Loļo̧k eo ilo Ļōb eo Ejjeļo̧k Kobban

Enan̄in 2,000 iiō remootļo̧k, jarin kōrā ro raar jerkak ke ej marok wōt im kar etal ilo iaļ eo aer n̄an ļōb eo ijo ānbwinin Irooj eo rej iakwe, Jisōs Kraist ekar babu ie.

Em̧ōj aō kajjieon̄ kōjekļo̧kjen kōn m̧wilaļ in būrom̧ōj eo aer.

Ijjab maron̄.

Em̧ōj aō kajjieon̄ kōjekļo̧kjeņ kōn metak in buruōer, aer jaje ren ta, im an ejjeļo̧k aer kōjatdikdik.

Ijjab maron̄.

Bōlen kajjitōk eo raar aolep kajjitōk kake, “etke menin ear waļo̧k?”

Etke em̧m̧aan eo ekar kadiwōjļo̧k tim̧oņ, kōmour ri ake, kōmour rinan̄inmej, etetal ioon dān, kōnono ippān enjeļ, kwaļo̧k kōn jeraam̧m̧an in kōjatdikdik im aiboojoj eo an gospel, kar naajdik jarlepju im kōjerkak rimej—etke E emaron̄ kar mej?

Rainin jej meļeļeļo̧k etke Rilo̧mo̧o̧r eaar aikuj mej.

Jejeļā ke An “mej … ar boktok mour kāāl jān kabwilōn̄lōn̄ in jerkakpeje.” Ak rikaļoor ro An raar ke jeļā menin ilo iien eo? Ak raar ke ļōmņak eļan̄n̄e Anij ear kōjool er?

Mekarta eddo in būruer im kajjitōk ko ilo kōļmenļo̧kjen ko aer ejjeļo̧k uwaakier, Meri im ro m̧ōtaan raar etal ilo iaļ eo aer n̄an lōb eo.

Raar jab itok ilo aer kōtmane juon kabwilōn̄lōn̄.

Raar jab itok ilo kōjatdikdik ke kajjitōk ko aer naaj uwaaki.

Im em̧ool raar jab itok kōnke ar wōr juon aer melele elikio kōn ta ekar waļo̧k.

Raar itok kōnke kōn iakwe im kautiej eo aer eļap n̄an Jisōs Kraist. Raar itok ilo ikdeelel n̄an leļo̧k jerbal in jipan̄ em̧m̧an āinwōt wujlep im iakwe eo aer n̄an em̧m̧aan eo raar kautiej im ļoore āinwōt Messaia eo kar kallim̧ur kake.

Raar itok kōnke raar jeļa ke n̄e laļin ej marok, jikin eo em̧m̧antata ej iaļ eo n̄an “meram eo [me] ej romaak … ilo marok.”

Ta eo Meri im ro raar pād ippan raar loe jibon̄nin Jabōt eo ear ukōt laļin n̄an indeeo. “Im rej lo ejṃaan eo e dāpiḷọk jān lōb eo, im rej deḷọñ ilowaan, im jab lo ubōn Irooj Jisōs. Im ke eḷap aer pere kake, lo, ruo armej rej jutak itureir, ilo nuknuk ko re jatōltōl … [im] rej ba n̄an er, ‘Etke koṃij pukot eo E mour, ippān ro re mej? E jab pād ijin, a em̧ōj an jerkakpeje.’”

Loļo̧k in ilo ļōb eo ejjeļo̧k kobban ear ukōt er indeeo.

Ekar ukōt laļin.

Elōn̄ remaron̄ pijaikļo̧k Jisōs āinwōt juon rikam̧ōtō jān Nazareth ak juon ri itoitak in kwaļo̧k jān Galili. Remaron̄ kile im̧we eo eļap An ilo bwebwenato in tōmak an laļin. Ak enaan eo eļap an ļōb eo ejjeļo̧k kobban ej bwe Kraist ejjab juon armej bajjōk ilo bwebwenato.

Jejjab pukot E ilubwiljin ro remej. Em̧ōj an Jerkakpeje!

Jemeļeļe ke im̧we eo an Rilo̧mo̧o̧r ejjab pād ilo jeje āinwōt An kar jab pād wōt ilo lōb eo. Jeje ko rekwojarjar rej katakin kōj ejjab kōn wōt wōn kar Jisōs ak wōn E kiiō.

Kōnke kōn ta eo ear waļo̧k ilo jibbon̄nin Jabōt, jemaron̄ kōnono kōn Jisōs Kraist āinwōt ke emour kiiō.

E emour!

rainin.

