Kōban̄ eo Ejako, Jetōb ko Kar Lo̧mo̧o̧ren

Em̧ōj ke am̧ kar jutak ilo juon jikin ebbōk kōban̄ ilo airport ak ejjeļo̧k kobban, ilo an kein m̧weiuk eo jab bōjrak an ro̧o̧l, ļōmņak eļan̄n̄e kōban̄ eo am̧ ilo juon wāween kar etaļ n̄an Kathmandu? Em̧ōj ke am̧ kar ron̄ kōn jikin eo āliktata jeļā kake kōn pāāk eo kwar check-in i ekar pād kōtaan “jeļā bwe enaaj waļo̧k juon jikin" im “kwoj aikuj ļōmņak in wia aolep men kāāl”? Kwonan̄in ke kōmakeļo̧k jān juon kōban̄ me epād ie aolep men ko aikuji? Eļan̄n̄e aaet, ennaan in emaron̄ kaitok limoum̧.

Rainin inaaj kōnono kōn kōban̄ eo ejako.

Emaron̄ 33 milien pāāk ko kar jako ilo airport ko ilo 2024 eo. Men̄e menin ej waļo̧k n̄an juon wōt oran edik n̄an bajinjea ro, jekdo̧o̧n ewi jamakijkij in, ļōmņak eo kōn luuji men ko m̧weiōm̧ raorōk ej juon inepata an aolep.

Kiiō epaak, ke ikar kelo̧k n̄an juon ijjitōn̄ ilo juon wiikān, ikar kile bwe pāāk eo aō ij bōke ippa ekar jab deļo̧n̄ ilo jikin pāāk eo ilōn̄ in bōram̧. Ikar aikuji pāāk in. Epād ilowaan, kein katakin ko raorōk. M̧okta wōt jān aō kar ba jabdewōt, rijerbal eo ekar bōk pāāk eo aō, kōļaakļo̧k juon tāāk in m̧weiuk ilo kein ejjōb eo, letok claim tikōt eo an kōban̄ eo aō, im m̧ōkaj im bwiliļo̧k men eo m̧weiū aorōk.

Ilo aolepān flight eo, ekar wōr juon aō en̄jake in ikūm̧kum̧. Ikar kōjatdikdik juon enaaj kōjparok pāāk ko aō im men ko kobban. Ikar kōjatdikdik jamin naaj meļo̧kļo̧ke, kowaane, ak jab jako. Ikar lukkuun jibwe tikōt in claim eo aō, ilo kōjatdikdik ke enaaj bar ro̧o̧ltok n̄an n̄a.

Bwebwenato in aō ekar wōr juon jem̧ļo̧k elem̧ōņōņō, pāāk eo aō im n̄a kar bar koba. Bōtaab en̄jake eo ekar kōm̧m̧an menin aō ļōmņak.

Bōlen em̧ōj ami kar ron̄ kōn juon riboot jān Osaka, Japan, kōn Kansai International Airport world record—juon men epen tōmake. Ālkin 30 iiō ko in an jerbal im kōm̧m̧ane buki milien cargo, carry-on ko, nien nuknuk ko, ilo airport in ejjan̄in kar jako juon kōban̄ ie.

Jab juon udin m̧weiuk!

Ekōjkan an maron̄ aindein?

Tsuyoshi Nabuta, airport chief in baggage operations, ej tōmak bwe kōjako juon kōban̄ ejjab aikuj in kar waļo̧k "kōnke kōban̄ ej aorōk n̄an bajinjea ro." Kain kōļmenļo̧kjeņ in epād ippān aolepān rijerbal ro an. Tōprak eo an airport eo, ej ba, ej m̧ōttan wōt juon kallim̧ur n̄an "kōjparok eļap im kanooj lale meļeļe ko."

Armej in Japan raar kōm̧m̧ane juon tōmak kōn kanooj lale aolep meļeļe ko. Ewōr juon aer pedped in katak, kaizen, me ej waļo̧k ilo juon kōļmenļo̧kjeņ ejjab bōjrak pukot im jerbali kōkōm̧anm̧anļo̧k ko reddik. Iminene in ej aikuji juon katakin kōn iien otemjej pukot wāween ko rōddik n̄an kōm̧mani kōkōm̧anm̧anļo̧k ko ilo an jerbal. Raar bōk uteij ilo m̧ool eo bwe kōkōm̧anm̧anļo̧k kein rej itok jān ro rej jerbal aolep raan.

Ium̧win iiō ko, rijerbal ro ilo Kansai Airport eo rekar ejaake juon kilen jerbal me ej kōm̧m̧an bwe kōttōpar eo kōn jab kōjakoki pāāk ko an bajinjea en m̧ool in. Rej lukkuun kamineneik rijerbal ro im jab bo̧jrak in kanooj lale bwe aolep pāāk rej bōnbōni, lali (track), im kōjparoki. Rej kwaļo̧k aer kea im kōm̧m̧an etale ko rellōn̄ me rej kōkōm̧anm̧anļo̧k juon automated system ewejepedik.

