Kōn Jisōs Kraist

Elōn̄ iiō remootļo̧k ekar wōr juon nejin baam̧le e kidu kilmeej, juon toy poodle etan Lady. Lady ekar māletlet, ājmour, im lukkuun jeļā kōkōpel bo̧o̧ļ. Elukkuun kajoor kōņaan ekōpel bo̧o̧ļ jabdewōt iien, jabdewōt jikin, toon wōt an jabdewōt kōņaan kadkad kake juon.

Juon raan, ālkin elōn̄ alen aō kadkad kake bo̧o̧ļ eo bwe en tin kōpel e, ikar kālet n̄an joļok ruo ball ilo juon wōt iien, juon būļu im juon iaļo. Lady ekar kōpel bo̧o̧ļ būļu eo, bōke, im jino an bar ettōrtok n̄an ippa, innām ej lo bo̧o̧ļ iaļo̧ eo. Ej joļok bo̧o̧l būļu eo, im m̧ōkajļok n̄an bo̧o̧l iaļo eo, bōke, im bar rooltok n̄an ippa. Innām āinwōt ej ļōm̧nake bo̧o̧l būļu eo, joļok bo̧o̧l iaļo eo, oktaklik, bar ettōr n̄an bo̧o̧l būlu eo, bōke, im bar jino an rooltok. Ilo an kar etal kajjien bo̧o̧l iaļo eo, ekar bōjrak, joļok bo̧o̧l būļu eo, bōke bo̧o̧l iaļo eo, im kajju ettōr tok. Innām ej joļok bo̧o̧l iaļo eo, reiliktak, mōkaj liktak n̄an bo̧o̧l būļu eo, bōke, im bar jino an ettōr tok. Ke Lady ekar bar lelok bo̧o̧l iaļo eo, ekajju bōjrak. Ekar joļok bo̧o̧l būļu eo, reilik reim̧aan jen bo̧o̧l būļu eo im bọọl iaļo eo. Innām̧ ekar bōjrak, im etal n̄an iep eo jikin, im babu. N̄an Lady, ruo bo̧o̧l eļap aer lōn̄. Ekar jino an pok, eddodo, im bōbweer.

Ilo mour ko ad, jejjab lale wōt inepata ko kōtaan būļu im iaļo ak barāinwōt būrōrō im kūriin, oran im piolōt, dot ko im ļain ko, im jabdewōt men ko rej kobain doon. Jemaron̄ en̄jaake āinwōt Lady—eddodoim ebbweer—im kōņaan wōt babuļo̧k ioon peet.

Ijjab maron̄ kōļapļok eļap iien n̄an raan ko am̧ ak joļok elōn̄ men ko mour in ej boktok. Ak imaron̄ lewaj kapilōk in: Ejjab aolep men rej juon wōt aorōkier, im wōnm̧aanļo̧k kōn jipadpad eo an indeeo ejipan̄ kōj karōk men ko raorōk im eļap tokjāer. Ilo Jabōt in Ijtō in, jen ļōm̧nak kōn aorōk in mije Jisōs Kraist im “kōn wānōk eo ejjeļo̧k jem̧ļo̧kin an pinmuur in en̄taan eo An eļap.” eļap tokjen im enej jipan̄ kōj jekdoon jon̄an men ko an mour in jemaron̄ kōm̧m̧ani. An mour, Mijen eo An, im leen Pinmuur eo An ej kōjeram̧m̧an kōj kajjojo raan im n̄an indeo.

Jisōs eaar mour im mej n̄an kōm̧m̧ane Ankilaan Jemen. Pinmuur eo An ejjeļok jem̧ļokin—ta ko rekar waļo̧k n̄an E ilo Getsemane n̄an mej eo An ioon debwāāl n̄an Jerkakpeje eo An Aiboojoj—ej dilepen karōk eo an Jemedwōj Ilan̄ n̄an adwōj bōk lo̧mo̧o̧r. Karōk in ej pedped wōt ioon Jisōs Kraist; ejjeļo̧k bar karōk āinwōt in. E eaar kadedeļok Pinmuur eo im kōn menin kar bōk “kajoor otemjej … i lañ im i laḷ.”

