Medengei, Oubeltikereng, e Mukeroul

Sera 2016 Ea Tabernacle Choir er a Temple Square a mle oldingel er a Netherlands me a Belgium. Ak mle olngeseu el kirel tial tekoi, eng mlarngii a techellek lorrenges a cheliteklir el erul klebesei.

Sera longitakl ak mle omdasou el uase ng kmal klou el ureor er a kedmeklel tial klou el chedal a chelitakl. A uldesuek a millatk er tial klou el klekedall er a chelitakl, locha kmal mle meringel e locha takai a cheral a loltak er ngii er a diall sel dongaisisiu er ngii el mora rua violin, terombetang, me a bebil er a klekedall el beot a dolab er a chimad. Eng di sel kumes e tial klou el klekedall, a dimle lousbech er ngii el sesei el taem, el diak el uaikal bebil er a mekekerei el klekedall el bla lousbech er tial klekool el rokir. Ak mlo omdasu el kmo a lak tial klou el klekedall eng diak el sal mo ungil a klekool meng mle blak a rengir longesechii tial klou el klekedall er a diall loleong a teuachel el mei.

Bebil er a taem e kid omelchesiu el uai tial klou el klekedall, el di sebeched el rulii a kekerei el tekoi e merekong. Eng di msall e kuchais el uase a ongak el motebedii a klou a relii.

Kede ousbech a rokui el klekedall. A bebil er kid a mereched el mesuub e kmal ungil er a skuul, a kuk bebil a meduch er a sunga. A rebebil a meluches e omekedechor a rebebil a omekerreu, omecheliu, e olisechakl er a rebebil. Kid el rokui a usbechall el rulii a klebekelel me a belkul tial beluulechad.

Mo er tirkel omelchesiu el uase ngdiak a ngera relii a lechub e te oumerang el uase ng diak a kmal ultutelir a lechub eng diak a ngera relii er a tara chad, me tirkel kuk omdasu el uase te kmal ngarbab, me tirkel kuk di ngara belngel, eng soak el mesaod er tiaikid el tekoi.

Ngii dil ker el mngarngii er a klengar, a bebil er kemiu omelchesiu el kmal oberedang meng diak mo mdasou el uase kom ngara tial rael. Ng soak el siotai er kemiu el me tuobed er a iilkolk el mei er a llomes. A llomes er a ebangkelio a meskid a mekekeald e omekungil e mo ngosukemiu el mo medengei el uase kom kmal techang e ngera moktek er a klengar kemiu.

A bebil er kid a mla touchakl er a ngodech el rael, el melasm losiik er a deureng er a chelsel.

Kid a blal siotai er kid a oubeltikereng el Chedam er a Babeluades el mo merael er a rolel a roltirakl e lmuut el mo er Ngii. Ng betik a rengul er kid loba klikiid el beltikereng.

Ngera rael? A rael a ngoseuir a dersta er kid el mo medengei el uase kede techang lokiu a odingel el mora rebebil.

A denguu er ngak, e a odingel a olchotel a chedaol beltikereng. Seikid e kid a kudmeklii a teletael el ngkel loldingel meng kel modingel a di diul nguu a klemeriar reng el mo ouchel a rengrir. Ng belkul a kmo, kede ngodechii a roled e merael mo kmeed e mo uaia Osobeled, el Jesus Kristo.

Okesiu, ng diak a belkul a di domelekl el mo ra bechid me a rengeleked el uase te mekerang e mo ungil; tiang a lodengelii. Ng sel kudmeklii a ungil teletael er a beltikereng me te mo mesisiich el mo meruul aikel kirel mengodech er a klengar tir e mo ungil chad.

Seikid e a ouchel reng a mo teletael er a bek el sils el mengikiid el sebechel uldimukl er ngii a klausubes er a diak lungil blekeradel. Ak dobedebek e dirk meruul er ngii el teletael el bebil ak blechoel mereched el merritel er a chad a lechub eng diak kungil lorrenges. E sel bol kebesengei, e kululuuch, e ak omelchesiu a tekoi er a babeluades el kirek el mo ouchel a renguk e kuk melasm el mo ungil. A ungil teletael le kiltmeklii a rechad er a blik, obekuk, me a rochedak e a uriul eng bechik, rengelekek, me a rsechelik a mla ngosukak el merael mo ungil chad.

Kede rokui el medengei el kmo ngera sel sebeched el telkib el mo ungil er ngii. Ng diak a belkul di domelekl er a ta me a tang, eng di ng klou a belkul doubeltikereng e dolngeseu e ra ta me a tang, e sel bo deuaisei, eng mo uchul e a chad a soal mengodech.

Tiaikid el osisiu el teletael e kid a mesuub el uase kede kmal techang e ngera sel mo ngercheled er tial ulebongel el blingelel a reksi er a beluulechad ruchei er a Ongeru Lemei Osobel.