M̧weiuk ko epidodo aer rup āinwōt kein kōjan̄jan̄ ko ekkā aer jibwilo̧k kōn pā n̄an bajinjea ro. Membōr in staff ro rej kōm̧m̧ani men ko reddik āinwōt likūt pāāk ko ioon conveyor belt ko kōn kajuleltok m̧aer bwe en pidodo an bajinjea ro jibwi im boki.

N̄e kwoj leļo̧k kōban̄ eo am̧ ilo Kansai Airport, āinwōt ke kwoj bōk juon en̄jake bwe rej ba n̄an kwe, "Epād ippām men ko m̧weiōm̧ raorōk. Ej amim̧ eddo kiiō. Kōm naaj bar kōro̧o̧li waj n̄an kwe."

Ilo aō kejekļo̧kjeņ kōn en̄jake kein, ij lo aō make kōļmenļo̧kjeņ kōn juon iien lōke eļapļo̧k an kwojarjar jān check in i juon pāāk.

Ilo juon wāaween kautiej, ij ļōmņak ta jekjek in n̄an Jemānwōj Ilan̄ eo ej iakwe n̄an jilkintok men ko M̧wien raorōk tata, ajri ro Nejin, ettoļo̧k jān m̧weo im̧wer ilan̄, jeļā rej aikuj iooni apan̄ ko an mour in. Ij tōmak kaenōm̧man eo An eļap tata ej bwe Ejeļā rejjab make ilo̧k. Ro jinen im jemān, baam̧le, ritōl ro, būratōr im sister in jerbal in karejar ro, kwe im n̄a jej jerbal āinwōt ribōk eddo ro an men ko M̧wien raorōk tata.

Ewi jon̄an an jitōnbōro im aorōk ajri ro Nejin n̄an E.

Im ewi jon̄an jitōnbōro im jeraam̧m̧an ro me rej kea kōn im naajdik ro jet.

Im āindein, en̄jake eo ej pidodo kile: lōke ta eo ej aorōk n̄an kea kake jān ro jet—im uwade kōn jokane in ro̧o̧ļo̧k eo. En̄jake in ej bōktok emeemļo̧kjeņ ko an jikin ko jeļā kaki: juon m̧am̧a—baba—ilo jikin ekto ektak ak platform, rej iak-iakwe rijikuuļ eo, ritariņae eo, ak mijenede eo nejier. Iiō ko in katakin, m̧aanjabpopo, im jar ej letok juon iien aorōk tata kōn likūt m̧weiuk eo aer aorōk tata n̄an kōjparok ro jet—lōke lo̧ļe eo an ribōk eddo ro n̄an kōjparok ļaddik ak leddik eo nejier ilo em̧m̧akūt eo aer m̧ae iien rej bar koba ippān doon.

Ilo juon wāween ekwojarjarļo̧k, Jemādwōj Ilan̄ ej barāinwōt likūt juon claim iood, ejjab āinwōt juon kakōļļe ilo juon kein jōbjōb ak āinwōt juon m̧ool ekwojarjar kar je ilo bōro: "Kwoj aō. Ijeļā kajjiōm̧. Kwojjab make iaam̧. Ikar jan̄in meļo̧kļo̧k eok. Ij ļōmņak wōt in kōro̧o̧ltok eok n̄an m̧weo."

Menin eļapļo̧k jān koba in eļōn̄ meļeļe ko.

Menin ej pinmuur.

Imaron̄ ke lewaj ruo waanjon̄ok ko ijo ij en̄jake Irooj enaaj lukkuun m̧ōņōņō ippān ro me rej kōļapļo̧k eddo eo aer ainwōt rilolorjake ro rej ļōmņak im kōttōpar in m̧weiuk aorōk ko An, ro Nejin?

Eo m̧oktata ej ilo eddo eo ad āinwōt būratōr im sister in jerbal in karejar—rūtto ro im jodikdik ro.

Jouj im jeļā kwoj bōk jikin Irooj, āinwōt ilo jeje ko rekwojarjar, jerbal n̄an ro me rej “bōnbōn ilubwiljin armej ro an kabun̄ eo an Kraist,” ro “etaer [rej] būki, bwe ren maron̄ keememej im naajdik er jān em̧m̧an eo an naan in Anij, n̄an kōjparok er ilo wāween ejim̧we.” Kōj “jej ‘emmejraake’ ro uwaan Kabun̄ in im ‘pād ippāer im kōkajoorļo̧k er’ (Katak im Bujen Ko 20:53).” Jeraam̧m̧an eo eļap tata ilo jerbal in mijenede ej itok ilo ad jerbale wāween ko ejjab oktak im make; ejja āinwōt ej m̧ool ilo jerbal in karejar.

Ij kūr kom̧ n̄an kōļmānļo̧kjeņ kōn ekōjkan am̧ maron̄:

• Leļo̧k iakwe eo āinwōt an Kraist, kea, im jerbal in jipan̄.

• Leļo̧k jipan̄ im kaenōm̧m̧an ilo iien aikuj ko ilo jetōb ak kanniōk.

• Jar n̄an kappukot tōl eo jān Jetōb.

