Ij M̧ōņōņō ilo Aō Jisōs
Nipai im Amon rej kareḷọk eō n̄an kōkajoorļok jemjerā eo aō ippān Jisōs Kraist im n̄an lan̄lōn̄ ilo elōn̄ waween ko jemaron̄ kwaļok an nebar E.
Ro jeiū im jatū, jeraam̧m̧an ilo Ijtō in! Em̧ōj an Jerkakpeje!
Ilo an rikanaan eo Nipai ilo Bok in Mormon kōjemļok katak eo an, ej kwaļok kam̧ool in ekajoor, “Ij m̧ōņōņō ilo alikkar; ij m̧ōņōņō ilo m̧ool; ij m̧ōņōņō ilo aō Jisōs, bwe Eaar lo̧mo̧o̧ren aō jān hell.”
Naan in ekadu, “Ij m̧ōņōņō ilo aō Jisōs,” elukkun jejjōt an kalikkar jeṃjerā eo em̧m̧an an Nipai ippān Nejin Anij, Messaia eo, Ripinmuur eo. Ilo bok ko an 1 im 2 Nipai, elōñḷọk jān 60 āt ko reoktak kōn Jisōs Kraist. Kajjojo āt ej kwaļo̧k kōn An Kajoor, Kadkadin, im mijen eo an āinwōt juon Rilo̧mo̧o̧r an laļ. Ijoke, ilo wāween an kwaļo̧k iakwe, Nipai ej ān̄inn̄in E ilo juon wāween eo eaorōk: "aō Jisōs."
N̄an Nipai, Jisōs Kraist ekar jab juon eo ettoļo̧k ak ekar jeḷā wōt kōn etan. Jaab, n̄an Nipai, etan Jisōs ekar an lo̧mo̧o̧r.
Ilo an Nipai kar ioon mālijjon̄, būrom̧ōj, im lan̄lōn̄ jān an bōk anjo̧, etan Jisōs Kraist ekar jino an aorōkļọk n̄an e.
Nipai ekar jino an jeļā bwe "ejjeļo̧k bar juon iaļ ak āt letok ium̧win lan̄ bwe armej ren maron̄ mour ilo aelōn̄ in Anij.” Etan Jisōs Kraist ekar pinmuur n̄an Nipai, im ekar m̧ōņōņō ilo menin.
Ilo an kōḷmānḷọkjeṇ kōn en̄taan ko an, kabo ko, im m̧ōjņo ko an, Nipai ej kwaļo̧k etke e ej m̧ōņōnō ilo Jisōs Kraist. E ear je:
Innām jej riiti naan ko rekajoor an Nipai, “O Irooj, iaar likūt aō lōke ilo Kwe, im inaaj lōke Kwe indeeo.”
Ilo jabdewōt waween—eo enana im eo eṃṃan—Nipai ekar lōke ilo Juon "eo ekajoor n̄an lo̧mo̧o̧r."
Nipai ekar jab makeļo̧k iaan ilo an kōņaan ñan nebar ilo Irooj. Mijenede eo ekajoor ilo Bok in Mormon Amon, eo ekar juon iien etetal ilo iaļan jum̧ae im jerawiwi, ekar barāinwōt en̄jaake lan̄lōn̄ kōn kajoor in pinmuur eo an Jisōs Kraist.
Ilo an kōļmenļokjen kōn an Irooj tūriam̧o, ilo lan̄lōn̄ ekar kwaļok: “Kōn menin, jen aiboojoj, aaet, jenaaj aiboojoj ilo Irooj; aaet, jenaaj m̧ōņōņō, bwe ad lan̄lōn̄ eobrak; aaet, jenaaj nebar ad Anij indeeo. Lo, wōn emaron̄ ļap an aiboojoj ilo Irooj? Aaet, wōn emaron̄ ba eļap kōn An kajoor eļap, im kōn an tūriam̧o, im kōn an lōjokmen n̄an ro nejin armej? Lo, ij ba n̄an kom̧, ijjab maron̄ ba jidik in jon̄an eo ij en̄jake.”
Ña bōrainwōt ijjab maron̄ in ba mōttan eo edik kōn men eo ij en̄jake kōn aō Jisōs: ad Rilo̧mo̧o̧r, ad Kiin̄ in Kiin̄ raņ, im ad Irooj in Aenoman.
An Nipai im Amon lan̄lōn̄ rōkobrak aō kōn kam̧m̧oolol. Rej kareḷọk eō n̄an kōkajoorļok jemjerā eo aō ippān Jisōs Kraist im ñan lañlōñ ilo elōñ wāween ko jemaroñ nebar ilo E.
Rainin ij m̧ōņōņō ilo ad Ripinmuur. Pein tūriam̧okake ej erļo̧ktok n̄an kōj. E ej jilkintok juon karuwainene ñan aolep, im ba, “Kom̧in ukeļo̧k, im Inaaj bōk kom̧.” Em̧ōj je etad ilo lọpiden Pein. Ij lan̄lōn̄ ilo menin letok eo an ukweļok im kalliṃur eo kōn jeorļọk bōd.
Ij m̧ōņōņō ilo ad Seperd Eṃṃan. E ej kūr ñan kōj, kakwelo̧ktok kōj,lo̧mo̧o̧ren kōj; im kobrak kōj kōn iakwe eo An. Ij lan̄lōn̄ bwe jej An sip im bwe E eban jem̧ļok An jerbal n̄an bokļok kōj n̄an Ippān.
