Tial Klou el Omerolem

A sorir a rengalk el cheldecheduch el chelid el milluches ra ngara mong a omuchel el ua tiang “Chelsel a metetoech ra chutem a kiei er ngii a kobito.”

Cheldechedechal a Bilbo Baggins a melekoi el kirel a di hutsu e ngodech el kobito el ngiluu a tara ungil techall—chung el mora omerael me a yaksok er a ngarbab el sengk.

A chetituokel er tiang a betok el ulsemuuch el kobito a diak el sorir a ngii di el ngerang el kirel tial omeral. Te kiei el di kirel a beot el klengar. Te sorir lomengur el elolem ra tal sils sel ngarngii a kelir e chemoit a temir el ngara sers, kakesekang tir ma ruldingel, mengitakl, outumetum, e oldeu er a deureng ra beot el klengar.

Engdi, a Bilbo sera lenguu a techall el mora klou el omerael, eng mle chuob sel kmal ngara chelsel a rengul. Ng medengelii a teletelel el kmo tial omerael a mo meringel. Dirrek el kengaol. E ngarngii a techall el diak el luuut el mei.

Eng di, a okedong er tial omerael a mla rutechii a chelsel a rengul. Me ngokor, e ngikal ngodech el kobito a mlo meche beot el klengar e tobedang el mo er a klou el omerael el tiang a mo ngoikii el mo er “sei el lmuut el mei.”

Sel locha uchul eng ual soad tial cheldecheduch ngii el cheldechedechad el dirrek.

A kmal irechar, er a irecher, ruchei ra demechell, er a rak el mengemengemed e cherrechar er a uldesued, e kid el dirrek a ngiluu okeodng el mo omuchel er a omeroled. Tiang a lultebedii a Dios, el Demad er a Babeluades. A kengei er tial omerael a belkul a kmo ng mo medechel a beot e selbechakl el klengar el di ngar bita er Ngii. Ng belkul a kmo a mei er kid er tial omerael er a beluulechad a mui er a diak dodengei el kengaol me a ringel.

Ke de mle medengei el kmo ng diak el bol beot.

Engdi ke er dirrek el mle medengei el kmo kede mo uker a betok el mekreos el klungiaol, uldimukl a bedenged me a mo ormii a mesisiich el deureng me a klengitereng er tial klengar. Kede mo meduch el mo blak a rengud, e mo osiik, e mo ngara ringel. Ng mo sebeched el metik a klemerang er a Dios me a kid.

Ng uaisei, kede mle medengei el kmo kede mo remuul a chelbirukl er tial omerolled. Engdi kede ngiluu a yaksok: e le uchul a ngarbab el tengetengel a Jesus Kristo, eng sebeched el mukbeches ra kngtid, obtanget e obiich a rengud, e a tara klebesei e kede mekiis er a kodall e mo dmak kid me a re betik er a rengud.

Ke de mlo medengei el kmo a Dios a meral betik a rengul er kid. Ng mileskid a kengar er kid, e soal a bo de ngai a klungiaol. Maluaisei, e Ngii a kildmeklii a mo Osobeled. “Meng uaisei,” ea Demad er a Babeluades a dilu el kmo, “ng di mokau el melilt el kirem, e leng mla mo ngerchelem.”

Ng locha mlar ngii a tebedechel tial omerael ra klechad el blol bekikl e dirrek el medakt er ngii a rengelekel a Dios, leng ual blel betok el reng el ngalek el rodos ma rodam er kid a millilt el mo omtok er ngii.

Tial sengk ma klisichel omelilt, a milskid a uldasu el mo sebeched el mesuub aikel ngii a bodengail el teleteled el mo cherechar a ual di ble ungil besul er kid a le blel kengaol tekoi.

Meng mlo uaisei, el blo doumerang er a telbilel me a klisichel a Dios me a Betik ra Rengul el Ngelekel, e ke de kilengei er a ringelel omerael.

Mak kilengei.

Me kau meke kilngei.

Kede kilengei el me ikrii a selbechakl el kot el beluad e mocha soiseb er a klou lomereael er “sei el lmuut el mei.”