Ilo iien in.

E emour im ej juon im̧we ejjab jemļo̧k ilo Kabun̄ in An im ilo mour ko an ro rej ļoor E. E ej tōl, kaenōm̧m̧an, ron̄jake, im kōmeraik mijak ko ad, im irļo̧k kōmjaļaaļ ko jān mejad.

Ennaan eo kōn jerkakpeje Kraist eo ej bwe, kōn An kajoor, jemaron̄ elļā jān aolep kapan̄pan̄ ko. Kōnke Jisōs Kraist ekar anjo̧ ioon mej, em̧ool E emaron̄ anjo̧ ioon jabdewōt kauwōtata, pok,, ak pere jej jelm̧ae.

Riboktok enaan ro jān lan̄ ilo ļōb eo ejjeļo̧k kobban raar leļo̧k n̄an Meri im ro m̧ōttan ruo karuwanene.

M̧oktata, “Itōm, [im] lale ije jikin an Irooj ar babu.”

Kein karuo, “Kom̧win jarōbḷọk im kōnnaanōk ro rū kaḷoran eṃōj An jerkakpeje jān ro re mej.”

Ejjab to, Rilo̧mo̧o̧r ear ālij ejja kūr in n̄an aolep: “Koṃwin ilọk ñan aolepen laḷ, im kwaḷọk gospel n̄an armej otemjeļo̧k.”

Ri tōmak ren m̧okta raar kōm̧m̧ane menin. Im ejjab to, enaan eo em̧m̧an kōn Jerkakpeje eo an Jisōs Kraist eaar ajedeed “aelōn̄ ko otemjej.” Jerbal in eaiboojoj ej wōnm̧aanļo̧k wōt rainin ilo ad kean̄ kōn wāween eo An ilo naan im jerbal ilo elōn̄ļo̧k jān 150 laļ ko.

Ak ewōr tokjan keememej ewi wāween an kar ijjino—jibbon̄nin Jabōt eo ippān Meri im ro m̧ōttan ro me, mekarta raar būrom̧ōj, mijak, im kajjitōk ko aer ejjeļo̧k uwaakier, raar itok nan ļōb eo im jeļā kōn m̧ool eo eaiboojoj kōn Jerkakpeje eo An. Ekar ijjino ilo jibbon̄nin Ijtō eo ke kōrā rein raar erom rikam̧ool ro jinointata ilo juon iien eo eļap ilo bwebwenato in laļin.

Kōj aolep jej aikuj kōm̧m̧an ejja menin wōt.

Jej aikuj loļo̧k ļōb eo ejjeļo̧k kobban, en̄jake m̧ool in ta meļeļein, im, ilo kōro̧o̧lļo̧k, kwaļo̧k kam̧ool in ippān ro jet.

Em̧ool men̄e epepen ko rej kōjepel kōj jān kar raan eo ekwojarjar, jej ibwiljin ro me Jisōs ekar kōnono kake ke E ekar ba, “E m̧ōņōņō ro raar jab lo, im rej tōmak.”

Rilo̧mo̧o̧r ekar kappeik kōj n̄an en̄jake in jetōb im jeļāļo̧kjen ko rekwojarjar. Kōn wōt en̄jake ko, jemaron̄ lo kōn kōj make meļeļe eo kōn lōb eo ejjeļok kobban: bwe Jisōs Kraist emour im ej kanoooj kōjeraam̧m̧an aolep ro me rej kappukot E.

Bar kōj, jemaron̄ jerbale kūr eo an Jisōs im kajedeed enaan ko reaiboojoj kōn lōb eo ejjeļo̧k kobban.

Jemaron̄ jerbale juon mijen aolep raan, ko rej boktok kōjeraam̧m̧an ko ejjab n̄an kiiō wōt ak n̄an epepen ko rej itok.

Jemaron̄ en̄jake juon kijejeto ekāāl im kaorōk apan̄ eo n̄an erom mijenede ro to̧o̧n wōt ad mour im rikaļoor ro an Kraist kōn peran im jerbal ko rettā an rikaļoor ilo aolepen raan in ad mour.

Jenaaj etetal ilo “ial eo” an Kraist im “jerbal n̄an Anij kōn aolep niknik raan im bon̄.”

Mour kōn enaan eo an Kraist eo em̧ōj an jerkakpeje ej kam̧ool kijejeto im iakwe eo ad n̄an Rilo̧mo̧o̧r. Emaron̄ em̧m̧an bwe ad jokkun wōt juon, peran, im jerbal ko rettā an jerbal in jipan̄ im iakwe n̄an Anij im ro Nejin naaj jino an ļapļo̧k an em̧m̧anļo̧k im kajoor jān ad maron̄e kōn naan wōt.

