ចូរមកតាមខ្ញុំ

ពរជ័យនៃការសិក្សា ព្រះគម្ពីរសញ្ញាចាស់

ដោយប្រធាន ម៉ាក អិល ភែក

ប្រធានសាលាថ្ងៃអាទិត្យទូទៅ

នៅពេលយើងអានជំពូក និងខគម្ពីរទាំងឡាយនៃព្រះគម្ពីរពីបុរាណនេះ នោះយើងនឹងត្រូវបានពង្រឹងខាងវិញ្ញាណ ។

Jesus Christ with stars in background — ការសន្យារបស់ប្រធាន ណិលសុន គឺជ្រាលជ្រៅណាស់ ហើយវាគឺជាការពិត ។

សូមស្វាគមន៍មកកាន់ការសិក្សាព្រះគម្ពីរសញ្ញាចាស់ ឆ្នាំ ២០២២ ជាមួយនឹងធនធាន ចូរមកតាមខ្ញុំ ដែលជាមគ្គទេសក៍មួយ ! ព្រះគម្ពីរសញ្ញាចាស់គឺជាព្រះគម្ពីរដ៏ពិសិដ្ឋមួយ ដែលត្រូវបានរក្សាទុកដោយព្រះហស្ដនៃព្រះ ដើម្បីឲ្យពួកយើងអាន និងសញ្ជឹងគិត ។ វាអាចជាពរជ័យ និងមគ្គទេសក៍មួយសម្រាប់ពួកយើងនៅក្នុងថ្ងៃចុងក្រោយនេះ ។

ព្រះគម្ពីរសញ្ញាចាស់ផ្ដល់ទិដ្ឋភាពទូលំទូលាយមួយអំពីសេចក្ដីជំនឿ និងភក្ដីភាពក្នុងរយៈពេល ៣៥០០ ឆ្នាំ ប្រហែលមកពីឆ្នាំ ៤០០០ មុន គ.ស. ដល់ ៥០០ មុន គ.ស. ។ មានគម្ពីរចំនួន ៣៩ នៅក្នុងព្រះគម្ពីរសញ្ញាចាស់ ។ គម្ពីរលោកុប្បត្តិគ្របដណ្ដប់លើគ្រាកាន់កាប់ត្រួតត្រាចំនួនបួនរបស់លោកអ័ដាម ហេណុក ណូអេ និង អ័ប្រាហាំ ។ គម្ពីរ ៣៨ ទៀត ពីគម្ពីរនិក្ខមនំដល់គម្ពីរម៉ាឡាគី គឺឧទ្ទិសដល់គ្រាកាន់កាប់ត្រួតត្រារបស់លោកម៉ូសេ ។

នៅពេលយើងអានព្រះគម្ពីរសញ្ញាចាស់ នោះយើងនឹងស្គាល់ព្យាការី និងការបង្រៀនរបស់ពួកលោកកាន់តែច្បាស់ឡើង ។ ពួកលោកបានបង្រៀនដំណឹងល្អរបស់ព្រះយេស៊ូវគ្រីស្ទ ។ ពួកលោកបានព្យាករ ហើយបានទន្ទឹងរង់ចាំការយាងមករបស់ព្រះមែស៊ី ។ ការបង្រៀនដ៏បំផុសគំនិតរបស់ពួកលោក ត្រូវបានរក្សាទុកសម្រាប់ជំនាន់របស់យើង ។

នៅពេលយើងអានជំពូក និងខគម្ពីរទាំងឡាយនៃព្រះគម្ពីរសញ្ញាចាស់ នោះយើងនឹងត្រូវបានពង្រឹងខាងវិញ្ញាណ ។ ព្រះវិញ្ញាណបរិសុទ្ធនឹងនាំការយកចិត្តទុកដាក់របស់យើងទៅលើខគម្ពីរជាក់លាក់ ដែលនឹងក្លាយជាកម្លាំងដល់យើង នៅពេលយើងទន្ទឹងរង់ចាំការយាងមកជាលើកទីពីររបស់ព្រះអង្គសង្គ្រោះ ។