Meng uaisei, e a klechad a ngarngii a teletelel el mo mengesang er kid, ng uaisei? Ke er di ngerang e ochebir a medad er tial klou el ruoll, e leng soad a di beot er a bai de mukeroul e ngoriakl.

Engdi, ngarngii a kmo ngerang el desang, ra chelsel a rengud, el songerenger er a ngarbab e kuoll el belkul a klengar. Tial klengerenger a tara uchul ea rechad a sorir a ebangkelio me a Ikelesia er a Jesus Kristo. A mla moluut el ebangkelio a, uaia, lomekbeches er sel okedong el mora omerael el de kilengei er ngii ra irechar. A Osobel oleker kid, el mo meche beot ma selbechakl el klengar e mobengkel er tial rolel re oltirakl.

Ng betok a chebirkelel tial rael. Ngarngii a bukl, ked, me a techukill. E locha ngarngii a, bubuu, trol, ma dirrek el tang terung el dragon. Engdi sel di mngar tial rael e moumerang er a Dios, eng mo sebechem el metik ra rolem el mora klebokel el basio e lmuut el kaeri el mormei er a blim ra babeluades.

Me ke mekera bo momuchel?

Ng kmal beot.

A kot, eng kirem el melilt el nguu a rengum el mo bedul a Dios. E molasem ra bek el sils el osiik er Ngii. Mosuub el mo oubeltikelreng el mo er Ngii. E mecherei tial beltikelreng meng mekrolau el mo mesuub, e mo medengei, e oltirakl a osisecheklel e momeduch el oltirakl a llechul a Dios. A mla moluut el ebangkelio er a Jesus Kristo a mlei er kid el kmal beot el ngalek a sebechel mo medengelii. Eng di a ebangkelio er a Jesus Kristo a olab a nger el mora kot el meringel ker er a klengar e dmolech e chetituokel meng nguu tial rokir el klengar er kid el mesuub e omdasu el kirel, el diak el sal sebeched el mo medengei aikel mekekerei el telengtengil.

Alsekum me koumededenger er tial omerael e lekau el diak kom chansing ra decham, e bo molatk el kmo a oltirakl a diak el belkul a kmo ke meruul el morsel ngarbab el teletelel; tia bai kirel el kmal ngara rengud el meruul er ngii. Aikel molilt el tekoi a ungil lochotau, ra bai duch er kau.

Ngii mesel omrebet, eng sebechem el melilt el diak bo mikrii, e bai mo mesisiich er sel berraod, e omakes el bedul uchei, e lmuut el mekiis. Tiaikid sel kot el ngarbab el skeng er tial lomerael.

A Dios a medengei el kmo ng diak kom cherrungel, me ke mo ruebet sel bebil. A Dios a diak bol kekere beltkil a rengul sel omngara ringel er sel omesisiich.

El diua ungil loungalek, el soal kau a dil blak a rengum el melasem. A oltirakl a diua dosuub el mo meduch lou piano. Ng locha sebechem er a uchelel el di ousekool er a di telkib el diak de sal dongchii el ongak el “Chopsticks.” Eng di sel di molasem, e tial beot el ongak el mle meringel a tara klebesei, a mo klebokel, el ongak.

Chelechang, e tial sils a locha diak el berkau er tial klengar, engdi tia mei. A di lolengit er ngii a Dios a kmo kedi blak a rengum e di melasem.

Ngarngii a kmong ngerang el ungil, e telkib el ngodech, er tial rael el kau a mla ngiltii: a di tal rolel e kau a moruchei er a omerolem er a ebangkelio a olngeseu er a rebebil el merael moruchei el dirrek.

Tial mo olngeseu er a rebebil a a rael er a oltirakl. Klaumerang, oureng, beltikelreng, chubechub, me a omesiou a metengetid a roltirakl.

Ngokiu a blakelreng er kau lolngeseu er a remechebuul me a rengesool, me a rengara ringel, e a teletelem a obiich e obeob, e a rengum a mo klou, me kau a mereal e ungil a rengum.

