Jar kōn Aenōm̧m̧an

Ro jeiū im jatū rejitenbōro, ij m̧ōņōņō bwe ippād ippāmi ilo iien in ilo ad maron̄ bar keememej aenōm̧m̧an eo an Rilo̧mo̧o̧r n̄an Rijilōk ro An, Eaar jeļā bwe Enaaj kar etal jen er make, ilo An jab tōl er, kōjparok, n̄an jipan̄ er ilo en̄taan ko aer.

Ilo kar Kejota eo Āliktata E ekar leļo̧k n̄an rijillōk ro juon kallim̧ur, eo enaaj wōnm̧aanļo̧k n̄an kaenōm̧m̧an im rōjan̄ rijilōk ro An retiljek rainin jekdo̧o̧n ta ko reppen jej iooni ilo mour ko ad make. Eaar ba: “Aenōṃṃan Ij likūt ṇa ippemi, Aō aenōṃṃan Ij lewōj n̄an koṃ. N̄a Ij lewōj n̄an koṃ, jab āinwōt an laḷ lewōj. En jab pok būruemi, im en jab lōļn̄o̧n̄.”

Laļ in rainin eoktakļo̧k. Ewōr tariņae ko im ainikien tariņae ko. Jeraam̧m̧an ko an aolep laļ rej dikļo̧k. Nana ko kar kanaan kaki rej ļapļo̧k ilo an epaaktok an Rilo̧mo̧o̧r jepļaaktok.

Aaet n̄an kōjekdo̧o̧n en̄taan im eppen kein, Armej ro Rekwojarjar retiljek rej iooni men kein ilo aolepen laļ in rej kobrak lan̄ kōn jar. Ilo lo̧bwilej im jikin ko rettiņo, rej pukot jipan̄ eo an Irooj, kōn aenōm̧m̧an, kōn tōl, im aenōm̧m̧an eo an juon make n̄an ro rej iakwe er.

Kwomaron̄ kar loe ilo jikin jar eo am̧ im ilo m̧weeo im̧ōm̧ bwe jar emaron̄ in jab emakijkij ak eļap en̄jake ilo bōro.

Oktakļo̧k n̄an Jemedwōj Ilan̄ ilo jar emakijkij ilo an laļ in oktakļo̧k āinwōt an armej oktakļo̧k. Ilo ilo iien mijak, būrom̧ōj, kauwōtata, nana, ak nan̄inmej, armej ekkā aer oktakļo̧k n̄an Anij ilo jar. Nejin Ejitenbōro, Jisōs Kraist, ilo etan jej jar, mour, jeļā kajjied, oņake kōj, im kea kake kōj. Kōm̧m̧an bwe kwon keememej naan ko an Kiin̄ David jān bok in Sam ko:

"Jeova ej juon jikin ijo ejjeļo̧k jorrāān ie, juon jikin im ejjeļo̧k uwōta ie ilo iien ko iien en̄taan.

“Im ro re jeļā Etam̧ renaaj lōke Eok, bwe Kwe O Jeova, Kwaar jab ilo̧k jān ro rej pukot Eok.”

Ilo iien metak, ajimakeke, ak tarpok, jej jeļā bwe Jemedwōj Ilan̄ im Nejin Emake Wōt rej jeļā kōn jekjek ko ad im bwe Rej kōņaan kōjeraam̧m̧an kōj. Naan ko an RIlo̧mo̧o̧r ralikkar:

“Im Ij ba ñan koṃ, kajjitōk, im naaj lewōj n̄an koṃ; kappukot, im koṃ naaj loe; kaļļaļļaḷ, im enaaj peḷḷọk n̄an koṃ.

"Bwe jabdewōt eo ej kajjitōk, ej bōk; im e eo ej kappukot, ej lo; im n̄an eo ej kaļļaļļaļ, enaaj peļļo̧k n̄an e."

Kōpeļļo̧k wūntō in lan̄ kōn emakijkij in jar en jab aikuj n̄an kōjerbal naan ko ak kajin ko rellōn̄. Ijoke, tiljek ilo jar eo Jemedwōj Ilan̄ ej aikuji jen kōj ej n̄an "leļo̧k aolep [ad]” ilo jikin ko rettiņo bwe būruwōd en “emakijkij wūjlepļo̧k n̄an E ilo jar.”

Ilo iien kwaļo̧k eo An Ioon To̧l eo, Rilo̧mo̧o̧r ekar kwaļo̧k:

N̄e kom̧ij jar, kom̧in deļo̧n̄ļo̧k ilo uukiļo̧k ko ami, im n̄e em̧ōj am̧ kili kōjām eo am̧, kom̧in jar n̄an Jemām, eo ej lo ilo ittino, Enaaj ņa woņeam̧i ilo alikkar.

"A n̄e kom̧ij jar, jab kōjerbal ālijinmen pata, āinwōt ro ripegan, bwe rej ļōmņak naaj ron̄jake er kōn ļap in aer kōnono.

"Kom̧in jab kōn menin āinwōt er, bwe Jemāmi e jeļā ta men ko kom̧ij aikuji m̧okta jān ami kajjitōk Ippān."

Irooj eaar bar letok n̄an kōj kam̧ool ko kōn kajoor in jar ilo būruwōd. Ilo Bok in Mormon, jej riit kōn armej ro an Alma eo Erūtto,

"Im Alma im armej ro an raar jab kotak ainikier ioon Irooj aer Anij, ak raar lutōkleplep burueer n̄an e; im eaar jeļā ļōmņak ko an burueer.

