Te i’oa e pi’ihia ai ’outou

’Ua ha’api’i te peresideni Russell M. Nelson ē mai te mea e parau ’āfaro mai te Fatu ia tātou, te ’ohipa mātāmua tāna e ha’apāpū ē ’ia māramarama tātou, ’o tō tātou ïa ihota’ata mau : e tamari’i tātou nā te Atua, e tamari’i nō te fafaura’a, ’e e pipi nā Iesu Mesia. E fa’ahi’a te tahi noa atu pi’ira’a ia tātou i raro.

’Ua ’apo mai au i te reira nō’u iho nei i te tāime ’a fa’ari’i ai tā’u tamaiti matahiapo i tāna niuniu ’āfa’ifa’i mātamua roa. Ma te poupou rahi, ’ua ha’amata ’oia i te patapata i te mau i’oa nō tōna mau fēti’i ’e te mau hoa i roto i te tāpura nūmera niuniu. I te hō’ē mahana, ’ua ’ite ihora vau tē niuniu mai ra tōna māmā. ’Ua pia mai te ’i’oa ra « Tō’u metua vahine » i ni’a i te paruai. E mana’o nehenehe roa ’e te hanahana ïa—’e i tā’u hi’ora’a, e tāpa’o fa’atura nō te metua maita’i a’e o te ’utuāfare. ’E ’ua ānoenoe atu ra vau. E aha te i’oa tāna i tu’u nō’u ?

’Ua ’imi au i roto i tāna mau nūmera niuniu, ma te mana’o ’ohie ē mai te mea ’o « Tō’u metua vahine » nō Wendi, ’o « Tō’u metua tāne » ïa nō’u. ’Aita rā. ’Ua ’imi au « Pāpā ». ’Aita ato’a. ’Ua ha’amata tō’u ānoenoe i te riro mai ’ei pe’ape’a iti. « ’O Corey rā anei? » ’Aita. ’Imira’a rū hōpe’a, ’ua mana’o vau : « E ta’ata tu’e pōpō māua—pēnei a’e ’o ‘Pelé’ te i’oa ». E moemoeāra’a noa. I te pae hōpe’a, ’ua patapata vau i tōna nūmera niuniu, ’e ’ua pura mai nā ta’o nei i ni’a i te paruai : « E ’ere te Metua vahine » !

E te mau taea’e ’e te mau tuahine, e aha te i’oa e pi’ihia ai ’outou ?

’Ua pi’i Iesu i te feiā e pe’e iāna i te mau i’oa e rave rau : Pipi. Mau tamaiti ’e mau tamāhine. Mau tamari’i nā te mau peropheta. Māmoe. Tau’a. Te māramarama o te ao nei. Feiā mo’a. Tē amo nei teie i te hō’ē aura’a mure ’ore ’e tē ha’apāpū nei te reira i te hō’ē tā’amura’a ta’a ’ē i te Fa’aora.

I roto rā i teie mau i’oa, tē vai ra te hō’ē ’o tei hau atu—te i’oa nō te Mesia. I roto i te Buka a Moromona, ’ua ha’api’i pūai te Ari’i Beniamina :

« ’Aita atu ho’i e i’oa i fa’a’itehia e tae mai ai te fa’aorara’a ; nō reira, ’ua hina’aro vau ’ia rave ’outou i te i’oa o te Mesia i ni’a ia ’outou […]

« ’E a muri a’era, ’o tē nā reira ra e ’itea ïa ’oia i te rima ’atau o te Atua, e ’ite ho’i ’oia i te i’oa i pi’ihia ai ’oia ; e pi’ihia ho’i ’oia i te i’oa o te Mesia. »

’O rātou e rave i te i’oa o te Mesia i ni’a ia rātou iho, e riro ïa rātou ’ei pipi nāna ’e ’ei ’ite nōna. I roto i te buka Te ’Ohipa, tē tai’o nei tātou ē i muri mai i te ti’afa’ahoura’a o Iesu Mesia, ’ua fa’auehia te mau ’ite tei mā’itihia ’ia parau pāpū ē, te feiā ato’a i ti’aturi ia Iesu, i bāpetizohia, ’e i fa’ari’i i te Vārua Maita’i, e fa’ari’i ïa rātou i te fa’a’orera’a o tā rātou mau hara. ’O rātou i fa’ari’i i teie mau ’ōro’a mo’a, ’ua ’amui atu ïa i te ’Ēkālesia, ’ua riro mai ’ei pipi ’e ’ua parauhia rātou e keresetiano. Tē parau ato’a nei te Buka a Moromona i te feiā ti’aturi i te Mesia ’ei keresetiano ’e ’o rātou tei rave i te fafaura’a « e mau tamari’i nā te Mesia, ’oia ho’i tāna mau tamari’i tamāroa ’e tāna mau tamāhine. »

