Rodech

Me ngera olengchelel tial kerrekar me a kot lungil kesiokel redechel? Ngolchotel a “beltikerneg er a Dios” e mchisii sel meang el moktek er a Demad er a Babeluades el kirel a mo suobel. “Beltkil a rengul a Dios a uchul, e nguldureklii a di tal Ngelekel, me tirke el rokui el mo oumerang er ngii a diak bol riid e bai mo nguu a diak a ulebengelel klengar.”

Tial kesiokel el rodech a olengchelel a klebokel el kelngeltengat er a diak a mengaisisiu er ngii el Tngakireng er a Osobel. Ng diak di deluut el mo ngar ruriul er tial klengar, le ngokiu a klaumera er kid er a Jesus Kristo, me a ouchel reng, oltirakl a llach, eng sebeched el mo mousubes er a kngtid e a tara klebesei e kede dechor el beches e klikiid er medal a Chedam me a Ngelekel.

A dolai er a redechel tial kerrekar a dirrek el olengchelel a kmo kede mo urrekodel aikel chedaol ruoll me a telbiil er a mla moluut el ebangkelio—el mla metecholb, e nguu a sengk er a Chedaol Reng, e mla soiseb er a blil a Rubak e ngmai a klengeltengat er bab. Ngokiu a krasia er a Jesus Kristo me a otirekled er a telbiled, e kede ngmai a diak el mochur el yaksok el mo kiei lobengterir a remelemalt el telungalk er kid el mo er a ulebongel.

Sei a uchul e a anghel a milsaod er a rodech el kmo “ng kot el ngarbab el deureng er a reng.” Ng meral uaisei!

Me kede rokui el mla smuub, el kmo uriul er a bla dechermii tial mekreos el rodech er a mla moluut el ebangkelio, e a melemolem el ngara blakereng el mora Rubak el Jesus Kristo a diak el beot el tekoi. Meng uaikel mla medung er tial ongdibel, kede melemolem el chemau a olibesongel, cheleblad, rrau el reng me a nglemuu, omengesuseu me a ongetikaik el mengesuseu e mengurs a rengud el mo cheroid er a Osobel me a klebokel el tekoi el bla decharm a doltirkal er Ngii.

A cherarou a uchul, e sel berrusel a Lehi a uldimukl er ngii a uleklatk! Sel kuk bitang er a omeuachel a klou lobereberk el blai el mui er a rekakerous el chad el melutk chimorir, loltuub, e omecheracheb er tirkel melemalt loltirakl er a Jesus Kristo.

A rechad el ngara tial blai a ulemtelub, e oltuub, e ocherechur er tirkel loltirakl a llach, el melasm el mengeuid e mengesang er a klaumera er tir er a Jesus Kristo me a ebangkelio er Ngii. E a ikaikid el tekoi er a ngor lomuchel a rraureng el mo er a roumerang, e a rebebil er tirkel chirremii a rdechel tial kerrekar a mlo merur er a ebangkelio el bla lenguu. A blulak longetikaik er a beluulechad a mengesuseu er tir; me te mo ikrii a rodech; me a, osisechakl el ngar chedaol llechukl, “[e touchakl] er a ngodech el rael [e] remiid.”

Chelsel a beluulechad er chelechal sils, e a rechedal a cherarou a oureor el diak lolengull, lomdois er a iidisir a rechad er sel klou e meteteu el blai. Tia mla oberk el mo er a omeuachel, e melasm el soiseb er a rekeblid, er tirkel loltuub me a romtelub a oldiu el meklou a ngerir el ngara rua internet.

A President Nelson a silodii el kmo: “A cherarou a mla mengisois a klisichel el melemall a klaumera er kid e merrob er a urerel a Rubak.” Ka dolbedebek a tekingel a Lehi: “Ng dimlak ki morrenges er tir.”

Ng uaisei el diak el kired el medakt, eng di kired el mo klekar. Ngarngii a taem, e a mekekerei el tekoi a ngodechii chedaol klengar kid. Lak kobechei a kerim, tekingir a rebebil, me a rediak loumerang el sechelei, a lechub a telitur me a klengitelreng me lecheridau er sel merekos, klikiis, el klengeltengat er a reng el mei lokiu a rdechel tial kerrekar. A osengem me a rengum bol moterekokl el ngara Osobel el Jesus Kristo me a diak a ulebengelel deureng el mei lokiu Ngii.

