គោលការណ៍ទាំងឡាយនៃការងារបម្រើ
ការធ្វើឲ្យការងារបម្រើកាន់តែមានអត្ថន័យ
ប្រសិនបើបងប្អូនឆ្ងល់ថា តើការងារបម្រើរបស់បងប្អូនមានអត្ថន័យដែរឬអត់ សូមពិចារណាពីគំនិតទាំងនេះ ។
វាងាយស្រួលដើម្បីឆ្ងល់ថាតើ ការងារបម្រើរបស់យើងធ្វើឲ្យមានភាពខុសគ្នាឬអត់ ជាពិសេសនៅពេលយើងកំពុងប្រឈមមុខនឹងការលំបាករបស់យើងផងដែរនោះ ។
នៅក្នុងជីវិតខ្ញុំមុនដំណាក់កាលជិះលើរទេះពិការនេះ ខ្ញុំចូលចិត្តមើលក្ដារប្រកាសចុះឈ្មោះ ដើម្បីបម្រើនៅក្នុងសមាគមសង្រ្គោះ ។ ជារឿយៗ ខ្ញុំចុះឈ្មោះដើម្បីផ្ដល់ការបម្រើ ។ វាគឺជារបៀបមួយដើម្បីបង្ហាញឆន្ទៈរបស់ខ្ញុំ « យល់ព្រមទទួលបន្ទុកគ្នាទៅវិញទៅមក » ( ម៉ូសាយ ១៨:៨ ) ។
វាមិនមែនជាកំហុសរបស់ក្ដារប្រកាស ដែលធ្វើឲ្យខ្ញុំមិនអាចចុះឈ្មោះបាននោះទេ ។ តាមពិតទៅ គឺខ្ញុំមិនអាចចុះឈ្មោះខ្ញុំទៀតបានទេ ។ ដោយសារតែពិការភាពរបស់ខ្ញុំ ខ្ញុំថែមទាំងមិនអាចកាន់ក្ដារប្រកាសនោះបានផង ។ គ្មាននរណារំពឹងឲ្យខ្ញុំចុះឈ្មោះនោះទេ ។ ប៉ុន្តែ ខ្ញុំពិតជាចង់ចុះឈ្មោះខ្លាំងណាស់ ! ការបម្រើធ្វើឲ្យយើងហ៊ុមព័ទ្ធដោយសេចក្ដីស្រឡាញ់របស់ព្រះ និងភ្ជាប់យើងទៅនឹងមនុស្សដទៃទៀត ។ ខ្ញុំខ្លួនឯងពិតជាត្រូវការអារម្មណ៍ភ្ជាប់ទំនាក់ទំនងនោះខ្លាំងណាស់ ។
ដោយសារខ្ញុំត្រូវការមនុស្សឲ្យជួយមើលថែខ្ញុំ ការបម្រើរបស់ខ្ញុំមើលទៅហាក់មិនស័ក្ដិសមនឹងកិច្ចខិតខំ ដែលវាតម្រូវឲ្យមនុស្សដទៃជួយខ្ញុំនោះទេ ។ ក្ដារប្រកាសនោះបានក្លាយជាការរំឭកមួយដល់ខ្ញុំ អំពីអ្វីដែលខ្ញុំលែងអាចធ្វើបានទៀត—យ៉ាងហោចណាស់រហូតដល់បងស្រីដែលផ្ដល់ការងារបម្រើរបស់ខ្ញុំ បានឃើញបំណងប្រាថ្នារបស់ខ្ញុំ ។
គាត់បានសួរខ្ញុំថា តើខ្ញុំចង់ធ្វើអ្វីដើម្បីបម្រើ មិនគ្រាន់តែអ្វីដែលខ្ញុំត្រូវការឲ្យគេបម្រើដល់ខ្ញុំនោះទេ ។ បន្ទាប់មក គាត់បានចុះឈ្មោះខ្ញុំនៅលើក្ដារប្រកាសនោះ ។ គាត់បានមកផ្ទះខ្ញុំ ហើយជួយខ្ញុំចម្អិនអាហារ ដែលខ្ញុំស្ម័គ្រចិត្តរៀបចំសម្រាប់មនុស្សដទៃទៀត ។ គាត់មិនដែលនិយាយថា ខ្ញុំត្រូវការជំនួយសម្រាប់ខ្លួនឯងខ្លាំងជាង ថាខ្ញុំមិនគួរព្យាយាមជួយមនុស្សដទៃនោះទេ ។ គាត់រីករាយនឹងចំណាយពេលជាមួយខ្ញុំ ។