Ij m̧ōņōņō ilo ad Rikōmour. E emaron̄ kemour aolep ro rej en̄jake metak in mej, ajimakeke, metak ilo ānbwin im kōļmenļokjen, eddo kōn jerawiwi, im kajojo bōro erup. ewōr An tūriaṃo. Ej jan̄ ippād im Ej karuwainene kōj n̄an pād wōt. Ij lan̄lōn̄ bwe Nejin Anij ej kemour kōj juon ilok juon im jepooļ kōj ilo pein kōn An iakwe.
Ij ṃōṇōṇō ilo Rijojomar eo ad. Kōn iakwe E ekar akweļap kōn kōj im̧aan Jemān, im ba, Kōn menin, “Jema, dāpij rein jeiū im jatū rej lōke ioon Eta, bwe ren maron̄ itok n̄an Ippa im bōk mour ejjeļo̧k jem̧ļo̧kin.” Ij lan̄lōn̄ bwe pinmuur eo an Jisōs Kraist ekar kapolel akweļap ko an kienim bwe E en bōk maron̄ ko an tūriam̧o n̄an kōj wōj.
Ij m̧ōņōņō ilo Rikain̄i eo ad. Kien ko An rej tōl im kōjparok kōj. Bujen ko An rej liāpe kōj n̄an E bwe En maron̄ ukōt, lo̧mo̧o̧ren, kotak aolep ro rej kāālet E. Ij lan̄lōn̄ bwe Ej jutak ilo bōran jepļaaktok in An em̧ool, im Kabun̄ in emour, im bwe kien ko An rej jipan̄ kōj en̄jake lan̄ ioon laļin.
Ij m̧ōņōņō ilo ad Rilo̧mo̧o̧r. E ekar anjo̧ ioon en̄taan in mej an kanniōk im jetōb jim̧or. Ejjeļok ilo mour in emaron̄ eļļe jān An kajoor. Ij lan̄lōn̄ bwe E emaroñ kaanjo̧ik kōj jān metak, en̄taan, im elōn̄ kain kapo ko.
Ro jeiu im jatū, āt ta ko an JIsōs Kraist ejipan̄ eok m̧ōņōņō ilo E? Bōlen Maajta Rikakpilōklōk ak Ṃōttad?
N̄e mour in ejjab em̧m̧an im pen n̄an m̧ōņōņō ilo Irooj n̄an pukot kajoor, kōļmenļokjen kōn āt ko Etan rekwojarjar im kōtļo̧k bwe En lewaj aenōm̧m̧an n̄an jetōb eo am̧.
Kōn jeļā eo em̧m̧an, Jisōs Kraist ej kallim̧ur ilo iakwe, “Kom̧in kepaaktok Eō im Inaaj kepaakwaj kom̧; niknik kappukot Eō im kom̧ naaj lo Eō.” N̄an jipan̄ kepaakļok E, E ej karuwaineneik kōj bwe jen katak kōn E, ron̄jake naan ko An, im etetal Ippān. N̄an jipan̄ kōj lo E, Ej karuwaineneik kōj n̄an juon bujen jemjerā ijo jemaron̄ bōk An kajoor im “jon̄ak eļapļo̧k an iakwe im tūriam̧okake.”
Ilo iien lan̄lōn̄ im n̄e mālijjon̄ ko ad rej pen tok, jen tiljek, pokake kien ko An, kōjparok bujen ko ad, im kijenmej ilo Irooj.
Rikanaan eo ad ejitōn bōro, Būreejtōn Dallin H. Oaks elukkuun em̧m̧an an kar kam̧ool etke jej aikuj m̧ōņōņō ilo Jisōs Kraist. Ekar katakin: “Āinwōt m̧ōttanļo̧k karōk eo an Jemān, Jerkakpeje eo an Jisōs Kraist ekar anjo̧ ioon mej n̄an kam̧ool n̄an kōj kajjojo kōn mour jab wabanban. Katok in pinmuur eo an Jisōs Kraist ej letok n̄an kōj kajjojo iien ko rem̧m̧an n̄an ukweļo̧k jān jerawiwi ko ad im jepļaakļo̧k ilo erreo n̄an m̧weo im̧ōn Jemedwōj Ilan̄. … Im ad Rilo̧mo̧o̧r ekar m̧ōņōņō in en̄jake ak jelm̧ae aolep metak im nan̄inmej ko ilo mour in bwe En jeļā wāween an maron̄ jipan̄ im kōkajoor kōj ilo en̄taan ko ad. Jisōs Kraist ekar kōm̧m̧ane aolepān men kein kōnke Ej iakwe kōj aolep ajri ro nejin Anij.
Ro jeiū im jatū, “wōn emaron̄ ļap an aiboojoj ilo Irooj?”! Ij m̧ōņōņō in kam̧ool bwe Anij ej Jemedwōj Ilan̄ eobrak kōn iakwe im bwe Jisōs ej RiKraist eo Emour im em̧ōj an jerkakpeje. Ilo Jabōt in Ijtō in, im aolep iien, Ij karuwaineneik kōj n̄an m̧ōņōņō ilo Jisōs Kraist. E ejaō Jisōs im aṃ. Ilo āt eo ekwojarjar etan Jisōs Kraist, amen.