Sera Ongelolem el buil, e a bechik er a Kathy me a ngak a mlara kemeldillel a Jason Hall. Sera bol secher, eng mle okeua me a eai a rekil e mesiou el merredel er a chelchad er a re elders.

Aikakid a tekingel a Jason el kirel a tekoi el dilubech el ngildechii a klengar ngii:

“[Sera leteruich me a eim a rekik] e ak [mlara] mlai e aksident. … Ak [chilmur] a chiklek e mle mechitechetuch er uluk el mer iou. Ng mlo diak kulchesiu ochik me a tedobech er a chimak. Ng mlo diak el sebechek el merael, dechor, … malechub eng di ngak lomengur. Ng mle meringel er ngak louteliil malechub ak mengedecheduch.”

“‘Chedam el [ngara Babeluades],’ a kulengit, ‘Ulekum meng kuk di sebechek lolab a chimak, e ak medengei el kmo ng sebechek. Adang, e Chedam, adang. …

“… ‘Mngai ochik, e Chedam, ak di [meluluuch] me di kusbech a chimak.’”

A Jason a dimlak bol mesisiich a chimal. Sebechem el rongesii a ngor er sel meteteu el blai? “Jason Hall, a Dios a diak el renges a nglunguchem! Alsekum a Dios a oubeltikereng el Dios, e ngera meng mechikau el uaisei? Ngera meng kirel ngarngii a klaumera er a kid er a Kristo?” A Jason Hall a rirengesterir, eng di dimlak lomtab a tekingir. Ng bai millai a redechel a kerrekar. A klaumera er ngii er a Jesus Kristo a mlo mesisiich e diak el mesim. Ng tilobed er a skuul er a daingak e mlo bechil a Kolette Coleman er a templo, el ngii a smodii el kmo ng beltikereng er a klengar ngii. Uriul er a teruich me a elolem el rak lekaubuch, e a tara mengasireng a dilubech, el ngelekir el sechal, er a Coleman, a mlechell.

Te milkerang e mukeroul er a klaumerang? A Kolette a silodii el kmo: “Aki mle ultuil er a moktek er a Dios. Eng milskemam a chubechub. Aki mle medengei el uase a Jason a [tara klebesei] eng mo ungil. … Kede mle medengei el kmo a Dios a milskid a Osobel, el tngakireng er ngii a rullid el mo outekangel sel sekum eng mo soad el kimer.”

Sera longedecheduch er a kemeldilel a Jason, e a teruich a rekil el Coleman a dilu el kmo a demal a ulsischeklii el kmo: “A Chedam er a Babeluades a [ngarngii] a uldesuel kired, ea klengar er a beluulechad a kmal mo klebokel, e sebeched el kiei er a chelsel a telungalek. … Eng di … ng kired el mo soiseb a meringel el tekoi e dirrek el mo remuul a chelbirukl.”

A Coleman a millemolem: “A Chedam er a Babeluades a uldureklii a Ngelekel Sechal, el Jesus, el mei er a beluulechad. A Urerel a mle kirel mo cherrungel. E omekungil er a recahd. E oubeltikereng er tir. E sola mlo er a ringel el kirel a rokui el ringel dolab, klengitelreng, me a kngtid. E sola Mlad el kired.” A Coleman a millemolem el melekoi el kmo, A uchul meng rilelii tiang, a Jesus a medengei el kmo ngara kumelechesiu er chelechang.

“Edei el klebesei ruriul er a lemad a Jesus, e Ngii … a liluut el mo ngar loba cherrungel el Bedengel. Tia kmal klou a belkul mei er ngak le ak medengei el kmo … a bedengel a [demak] a mo cherrungel e kemam a mo dmak el telungalek.”

A ulebongel e a Coleman a dilu el kmo: “Sera kekerei eng bek el kesus, el demak a dmu er ngak el kmo, ‘A Papa betik a rengul er kau, a Chedam er a Babeluades a betik a rengul er kau, e kau a kedung el buik.’”