E aha te aura’a ’ia pi’ihia nā ni’a i te i’oa o te Mesia? ’Oia ho’i te ravera’a ïa ’e te ha’apa’ora’a i te mau fafaura’a, te ha’amana’o-noa-ra’a iāna, te ha’apa’ora’a i tāna mau fa’auera’a, ’e te hina’arora’a « ’ia ti’a ’ei ’ite nō te Atua i te mau taime ato’a ’e nō te mau mea ato’a. » Te aura’a ’oia ïa ’ia ti’a i pīha’i iho i te mau peropheta ’e te mau ’aposetolo e ’āfa’i nei i te parau poro’i a te Mesia—’e tāna ha’api’ira’a tumu, mau fafaura’a, ’e mau oro’a—nā te ao nei. ’Oia ato’a ’ia tāvini ia vetahi ’ē ’ia matara te māuiui, ’ia riro ’ei māramarama ’e ’ia ’afa’i mai i te tīa’i i te Mesia i te mau ta’ata ato’a. Parau mau, e tauto’ora’a teie nō te oraraʼa taʼatoʼa. ’Ua ha’api’i te peropheta Iosepha Semita ē « teie te hō’ē fāito e’ita roa e noa’a i te ta’ata i [terā] noa iho taime. »

Nō te mea e ha’ara’a roa te ti’ara’a pipi ’e e mea nā roto i te tauto’ora’a patuhia « te fa’aue nā ni’a iho i te fa’aue, te a’o nā ni’a iho i te a’o » e mea ’ohie ïa ’ia haru-’ē-hia tātou e te mau ti’ara’a o te ao nei. E hōro’a mai te reira i te hi’ora’a faufa’a tau poto, e’ita roa atu rā e nava’i i te reira ana’e. Tei roto noa ’e e « mea nā roto noa i te Mesia Mo’a » te fa’aorara’a ’e te mau maita’i nō te tau a muri atu e tae mai ai. Nō reira, e mea tano ’e e mana’o pa’ari ho’i ’ia pe’e i te mau parau a’o a te peropheta ’ia fa’ariro i te ti’ara’a pipi ’ei tauto’ora’a mātamua i roto iho ā rā i te hō’ē tau tata’ura’a nō te mau reo ’e te mau mana. Teie mau te hōhonura’a o te a’o a te Ari’i Beniamina ’a parau ai ’oia ē : « ’Ia ha’amana’o ’outou ē ’ia tāmau i te i’oa [o te Mesia] i pāpa’i-mau-hia i roto i tō ’outou ra ’ā’au […] ’ia fa’aro’o ’outou ’e ’ia ’ite ho’i i te reo e pi’ihia ai ’outou, ’e ’oia ato’a i te i’oa ’o tāna e pi’i ia ’outou ».

’Ua ’ite au i te reira i roto i tō’u iho ’utuāfare. ’Ua tāuihia a muri atu te orara’a o tō’u tupuna tāne Martin Gassner ’aua’a a’e maoti te hō’ē peresideni ’āma’a ha’eha’a i pāhono i te pi’ira’a a te Fa’aora. I te Fenua Heremani, i te matahiti 1909, e mau tau fifi ïa, ’e e mea varavara te moni. E tāpiri ’āuri ’o Martin i roto i te hō’ē taiete hāmani tuiō. Nāna iho i parau ē, te pae rahi o tāna moni ’ohipa, tei roto ïa i te inu, te ’ava’ava ’e te ’aufaura’a i te inu nō te mau ta’ata. I te pae hōpe’a ’ua fa’aara atu tāna vahine ē ’ia ’ore ’oia e tāui, ’e haere ’ē atu ’oia.

