2010–2019
Mekreos el Ngalek el Redil
October 2019 el klou el ongdibel
13:4

Mekreos el Ngalek el Redil

Mla er a Bonnie H. Cordon

General President er a Rengeask el Redil

Oba reng el meruul a ikel rokui el doruul er a chesel a Rengeasek el Redil a klemeriar reng er kemam el mo ngosukau el mo diak el mesim a klaumerang er kau er a Rubak el Jesus Kristo.

Rodos er ngak, ng klou el deureng el me obengkemiu! Kede sioning er a ochebelel ocholt el ngii a tuamet a rengud e smiich.

Chelechal domuchel, eng soak el ouchais er kemiu er a rebebil el sechelei; tirka rengeasek el redil el ngodech a duch, siukang, me a teletael ngarngii me a telungalek er tir. A derta er tir, el di uai kemiu, a mla nguu a renguk.

Bella

A kot, e kuchotii a Bella. Ng mesisiich el di chimol ngeasek el dil er a ikelesia er tir el ngara Iceland.

Josephine

E ngka kuk Josephine er a Africa, el liluut el tibir el mo mesuub er a Babier er a Mormon ra bek el sils. Ng metik a klisiich me a klengeltengat el mei lokiu tial beot, e blakelreng lomeruul.

Ashtyn

A ulebongel, mesang a Ashtyn, el mesisiich el ngeasek el dil el mlo dibus ra delongeled el mle elolem el rak el secher el kasinoma. A mesisiich el klaumerang er ngii er a Tngakireng er a Jesus Kristo a dirk ngara chelsel a renguk.

Kom rokui smiich el ngeasek el redil. Kom ngodech, ea derta er kemiu olab a sengk me a omeruul engdi diua omosisiu er a ikel meklou a belkul e cherechar el teletael.

Kemiu a reng el ngelekel redil a Chedam ma Chedil el ngara Babeluades, e diak a di chimol tekoi el ngii a mo choridemiu er a beltkil a Rengrir me a beltkil a rengul a Osobeliu. Sel morael mo kmeed er Ngii, ngii mesel bekesem a ua tolechoi el bedul uchei, e kemo mesa di ngarngii el budech el me kiei ra rengum leng blak a rengum el oltirakl er a Osobeled, el Jesus Kristo.

President Russell M. Nelson, el betik a rengud er ngii el Profet er kid, a ulengit me ak mouchais a bebil ra ulekrael el omesemechokl el mo ngosukau el mo “omekeroul er a chedaol el [kau] a sebechem el mo ngii” e smisichii a llemeltem el mengetikaik. Ak mo mesaod a eua el omesemechokl er chelechal kesus.

Moktek er a re Ngeasek el Redil

A kot, sel kmal meliud ra rengud el doruul er a re Ngeasek el Redil a somam el ngosukau el nguu a diak el mesim el klaumerang er a Rubak el Jesus Kristo me a ulterekokl el klemedengei er a chedaol el delengchelem el ngelekel a Dios.

Chelechal kesus, eng soak el mo ouchais er a telkib el ngedechel a moktek er a re Ngeasek el Redil Ak meluluuch me ko mo melchesuar er a Chedaol Reng el ouchais a klemerang er a ikal tekoi sel kulekoi er a beches el moktek:

Ngak a mekreous el ngelekel redil a chedam ma chedil ra babeluades, loba chedaol teletelek me a cherechar el osiolek.

Chelecha el kultirakl er a Jesus Kristo, e ak melasem el mo uai Ngii. A kusiik e meruul a ocholt el kngai e mesiou er a rebebil loba chedaol Ngklel.

Ak dechor el sioning er a Dios er a bek el taem er a rokui el tekoi me a bek el basio.

Sel kulasem el monguu a diak a ulebengelel klengar, e ak kurrekodel er a sengk er a ouchel reng e osiik el mo ungil er a bek el sils. Ngultuil er a klaumerang, e ak mo melisiich er a delengcheklek me a telungalek er ngak, meruul e oltirakl a chedaol telbiil, e ngmai a chedaoll ruoll me a klengeltengat er a chedaol templo.