A President Russell M. Nelson a silodii el kmo ngera uchul me a telungalek er a Hall a mla er a deureng e mlarngii a urungulir. Ng millekoi:

“A deureng el domelechesuar a kekerei a ngerchelel el kirel aike el teletael el duubech er a klengar er kid me a rokui el tekoi el kid a ultuil a klengar er kid er ngii.

“Se el sekum e a moktek er a klengar er kid a ngara uldasou er a mo suobel … el Jesus Kristo me a ebangkelio er Ngii, e kid a sebeched el mo melechesuar a deureng el diak el diak el iior er a ike el ngii a mla duubech—me a lechub e ng diak el bol duubech—er a klengar er kid. A deureng a mei el Ngii a uchul. Ngii a uchul a rokui el deureng. …

“Alsekum e kede osiik er a beluulechad … , eng diak a ta el bo dodengelii a deureng. … A [deureng] a sengk el mei el okiu a mera el lomelasm el mo kiei er a melemalt el klengar, el uai osisecheklel a Jesus Kristo.”

Alsekum eng meketeketa el taem el diak mnguu a rdechel a kerrekar, e modengei el kmo a chimal Osobel a berrokel kiriu. Ngii oba beltikereng e olengit, “Bo mouchel a rengmiu e mei er ngak.” A rodech er ngii a kmal betok e di ngarngii. Ng diak locheraol er a udoud, e diak a chad el kmal semeriar el kirel lekotouar ngii.

A lengarngii er a rengum a lemuut el mo er tial kerrekar e mo nguu a rdechel, e momuchel el mo ngara nglunguuch el mo er a Demam er a Babeluades. Moumerang er a Jesus Kristo me a klisichel a tngakireng er Ngii. Ak yaksok el kmo sel momes el bedul Osobel “er a bek luldasou,” e a rdechel a kerrekar a bom nguu, el ungil a telemtemul, e deureng el mora rengum, “el ngii a kot el ngarbab er a rokui el sengk er a Dios.”

Edei el sandei er a memong, e ak milsa mui el rdechel a deureng er a Osobel e ra bechik er a Kathy, me a ngak er a ki mngara oterkeklel a Templo er a Lisbon Portual. A klemerang er a mla moluut el ebangkelio a ulemuchel er a Portugal er sera 1975 el tekoi er a klechelid a mlo sebechel morngii. Betok er a Resanto el tir a mle kot el oremii tial rodech er a lak a klou el seked, diak a ikelesia, el diak a kmeed el templo el ko er a di tal telael mile (1,600 km) a cherridel e chelecha e te mlara deureng le a rdechel a kerrekar a sebechir el metik er ngii er a chelsel a blil a Rubak el ngara Lisbon, Portugal. Ak chemat e mengull er tirkal Uriul-klebesei el Santo el rengrir a mle ultuil er a Osobel.

A Osobel a dilu el kmo, “Ngike el mei er ngak, me ngak a ngarngii, a mo nguu a rodech: le lak ngak eng diak mngerang.”

Sera longedecheduch er chelechal tutau el mo er a rechedal a ikelesia er a beluulechad el rokir, e a President Nelson a dilu el kmo, “Rodam me a rodos er ngak, kemiu a okesiu er a rodech el mei sel moltirakl a osischeklel a Jesus Kristo. E millemolem el kmo: “A kuureng a suliu! Ng betik a renguk er kemiu!”

Ng betik a rengmam er kau, e President Nelson.

Ngak a sioning er a klisichel a chedaol ocholt lobang a Merredel er kid. Ngii a profet er a Dios. Ng uaia Lehi er a recheuodel, e a President Russell M. Nelson olechau er kid a retelugnalek er a Dios, el mei e bo denguu a rdechel tial kerekar. Bo doba ngariou el reng me a klisiich el mo oltirakl a tekingel.

A kmal loba ngariou el reng e sioning el kmo a Jesus Kristo a Ngelekel a Dios. A beltikereng er Ngii, Klisichel, me a krasia er Ngii a uchul a rokui el meklou a ultutelel tekoi. Aika kdung el ngara ngklel a Jesus Kristo, amen.