei ae Raoiroi. Ni buokiia, ko kona ni karaba wiikin te taura ke te tooti ao tamnein moangaren te aomata n te tabo teuana i nanon te ruu; tuangiia am ataei bwa a na kakaei bwaai aikai. Wareka Reirei ao Berita aika Tabu 11:13, ao buokiia am ataei ni kinai taeka ake a irekereke nakon bwaai ake a kunei. Tera ae a reirei taeka aikai n aron ana ibuobuoki te Tamnei are Raoiroi nakoira?

• Tibwakin oin am taneiai n tamnei e kona ni buokiia am ataei ni kinaa ana kairoro te Tamnei ae Raoiroi i nanon maiuia. Ngkai ko tibwatibwa, tuangiia bwa a na tibwai aia taneiai naba. Kam kona naba n uaia ni wareka Reirei ao Berita aika Tabu 11:12–13, n taraia bwa ti na kanga n ataia ngkana ti kairaki iroun te Tamnei ae Raoiroi. Kakoaua bwa Tamara are i Karawa e tangiria ni kairiira rinanon te Tamnei ae Raoiroi.

• N ai aron Hyrum Smith, a na bae am ataei ni karekei taai n tibwaa te euangkerio ma aomata tabeman. Kam kona n uaia ni wareka Reirei ao Berita aika Tabu 11:21, 26 ao tuangiia am ataei bwa a na kakaea tera ae tuanga Hyrum te Uea bwa e riai ni karaoia bwa e angoa n reireia te euangkerio. Tera ae e nanonaki ni “karekea” ana taeka te Atua? Ti na kanga ni karaoa aei? Ti na kanga n “kaikoi” ana taeka te Atua i nanora? Tao a kona am ataei n karaoa te kaotioti n tibwai tabeua bwaai iaon Iesu Kristo ke Ana Boki Moomon ma aomata tabeman.