Betebengii a milengodech el mle “kemam” el mo “ngak.” Aikal klemerang a mei er a derta er kid. Kau a mekreos el ngelekel el redil a Chedam me a Chedil el ngara Babeluades. Kau a olab a telbill el oltirakl er a Osobeled er a, Jesus Kristo. Ak siotai er kau me bo mosuub e momdasu ikal tekoi. Ak medengei el sel bo moruul, e ke monguu a sioning er ngii el klemerang. Sel mo ungil medengei a ikal klemerang a mo ngodechii a teletelem sel bom chebangel a ringel. A mo medengelkau me a moktek a ngosukau el meklemeltii a soam el mora Osobel.

A budech ma ulekrael a bomngai sel bo moltirakl er a Jesus Kristo.

Klass er a Rengeasek el Redil

A ongerung el mla metutk el bo losemechokl er ngii a mo rutechii a klass er a re Ngeasek el Redil. A Elder Neal A. Maxwell a melekoi el kmo, “Ng oumesind er a taem e sel kmal lousbech er ngii a rechad a mo selbechakl er a ikel metacherbesul ra klengar sel ngarngii a bo le tab er ngii.” A ikal klass er kid a kirel selbechakl er a ongarm, el budech el basio ra beltik el reng ma kltalreng. Ngokiu a blak el reng lomekdubech a mesisiich el deleuill, e oisisii sel reng er a keltal reng ra delongelir a re Ngeasek el Redil, ea ki momesemechokl a bebil er a teletelel a klass.

Ng mla engelakl ra dart el rak, el re ngeasek el redil a ulebii el mo edei el klass. Ngdi sel rechedel, e aki siotai ra re mengeteklir a re Ngeasek el Redil ma re bishop me loluluuch e lomes a usbechellir a re derta el ngeasek el redil e longetemokl er tir loltirakl aikel komakai el lomes el tekoi. A ikakid a bebil ra okesiu el kmo ngmo ua ngerang osenged er ngii.

  • Alsekum eng ngarngii a re derta el ngeasek el redil, eng sebechel di mo imong a klass ra re Ngeasek el Redil me te rokui el di mo dmak.

  • Altang ngarngii a re betok el ngeasek el redil el teruich ma eru rekrir me re kuk mekesai el tir a ngarbab a rekrir. Ke locha tibir el mo eru el klass: Ngeasek el Redil el teruich ma erung ma re Ngeasek el Redil el teruich ma edei– elmo teruich ma eai.

  • Malechub alskeum eng ngarngii a klou el ward el ngarngii okolem el ngeasek el redil, eng sebechel mo klolem el klass, el derta er ngii a oltirakl a rekrir, el mongederoder ra bek el rak.

Ngii di el teletelel omongederoder a klass er kemiu, e ngdi kemiu el ngeasek el redil a klisichel a omengetmeklel a kltalreng. Bo mo mekllomes er tirkel kmeed er kemiu. Bo muchul a beltik el reng ma ulekerreu el kemiu ourreng el ngmai ra rebebil. Ngokiu a nglunguuch el ngara rengmiu, e molemolem el odars a chimomiu e bom klisichel a ungil tekoi. Le bom uaisei, ea klengar er kau a mo mui er a blokokeuii. Kemo ungil a rengum el kirir a re bebil e mo omuchel el omes a ikel klungiolir sel lobult.

Ngklir a Klass er a re Ngeasek el Redil

Ongedei, me tial beches el omengederoder er a klass, ea rokui el klass a mo okodongall er sel imol ngakl el “Ngeasek el Redil” Kede mo mechei a ngakl el “Beehive,” “Mia Maid,” me a “Laurel.”

Melisiich a Klass Presidencies

Sel mong me ngulebongel el bo kusaod er ngii sel klou el lusbechelel a klass presidencies. Ngdiak el ior ra kmong ua ngerang a mongederoder er a re Ngeasek el Redil, a bek el klass a kirel lou klass presidency! Tiang a chedaol teletael el re ngeasek el redil a mlokedong el mo mengetakl er a rengeasek.

A ngerchelel ma moktek er a klass presidency a mla mo mesisiich e mengai elmo ungil bleketakl. A ureor el olsobel a tara ikaikid el klou a ultutelel ngerachel, tokuni a urerel oldingel, ureor ra kle misionari, melisiich, ma ureor ra templo ma reksi er a telungalk. Choi, tiakid sel de mengideb er a Israel—el klebokel ureor el mo er a rokui el rengeasek el redil el chedal a sel battalion er a Rubak.