• Jipan̄ kōpooj baam̧le ko n̄an kōm̧m̧an im kōjparok bujen ko rekwojarjar ippān Anij ilo aer būki kain̄i ko.

  

Ļōmņak kōn ijjitōn̄ in jerbal in karejar eo am̧ āinwōt “kea āinwōt an Kraist” kōn m̧weiuk ko raorōk tata an Irooj, eo ilo jem̧ļo̧kin iaļ eo aer ilo mour in maron̄ bōk im pinmuur jān E. Ij kūr kom̧ n̄an kōjerbal jerbal ko reddik an jouj im kea ilo jerbal in karejar eo ami, erom rijerbal eo em̧m̧anļo̧k an Jisōs Kraist.

Kein karuo eo ej eddo eo an aolep n̄an kōkajoorļo̧k im jālitake diktak in epepen eo, n̄an karūttoļo̧k ajri ro “ilo meram im m̧ool”

Ilo iien ko rōkauwōtata eo jej mour ie, diktak in epepen eo ej aikuj juon bōbrae im kone jān lan̄. Jemaron̄ jipan̄ ilo kijejeto in kōn leļo̧k ad iien im katakin. Ejjeļo̧k juon aikuj eļapļo̧k im tōpar eļapļo̧k ilo jerbal in jān n̄e kōm̧man ippān ajri in Būraimere ro, likao ro, jiron̄ ro, im rūm̧m̧an ded ro.

Būreejtōn Dieter F. Uchtdorf ekar kallim̧ur bwe ilo ad kōm̧m̧ane ijo kuņaad ilo katakin, naajrik, innām lōke ilo Anij n̄an jerbali menin bwilōn̄ ko An, “Uwaak enaaj em̧m̧anļo̧k im ļapļo̧k im m̧ōņōņōļo̧k jen jabdewōt men kwomaron̄ kōttōpraki kōn kwe make.”

Elmen ad kōm̧m̧ane menin?

Kōn ellowetak, katakin, im kōketak jodikdik ro ad n̄an bōk āt eo ekwojarjar etan Jisōs Kraist ilo būruōer im aer ļōmņak, n̄an lem̧ōņōņō bōk debwāāl eo an Kraist, im n̄an jorjor ilo kwojarjar āinwōt rikaļoor ro An im rilo̧k ilo Etan.

Jej katakin menin, “bwe ro nejid ren maron̄ jeļā n̄an ia rej maron̄ reiļo̧k n̄an jeorļo̧k jero̧wiwi ko aer.” em̧ool Jisōs Kraist.

Im̧we er n̄an “lukkuun m̧ool im kijejeto ilo am̧ kōm̧m̧ane jerbal eo ilo jetōb eo emenin aikuj, kapeel eo in jerbal kōn wāween n̄an ron̄ unoojdikdik ko an Jetōb Kwojarjar, [leļo̧k n̄an er] aolep iaļ ko [re] naaj aikuji ilo mour [ko aer]."

Jetōb kein raorōk rej jodikdik ro kōn kōjatdikdik eļap jān jon̄an eo jem̧ļo̧k eo aer ej n̄an ro̧o̧l n̄an lan̄ im mour indeeo ilo aiboojoj an selestial.

Katakin diktak in epepen eo n̄an jeļā, iakwe, im lo̧o̧r aer Rilo̧mo̧o̧r, Jisōs Kraist. "E ej kajoor eo an jodikdik ro."

Renaaj uwaak.

Ejjab āinwōt juon kōban, kajjojo iaad ej lukkuun eddo kōn jokāālet ko ad, tōmak ko, im jerbal ko, kar jipan̄ kōn enjeļ in jerbal in karejar ro in lan̄ ak laļ. Kōn menin, āinwōt rikaļoor ro an Jisōs Kraist, jej jerkak kōn kije ekāāl n̄an jipan̄ im kea kōn ro me jenaaj iioon er.

Ilo jem̧ļo̧kin, jej aolep juon baam̧le.

Jej aolep aikuj jipan̄ ilo ad mour laļ in.

Kōj kajjojo ewōr ad juon tāāk eo me ej kakōļļeik kōj āinwōt juon nejin Jemādwōj Ilan̄ em̧m̧an. Kar je ioon tāāk in ej juon kallim̧ur ilo jetōb im kean̄ ekwojarjar me ej kam̧ool, “Jetōb in eaorōk eļap tokjān n̄an juon raan lo̧mo̧o̧ren jān rikabwijer eo an,” n̄an jāmin meļo̧kļo̧ke, kowaane, ak jerwane.\

Ij lan̄ļōn̄ ilo pinmuur im keememe jeraam̧m̧an eo eļap ewōr ippād n̄an bōk koņaad ilo jerbal in me juon raan n̄e jej bar ro̧o̧l n̄an juon eo ekar kōm̧anm̧an im ej iakwe kōj kōn juon iakwe eweeppān.

Bwe jen maron̄ kakūrm̧ool mijen jab in kōn kōj make im niknik kea kōn ro jet ilo aer kappukot n̄an bar ro̧o̧l n̄an kaorōk in lan̄ eo An ej aō jar, ilo etan Jisōs Kraist, amen