I te hō’ē mahana, ’ua fārerei te tahi hoa ’ohipa o Martin iāna ’a haere ai i te fare inura’a, ma te tahi buka iti mi’omi’o, e buka fa’aro’o, i roto i tōna rima. ’Ua ’itehia mai iāna i ni’a i te purōmu ’e ’ua parau ’oia ia Martin ē e mana’o ta’a ’ē tei tupu ’a tai’o ai ’oia i teie buka na’ina’i, te i’oa ’o Was wissen Sie von den Mormonen ?, ’oia ho’i E aha tā ’oe i ’ite nō ni’a i te mau momoni ? Pāpū ē ’ua taui terā i’oa.

’Ua tāumihia te tītiro nō te hō’ē vāhi i te tua o te reira, ’e e nehenehe ri’i e tai’o i hea te fare pure. Tei te ātea ’ē roa te reira, ’ua tūra’ihia rā raua e te mea tā rāua i tai’o ’e ’ua fa’a’oti e haere atu nā ni’a i te pere’o’o auahi i taua Sābati ra. I tō rāua taera’a atu, ’ua ’ite atu ra rāua ē, e ’ere te reira vāhi i te fare pure, nō te hunara’a ta’ata pohe rā. ’Ua fē’a’a iho ra ’o Martin—nō te mea e aha pa’i te aura’a e tu’u i te tahi fare pure i te hō’ē vāhi hunara’a ta’ata pohe.

’Āre’a rā, i te tahua i ni’a, ’ua ’iteahia ia rāua te hō’ē pupu iti Feiā mo’a. ’Ua ani te hō’ē ta’ata ia rāua ’ia fa’aea nō te purera’a ’itera’a pāpū. ’Ua putapūhia ’o Martin e te Vārua ’e nō tōna fa’aurura’ahia nā roto i te mau ’itera’a pāpū iti ’e te hōhonu, ’ua fa’a’ite ato’a iho ra i tōna iho ’itera’a pāpū. Tei te reira vāhi mana’o-’ore-hia ïa tōna paraura’a ē ’ua ’ite a’ena ’oia e parau mau te reira.

’Ua fa’a’ite mai ra te ta’ata ē, ’o ’oia te peresideni ’āma’a, ’e ’ua ani atu ra iā rāua e ho’i mai ānei rāua. ’Ua parau atu Martin ē, e mea ātea roa ’oia i te fa’aeara’a ’e e’ita e pe’e te tere tāhepetoma. ’Ua parau atu ra te peresideni ’āma’a : « ’A pe’e mai ia’u ».

’Ua haere atu rātou e tau fare i raro ē tae atu ai i te hō’ē pū hāmanira’a tao’a i reira te hō’ē hoa o te peresideni ’āma’a e ’ohipa ai. I muri mai i te hō’ē ’aparaura’a iti, ’ua tihepuhia ’o Martin ’e tōna hoa. I muri mai, ’ua arata’i te peresideni ’āma’a ia rāua i te hō’e fare nohora’a tahua ’e ’ua ha’apāpū i te nohora’a nō tō rāua na ’utuāfare.

’Ua tupu te reira i roto noa i nā hora e piti. ’Ua tāui te ’utuāfare o Martin i tō rātou nohora’a i te hepetoma i muri iho. E ono ’āva’e i muri mai, ’ua bapetizohia rātou. Riro mai nei te ta’ata tei hi’ohia e ta’ero ’ava faufa’a ’ore ’ei ta’ata itoito roa i roto i tāna fa’aro’o āpī—’e ’ua ha’amata te feiā nō te ’oire i te pi’i ’iāna, ’eiaha rā paha ma te fa’atura, « te tahu’a ».

Nō te peresideni ’āma’a rā, e’ita vau e nehenehe e fa’a’ite atu i tōna i’oa—’ua mo’ehia tōna i’oa i te roara’a o te tau. E pi’i rā vau iāna e pipi, e ti’ahau, e Keresetiano, e ta’ata Samaria maita’i, ’e e hoa. Tē vai noa nei ā tōna mana maita’i, 116 matahiti i muri mai, ’e tē ti’a nei au i ni’a i nā tapono o tōna ti’ara’a pipi.