Me sel modengei, ea bek el terebel er a Ikelesia, ea Rubak a omekedong er a presidencies el mo mengetakl er a re chedal. Ngeasek el redil, a chedal a klass presidency a locha mo kot el techellem el mengetmokl er tiakid el ulekrael teletelel omerredel. A roungerachel er a remeklou, mrelii sel okedong er a re mo klass presidencies lorechudel el tekoi e mobenterir el mengederedel, mengetikaik e omekrael er tir me bo lungil. Ngii dil terebel er a omerredel el lodengei a klass presidency, momuchel er sel le ngarngii e molengeseu er tir lomekdubech a ikel duch lolab ma kllou el reng me bol el ngeltengat el merredel. Bo mobenterir, ngii di lak mongederedel. A Reng a mo mengetikaik er kau sel mo omekrael er tir.

Chloe

Sel mo olechotel a ultutelel a ngerchelir a roungalk ma re merredel el mengetikaik, e me kuuchais ra tal cheldecheduch. A Chloe a mlokedong el mo mesiou el klass president. A mle kladikm el merredel er a priesthood a ulemekrael er ngii me losiik a ngesou er a Rubak el mo melilt a ngklir tirkel mobengkel ra presidency. A Chloe a miluluuch e ngiluu a ulekrael el kmo ngtechang a mo kldemel el kmal mle mereched. Sera lolemolem el lomtab e meluluuch el kirel a mo melchesel, ea Reng a mekedekudem el mora uldesuel el kirel a ngeasek el dil el blel chelbed er ngii—chad el diak el blechoel el mora ikelesia malechub eng ongdibel.

Ng kora dimlak el ansing er tial locholt, a Chloe milngedecheduch er a delal, meng mlo smodii el kmo a tara rolel a kede ngmai a ocholt a okiu a mekedekudem el mei el luldasu. Meng milsemechokl a rengul, a Chloe a mlo melchesuar el kmong kirel ngiltii ngikal ngeasek el dil. A bishop a uldersii okedong, me ngikal ngeasek el dil a kilengei. Nguriul ra le mechedaol, e ngikal melchesel a melekoi el kmo, “Ke medengei, ng dimlak a tal bo kulchesuar el kmo ngarngii a techellek malechub a kusbechal ra ngii dil ngerang. Ng dimlak kulchesuar el kmo ngak a kirek el ngar tiang. Eng di ngokiu tial okedong, e a kumelchesiu el renguk a Demad ra Babeluades a ngarngii a moktek ma kirek el mo rengii. Me se er a Chloe ma delal er a bol merek er a miting, a Chloe a ulebult el mora delal e merael iuosech er a medal e millekoi, a “Ocholt a merang! Ocholt a meral ngarngii!”

Klass presidencies, kemiu a mla mokedong er a Dios e kltmokl el mo mengetakl er a re cheldebechel ra rengelekel redil. “A Rubak a medengelkau. … Ngii a ngileltau.” Kau a mla mechedaol lokiu a chad el oba ngerachel er a priesthood; tia belkul a kmo sel moruul a urerel tial okedong el mngiluu, e kau a meruul loba ngerachel er a priesthood. Ngarngii a klou a belkul urreor el bo meruul er ngii. Bom kerekikl el kirel e mruul omngai el odbechel Chedaol Reng. Sel bom uaisei, e ke mesiou loba kllouelreng, le kau a diak mosiou el di kau el tang!

Klass presidents, aki ousbech a llemsiu, ngeriu, ma klisichiu el morsel beches el ward council er a re ngeasek el Elder Quentin L. Cook a uluuchais er a chelechal sils. Kemiu a klou a ngerecheliu el mo olngeseu el mes a ikel lousbech a rodam ma rodos er kemiu.

A ikal mla mengodech el kirel omengederoder ra klass ma omengederedel a mo omuchel er sel rechedel sel ward ma branch bol kltmokl el mo bedul a January 1, 2020.

