Lañlōñ eo ilo juon Bujen Jemjerā ippān Anij

Ro jeiū im jatū rejitōnbōro, Eḷap an utiej būruō kōn iien in imaron̄ kōnono n̄an kom̧ ilo Jabōt in Ijtō in. Ij jar bwe Jetōb eo an Irooj en pād ippāmi im ippa ilo iien in ekwojarjar im wōnm̧aanļok wōt im katakin im kōketak kōj ilo ad ippān doon āinwōt rikaļoor ro an Jisōs Kraist ñan wūjtak E.

Ilo jet iaan jikin ko ilo laļ in, armej rej kōjerbal juon wāween eo ej make wōt im jenolo̧k ñan iakiakweik doon ilo jibbon̄ in Ijtō. Paschal iakiakwe eo, barāinwōt jeļā kake āinwōt juon iien nebar ilo Ijtō ak raan in iakiakwe ilo Ijtō, ej juon iminene ibwiljin elōn̄ Rikūrjin ro.

Eo ej iakiakwe ej ba, “Kraist eṃōj an jerkakpeje.”

Armej eo juon ej uwaak, “Eṃool, Eṃōj an Jerkakpeje.”

Men in eḷapḷọk jen baj juon naan in iakiakwe ak kōnnaan. Ej juon keemem kōn menin letok ekwojarjar kar letok jān Jemedwōj Ilan̄ n̄ān kōj. Meļeļe eo kōn ta eo Jisōs Kraist ej letok kōn Pinmuur im Jerkakpeje eo An ej boktok jokne, aenōm̧m̧an, im kaṃool n̄an kōj aolep. N̄e Pinmuur eo ejjeļok jem̧ļokin an Jisōs Kraist ejako, ejjeļọk enaaj kar wōr an kōjātdikdik n̄an jepļaakļok ñan ippān Jemedwōj Ilan̄. Im n̄e ejjeḷọk An Jerkakpeje, mej enaaj kar jem̧ḷọkin eo.

Rilo̧mo̧o̧r Jisōs Kraist eo ekar kalikkar wūn eo ekwojarjar kōn An pinmuur, ej ba: “eļan̄n̄e kom̧ naaj itok n̄an Eō kom̧ naaj lo mour indeeo. Lo, pein tūriam̧o eo Aō ej erļo̧kwaj n̄an kom̧, im jabdewōt eo enaaj itok, e Inaaj bōk, im em̧ōņōņō ro rej itok n̄an Eō.”

”Itok n̄an Eō” ej juon kūr ekwojarjar eo meļeļein jabdewōt jikin kwoj pād ie kiiō, ta eo kwoj ioone ilo mour eo am̧, komaron̄ en̄jaake iakwe eo ejjeļọk jem̧ḷọkin an Anij kar letok ilo Nejin, Jisōs Kraist.

Aeet, Jemedwōj Ilan̄ ewor juon an iakwe ejenolọk n̄an kajjojo ro rej kom̧m̧an bujen Ippān ilo den in peptaij. Iakwe eo ekwojarjar ej m̧wilaļ ļok ñe bujen ko jet rej kom̧m̧ani ilo m̧weo im̧ōn Irooj im kōjparoki ilo tiljek.

Nathalie im ña kar en̄jaake iakwe in ekwojarjar ilo juon iien elukuun pen ilo mour ko aṃro āinwōt ḷeo im lio pālele im ripālele indeeo ro. Em̧ōj kōjeram̧m̧an kōṃro kōn jon̄oul ajri ro. N̄e ij ba menin, elōn̄ jodikdik ro rej kajjitōk, “Ewi wāween?“ Im ij uwaak, “wāween de in”

Kōm kar eñajke mej eo an emān iaan ro nejim ilo jiṇoin ṃare e am̧ro. Ālikin an kar mej jilu iaan ajri ro nejim, Nathalie im ña kar kōļmānļọkjen im kajitūkin kōm make elōn̄ kajjitōk ko, āinwōt an Rikanaan Josep Smith ilo Jikin kalbuuj Liberty: “O Anij, kwo pād ia? Kwōj ke ron̄ am ikkūr im jar?