Jet remaron̄ abin lukkuun kallim̧ur kōn wōt kajjitōk ko rejan̄in kar uwaak me ej iokļo̧k jekjek ko an mour, gospel eo, ak Kabun̄ in.

Ak, āinwōt Meri im ro raar pad ippān jibbon̄en eo, jekdoon n̄e men ko renaaj marok, jej wōnm̧aanļo̧k kōn tōmak, kōn peran im ettā, im etetalļo̧k ilo meram eo an Rilo̧mo̧o̧r. N̄e jenaaj kōm̧m̧an wāween in, ad tōmak enaaj kōjeraam̧m̧an kōj kōn jeļāļo̧kjen.

Āinwōt māņāāņ im meram in aļ ilo jibbon̄, jenaaj en̄jake iakwe im kōmour eo an Nejin Anij.

Meram indeeo enaaj bōk jikin marok.

Ro jeiū im jatū rejitenbōro, kajjojo jibbon̄ kōm̧m̧an bwe raan tak in al otemjej en kakeememej kōj bwe Jisōs Kraist ej meram eo me ej tōl kōj ilo mour in, ilo jabdewōt kom̧laļ in būrom̧ōj, ioon toļ in lan̄lōn̄ eaiboojoj, im jabdewōt lojet in jajeļo̧kjen ko ak kapo, n̄an jepļaak eo ad ippan Jemed Ilan̄ eo ej iakwe im tūriam̧o̧.

Ro jeiū im jatū, ilo ad m̧ōņōņō in tōpar Jisōs Kraist, jej aikuj etal ilo iaļ eo ad ļo̧k n̄an lōb eo ejjeļo̧k kobban.

Jej aikuj jeļā ippad make naan kein rekōjeraam̧m̧an, “Koṃwin jab lōḷn̄ọn̄, Jisōs, eo ar debwāāl E ejako ijin. Em̧ōj an jerkakpeje!”

Naan kein renaaj ukōt kōj. Renaaj im̧we kōj n̄an bōk iood etan Kraist. Im ilo iien ņe m̧aanļo̧k, Meram eo an Kraist enaaj jino romaak ilowaad. Enaaj, ilo iien, bōktok juon kajoor in ukōt ibūruōd im kōjeraam̧m̧an kōn juon ikdeleel in kōm̧m̧an em̧m̧an wōt. Jisōs Kraist im gospel eo em̧ōj an jepļaaktok rej ad kajoor. Jisōs Kraist ej ad unin tōl n̄an kōm̧m̧ani kāālet ko im naaj bōktok lan̄lōn̄ im m̧ōņōņō ilo mour in im eļļāļo̧k wōt n̄an indeeo.

Jaab, jaar jab pād ijo ippān Meri ilo jibbon̄nin Ijtō eo. Jaar jab loe ta eo liin im kōrā ro jet raar loe. Bōtaab jemaron̄ kajjitōk ippād make: Ta eo em̧ōj ad kar loe, en̄jake, ak iioone?

Em̧ool, jen jab ke, erom rikam̧ool ro an Jisōs Kraist? Jen jab kwaļo̧k iakwe eo ad n̄an E im ro jet ke?

Ro m̧ōtta jitōnbōro, ilo jibbon̄nin Ijtō kwojarjar in, ij lewaj aō kam̧ool: E ekar jerkak.

Em̧ōj aō jutak ilo kōjām in lōb eo ejjeļo̧k kobban im lo kōn mejān jetōb m̧ool eo ejjeļo̧k jem̧ļo̧kin ke Jisōs Kraist ejako ibwiljin ro re mej ak epād ibwiljin ro remour.

E emour!

Kam̧ool in ear kōm̧m̧an aolep oktak ilo mour e aō.

Ta eo ear waļo̧k ilo lōb eo ejjeļo̧k kobban enaaj kōm̧m̧ane ejja wāween in n̄an eo ej m̧ool ilo kappukot E. Enaaj kōm̧m̧an oktak n̄an kwe.

Ro jeiū im jatū rejitenbōro, kōm̧m̧an bwe jen etetal ilo Iaļ eo An āinwōt rikaļoor ro rej lem̧ōņōņō wōt an ad jitōnbōro Rilo̧mo̧o̧r, Eo ekar Jerkak, ej aō jar im kōjeraam̧m̧an ilo āt eo ekwojarjar etan Jisōs Kraist, amen.