សំណួរដែលបំផុសគំនិត

ខ្ញុំសូមចែកចាយដំណើររឿងមួយអំពីរបៀប ដែលខគម្ពីរតែមួយចេញពីព្រះគម្ពីរសញ្ញាចាស់ បានមានឥទ្ធិពលលើខ្ញុំពេញមួយជីវិតរបស់ខ្ញុំ ។

នៅឆ្នាំ ១៩៧៤ ខ្ញុំមានអាយុ ១៧ ឆ្នាំ ។ ខ្ញុំរីករាយនឹងជីវិតក្នុងនាមជាសិស្សអនុវិទ្យាល័យ ។ ខ្ញុំទន្ទឹងរង់ចាំដល់ថ្ងៃបម្រើបេសកកម្មរបស់ខ្ញុំ ។ នៅក្នុងទស្សនាវដ្ដី Ensign ខែ តុលា ឆ្នាំ ១៩៧៤ ខ្ញុំបានអានសារលិខិតដ៏មានអានុភាពមួយមកពីប្រធាន ស្ពែនស៊ើរ ដបុលយូ ឃឹមបឹល ( ឆ្នាំ ១៨៩៥–១៩៨៥ ) ដែលមានចំណងជើងថា « When the World Will Be Converted » ។^១ តាំងពីនោះមក ខ្ញុំបានអានវាជាច្រើនដង ។ មកដល់សព្វថ្ងៃនេះ វានៅតែបំផុសគំនិតខ្ញុំ ។

ប្រធាន ឃឹមបឹល បានបង្ហាញពីទស្សនវិស័យរបស់ពិភពលោកទាំងស្រុងមួយ អំពីការរីកចម្រើនរបស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនៅក្នុងគ្រាកាន់កាប់ត្រួតត្រានេះ ។ លោកបានបង្រៀនអំពីឱកាស និងការទទួលខុសត្រូវរបស់យើង ដើម្បីនាំដំណឹងល្អទៅកាន់ពិភពលោកទាំងមូល ។ ប្រធាន ឃឹមបឹល បានដកស្រង់ខគម្ពីរមួយមកពីគម្ពីរលោកុប្បត្តិ ។ វាបានបំផុសគំនិតខ្ញុំនៅពេលនោះ ហើយវាបានបន្ដបំផុសគំនិតខ្ញុំពេញមួយជីវិតរបស់ខ្ញុំ ៖ « តើមានការអ្វីដែលព្រះយេហូវ៉ាធ្វើមិនកើតដែរឬអី ? » ( លោកុប្បត្តិ ១៨:១៤ ដែលត្រូវសិក្សានៅក្នុងខែកុម្ភៈតាមកាលវិភាគ ) ។

ប្រធាន ឃឹមបឹល បានរំឭកដល់ដំណើររឿងអំពីលោកអ័ប្រាហាំ និងសារ៉ា ។ សារ៉ាបានសើចនឹងការសន្យារបស់ព្រះអម្ចាស់ថា នាង និងអ័ប្រាហាំនឹងមានកូនប្រុសម្នាក់ ។ ពួកលោកមិនមានកូននោះទេ ។ ឥឡូវនេះ ពួកលោកម្នាក់ៗមានអាយុ ៩០ និង ១០០ ឆ្នាំហើយ ។ ពួកលោកហួសអាយុមានកូនទៅហើយ ។

« តែព្រះយេហូវ៉ាទ្រង់មានព្រះបន្ទូលនឹងអ័ប្រាហាំថា ហេតុអ្វីបានជាសារ៉ាសើច … ? »

« តើមានការអ្វីដែលព្រះយេហូវ៉ាធ្វើមិនកើតដែរឬអី ? ដល់វេលាកំណត់ នោះយើងនឹងមកឯឯង លុះគ្រប់ខែហើយ សារ៉ានឹងបង្កើតបានកូនប្រុស១ » ( លោកុប្បត្តិ ១៨:១៣–១៤ ) ។