Kōm kar jeļā tok ālik ke menin ejjab jem̧ļok in mālijjon̄ ko am ke Allan Mutombo, nin̄nin̄ eo nejim ruwatimjuon an allōn̄, ekar jako. Ikar loe ilo jikin babu eo an. Jibwe ānbwinnin lo peiū, ikar jan̄ raan eo, akweļap kōn juon menin bwilōn̄. Ijoke, āinwōt am̧ jeļā, karōk eo an Anij n̄an kōj eweppān, im raan eo E ekar kālet n̄an bar bōk Allan ñan Ippān. Jar ko aō rekar jab ukōt An ļōm̧nak im ankilaan.

N̄an kōļapļok mālijjon̄ in, ālikin kallib eo, baam̧le ko am rekar koba ippān doon im kōm̧m̧an kwōn, rekar jab kajjito̧k ippam̧ro, manit eo aikuj bwe komro Nathalie en kar jepel, im rekar kajjitōk bwe in bōk m̧weiuk ko an kōrā e ippa n̄an nabōj kōnke em̧ōj an jako elōn̄ ajri jān kom̧ro.

Ikar etal n̄an lowaan m̧weo im jar, kajjitōk kōn kajoor n̄an jelmae apañ in. Naan ko ilo bok al eo eaiboojoj, kar je jān Emma Lou Thayne, ekar itok n̄an ļōm̧nak e aō: Ia imaroñ oktak ñan aenōm̧m̧an?

Ikar barāinwōt keememej naan ko ilo iien liāp eo am̧ro ilo tampeḷ im kallim̧ur ko jekar kōm̧m̧ani n̄an Anij im ñan doon. Ikar en̄jaake aenōm̧m̧an im lōke bwe Nathalie im ña rej leddik im laddik eo nejin Jemedwōj Ilan̄ eo ej iakwe im kea.

Ikar en̄jaake iakwe eo an Rilo̧mo̧o̧r im pein ilo an ļōn̄aj eō.

Ikar diwōjtok kōn ejjeļo̧k im ba n̄an armej ro rekar pād ijo, “joļok bōd, ak Nathalie ej eo mōtta indeo. Koṃro ej kajeoñ ippān doon jipañ ñan kalōk juon baam̧ļe indeo, im Rilo̧mo̧o̧r eo ej jipan̄ kōm menin."

Rekar jum̧ae kālet eo aō, ak kōjerbal tōmak eo aō ilo Jisōs Kraist ekar kōṃṃan bwe in kajoorḷọk.

Katakin kōj kōn ad erom̧ rikaļooran im kōm̧m̧an bujen jemjerā ippān Jemedwōj Ilan̄ im ad Rilo̧mo̧o̧r Jisōs Kraist, ad Rikanaan, Būreejtōn Dallin H. Oaks, ekar ba: "Ḷọọr Kraist ejjab juon men bajjōk ak iminene ilo jet iien. Ej juon kien me ej wōnm̧aanļo̧k wōt im wāween mour bwe aikuj in tōl kōj ilo aolep iien ko im ilo aolep jikin ko. Katak ko im waanjon̄ak ko An rej kōmeḷeḷeiki iaļ eo n̄an aolep rikaļooran Jisōs Kraist."

Kōjparok bujen ko "enej aikuj bwe ro rikaļooran [Rilo̧mo̧o̧r] ren etal jān ta eo Ekar kūri, ‘bwe men eo e utiej ippān armej’(Luk 16:15), im ‘ṃanit ko an armej ran.’(Mark 7:8)."

Menin bwilōn̄ eo kōṃro Nathalie kar jar kake ekar waļọk ālikin am kar jutak kōn m̧ool im meram eo ej ilo Jisōs Kraist. Koṃro kar bōk juon kaṃool ekajoor ke Kraist ej kwaļok menin bwilōn̄ ko ekkar n̄an tōmak eo am ilo E. Jet iien ilo mour in ejjab aolep men rej kūrm̧ool āinwōt ad kōtmene, im jet iien jej aikuji tōmak eo ilo Jisōs eKraist bwe aolep men ren em̧m̧ān ilo jem̧ļokin.

