Ha’amana’o i te peresideni Nelson

E piti mahana i muri i te ’ōpanira’a o te ’āmuira’a rahi, ’ua fa’a’ite te feiā fa’atere o te ’Ēkālesia ’e te mau melo o te ’utuāfare i tō rātou āruera’a i te peresideni Russell M. Nelson i ni’a i tōna ti’ara’a metua tāne here ’e hoa fa’aipoipo, ’e hoa rahi, e pipi nā te Fatu Iesu Mesia ’e peropheta fa’auru o te Atua.

’Ua fa’a’ite te orara’a o te peresideni Nelson « i tōna ’itera’a pāpū pūpū mau ’ei peropheta ’e ’ei tāvini nā te Fatu ’o Iesu Mesia », ’ua parau te peresideni Dallin H. Oaks i te purera’a hunara’a o te peresideni Nelson i te 7 nō ’Ātopa 2025, i te pū ’āmuira’a. ’Ua parau te peresideni Oaks nō te peresideni Nelson, tei fa’aru’e ma te hau i tōna fare i te 27 nō Tetepa 2025, « ’o tō’u hoa maita’i roa a’e ’e tō’u ’orometua maita’i roa a’e. »

’Ua parau ato’a te peresideni Oaks nō te peresideni Nelson ē « ’o te hō’ē o te mau misiōnare pūai roa a’e o ’Īserā’ela, tei ha’a. » ’Ua parau ’oia ē : « Tōna mata ’ata’ata, te māhanahana o tōna reo ’e te mana o tōna aro, e putapū te ’ā’au » o te mau nūna’a ’e o te feiā fa’atere fa’aro’o.

’Ua fa’ahanahana te peresideni Oaks ’e te tahi atu e pae ta’ata a’o i te peresideni Nelson nō tōna here, tāna tāvinira’a ’e tāna pūpūra’a iāna i te Fatu Iesu Mesia ’e i te mau tamari’i a te Atua nā te ao ato’a nei.

Nā muri i te tahi atu feiā a’o, ’ua ha’amāuruuru ’oia i te tuahine Wendy Watson Nelson i te aupurura’a ’e i te turura’a i te peresideni Nelson i roto i tō rāua 19 matahiti fa’aipoipora’a. ’Ua fa’a’ite ato’a ’oia i tōna māuruuru i te vahine a te peresideni Nelson tei fa’aru’e a’ena, ’o Dantzel White Nelson, ’e tā rāua e 10 tamari’i nō tō rātou ha’apa’o maita’i i « te mea tāna i poro ’e i ora na. »

’Ua fa’a’ite pāpū Elder Henry B. Eyring, tei tāvini i pīha’i iho i te peresideni Oaks ’e i te peresideni Nelson i roto i te Peresidenira’a Mātāmua, nō ni’a i te pi’ira’a peropheta o te peresideni Nelson, ’e tōna ’aravihi ’e tōna hina’aro ’ia ha’amaita’i ia vetahi ’ē.

« ’A tāvini ai au i pīha’i iho iāna i roto i te Peresidenira’a Mātāmua, ha’amata i te ’āva’e Tēnuare 2018, ’ua riro mai au ’ei ’ite nō te fa’aurura’a te Fatu i tōna peropheta », ’ua parau Elder Eyring. « ’Ua māuruuru vau i te mātaura’a i te peresideni Russell M. Nelson. »

I roto i tā rātou mau parau, ’ua ha’apoupou Elder Jeffrey R. Holland nō te pupu nō te Tino ’Ahuru Ma Piti ’āpōsetolo ’e te peresideni Camille N. Johnson, te peresideni rahi o te Sōtaiete Tauturu, i te peresideni Nelson nō tōna hāmani maita’i morohi ’ore i te mau ta’ata, i roto ’e i rāpae i te ’Ēkālesia.