អ័ប្រាហាំ និងសារ៉ាបានអនុវត្តសេចក្ដីជំនឿ ។ ព្រះអម្ចាស់បានរក្សាការសន្យារបស់ទ្រង់ ។ អ៊ីសាកបានកើតមក ។ អ័ប្រាហាំបានក្លាយជាឪពុកនៃជាតិសាសន៍ជាច្រើន ។

កម្លាំងដើម្បីប្រឈមមុខនឹងឧបសគ្គ

« តើមានការអ្វីដែលព្រះយេហូវ៉ាធ្វើមិនកើតដែរឬអី ? » បទគម្ពីរក្នុងព្រះគម្ពីរសញ្ញាចាស់នេះបានពង្រឹងខ្ញុំ នៅពេលខ្ញុំបានប្រឈមមុខនឹងឧបសគ្គ ឬការព្រួយបារម្ភនៅក្នុងជីវិត ៖

ក្នុងនាមជាអ្នកផ្សព្វផ្សាយសាសនាថ្មីម្នាក់ នៅពេលដែលខ្ញុំមានអារម្មណ៍សន្ធប់ ។ « តើមានការអ្វីដែលព្រះយេហូវ៉ាធ្វើមិនកើតដែរឬអី ? »
បន្ទាប់ពីបេសកកម្មរបស់ខ្ញុំ នៅពេល អ៊ែន ម៉ារី និងខ្ញុំបានពិចារណារៀបអាពាហ៍ពិពាហ៍ ហើយភ័យពីរបៀបចំណាយលើថ្លៃម្ហូប ថ្លៃផ្ទះ និងថ្លៃបង់សាលា ។ « តើមានការអ្វីដែលព្រះយេហូវ៉ាធ្វើមិនកើតដែរឬអី ? »
ក្នុងនាមជាគូស្វាមីភរិយារៀបការថ្មី ដែលទើបមានកូន ហើយដឹងពីសម្ពាធខាងហិរញ្ញវត្ថុក្នុងជីវិត ។ « តើមានការអ្វីដែលព្រះយេហូវ៉ាធ្វើមិនកើតដែរឬអី ? »
ពេលប្រឈមមុខនឹងឧបសគ្គនៅសាលារៀន គ្រួសារដែលមានកូនធំឡើង និងពេលចាប់ផ្ដើមអាជីពការងារ ។ « តើមានការអ្វីដែលព្រះយេហូវ៉ាធ្វើមិនកើតដែរឬអី ? »
នៅពេលខ្ញុំជាប្រធានបេសកកម្ម បាសេឡូណា អេស្ប៉ាញ នោះ អ៊ែន ម៉ារី និងខ្ញុំបានយោងទៅបទគម្ពីរនេះម្ដងហើយម្ដងទៀត នៅពេលបង្រៀនពួកអ្នកផ្សព្វផ្សាយសាសនា ។ « តើមានការអ្វីដែលព្រះយេហូវ៉ាធ្វើមិនកើតដែរឬអី ? » សំបុត្រទៅកាន់ពួកអ្នកផ្សព្វផ្សាយសាសនារបស់យើង ដែលជារឿយៗរួមមានសេចក្ដីយោងទៅ « តើមានការអ្វីដែលព្រះយេហូវ៉ាធ្វើមិនកើតដែរឬអី ? »