Ng di tial beltikelreng a diak mobang e mongerchir er a kmong ngerang. Tia diak likel bedengel a omesiou el mongerechir mebol merael chisem, bol sorir kau, malechub, e bo loruul a soam.

A meral oltirakl er a Jesus Kristo oubeltikelreng er a Dios me a rengelekel el diak longerchir el mo omtechei a sulel. Ng betik a rengud er tirkel tomall a rengud, el diak el sorir kid. Ngii metirke loltuub er kid, mekngit er kid, e osiik el melemall er kid.

Sel mokekii a rengum ra mechellins el beltikelreng ra Kristo, e ng mo diak a basio er a mekngit el reng, omerritel, me a otuub. Kau a urrekodel a llechul a Dios e leng betik a rengum er Ngii. Ngar tial lomerael, el mekekokil e ke merael e mo ua Kristo er a uldesuem me a omerellem. E ngera lomerael a kuk ngarbab er tiang?

Sel ongedei el tekoi el dolasm el mo meduch er ngii er tial omeroled a mo nguu a ngklel a Jesus Kristo e diak demerur el chedal a Ikelesia er a Jesus Kristo.

Ng diak domart er a klaumerang er kid.

Ng diak dolakl er ngii.

Ng blitokl le kede bai, mesaod el kirel tial omeroled lobengterir a rebebil el di ua de kadecheduch ra bek el sils. A re sechelei a meruul el uaisei—te mesaod a tekoi el ngii a meklou a ultutelel mo er tir. Tekoi el ngii a kmeed er a rengrir e ngar ngii a rrelii el kirir.

Tiaikid a bo moruul er ngii. Mouchais er a cheldechedecham me a mla dubech el merkau er chelechal omchedal a Ikelesia er a Jesus Kristo er a Uriul-klebesei el Santo.

Sel bebil ea cheldechedecham a rulii ma rechad a ocherechur. E a le bebil e ngollangel er tir. A lebebil eng ngosuterir a rechad el mo melemolm el ngara kllouelreng, mesisiich, e bekeu el mo chemau a lmuut el ta er a sikang, ma tara sils el motelkib el kmeed er a Dios.

Mouchais a mla dubech el merkau er mederir, ma social media, chelechad, ma ngii di el ker.

A tara ulebongel tekoi el Jesus a dilii el mora Roltirakl er Ngii a mle kirir el mo ra rokui el beluu e ouchais er a cheldechedechal a mla mekiis el Kristo. Chelechal sils eng dmeu a rengud el kongei er tial ngarbab el oderuchel.

Meral klebokel el klumech el douchais el kirel: e le uchul a Jesus Kristo, ea bek el sechal, redil, ma ngalek a sebechir el lemuut el mora blirir er a babeluades e ngar sei el kiei el ngara klebkall me a llemalt!

Ng dirrel el muut el ngarngii a bebil er a ungil chais.

A Dios a mla me duum ra chad er chelechal de ngarngii el taem. Ngarngii a ngar el profet er kid.

Mei e kumeklatk er kemiu el kmo a Dios a diak lousbech er kemiu el mo “olterau” er tial mla moluut el ebangkelio er a Ikelesia er a Jesus Kristo.

Ngdi mengerechir er kau meng diak momart er ngii er cheungel a sualou.

E alsekum me a rechad a tibir el Ikelesia a diak el bortir, sei a kuk uldesuir.

Ng diak a belkul a kmo ng diak el sebechem. Ke melemolem el meruul a ungil mortir. Ma kal dung diak el sebechem el lmuut el loleker er tir.

Sel kakerous er a beot el kadecheduch er a social media me a chebechub, e bekeu el reng ra oltirakl a—okedong!

Ke de oubeltikelreng e melengmes er a rokui el ngelekel a Dios, el diak el iior er a deruchellel er a klengar, diak el iior er a lechad er ngii malechub a klechelid er ngii, diak el iior er a uldesuir ra klengar.

Sel kid a kuk di meruul er ngii a kmu el uase, “Mei e mesang! Mei me bo modengelii el kmo a omerael er a rael er a oltirakl a ungil a rengud er ngii e melisiich.”

