Jerbal in Karejar—“Kom̧win Yokwe Doon; āinwōt Iar Yokwe Kom̧”
Jerbal in karejar ilo m̧ool ej ilo ad kwaļo̧k iakwe im kea kōn ro jet āinwōt Rilo̧mo̧o̧r. Ej juon wāween mour; ej wāween eo an Rilo̧mo̧o̧r, Jisōs Kraist.
Jinoin aō kar kōnono ilo kweilo̧k eo eļap, iaar kwaļo̧k kōn wāween an kajoor in Pinmuur eo an Rilo̧mo̧o̧r kar ukōt Jema.
Rainin ikōṇaan kwaļo̧k n̄an kom̧ jidik kōn wāween an kar jino oktak. Ilo iien eo Jema ekar jelm̧ae mālijjon̄ ko reppen ilo mour eo an, ekar wōr ruo jerbal in karejar jeiū im jatū em̧m̧an ro rekar jino loļo̧k. Juon iaer ekar karuwaineneik jema n̄an etal n̄an tampeļ ippān im kōrā eo pāleen. E ekar eoron̄ kūr eo. Kajjojo wiik rekar ektake im ettōrļo̧k n̄an bukwōn eo juon n̄an kabun̄jar im jerbal ilo m̧weeo im̧ōn Irooj. Rekar wōnm̧aanļo̧k wōt ium̧win jilu iiō. Innem Jema ekar kāālet n̄an jerbal ilo tampeļ.
Ij keememej oktak ko rekar bōk jikin ippān jema ilo iien eo. Ekar jino jeļā kaki im kile aikuj ko an ro jet. Ekar jino kōjparok ājmour eo an. Ekar jino kaorōk jemjerā eo an ippān Anij im kōn jemjerā ko ilo mour eo an. Ekar m̧ool in oktak. Kiiō Jetōb eo ej pād ippān, im ikar en̄jake.
Ejeram̧m̧an ripālele rein rekar loļo̧k jema im jipan̄e. Rekar jab ekajete kōn men ko ekar iooni ilo mour eo an. Rekar etetal ippān im jipan̄ e ejaake jem̧jerā eo an ippān Anij. Relakkar m̧ōttan wōt baba, ro epaake er n̄an kiiō.
Kōn rikaļoor rein an Rilo̧mo̧o̧r me rettā im rej wūjlepļo̧k aer kar loļo̧k juon em̧m̧aan eo ekar jebwābwe im ejo̧o̧l, baam̧le eo aō im n̄a kōm ej jeraam̧m̧an kōn menin n̄an indeeo.
N̄e jej kāālet n̄an kômmane jerbal in karejar im ilo men ko jej iooni aolep raan, jej jipan̄ kōjeraam̧m̧an jemān bar ro jet, sister an bar ro jet, im nejin bar ro jet. N̄e jej loļo̧k, jej jipan̄ uwaake jar ko an doon. Jej pā ko pein Rilo̧mo̧o̧r. O, eļap aō kam̧m̧oolol kōn aolep ro rekar kōjeraam̧m̧an baam̧le ko āinwōt baam̧le eo aō ilo aer kar jerbal in karejar n̄an er kōn tūriam̧o.
Ijeļa Irooj ejeļā kōn kwe im apan̄ ko kwoj iooni ilo am̧ kajjieon̄ kōjparok bujen ko am̧ im jerbal in karejar n̄an ro jet. Ewōr Ippān kōjeraam̧m̧an ko em̧ōj an kallim̧ur kaki kōn jipan̄ eo An ekwojarjar n̄an kwe im baam̧le eo am̧ ilo am̧ kōjerbal tōmak eo am̧ im jerbal n̄an E.
Jemaron̄ jab ņa mejļan jekjek ko reppen im kabūrom̧ōjm̧ōj āinwōt ad kōjatdikdik; jet oktak ejjab ad n̄an kōm̧m̧ani. Ak jemaron̄ kāālet n̄an iakwe im jerbal in karejar āinwōt Rilo̧mo̧o̧r.
Jerbal in karejar kōn jetōb ej boktok kōmour an Rilo̧mo̧o̧r n̄an mour ko ad im mour ko an ro jej jerbal in karejar n̄an er. Ekkā aō lo aeņōm̧m̧an, alikkar, kōmour, im kōttōpar n̄e ij kōm̧m̧an jerbal in karejar. Ij epaakeļo̧k Rilo̧mo̧o̧r n̄e ij kōm̧m̧ane jerbal in karejar eo aō. En̄in ej karōk eo ekwojarjar.