មូលដ្ឋានគ្រឹះខាងបទគម្ពីរ

reproduction of stone tablets with Ten Commandments

ខគម្ពីរនេះគឺគ្រាន់តែជាឧទាហរណ៍មួយ ក្នុងចំណោមឧទាហរណ៍ជាច្រើននៃខគម្ពីរដ៏បំផុសគំនិត ដែលមាននៅក្នុងព្រះគម្ពីរសញ្ញាចាស់ ។ ខ្ញុំជឿជាក់ថា មានខគម្ពីរជាច្រើនដែលបានបំផុសគំនិតបងប្អូនរួចមកហើយ ។ នៅពេលយើងអានព្រះគម្ពីរសញ្ញាចាស់នៅឆ្នាំនេះប្រកបដោយមនសិការ និងប្រកបដោយការអធិស្ឋាន នោះព្រះវិញ្ញាណបរិសុទ្ធនឹងនាំការយកចិត្តទុកដាក់របស់យើងទៅលើខគម្ពីរជាក់លាក់បន្ថែមទៀត ដែលនឹងពង្រឹងដល់ការប្រែចិត្តជឿរបស់យើងទៅលើព្រះយេស៊ូវគ្រីស្ទ និងដំណឹងល្អរបស់ទ្រង់ ។

ព្រះគម្ពីរសញ្ញាចាស់មាននូវគោលលទ្ធិ និងគោលការណ៍ជាច្រើនដែលមានសារៈសំខាន់ជានិច្ច ។ វាមាននូវការព្យាករណ៍ដែលមិនទាន់បានបំពេញនៅឡើយ ។ វាបង្រៀនយើងអំពីទីកន្លែងកំណើតដ៏ទេវភាពរបស់យើង ។ ហើយវាបង្រៀនយើងអំពីសេចក្ដីសញ្ញាអ័ប្រាហាំ ដែលនៅតែអនុវត្តដល់សព្វថ្ងៃនេះ ។

ព្រះគម្ពីរសញ្ញាចាស់ផ្ដល់ជាមូលដ្ឋានគ្រឹះសម្រាប់ព្រះគម្ពីរផ្សេងទៀតរបស់យើង ។ កាលណាយើងយល់ពីព្រះគម្ពីរសញ្ញាចាស់កាន់តែច្បាស់ នោះយើងនឹងកាន់តែយល់ពីច្បាប់ព្រះគម្ពីរផ្សេងៗទៀតកាន់តែខ្លាំងផងដែរ ពីព្រោះការបង្រៀនក្នុងព្រះគម្ពីរសញ្ញាចាស់បង្ហាញឡើងនៅក្នុងព្រះគម្ពីរទាំងនោះ ៖

អំឡុងការងារបម្រើរបស់ទ្រង់ ព្រះអង្គសង្រ្គោះបានបង្រៀនដោយប្រើបទគម្ពីរមកពីព្រះគម្ពីរសញ្ញាចាស់ ។
លីហៃ និងគ្រួសាររបស់លោកបានយកផ្ទាំងលង្ហិន ដែលមានបទគម្ពីរមកពីព្រះគម្ពីរសញ្ញាចាស់ ។
នីហ្វៃបានបង្រៀនយ៉ាកុប ដោយដកស្រង់ពាក្យសម្ដីចេញពីគម្ពីរអេសាយនៅក្នុងព្រះគម្ពីរសញ្ញាចាស់ ។
អំឡុងការយាងមកជួបពួកសាសន៍នីហ្វៃរបស់ទ្រង់ បន្ទាប់ពីការរស់ឡើងវិញរបស់ទ្រង់ នោះព្រះយេស៊ូវគ្រីស្ទបានដកស្រង់ពាក្យពេចន៍ចេញពីគម្ពីរអេសាយ និងម៉ាឡាគីនៅក្នុងព្រះគម្ពីរសញ្ញាចាស់ ។

beings appearing to Joseph Smith and Oliver Cowdery in Kirtland Temple

ព្យាការី និងការបង្រៀនទាំងឡាយនៅក្នុងព្រះគម្ពីរសញ្ញាចាស់ ក៏ជាចំណុចស្នូលនៃសារលិខិតនៃការស្ដារដំណឹងល្អឡើងវិញនៅក្នុងជំនាន់របស់យើងផងដែរ ៖

