Reirei ao Berita aika Tabu 6–9

I nanon te tiburing 1829, e anga nanona Oliver Cowdery n riki bwa ana tia koroboki Iotebwa Timiti ngke e reitinako n raira Ana Boki Moomon. E kukurei n te bwai ae rinanona, ao e iangoia ngkana e kona naba ni karekea te kaotioti ao te bwai n tangira n rairairi. Ma, e aki nakoraoi, ana moan kakatai.

Ngkana ko rinanon te kaiangatoa ni karekean ke ni mataata n te kaotioti, tao ko kona n rinanon ana taneiai Oliver—ao n reiakinaki mai iai. Ngkai ko wareka Reirei ao Berita aika Tabu 6, 8, ao9, ataia bwa tera ae reirei i aona te Uea nakon Oliver i aon taekan te kaotioti i bon ibukim. Ibukin te katooto:

• Tera are e uotiarake Reirei ao Berita aika Tabu 6:5–7; 8:1; 9:7–8 ibukin are e kainnanoia te Uea mairoum i mwain ae E kaota Ana kantaninga?

• Tera ae ko reiakinna man Reirei ao Berita aika Tabu 6:14–17, 22–24; 8:2–3; 9:7–9 i aon kakaokoron kawai ake a roroko iai kaotioti? Ko na kanga ni kinai?

• Tera riki ae ko reiakinna ibukin te kaotioti man mwakoro aikai?

Ana taneiai Oliver e na karikiko ni “kaoka am iango” nakon taai ngke ko namakina bwa e taetae nakoim te Uea (Reirei ao Berita aika Tabu 6:22). Ko korei mwiin am iango ke namakin ibukin taneiai aikai? Ngkana ko karaoia, iangoia ni wareka te bwai are ko koreia. Ngkana ko aki, anaa tabeua te tai ni korei ake ko uring. Iangoia bwa ko na kanga n reitinako ni karekea te korakora man taian taneiai aikai. Ibukin iango tabeua, taraa ana rongorongo Unimwaane Neil L. Andersen “Ururing n te Maiu n Tamnei aika Kakukurei” (Riaona, Meei 2020, 18–22).

A mwaiti taan kairiiri n te Ekaretia aika a tibwaa aia taneiai n te kaotioti n “Ongo Irouna” witeo ake a ikoikotaki. I mwiin matakuakinan teuana ke ae mwaiti riki ni witeo aikai, ko na bae n namakina kairam ni korei oin am taneiai, n tibwaia bwa e kanga n tia n taetae nakoim te Uea.

Taraa naba Topics and Questions, “Personal Revelation,” Gospel Library; “Oliver Cowdery’s Gift,” n Revelations in Context, 15–19.

E ataia te Uea ae Iotebwa Timiti e na rinanon “kangaanga nako” n ririki aika i mwaaina (Reirei ao Berita aika Tabu 6:18). E ataia naba bwa tera kataakim nakon taai aika ana roko. Tera ae ko kunea n Ana reirei nakon Iotebwa ao Oliver n Reirei ao Berita aika Tabu 6:18–21, 29–37 ae e buokiko bwa ko na kakoaua?

Tera ae nanonaki n “tanimai nakon [Kristo] n am iango n taai nako”? (kibu 36). Ko na kanga ni kakaraoa aei ni katoa tai—n taai ni kakukurei ao “n taai ni kangaanga”? Iangoa te reirei aei mairoun Beretitenti Russell M. Nelson: E anaa karauan raoi iangoakina te keiaki n Taraia n ara iango ni kabane. Ma ngkana ti karaoia, a mauna ara nanououa ao mwaakura” (“Karekean Mwaakan Iesu Kristo nakon Maiura,” Riaona, 41).

Taraa naba Neil L. Andersen, “Au Iango E Iangoa Raoi te Koaua Aio iaon Iesu Kristo,” Riaona, Meei 2023, 91–94.

Bukin tera n tabetai ti “maaku … ni karaoa ae raoiroi”? (te kibu 33). Tera ae ko kunea n Reirei ao Berita aika Tabu 6:29–37 are e anganiko te ninikoria ni karaoa ae tamaroa? Iangoia n anenea ke n ongora te anene n taromauri are e kaunga nanom ni karekea te ninikoria iroun Kristo, n aron “Let Us All Press On” (Anene n Taromauri, nambwa. 243).