« Te fāna’ora’a i te taime nō te hi’o iāna i te herera’a i te mau ta’ata, ’e te mau ta’ata i te herera’a iāna, e mau ha’amana’ora’a nehenehe roa ïa », ’ua parau Elder Holland. ’Ua ha’amana’o ’oia i te peresideni Nelson e « ta’ata e tāpe’a i te rima ’e ’o tē fa’aora i te ’ā’au. »

’Ua parau ato’a te peresideni Johnson : « ’Ua taui mau te peresideni Nelson i te ao nei, hō’ē ta’ata ’e hō’ē ’ohipa i te taime hō’ē, ’e ’ua tītau manihini ’oia ia tātou ’ia nā reira ato’a maoti te mana a te Atua ’ei tāne ’e ’ei vahine nō te fafaura’a. »

E piti tamari’i a te peresideni Nelson, ’o Laurie N. Marsh ’e ’o Russell M. Nelson Jr., tei parau ē ’ua ora tō rāua metua tāne ma te ’oa’oa nō te mea ’ua fa’atumu ’oia i tōna orara’a i ni’a i te Fa’aora Iesu Mesia, ’e ’ua fa’ariro i te aupurura’a i te ta’ata ’ei ’ohipa mātāmua roa.

« ’Ua pa’ari mātou i roto i te hō’ē ’utuāfare tei fa’atumuhia i ni’a i te Fa’aora ’e tei ’ī i te ’oa’oa », te parau ïa a te tuahine Marsh. ’Ua parau ’oia ē, te fā a te ’utuāfare ’o te rirora’a ïa ’ei ’utuāfare mure ’ore.

’Ua parau fa’ahou te taea’e Nelson ē, e mea rohirohi ’ore tōna metua tāne i roto i tāna tāvinira’a. « ’Ua fa’a’ite mai te peresideni Nelson i mua i tō mātou mata ē, ’aita e ’fa’afa’aeara’a’ i roto i tāna huru Fa’aho’i-fa’ahou-ra’a mai. » ’Ua parau ’oia ē, i te pi’ira’ahia ’oia ’ia fa’atere i te ’Ēkālesia, ’ua hōreo tōna metua tāne ’ia tāvini i te Metua ’e i te Tamaiti ē tae noa atu tōna mahana pohera’a. « Terā mau ïa tāna i rave. »

Nā Marjorie N. Lowder ’e Gloria N. Irion, nā tamāhine a te peresideni Nelson, i pūpū i te mau pure o te purera’a. Nā te pupu hīmene o te Fare Menemene i Temple Square i ha’apa’o i te pehe.

’Ua tupu te ’ōro’a hunara’a o te peresideni Nelson i muri i te purera’a fa’ahanahanara’a tei fa’atupuhia i te 1 nō ’Ātopa ’e te ha’apurorora’a mai te Fare Menemene atu i Temple Square. ’Ua pūpū te peresideni Oaks, ’o Elder Holland ’e Elder Eyring, te ’episekōpo peresideni ’o Gérald Caussé, ’o Elder Carl B. Cook nō te peresidenira’a nō te Hitu ’Ahuru ’e te peresideni rahi o te Paraimere, ’o Susan H. Porter i te mau parau fa’ahanahana, ma te fa’a’ite i te mau ’ohipa iti tā rātou i ’ite ’e te peresideni Nelson, ’e i tō rātou mau mana’o nō ni’a i te orara’a hi’ora’a maita’i, te tāvinira’a huru Mesia ’e te mau ha’api’ira’a fa’auru nāna.

I roto i tāna parau fa’ahanahana, ’ua parau te peresideni Oaks nō te peresideni Nelson ē « e peropheta nō te here » tei « poro i te ’evanelia nō te here. »

Nō te tahi atu ā ha’amāramaramara’a nō ni’a i te orara’a ’e te tāvinira’a a te peresideni Nelson, hi’o ’Ei ha’amana’ora’a : Peresideni Russell M. Nelson, 1924–2025, e ha’apararehia ’ei ’āpiti nō te mau ve’a a te ’Ēkālesia nō Novema 2025.