នៅក្នុងការមកជួបព្យាការី យ៉ូសែប ស្ម៊ីធ ជាលើកដំបូងរបស់លោក មរ៉ូណៃបានដកស្រង់សម្ដីចេញពីគម្ពីរម៉ាឡាគី ។
ព្រះគម្ពីរមុក្តាដ៏មានតម្លៃមហិមារួមមានគម្ពីរអ័ប្រាហាំ និងគម្ពីរម៉ូសេ ។
ម៉ូសេ អេលីយ៉ាស និង អេលីយ៉ា បានប្រគល់កូនសោបព្វជិតភាពឲ្យទៅព្យាការី យ៉ូសែប ស៊្មីធ នៅក្នុងព្រះវិហារបរិសុទ្ធ ខឺតឡង់ ។

តើវាមានគោលបំណងអ្វី ?

នៅពេលយើងអានគម្ពីរទាំងឡាយនៅក្នុងព្រះគម្ពីរសញ្ញាចាស់ នោះយើងគួរតែពិចារណាថា គម្ពីរទាំងនេះត្រូវបានជ្រើសរើស គូសបញ្ជាក់ និងរៀបចំតាមរបៀបដ៏ពិសេសមួយ សម្រាប់មូលហេតុខាងសាសនា ។ យើងអាចសួរខ្លួនឯងដោយសមរម្យថា « ហេតុអ្វីមានព័ត៌មាននេះ ហើយតើមានគោលបំណងអ្វី ? »

ខណៈផ្នែកមួយចំនួននៃព្រះគម្ពីរសញ្ញាចាស់អាចពិបាកនឹងយល់ខ្លះ នោះយើងគួរតែចងចាំថា វាមាននូវភាពពោរពេញមួយ ដែលមិនគួរធ្វេសប្រហែសឡើយ ។ ដូចដែលព្យាការី យ៉ូសែប ស៊្មីធ បានបង្រៀនថា « យើងខ្ញុំជឿថា ព្រះគម្ពីរប៊ីបគឺជាព្រះបន្ទូលនៃព្រះ បើសិនជាបានបកប្រែត្រឹមត្រូវ » ( មាត្រានៃសេចក្ដីជំនឿ ១:៨ ) ។ ប្រាកដណាស់ យើងមានពរជ័យតាមរយៈការសិក្សាព្រះបន្ទូលរបស់ព្រះ !

វាអាចមានប្រយោជន៍នៅក្នុងការសិក្សាព្រះគម្ពីរសញ្ញាចាស់របស់យើង ដើម្បីរកមើលប្រធានបទ និងការយល់ដឹងនានា ។ យើងគួរតែរកមើលពីរបៀបដើម្បីយល់កាន់តែច្បាស់ថា ព្រះនៃព្រះគម្ពីរសញ្ញាចាស់ក៏ជាព្រះនៃព្រះគម្ពីរសញ្ញាថ្មីផងដែរ ។ ព្រះយេហូវ៉ាគឺជាព្រះយេស៊ូវគ្រីស្ទ ។ តើការសិក្សាព្រះគម្ពីរសញ្ញាចាស់ជួយយើងឲ្យស្គាល់ព្រះអង្គសង្គ្រោះរបស់យើងកាន់តែច្បាស់ដោយរបៀបណា ?

ប្រធានបទសំខាន់ៗផ្សេងទៀត ដែលខ្ញុំរកឃើញនៅក្នុងព្រះគម្ពីរសញ្ញាចាស់រួមមាន សេចក្ដីសញ្ញា ភាពបរិសុទ្ធ ព្យាការីដែលនៅរស់ ពលិកម្ម និងការគោរពប្រតិបត្តិ សេចក្ដីជំនឿ និងការប្រែចិត្ត ការសរសើរដល់ព្រះអម្ចាស់ និងព្រះរាជអំណាចរបស់ព្រះ ។