នៅទីបញ្ចប់ ខ្ញុំដឹងថា កិច្ចខិតខំរបស់ខ្ញុំគឺមានតម្លៃ ។ ដោយមានជំនួយពីបងស្រីដែលផ្ដល់ការងារបម្រើរបស់ខ្ញុំ នោះខ្ញុំអាចធ្វើអ្វីមួយបាន ។ មិនថាអ្វីមួយនោះមានអត្ថន័យអ្វីចំពោះអ្នកផ្សេងឬអត់នោះទេ វាធ្វើឲ្យមានភាពខុសគ្នាចំពោះខ្ញុំ ។ ទោះជាវាមិនមានប្រយោជន៍ដោយផ្ទាល់ដល់គ្រួសាររបស់ខ្ញុំ ឬព្យាបាលរូបកាយរបស់ខ្ញុំក្ដី ក៏វាបានជួយព្យាបាលដួងចិត្តរបស់ខ្ញុំដែរ ។
អិមរី ផាកម៉ៃអើ
រដ្ឋយូថាហ៍ ស.រ.អា.
ដោយមានជំនួយរបស់ទ្រង់ បងប្អូនហួសពីល្អគ្រប់គ្រាន់ទៅទៀត
ទីក្រុងស៊ីយ៉ូនដែលបានប្រែរូប ដោយ ឌេល ផាសុន; រូបថតកែវយឺត មកពី Getty Images
វាធម្មតាទេ ដែលមានអារម្មណ៍មិនល្អគ្រប់គ្រាន់ដើម្បីធ្វើកិច្ចការរបស់ព្រះអម្ចាស់ ។ ព្យាការីហេណុកក៏មានអារម្មណ៍យ៉ាងដូច្នោះដែរ ។ នៅពេលព្រះអម្ចាស់បានបញ្ជាឲ្យលោកហៅប្រជាជនឲ្យប្រែចិត្ត នោះលោកបានព្រួយបារម្ភ ព្រោះលោកគ្រាន់តែជា « ក្មេងតូចមួយ ហើយប្រជាជនទាំងអស់គ្នាស្អប់ទូលបង្គំ ដ្បិតទូលបង្គំមានមាត់រឹង » ( ម៉ូសេ ៦:៣១ ) ។
ប៉ុន្ដែ ព្រះអម្ចាស់បានសន្យាថា ទ្រង់នឹងគង់នៅជាមួយហេណុក ហើយថាព្រះវិញ្ញាណរបស់ទ្រង់នឹងសណ្ឋិតលើលោក ហើយ « គ្រប់អស់ទាំងពាក្យសម្ដីរបស់អ្នក យើងនឹងរាប់ជាសុចរិត … ហេតុដូច្នេះហើយ » ទ្រង់បានអញ្ជើញឲ្យ « ដើរជាមួយនឹងយើងចុះ » ( ម៉ូសេ ៦:៣៤ ) ។
ហេណុកបានគោរពប្រតិបត្តិតាមអ្វីដែលព្រះអម្ចាស់បានបញ្ជា ហើយលោកបានមានឥទ្ធិពលដ៏អស្ចារ្យមួយទៅលើប្រជាជន មិនមែនដោយសារអំណាចរបស់លោកផ្ទាល់នោះទេ ប៉ុន្ដែដោយសារតែ « អំណាចខាងភាសាដែលព្រះទ្រង់បានប្រទានដល់គាត់នោះ » ( ម៉ូសេ ៧:១៣ ) ។
គោលការណ៍ដែលត្រូវពិចារណា
ប្រសិនបើបងប្អូនឆ្ងល់ថា តើការងារបម្រើរបស់បងប្អូនមានអត្ថន័យដែរឬអត់ សូមពិចារណាពីគោលការណ៍ទាំងនេះ ៖
-