Betik er a renguk el rodos, ak sioning er a ikal dosmechokl el blak saod er chelechal sils el kmong ulekrael el mlara Rubak. Sel doba blak el reng el lomekdubech a ikal dosmechokl, e lak doridii osenged ra ngercheled: el melisiich er kid el mo oltirakl er a Jesus Kristo e olngeseu ra re bebil el mo oltirakl er Ngii. A kuuchais el kmo tiang a Ikelesia er Ngii. Ak meral dmeu a renguk el kmo Ngii a mechikid me kede klou a ultuteled el tebedechel a Urerel.

Nglunguchek el kmo sel osisiu el Reng el ulmekrael a ikal dosmechokl bol lokrolau ra omerolem el ngar tial rael er a telbiil. Aika kdung el ngara ngklel a Jesus Kristo, amen.

Uleklatk

  1. Mesa Rom 8:35–39.

  2. Russell M. Nelson, “Witnesses, Aaronic Priesthood Quorums, and Young Women Classes,” Liahona, Nov. 2019, 39.

  3. Mesa Osisechakl 3:5–7; Jacob 7:5.

  4. Mesa Rom 8:16–17; Doctrine and Covenants 76:24; “Telungalek: Chais el mora Beluulechad,” Liahona, May 2017, 145.

  5. Mesa 2 Petrus 1:3–4; Alma 37:44; Doctrine and Covenants 78:18; “Telungalek: Chais el mora Beluulechad.”

  6. Mesa Johanes 13:14–15, 35.

  7. Mesa Mateus 22:37–39; 25:40; 3 Nephi 12:48.

  8. Mesa Johanes 16:13; 3 Nephi 14:7–8; Moroni 7:13; 10:5; Doctrine and Covenants 8:2; 9:8; 11:13.

  9. Mesa Mateus 20:26–28; 22:37–39; 25:34–40; 3 Nephi 26:19.

  10. Mesa Isaia 43:10; Mosiah 18:9; Doctrine and Covenants 14:8.

  11. Mesa Rom 8:17; 2 Nephi 9:18; 31:20; Doctrine and Covenants 84:38; 132:49; Moses 1:39.

  12. Mesa Helaman 12:23; Moroni 10:33; Doctrine and Covenants 58:42.

  13. Mesa Alma 34:33; Doctrine and Covenants 82:18.

  14. Mesa Hebru 11; 2 Nephi 31:19–20; Alma 32:21.

  15. Mesa Joshua 24:15; Doctrine and Covenants 109:8; 132:19.

  16. Mesa Exodus 19:5; 1 Nephi 14:14; 2 Nephi 11:5; Doctrine and Covenants 54:6; 66:2; 90:24.

  17. Mesa Mosiah 13:30; Alma 30:3; Doctrine and Covenants 84:20–22; Articles of Faith 1:3.

  18. Mesa Psalm 24:3; Isaia 2:3; Ezekiel 37:26.

  19. Neal A. Maxwell, All These Things Shall Give Thee Experience (1979), 55.

  20. A klass a kirel mo okodongall lokiu sel cheldellel sel dai el “Ngeasek el Redil.” Sel mesa a keltukl el klass, bo luldimukl a rekil—tia okesiul, “Young Women 12–14”; “Young Women 15–18” (see Handbook 2: Administering the Church, 10.1.5, ChurchofJesusChrist.org).

  21. A klass presidency a kirir mokedong el mora ikel derta el klass ra Ngeasek el Redil. Sel sebechel, a cherrungel el presidency a kirel mokedong, el ngarngii a president, terung el keldemel, ma melchesel. A le kirel, el mokedong a diak el cherrungel el presidency (mesa Handbook 2, 10.3.5).

  22. Mesa Handbook 2, 10.3.5.

  23. Mesa Russell M. Nelson “Hope of Israel” (worldwide youth devotional, June 3, 2018), HopeofIsrael.ChurchofJesusChrist.org.

  24. A bebil ra osisechakl a ngarngii el mora re meklou el Ngeasek el Redil el ngara Handbook 2, chapter 10.

  25. Henry B. Eyring, “Rise to Your Call,” Liahona, Nov. 2002, 76.

  26. Alsekum meng di imong a klass e imong a klass presidency, e sel cherrungel el presidency a sebechel el ngar sel ward youth council lobengterir a cheldebechel ra re Aaronic Priesthood president me lungil delbodeb a re ngeasek el redil ma re sechal (mesa Handbook 2, 18.2.9).