« E parau tē nā ’ō ra ē, e ti’a ’ia tai’o i te mau huero i roto i te hō’ē ’āpara, e’ita rā e nehenehe e tai’o i te mau ’āpara e noa’a mai i te hō’ē huero. » ’Ua hotu rahi roa te huero i tanuhia e te peresideni ’āma’a. ’Aita ’oia i mana’o ē e 48 matahiti i muri mai, e rave rahi u’i nō te fēti’i o Martin, i na pae e piti nō te pāruru, e tā’atihia i roto i te hiero nō Bern (Herevetia).

Pēnei a’e te mau a’ora’a rahi a’e ’o terā ïa ’aita i fa’aro’ohia, ’o tā tātou rā e hi’o nei i roto i te mau ’ohipa muhu ’ore ’e te fa’atietie ’ore ’e te orara’a o te feiā mai terā noa, ’o tē tāmata nei ’ia riro mai ia Iesu ra te huru, ’o tē hamani maita’i haere ra. E ’ere te mea tā teie peresideni ’āma’a ’ā’au aroha i rave i te hō’ē tuha’a nō te hō’ē tāpura. ’Ua ora noa ’oia i te ’evanelia ma te haeha’a mai te au tei tātarahia mai i roto i te buka ā Alama : « ’Aita rātou i tu’u ’ē atu i […] tei po’ia, ’e tei po’ihā, ’e tei pohehia i te ma’i […] ’ua hōro’a noa rātou nā te mau ta’ata ato’a, i te ta’ata pa’ari ’e te ta’ata ’āpī ato’a ho’i […] i te tāne ’e te vahine ». ’E, te hō’ē mea i tītauhia iā tātou e ha’amana’o, ’aita rātou i tu’u ’ē atu i te hō’ē « i roto i te ’ēkālesia ’e tei rāpae ho’i i te ’ēkālesia ».

Tē fā’ī nei te feiā e rave i te i’oa o te Mesia i ni’a ia rātou i te parau a te peropheta Iosepha Semita ē : « E’ita te hō’ē ta’ata ’o tei ’ī i te aroha o te Atua e māuruuru i te ha’amaita’i noa i tōna iho ’utuāfare, e tere rā ’oia nā te ao ato’a nei, ma te ’ana’anatae i te ha’amaita’i i te tā’āto’ara’a o te nūna’a ta’ata ».

Teie ïa te huru orara’a o Iesu. Parau pāpū, ’ua rahi roa tāna i rave ’e ’aita ïa tāna mau pipi i pāpa’i pauroa i te reira. ’Ua pāpa’i Ioane ē : « E rave rahi ā tā Iesu peu i rave, ’āhiri i hope ato’a i te pāpa’ihia, tē mana’o nei au e ’ore e ti’a i tō te ao ato’a nei ’ia fa’ari’i mai i taua mau buka ra, ’āhiri i pāpa’ihia ».

E ’imi na tātou ’ia pe’e i te ’ē’a o te Mesia ra, ma te rave i te maita’i ’e ma te fa’arirora’a i te ti’ara’a pipi ’ei tauto’ora’a mātamua nō teie orara’a ’ia nehenehe te feiā tā tātou e ’amui atu ’ia ’ite i te aroha o te Atua ’e te mana ha’apāpū o te Vārua Maita’i. I reira e nehenehe ai e ’ati atu i tō’u metua tupuna tāne ’e te tahi atu rahira’a mirioni, mai ia Anederea nō te parau ē : « ’Ua itea ia māua te Mesia ».

I te pae hōpe’a, ’aita tō tātou ti’ara’a ta’ata e au i tā tō te ao nei. E au rā tō tātou ti’ara’a pipi i te mau ’ōro’a tā tātou e fa’ari’i, te mau fafaura’a tā tātou e ha’apa’o, ’e te aroha tā tātou e fa’a’ite i te Atua ’e i te ta’ata tupu nā roto i te rave-noa-ra’a i te mea maita’i. Mai tā te peresideni Nelson i ha’api’i, e tamari’i mau tātou nā te Atua, e tamari’i nō te fafaura’a ’e e pipi nā Iesu Mesia.

Tē parau pāpū nei au ē, tē ora nei Iesu Mesia ’e ’ua fa’aora ia tātou. ’O ’oia tei parau ē : « Nā’u i ma’iri i tō i’oa na ; nō’u ’oe. » Nā roto i te i’oa o Iesu Mesia, ’āmene.