ការយល់ដឹងពីការងារបម្រើ និងគោលបំណងរបស់វា នឹងជួយយើងឲ្យវិនិច្ឆ័យកិច្ចខិតខំរបស់យើងបានកាន់តែត្រឹមត្រូវ ។
-
ការងារបម្រើគឺហួសពីការធ្វើឲ្យទំនាក់ទំនងកាន់តែមានភាពរឹងមាំទៅទៀត វាគឺអំពីការជួយមនុស្សដទៃឲ្យពង្រឹងទំនាក់ទំនងរបស់ពួកគេជាមួយនឹងព្រះអង្គសង្គ្រោះ ។១
-
ការងារបម្រើមិនមែនគ្រាន់តែការចាត់តាំងមួយនោះទេ វាគឺជារបៀបដែលយើងរស់នៅតាមសេចក្ដីសញ្ញារបស់យើង ដើម្បីបម្រើទ្រង់តាមរយៈការមើលថែដល់គ្នាទៅវិញទៅមក ។
-
ការងារបម្រើមិនចាំបាច់ធ្វើតាមទម្រង់ ដែលបានកំណត់ទុកមុននោះទេ ។ វាពង្រីកសមត្ថភាពយើង នៅពេលយើងសម្របខ្លួនតាមស្ថានភាព ហើយស្វែងរកនូវការបំផុសគំនិតដើម្បីផ្ដល់ការងារបម្រើ ដូចដែលព្រះអង្គសង្គ្រោះបានធ្វើ ។
-
-
ការយល់ដឹងពីរបៀបដែលព្រះទតមើលការងារបម្រើរបស់យើង អាចផ្លាស់ប្ដូរទស្សនវិស័យរបស់យើងបាន ។
-
ព្រះមិនវាស់ស្ទង់ការងារបម្រើដោយផ្អែកលើលទ្ធផលដ៏ធំសម្បើម ឬថាតើកិច្ចខិតខំរបស់យើងត្រូវបានគេសរសើរដែរឬអត់នោះទេ ( សូមមើលគំរូរបស់ អូលីវើរ គ្រែនជើរ នៅក្នុង គោលលទ្ធិ និង សេចក្ដីសញ្ញា ១១៧:១២–១៣ ) ។២
-
នៅពេលយើងមានបំណងល្អ ហើយយើងខិតខំយ៉ាងពិតប្រាកដ នោះការងារបម្រើរបស់យើងគឺមានអត្ថន័យចំពោះទ្រង់ហើយ ( សូមមើល គោលលទ្ធិ និង សេចក្ដីសញ្ញា ៤:២, ៥ ) ។
-
ព្រះស្ម័គ្រព្រះទ័យលើកតម្កើង ទោះបីជាយើងធ្វើ « ការបម្រើតូចតាច ឬមើលសឹងមិនឃើញ » នេះក្ដី៣ ( សូមមើល គោលលទ្ធិ និង សេចក្ដីសញ្ញា ១២៣:១៧ ) ។
-
តើយើងអាចធ្វើអ្វីខ្លះ ?
ជំនួសឲ្យការព្រួយបារម្ភពីអ្វីដែលបងប្អូនគិតថា បងប្អូនមិនអាចធ្វើបាន នោះសូមពិចារណាអំពីអ្វីដែលបងប្អូនអាចធ្វើបានប្រកបដោយការអធិស្ឋានវិញ ។ បន្ទាប់មក សូមធ្វើវា ។ នៅពេលបងប្អូនធ្វើសកម្មភាពដោយនៅក្នុងព្រះនាមរបស់ព្រះអម្ចាស់ នោះទ្រង់អាចលើកតម្កើងកិច្ចខិតខំរបស់បងប្អូន ហើយប្រើប្រាស់ការខិតខំនោះដើម្បីប្រទានពរដល់បងប្អូន និងមនុស្សដទៃទៀត ( សូមមើល នីហ្វៃទី២ ៣២:៩ ) ។