Kōn tōllo̧ke, tūriam̧o, im jouj an Jisōs Kraist ekwojarjar, jemaron̄ jepļaakļok ippān Jemedwōj Ilan̄ im mour Ippān. Jisōs Kraist wōt emaron̄ kakūrm̧ool menin. Rilo̧mo̧o̧r Make eaar ba, “N̄a iaļ eo, m̧ool eo, im mour eo: ejjeļo̧k armij enaj itok n̄an Jema, elan̄n̄e jab kōn n̄a.” Jisōs, eo ej tōl kōj n̄an lọmọọr, ewōr ippān kajoor n̄an kōm̧m̧ane ta ko jejjab maron̄ kōm̧m̧ane n̄an kōj make kōnke E eaar kadedeļok Pinmuur eo An.

Kōḷmenḷọkjeṇ kōn wūn kein jej kakeememej Ijtō. M̧oktata, Jisōs Kraist eaar anjo̧ jān mej; E eaar jerkak jān lōb. Kōn E, Jerkakpeje ej juon menin letok n̄an aolep im ejjeļok jem̧ļokin n̄an ro rej itok n̄an laļin. Mej ejjab jem̧ļok eo kōnke jetōb im ānbwin eo renaaj koba ippān doon, im jamin bar ajej.

Kein karuo, ewōr ippān Jisōs Kraist jim̧or kajoor im ikdeelel eo n̄an lo̧mo̧o̧ren kōj jān jerawiwi ko ad. Kōn Jisōs Kraist, n̄e jej ukweļok im ļoore E, “ejidimkij an naaj karōk in lo̧mo̧o̧r eļap itok n̄an [kōj].” Ripinmuur eaar en̄taan im bōk kaje n̄an jerawiwi, nana, im bōd ko an aolep. E emaron̄ im enaaj karreoik aolep ro rej tōmak ilo Etan, ukweļok, ļoore iaļ in bujen eo, im wōnm̧aanļok im niknik n̄an jem̧ļokin. “aolep armej remaron̄ bōk lo̧mo̧o̧r” kōn E im An Pinmuur. Aolepmeļeļein kōjwōj. Eļan̄n̄e aolep, innām jabdewōt. Eļan̄n̄e jabdewōt, innām ej n̄ān juon. Im eļan̄n̄e ej n̄an juon, innām ej n̄an eok.

Ippān Jisōs Kraist epād maron̄ eo ejjeļok jem̧ļokin n̄an jeirļok bōd, ej kallim̧ur bwe “jon̄an emmakijkij in wōt an armej ro aō ukeļo̧k Inaaj jeorļo̧k aer bōd im bōd ko aer ņae Eō.” Kōn Jisōs Kraist, jerawiwi ko jekar m̧oolin ukweļo̧k jāni reban deor jidik annan̄, ak naaj jako n̄an kakinejnej jetōb ko ad . Jeban kōņak juon leta būrōrō, kiiō ak n̄an indeeo. N̄e jej ukweļok kōn aolepen ad, ad jerawiwi, ejjab jidik wōt, kar dilaiki ņa ioon debwāāl im jejamin bar eddodo kōn wōņāān ko ilo jetob. Ālkin ad ukweļo̧k, ejako ad m̧ūri n̄an wānōk kōnke em̧ōj an Jisōs kōļļaiki; E ej tūriam̧o kake kōj jān kaje ko ren kar ekkar. Emōj jeirļok ad bōd, būruōd im peid rej bar erreo, im Irooj ejamin bar keememej jerawiwi ko ad . Irooj ad Anij “e kajoor; eo enaaj lọmọọr, [im] Enaaj lañlōñ [iood] kōn ṃōṇōṇō.”