Jerbal in karejar ilo m̧ool ej kwaļo̧k ad iakwe im kea kōn ro jet āinwōt Rilo̧mo̧o̧r. Ej juon wāween mour; ej wāween eo an Rilo̧mo̧o̧r Jisōs Kraist. Ejjab juon būrookraam̧ ak juon elaajrak; jerbal in karejar eaorōk ilo kadkad eo an Anij im wōn eo jemaron̄ erom̧ ilo ad ļoor E.
Rejjab kūr kōj ak kōtļo̧k kōj jān jerbal in karejar. Ej m̧ōttan eo n̄an kakūrm̧ool bujen ko jekar kōm̧m̧ani ilo iien peptaij im ilo tampeļ. Jej bujen n̄an bōk iood etan Rilo̧mo̧o̧r—im erom̧ āinwōt E ilo ad kaarmejet im wūjlepļo̧k mour ko ad n̄an E. N̄e jej jerbal in karejar āinwōt E, jej jino ļōmņak, en̄jake, im iakwe āinwōt E.
Jemād Ilan̄ ej kōm̧m̧ane jerbal eo Ankōn jerbal in karejar n̄an kajjojo ajri ro Nejin juon ilo̧k juon. Rilo̧mo̧o̧r ekar kwaļo̧k n̄an kōj jon̄ak eo ekkā ilo iien kwaļo̧k naan eo An ioon laļin bwe ej tūriam̧o ilo an kōjeraam̧m̧an, kōmour, im kea kōn "eo juon." Ej kūr kōj n̄an kōm̧m̧ane ejja menin wōt—im n̄an jerbal in karejar ilo wāween ko ad make—wāween ko me rej jipan̄ kōj en̄jake iakwe eo an Anij. N̄e jej en̄jake An iakwe im kile kōj, menin ekōm̧m̧an eļap oktak. Im n̄e jej kōjeram̧m̧an juon, jej kōjeram̧m̧an aolep.
Rilo̧mo̧o̧r ekar kwaļo̧k n̄an kajjojo armej iakwe eo an Anij kōn katok in Pinmuur im maron̄ eo ekwojarjar n̄an kōmour im loļo̧k kwe im n̄a kōn iakwe eļap.
Jisōs Kraist ekar kāālet bwe en en̄taan kōn jerawiwi ko ad im pinmuur kōn metak ko me jejjab maron̄ kōmeļeļeiki bwe jen maron̄ bōk lo̧mo̧o̧r im bōk jipan̄ eo ekwojarjar. Aolep men kein E ekar kōm̧m̧ani ilo ejjeļo̧k jeļā n̄e jenaaj kar bar ukōtļo̧k iakwe in An. “Ak Anij ekar erļo̧ke iakwe eo An n̄an kōj, ilo menin, ke jekar rijerawiwi wōt, Kraist ekar mej kōn kōj.”
En̄in ej kain iakwe eo An n̄an kwe im n̄a. Im en̄in ej kain iakwe eo E ej kōņaan bwe jen kwaļo̧k n̄an doon: “juon Kien ekāāl ij lewaj n̄an kom̧, kom̧win yokwe doon āinwōt Iar yokwe kom̧, kom̧win barāinwōt yokwe doon.” Jemaron̄ kwaļo̧k ad iakwe E ilo ad kōjparok kien ko An im jerbal in karejar n̄an ro jet men̄e jejjab aolep wānōk.
Kar jilikintok kōj n̄an laļin n̄an ekkatak n̄an iakwe Anij im ro jet āinwōt kar Rilo̧mo̧o̧r—n̄an iakwe ilo wāween kaarmejet im oktak, wāween ko me renaaj bōktok m̧ōņōņō eļap. Kōn Pinmuur eo an Rilo̧mo̧o̧r jemaron̄ iakwe ilo wāween ko me jekar jab ļōmņak kaki. Elder Quentin L. Cook ekar kwaļo̧k, “Iakwe eo ad n̄an Anij im ro ritūrid ej idajon̄jon̄ eo eļap n̄an jetōb ko ad.”
Kāālet n̄an jerbal in karejar ejjab pidodo im eban em̧m̧an ad kōm̧m̧ane. Eaikuji kaarmejete, tōmak, ettā, im lōke bwe aolep men ko renaaj jejjet ilo ad kōtļo̧k bwe Anij en anjo̧. N̄e jej bōjrak im kāālet n̄an kea kōn ro jet ilōn̄in men ko jet, Jetōb im iakwe eo An remaron̄ deļo̧n̄tok im jemaron̄ bōk aenōm̧m̧an im erreim̧aanļo̧k eo me jejlukkuun aikuji.