Kede omekedong er a rechad el “mei e olengeseu, el melasem el meruul er tial beluulechad el mo ungil beluu.”

Me kede kmo, “Mei em kiei” Kemam a rodam ma rodos er kau. Ng diak ki mcherrungel. Aki oumerang er a Dios e osiik el mo urekodel a llechul.

“Bem teloi er kemam, me bom rellemam el moungil. Me, ngokiu tial teletael, e kau a merael el moungil dirrek. Mei e dedak el ngar tial omerael.”

Me sera sechelimam ra Bilbo Baggins ra lolchesuar er a okedong el mo ra omerael el mengitikaik er ngii, eng mlo soual mo bad e ongelii, e ungil lomengur ra tutau, e tuobed er a tutau.

Ma Bilbo ra le bekiis, eng milsang a blil el cherrad, meng kileed eng mechudoud er a tekoi el bo longetmokl er ngii.

Engdi e a sechelil ra Gandalf a mlong e uleker, “Meng oingerang e ke mei?” Meng kirel mo mes ra resechelil, a Bilbo a mocha kirel melilt el kmong mekerang.

Maleuaisei, e ngikel hutsu e ngodech el kobito a miltik er ngii el rurta el tuobed ra medal a tuangel el mocha ra rolel omerael el lorreched meng ngulbes er a ulkungel, ma skersel, ma oseldel a medal. Ng dirrek el dimlak el rekir a ongerung el blengrul ra tutau.

Ng locha ngarngii a suobel el dirrek el de subii er tiang.

Alsekum me kede mla melchesuar er sel longitikaik el mo obengkel sel klou lomerael er a klechad e omerk a ika el ungil Demad ra Babeluades a kiltmokl el kired er a mla memong, e ak beches louchais er kemiu, chelecha tiaikid sel sils el doltirakl er a Ngelekel a Dios el Osebeled er a rolel er a omesiou e oltirakl.

Ng sebeched el choitii a klengar er kid el mengiil er seikid el techall sel sekum a rokui el tekoi a mo ungil klebechel. Chelecha eng taem el doterkeklid e mo ultebechel losiik er a Dios, mesiou ra rebebil, e chouchais a ikel dodengei el mora rebebil.

Bo bechei a ulekungiu, skersiu, oseldiu, ma cherrad el blai.

E tirkel bebil er kid el mla muchel er seikid el rael, bo le meduch a rengmiu, em bom chubechubechad, bo leklou a rengmiu, e molemolm!

E tirkel milcheuid er a rael, kiolengit me mluut el mei, mluut el me bengkemam, me demengai el mo mesisiich.

E tirkel dirkak lomuchel, ngera orreked er kemiu? Alsekum e ke soam el melchesuar a ikel longasireng el tekingel tial klou lomerael ra reng, e bom sebechau ra kuk smiich el omerolem! Mongedecheduch er a re misionari. Mongedecheduch er a re sechelim ra Uriul-klebesei el Santo. Mongedecheduch lobengterir el kirel tial klebokel el ureor e mengasireng.

Ng mla mo taem el domuchel!

Alsekum e ko melchesiu el kmo a klengar er kau a lmuut el klou a belkul, e ngarbab a moktek er ngii, e mesisiich el telungalk, e kmeed el deleuill lobengkel a Dios, a kulengit, mei em teloi er kemam.

Alsekum e kosiik er a delbechelir a rechad loureor el mo kot lungil el bedengir a rechad, lolngeseu er a rousbech a ngeseu, e meruul er tial beluulechad el moungil el beluu, mei, em teloi er kemam!

Mei e mesa el kmo tial klebokel, e mengasireng, e smiich lomerael ng ngera belkul.

Ngar tia el rael e kedi kau el mo medengelkau.

Kemo metik a belkul a tekoi.

Kemo metik er a Dios.

Kemo metik er sel kot el smiich e ngarbab lomerael er a klengar er kau.

A ikang a kuuchais loba ngklel a Osobeled el, Jesus Kristo, amen.