នៅពេលយើងសិក្សា នោះយើងគួរតែចងចាំថា វិវរណៈនៅថ្ងៃចុងក្រោយផ្ដល់ឲ្យយើងនូវការយល់ដឹងពេញលេញបន្ថែមទៀតអំពីព្រះគម្ពីរសញ្ញាចាស់ ។ ឧទាហរណ៍ ដោយសារវិវរណៈសម័យទំនើប នោះយើងដឹងថា ព្យាការីនៃព្រះគម្ពីរសញ្ញាចាស់បានកាន់បព្វជិតភាពមិលគីស្សាដែក ហើយថាព្យាការីនៅក្នុងគ្រាកាន់កាប់ត្រួតត្រាមុនៗបានដឹង និងបានបង្រៀនពីដំណឹងល្អរបស់ព្រះយេស៊ូវគ្រីស្ទ ។

ការសន្យាទាំងឡាយរបស់ព្យាការី

នៅក្នុងគ្រាកាន់កាប់ត្រួតត្រានេះ យើងមានពរជ័យជាថ្មីម្ដងទៀតដើម្បីដឹងថា ព្យាការី និងពួកសាវកផ្ដល់នូវការបង្រៀន និងការទូន្មានដ៏បំផុសគំនិត ។

អែលឌើរ ឃ្វីនថិន អិល ឃុក ក្នុងកូរ៉ុមនៃពួកសាវកដប់ពីរនាក់ បានណែនាំជាលើកដំបូងអំពី ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ នៅក្នុងសន្និសីទទូទៅ ខែ តុលា ឆ្នាំ ២០១៨ ។^២ ធនធាននេះគឺជាពរជ័យដ៏អស្ចារ្យសម្រាប់មនុស្សទាំងអស់ ។ បីឆ្នាំកន្លងមកនេះបានផ្ដល់ដល់ខ្ញុំ នូវបទពិសោធន៍សិក្សាព្រះគម្ពីរដ៏ជ្រាលជ្រៅ និងមានអត្ថន័យខ្លាំងបំផុតមួយចំនួននៅក្នុងជីវិតរបស់ខ្ញុំ ។ ខ្ញុំជឿជាក់ថា ពរជ័យដូចគ្នានេះកំពុងរង់ចាំពួកយើងម្នាក់ៗនៅក្នុងឆ្នាំ ២០២២ ។

ប្រធាន រ័សុល អិម ណិលសុន បានមានប្រសាសន៍ថា នៅពេលយើងផ្លាស់ប្ដូរគេហដ្ឋានរបស់យើងឲ្យក្លាយទៅជាទីបរិសុទ្ធនៃសេចក្ដីជំនឿ និងមជ្ឈមណ្ឌលនៃការរៀនសូត្រដំណឹងល្អ នោះយើងនឹងទទួលបានពរជ័យជាក់លាក់ចំនួនបួន ៖

« យូរៗទៅថ្ងៃឈប់សម្រាក របស់បងប្អូន នឹងបានជាទីរីករាយចិត្តយ៉ាងពិតប្រាកដ » ។
« កូនចៅ របស់បងប្អូន នឹងមានចិត្តរំភើបក្នុងការរៀន និងរស់នៅតាមការបង្រៀនរបស់ព្រះអង្គសង្គ្រោះ » ។
« ឥទ្ធិពលរបស់មារសត្រូវនៅក្នុងជីវិត របស់បងប្អូន និងគេហដ្ឋាន របស់បងប្អូន នឹងត្រូវសាបរលាប » ។
« ការផ្លាស់ប្ដូរនៅក្នុងគ្រួសាររបស់បងប្អូននឹងមានយ៉ាងខ្លាំង និងរឹងមាំ » ។^៣

ការសន្យារបស់ប្រធាន ណិលសុន គឺជ្រាលជ្រៅណាស់ ហើយវាគឺជាការពិត ។ ពរជ័យទាំងនេះបានក្លាយជាការពិត ហើយនឹងបន្ដនៅក្នុងឆ្នាំ ២០២២ នេះផងដែរ នៅពេលយើងសិក្សា និងរៀនសូត្រពីព្រះគម្ពីរសញ្ញាចាស់ ។