Kein kajilu, Jisōs Kraist emeļeļe kōn apan̄ ko ad, eaar jab bōk wōt ioon jerawiwi ko ad ak barāinwōt ad būrom̧ōj, nan̄inmej, im m̧ōjņo. Kōnke Jisōs Kraist eaar niknik im kadedeļo̧k pinmuur eo ejjeļok jem̧ļokin, E eweppān an meļeļe kake kōj. E emaron̄ kaeņōm̧m̧an kōj im letok “jokne … aeņōm̧m̧an … ilo [ad] akweļap. E, im E wōt, emaron̄ ļōm̧nak kake aolep men ko rej ļōme wōn kōj: bōtōktōkid, ad jeļā, manit, men ko jej iooni, wāween ko jej iooni lo kōļmenļokjen im jetob, im aolep kajojo wāween ko renej jelōt wōn kōj. E, im E wōt, enaaj juon raan ekajete kōj “ekkar n̄an jerbal ko [ad], ekkar n̄an ikdeelel ko an [būruōd].”

Kōn Jisōs Kraist, aolep men ko rejjab jim̧we im jejjet ilo mour in, renaaj weppān. E enaaj kōjeram̧m̧an ad en̄taan n̄an eddōkļok eo ad. E enaaj kokwojarjar kōj ilo iien ad liaajļōļ. E enaaj katōn̄al kab eo emeo̧. E enaaj m̧ool im emakijkij an kōm̧m̧an bwe jen ājmour. Eļan̄n̄e jej lōke E, jeban “en̄taan jabdewōt mennin kaen̄tanaan otemjeļo̧k, ijello̧kun wōt n̄e [ej] mennin jakoļo̧k ilo lan̄lōn̄ an Kraist.”

Mije Rilo̧mo̧o̧r eo, Pinmuur eo An ejjeļok jem̧ļokin, im ta eo E eaar kōm̧m̧ane n̄an kōj enaaj boktok m̧ōņōņō im alikkar n̄an mour ko ad, jekdoon n̄e ewōr ippād inepata ko jet. En̄iin ej unin an rikanaan ro etto im raan kein kar im naaj wōnmaanļok wōt im tōlļok kōj n̄an Kraist. Komaron̄ keememej bwe Būreejtōn Russell M. Nelson eaar katakin, jekdo̧o̧n kain kajjitōk ak būrabļōm rot ko am̧, uwaak eo aolep iien ej pād ilo mour im katak ko an Jisōs Kraist. Im Būreejtōn Dallin H oaks, Rikanaan eo an Irooj ej mour rainin, eaar ba, Jisōs Kraist ej iaļ eo.

Kwojjab aikujin āinwōt kidu eo nejim edik, Lady—pok, ebweer, eddodo—n̄e kwoj ioone elōn̄ bo̧o̧ļ; kwojjab aikujin bar tōbal likļo̧k n̄an peet eo im mijak. Ijellokin, kalimjōke bo̧o̧ļ eo. Mije wōt Rilo̧mo̧o̧r. kappukot "menin letok ko raorōk Pinmuur eo An emaroñ letok." Innām komaron̄ lan̄lōn̄ im ejjeļok pere al ippān ro ajri ro:

Kōnke Jisōs eaar kadedeļo̧k Pinmuur eo, Ippān ewōr kajoor n̄an jipan̄ eok ilo iaļ in an mour in im lo̧mo̧o̧ren eok jān mej, jim̧or ilo kanniōk im jetōb. Keememe ennaan eo an Ijtō ekam̧ōņōņō aolep raan ilo am̧ kōļmenļokjen kōn kōjeram̧m̧an ko kwoj loi kajjojo raan kōn E. Leļo̧k aolepān būruōm̧ n̄an Rilo̧mo̧o̧r!

Ilo jibboñōniin Ijtō in, ij likit aō kam̧ool kōn, “iakwe eo eļap im em̧m̧an kar kalikkare jān Jemān im Nejin ilo itok eo an Ripinmuur n̄an laļ in.” Jisōs Kraist ej Rijerkakpeje eo im Mour eo, Nejin emake wōt, Ļaam̧ eo Ekwpkarkar eo kar m̧ane, ad Ripinmuur, ad Rilo̧mo̧o̧r, ad Rijojomar, Im ilo eḷaptata Irooj eo em̧ōj an Jerkakpeje. "Ej mour, eo ekar mej." Ilo etan Jisōs Kraist, amen.