Nooria bwa mwaitira te taeka n aron “tangira” ke “tangiria” n oti i nanon mwakoro 6 ao 7. Tera ae ko reiakinna man mwakoro aikai n taekan kakawakina are katukua nakon are ko tangiria te Atua? Titirakiniko ana titiraki te Uea n Reirei ao Berita aika Tabu 7:1: “Tera ae ko tangiria?”

Teuana te bwai ae tangiria Oliver Cowdery ae raoiroi—n rairairi n aron are karaoia Iotebwa—e aki koro nanona. Ngkana ko wareka Reirei ao Berita aika Tabu 9:3, 7:14, tera te namakin are ko karekea ae na kona ni buokiko ngkana te bwai ae ko tangiria e aki koro nanona n te tai aei?

Taraa naba Reirei ao Berita aika Tabu 11:8; Dallin H. Oaks, “Desire,” Riaona, Meei 2011, 42–45.

• Te koaua are e reiakinna Oliver Cowdery ibukin ae bon oin am kaotioti e kona ni buokiia am ataei ngkai a karikirakea aia konabwai n kinaa te Tamnei ae Raoiroi. Ko kona ni kabongana “Mwakoro 5: Iotebwa Timiti ao Oliver Cowdery” (n Reirei ao Berita aika Tabu, 22–25, ke te witeo ae e irekereke ma ngaia n Gospel Library) n reireiniia taekan Oliver ao te bwai are e reiakinna. Tibwaia i marenami mwakoron te karaki are mamaten nanomi. Ngkai kam karaoia, katuruturui baike e reireina Oliver te Uea bwa e na kanga n ongo banaan te Atua, ao wareki kiibu aika a kaineti, n aron Reirei ao Berita aika Tabu 6:23 ke 9:7–9.

  

  3:11

  

• Ko kona naba ni kaoiia am ataei bwa a na riing atuia ao bwabwaia ngkana ko wareki taeka “te iango” ao “te nano” i nanon Reirei ao Berita aika Tabu 8:2. Tuangiia am ataei, man am taneiai, bwa e kanga arona ngkana e taetae te Tamnei ae Raoiroi nakon am iango ao nanom. Buokiia ni kunei kaeka nakon te titiraki “E kanga n taetae nakoira te Tamnei ae Raoiroi?” i nanon kiibu aikai: Reirei ao Berita aika Tabu 6:15–16, 22–23; 8:2; 9:7–9.

• E tuangiia Iotebwa ao Oliver te Uea, “Tai maaku, te nanai ae uarereke” (Reirei ao Berita aika Tabu 6:34). Ko na bae ni kaoia am ataei bwa ana kaokioka atongan te kibu n taeka anne ni kamwaitia ma ngkoe. A na bae naba n tangiria n riki bwa kanga te nanai n tiibu ae a maaku. Tera ae a maakua tiibu? I mwiina kam kona ngkoe ao am ataei n tara tamnein te Tia Kamaiu ae te tia kawakin tiibu (iai teuana ae tauraoi n tokin te kabwarabwara aei) ao marooro i aona bwa E kanga n tararuaira n ai aron te tia kawakin tiibu n tararuaia Ana tiibu.

• Iangoia ni katanga ke anenea te kuna i aon kunean te korakora iroun Kristo, n aron “Dare to Do Right” (Aia Boki n Anene Ataei, 158).ke “Let Us All Press On” (Anene n Taromauri, nambwa 243). Tera ae e reiakinna te anene bwa e kanga te Tia Kamaiu ni buokiira n aki maaku?

• I mwiin ami wareware ni kabane n Reirei ao Berita aika Tabu 6:36, kam kona ngkoe ao am ataei ni karaoi korotamnei ni buokii ngkami n uringnga n “tan nakon [Iesu Kristo] n am iango n taai nako.” Tibwaia i marenami ami korobanna, ao buokiia am ataei ni iangoi taabo ae a kona iai ni katikui bwa aonga n nonorii ni katoa tai.