Kiiō komaron̄ ba, "ijjab jelṃae ejja jekjek in wōt—ewi wāween an jerbal n̄an n̄a? Ilo mour in, kajjojo iaad jenaaj jelṃae iien ko ad make remarok, iien ko rejjab āinwōt ad kar kōtmeni. Eļan̄n̄e kwoj jelṃae marok kōn būrom̧ōj, jouj im keememej iien eo emarok Jisōs Kraist ekar iion kajirere, mao, jorrāān, kōjrat, im lelōn̄ļọk ņa ioon debwāāl kōn kwe im n̄a.

Raan eo ekar obrak kōn kabūroṃōjṃōj eo eḷap an jorrāān, im ear kakkure jetōb ko an ro rekar iakwe im kautiej Jisōs Kraist. Ak marok eo ilo raan eo ekar jab n̄an indeo. En̄jaake eo n̄an ebweer ekar jab to an pād kōnke, ilo Jabōt eo, Rilo̧m̧o̧o̧r eo ekar jerkakpeje ekar anjo̧ jān to ko an mej. Innām jekdoon ewi jon̄an an marok raan ko am̧, jouj im keememej bwe Jabōt enaaj itok eļan̄n̄e kwoj tiljet in kōjparok bujen ko kwaar kōm̧m̧ani ippān Irooj.

Karōk eo an Jemedwōj Ilan̄ n̄an kōj ej m̧ōņōņō kiiō im lan̄lōn̄ n̄an indeo Ippān. E ej letok n̄an kōj kakien im kien im kōm̧m̧an bujen ippād n̄an kōjeram̧an kōj. An kōņaan, kōttōpar, im aiboojoj rej bwe jen jepļaakļok n̄an Ippān ilo erreo, ilo ad kar kwaļok bwe jej tellọkin juon indeo in lan̄lōn̄ Ippān.

Jejļā kōttōpar eo an rijuṃae eo. E ej kappukot aolep bwe "ren en̄taan āinwōt e." Enaaj kar kōṃṃan bwe jen kakure bujen ko ad n̄an boktok būrom̧ōj iood. Ekar kalliṃur n̄an an kakkure kōj. Būrookraam̧ eo an satan ekkā an kōmeḷeḷeiki āinwōt, "ikkure kiiō im kōļļa tokālik." E ej bar kajjion̄ katakin kōj bwe ejjeļo̧k kaje ak bōk eddo n̄an kōm̧m̧an ko ad.

Būreejtōn Ezra Taft Benson ekar katakin:

"Teej eo eļap an mour in ej pokake Anij. …

"Jerbal eo elap ilo mour in ej n̄an ekkatak ankilaan Irooj innem kōm̧m̧ane.

"Kien eo eļap an mour in ej n̄an iakwe Irooj.

Jemaron̄ eddōkļo̧k ilo ettā im kōkajoorļo̧k bujen jemjerā eo ad ippān Jemedwōj Ilan̄ im ad Rilọmọọr Jisōs Kraist eļan̄n̄e jej erom̧ āinwōt juon ajri edik, kalōk mour ko ad ioon dekā eo ej Rilọmọọr Jisōs Kraist, wūjlepļok n̄an tōmak ilo E, ron̄jake tōl ko an Jetōb Kwojarjar n̄an tiljek kōjparok bujen ko em̧ōj kōm̧m̧ani ippān Irooj ilo iien eo jekar peptaij im ilo m̧weo Im̧ōn.

Ijeļā bwe Anij ej mour im kam̧ool bwe Jisōs ej Kraist eo. Ij kam̧ool bwe Būreejtōn Dallin H. Oaks ej rikanaan eo an Anij ioon laļ in.

Jisōs Kraist Em̧ōj an Jerkakpeje. Eṃool, Em̧ōj An jerkakpeje. Ilo etan Jisōs Kraist, amen.