"Im ālkin men kein ainikien Irooj eaar itok n̄an er ilo en̄taan ko aer, im ba: Kom̧in kotak bōrami im kom̧in ineem̧m̧an bwe I jeļā … Inaaj barāinwō kamerāik eddo ko kar likūt ioon aerami, bwe em̧ool kom̧ make kom̧in jab en̄jaki ioon ālkimi, em̧ool n̄e kom̧ij pād ilo kom̧akoko. …

“Im kiiō ālikin men kein, eddo ko kar likūt ioon Alma im ro jein im jatin kar kōm̧m̧an bwe ren mera; aaet, Irooj Eaar kōkajoorļo̧k er bwe ren maron̄ kotak eddo ko aer ilo ejjeļo̧k pen, im raar ajeļo̧k er ilo itok-limo im kōn ineem̧m̧an n̄an aolep ankilaan Irooj.”

Ij kam̧ool bwe Irooj ej ron̄ im uwaake jar ko an būruwōd, āinwōt An kar kōm̧m̧ane n̄an Alma im armej ro an. Jemaron̄ ļoor kien ko An n̄an “jar iien otemjej” n̄an bōk emakijkij jar ilo būruwōd. Āinwōt an kar rikanaan ro kwaļo̧k elōn̄ iien ko remootļo̧k, komaron̄ jab kōņaan jar ak komaron̄ jab jeļā ta eo n̄an ba, ak Anij ej ron̄jake jar ko rettiņo an būruwōm̧. En̄jake ko an būruwōm̧ im iakwe eo n̄an Jemedwōj Ilan̄ im n̄an Nejin Emake Wōt elukkuun aorōk bwe jar ko am̧ rej aolep iien wōr uwaakier.

Ilo ad jar aolep iien, jekdo̧o̧n jekjek rot ko ilo mour in, Irooj ej letok n̄an kōj An aenōm̧m̧an im jipan̄. Ij keememej waanjon̄ak eo an ļōm̧aro nejin Mosaia ro raar tōprak aer kwaļo̧k gospel eo im kar kajoor ilo mour in jetōb kōnke raar jar aolep raan. Jej riit ilo bok in Alma, "Raar leļo̧k n̄an er eļap jar, im jitlo̧k; kōn menin ippāer eaar wō jetōbin kanaan, im jetōbin revelesōn."

Eaorōk n̄an mour in jetōb eo aern̄an jar emakijkij ijelo̧kin kōttar n̄an jar m̧ae iien eo eaar wōr jorrāān ilo aer kar kōjekdo̧o̧n aikuj eo ekwojarjar n̄an jipan̄. Jar emakijkij ilo iien m̧ōņōņō im barāinwōt ilo iien inepata im būrom̧ōj em̧ool enaaj letok jinekjej eo ekkar n̄an Ankilaan im iien eo ejejjet.

Ijeļā bwe Anij Jemād emour. E ej iakwe kōj. E ej ron̄jake jar ko ad, im elōn̄ iien E enaaj uwaake kōn en̄jake ko raenōm̧m̧an. Im bar juon, jān Bok in Mormon: "Im kiiō, aenōm̧m̧an an Anij en pād ioomi, im ioon im̧ōko im̧ōmi im bwidej ko ami, im ioon ami bwijin in mennin mour ko reļļap im ko reddik, im aolep men ko rej m̧weiōmi, kōrā ro pāleemi im ajri ro nejimi, ekkar n̄an tōmak eo ami im jerbal ko ami rem̧m̧an, jān iien in m̧aanļo̧k im indeeo. Im āindein Iaar kōnono.”

Ro jeiū im jatū, ij kwaļo̧k aō naan in kam̧ool bwe kallim̧ur eo an Rilo̧mo̧o̧r ej m̧ool im bwe jar eo ettā kōn aenōm̧m̧an ilo būrowōm̧ enaaj menin m̧ōņōņō. Iaar en̄jake ilo iien ilomej eo an kōrā eo ippa eo 61 an iiō. Iaar ilbōk kōn aenōm̧m̧an in en̄jake eo, kōn m̧ōņōņō. Armej ro ilo ilomej eo raar bōlen ļōmņak etke ij ettōn̄ dikdik. Kōnke Irooj eaar uwaake jar eo aō kōn aenōm̧m̧an, kōn juon jeļā jān Jetōb Kwojarjar me ej kōtļo̧k bwe in lo bar ippān doon eo ekam̧ōņōņō im̧aan ippān. Irooj eaar letok n̄an eō aenōm̧m̧an im kōjatdikdik me E ekar kallim̧uri rijilōk ro An.

Eaar ba: “Aenōṃṃan Ij likūt ṇa ippemi, Aō aenōṃṃan Ij lewōj n̄an koṃ. N̄a Ij lewōj n̄an koṃ, jab āinwōt an laḷ lewōj. En jab pok būruemi.”

Ij kam̧ool bwe Jisōs Kraist ej mour. E ej iakwe kōj im kōjeraam̧m̧an kōj. E ej letok n̄an kōj aenōm̧m̧an ilo mour ko ad kōn m̧ool im emakijkij ilo jar. Kōn men kein ij kam̧ool ilo ettā ilo āt eo ekwojarjar etan Jisōs Kraist, amen.