Juon jiron̄ ekar kwaļo̧k ke ekkā an mijak in kōm̧m̧ane jerbal in karejar kōnke ejjab kōņaan jeļā wāween an ro jet ļōmņak. Ikar kajjitōk elmen an kōm̧m̧ane. Ekar ettōn̄ dikdik im ba, “Ij loļo̧k—im ekajoor em̧m̧an jān aō kōtmene.” Ej kōjerbale tōmak, im Irooj ej jipan̄ e.
Ilo ad loļo̧k kōn tōmak, jejjab make iaad. Irooj enaaj pād ippād. E enaaj “ņa mellan ko im kaki [jemaron̄] kōttōprak men eo Iaar jiron̄ eok”—ekoba kōjeram̧m̧an in kajoor in priesthood eo an Anij ilo ad kōjparok bujen ko ad im mālim an priesthood eo An n̄an jutak ilo Etan kōn jerbal in loļo̧k ko ad. Irooj ejeļā kōn buruōn ro jej jerbal in karejar n̄an er. Ej iakwe er im Ej iakwe eok. E enaaj jipan̄ eok n̄an kōjeraam̧m̧an er ilo wāween ko rej aikuji.
Ļōmņak kōn aorōkin ijjitōn̄ in jerbal in karejar ko ad. Būreejtōnji ro an Doulul eo an Kōrā ro im elder ro rej bōk revelesōn jān Irooj n̄an leļo̧k ijjitōn̄ ko reim̧we n̄an kwe im n̄a—jerbal in loļo̧k ko n̄an jutak ilo Etan im jerbal Ippān n̄an kea kōn ajri ro nejin Anij. Āinwōt Būreejtōn Jeffrey R. Holland ekar katakin, jej ruwainene n̄an leļo̧k “Anij im Jemed aolepān juon pein jipan̄ ilo jerbal im uwaaki jar ko, … irļo̧k kōm̧jaļļaaļ ko, im kōkajoorļo̧k bukwe ko remōjņo.”
Eļan̄n̄e kwoj kōņaan lōke eo em̧wilaļ, en̄jake ruwainene, im kōm̧m̧ane juon oktak eļap ilo laļin, Ij karuwaineneik kom̧ n̄an ļoor waanjon̄ak eo an Rilo̧mo̧o̧r im jerbal in karejar ilo Etan. Ejamin kar wōr aikuj elapļo̧k jān kiiō n̄an ļōn̄aj, kōkajoor, im kōmour armej ro kōn Pinmuur eo an Jisōs Kraist. “Elōn̄ iaad ro rej lukkuun aikuj en̄jake iakwe eo An.” Āinwōt rikaļoor ro An, kwe im n̄a ewōr ad kōjeraam̧m̧an in bujen eo im eddo n̄an bokļo̧k iakwe eo an Rilo̧mo̧o̧r im m̧ōņōņō eo n̄an aolep ro nejin Anij. N̄e jej kwaļọk iakwe eo An im An karuwainene n̄an ro jet, jenaaj bar en̄jake ejja menin wōt. Rilo̧mo̧o̧r ekar kallim̧ur, “Jabdewōt eo mour enaaj jako jān e kōn N̄a enaaj lo e.”
Rilo̧mo̧o̧r ekar jab jerbal in karejar n̄an wōt ro uwaan baam̧le eo im ro m̧ōttan repaake. Ekar jerbal in karejar n̄an aolep im Ej kūr kōj n̄an kōm̧m̧ane āinwōt E. Jej bōk ijjitōn̄ in jerbal in karejar n̄an kaddōkļo̧k maron̄ eo ad n̄an iakwe ro jet im lale bwe ejjeļo̧k ren ajimakeke. Jej jar kōn er, kea kōn aikuj ko aer, im kōkajoorļo̧k tōmak eo aer ilo Jisōs Kraist.
Ij tōmak bwe Jemādwōj Ilan̄ ekōņaan bwe kwon m̧ōņōņō. E ej iakwe eok. Jerbal eo An, ekoba jerbal in karejar, kar kōm̧anm̧an n̄an boktok n̄an kwe im n̄a lan̄lōn̄ eo eļap tata jemaron̄ en̄jake.
Ij kam̧ool bwe jerbal in karejar ej “bōktok kōjeraam̧m̧an ko an lan̄,” im barāinwōt ej wāween eo an lan̄. Ij kam̧ool bwe Jisōs Kraist emour. Ilo ad kaarmejet āinwōt E kōn iakwe im jerbal in karejar āinwōt E, jenaaj jeraam̧m̧an n̄an lo m̧ōņōņō eo ad make, kōmour, im aenōm̧m̧an ilo E. Jenaaj erom̧ āinwōt E. Ilo etan Jisōs Kraist, amen.