Alsekum e kede melchedech er a ngerchelem, eng soak el siotai er kau el mo sikii a basio el sebechel di kau el tang e moker er a Chedam er a Babeluades me lochotii er kau a ngerchelem. A nger a locha mekekokil mei e merael mo bleketakl sel dengai ochid lotuil el mesisiich er a rolel a telbiil me a odingel.

Kid a chelbangel a bebil er a osisiu el ringel el Joseph Smith a mle chelbangel er sera lengar “chelsel a mekemad er a tekoi me a uldasu loldechelakl er ngii.” Sel donguiu a tekingel, eng mle belchoel kmo: “Ngera kirel ruoll? Ngera er a ikang a klemrang; a lechub, e ngii el rokui el diak el klemerang? Alsekum a ta er ngii a klemerang, e [ngera] er ngii, e mekera bo kudengei?”

Ngokiu a llomes lengiluu er a Hong er a Jakobus, el kmo, “A lengarngii ousbech a llomes, e loker er a Dios, el mimokl el msang, el diak a ngera lorkedii; me bo lenguu,” me a “Joseph a mocha tibir er a rengul el mo ‘oker er a Dios.’”

Kede melemolem el menguiu el kmo tia mle ketengel er a klengar ngii loruul er tial tekoi, le chelsel aika el rokui el sebekreng er ngii eng dirkak a tang, me lolasm, el mo meluluuch el klou a ngerel.

Meng uaisei eng sebechel mei er kid sel ketenged el mo mengedecheduch er a Ulemeob er kid er a teletael el dirkak a tal doruul e rngii.

A Joseph el milasm a uchul, e a Chedam er a Babeluades me a Ngelekel, e ra Jesus Kristo, a mlo duum er ngii, e uleker er a ngklel, me seikid a mle uchul e kid oba mui el klemedengei el kmo kede kmal techang e kid a meral klou a belkud.

Kede melemolem el menguiu el uase sera lengeasek e a Joseph a mlotuub er tirkel mle kirir el sechelil chad e mle kirir el ungil a blekerdelir el mo er ngii. Me kid a mo mes a olibesongel sel di kiei er a klengar loltirakl.

Alsekum e chelechang e komelchesiu el diak a ngerchelem e tial rael er a ouchel reng a kora uaia lemeringel er kau, e a kulengit me bo modengei el uase a di molemolem, e a berraod a mo mengai er a ongelngelem e kau a lmuut el mo mesa llomes. A Chedam er a Babeluades a kmal diak el chitid sel dosiik er Ngii. Ng sebeched el ruebet e lmuut el mekiis, e Ngii a mo ngosukid el smuld a dechedechel ochid.

A rebebil er kid a ngara ringel, eng di kar lolab a Rubak a kmal klou el muiid a rokui el telemall.

A leuaisei eng tiaikid el beltikereng, sel cherrungel el beltikereng el ngii a dirrek el domekedong er ngii el bliochel el beltikereng a lechub eng “klikiid el beltikereng er a Kristo,” a dousbech e rngii er a rekeblid el roungalek a olngeseu er a rengelekir me a rengalek olngeseu er a chedam me a chedil. Ngokiu tiaikid el beltikereng, e a reng a mengodech me a klemeriar reng el mo meruul a Soal a mokdubech.

Ng tiaikid el beltikereng el dousbech e rengii sel doldingel er a ta me a tang el ngelekel a Demad er a Babeluades e dechedal a Ikelesia er Ngii a mo rullid el mo ngmai aikel rokui el klekedall er a chelitakl sel bo dongitakl meng sebeched el mo odersii a ungil e klebokel el chelitakl er a babeluades sel luut el mei Osobel.

Ng tiaikid el beltikereng, tia lllomes el kirel dmiich e omekellomes er kid sel doruul a urered er a bek el sils. A rechad a mesa tia llomes e mo sorir el mo kmeed er ngii. Tiaikid a teletael er a urerel a misionari el rulterir a rebebil el “mei e mesang, e mei e olngeseu, e mei e kiei.” A kulengit, me sel bla denguu a sioning el kirel tial klou el ureor me a ngercheled er a chelsel, e bo dedak el ngara deureng lobengkel a profet Joesph Smith, el dilu el kmo, “Ak mla mesa ues; e medengelii, e medengei el kmo a Dios a medengelii, meng diak el sebechek lomulak el kirel.”

A kuchais er kemiu el kmo ak medengei el kmo ngak ak techang, e medengei el kmo kemiu kom techang. Kid el rokui a ngelekel a Chedam er a Babeluades el betik a rengul er kid. Ngii a dimlak lodureklid el me mengesengsang er tiang kede bai lmuut el mo er Ngii. Me kid el rokui bo demui el medengelii a ngercheled er tial klou el ureor er a oldingel me bol sebeched el merael mo uai Ngii sel Luut el mei tiaikid a nglunguchek el ngara ngklel a Jesus Kristo, amen.