Bwanaa man Kaokan Bwaai

E kaota te bwaatua koora te anera Moronaai nakon Iotebwa Timiti, Oliver Cowdery, David Whitmer, ao Martin Harris n te buakonikai irarikin mweengaia Whitmer i Fayette, New York. Ana karo Iotebwa a kawariia ana utu Whitmer n te tai anne. Lucy Mack Smith, ae tinan Iotebwa e kabwarabwara aron rotakiia n te taneiai ae kamiimi aio i aoia taan kakoaua:

“Bon i marenan te aoa teniua ao aua. Mrs. Whitmer ao Mr. Ngai ma Smith ti tekateka n te ruu ni matuu. I tekateka i aon te kainiwene. Ngke e rin Iotebwa, e bwaka naba ni wene i rarikiu. ‘Tamau! Tinau!’ e taku. ‘Kam aki ata aron kukureiu. E a tia te Uea ni kaota te bwaatua nakoia teniman riki irarikiu, ake a tia naba n noora te anera ao a na taekina kakoauaan te koaua n te bwai are I a tia n taekinna. Bwa a ataia i bon irouia bwa I aki nakonako ni mwamwanaia aomata. Ao I a namakina ae kanga I a kabebeteaki man te rawawata ae e kakamaku, are kanga e taraa n rangi ni korakora irou bwa N na tokanikai i aona. Ma ngkai a nang uota mwakorona, ao e angan nanou te kimwareirei bwa ai bon tiaki tii ngai n takarere i nanon te aonaaba.’ I mwiina e rinnako Martin Harris. E taraa n ae e rabunaki n te kimwareirei ae korakora. E a taekina ngkanne koauan te bwai are e a tia n nooria ao n ongo, n aroia naba ake tabeman, Oliver ao David. Titebo aia koaua ni bwaai ake i nanon Ana Boki Moomon. …

“Bon Martin Harris are kanga e a aki kona n taua kaotan nanona n taekinna. E taku, “I a tia n noora te anera mai Karawa are e bon koaua bwa e taekina kakoauaan te koaua ni baike I a tia n ongo ni kaineti ma te rekooti, ao e a tia n nooria matau. I a tia naba n noora te bwaatua ao n tautaua i nanon baiu ao I kona n taekina koauana n taekana anne nakon te aonaaba ni kabutaa. Ma I a tia ni karekea ibukiu te kakoaua are e aki kona ni kabwarabwaraki n te taeka, ae e aki kona ni kabwarabwara te neewe, ao I kakabwaia te Atua ma nanou ni kabane bwa e a tia n ruo ni kamangoria ni karikai, ae bon ngai, te tia kakoaua ni korakoran ana mwakuri ao babaire [i] bukiia natiia aomata.’ A reitia naba n te nebonebo ae tabu Oliver ao David nakon te Atua ibukin ana raoiroi ao ana akoi. Ti okira mweengara [nako Palmyra, New York,] n te bong are i mwiina ma te kukurei, ao ni kimwareirei.”

E mena naba ikekei Lucy Mack Smith ngke a oki rikaaki taan Kakoaua ake Waniman man aia taneiai are a rinanona:

“I mwiin okiia taan kakoaua nakon te auti, e a manga kaoti riki te anera nakon Iotebwa; ao n te tai anne Iotebwa e a kaoka taian bwaatua nako nanon baina. N te tairiki anne ti booa ara bootaki, are a bane iai ni kaotii aia koaua taan kakoaua ni kabane ni koauan te bwai are e kaotaki mai ieta; ao ni kabane ara utu, ao nakon Don Carlos [Smith], are ai tibwa 14 ana ririki, e taekina kakoauan te koaua ibukin koron boong ni boong aika kaitira—are e a moanaki ngkai rokona.”

Ni ikotaki nakon Aia Kakoaua Taan Kakoaua ake Teniman ao Taan Kakoaua Ake Waniman, e kakabwaiaaki naba Mary Whitmer, ae tinan David Whitmer n noora taian bwaatua koora. E kaotia te anera Moronaai nakoina ibukin ana mwakuri n anga nano are e karaoi ngke a tiku ni maeka Iotebwa, Emma ao Oliver ni mweengana. “Ko a tia n rangi ni kakaonimaki ao ni mwakuri korakora n am beku,” e tuangnga Moronaai. “E bon riai, bwa, ko na karekea te kakoaua bwa e aonga ni kakorakoraaki riki am onimaki.”