Chimal Osobel
Me sel de bo er Ngii, e a Dios a me sobecheklid, lomekungil er kid a lechub eng meskid a klisiich el obangel a ngii di el teletael.
Kmeed el eru el telael el rak er a memong, e a Osobel a mla er a rois el me metengel ruriul er a lolisechakl er sel Beatitudes me a lmuut el bebil er a osisechakl er a ebangkelio. Me sera lorael, e a tal chad el silecher el chebedes a dilum er Ngii. Ngika el chad a uleba ngariou el reng me a omengull er medal a Kristo, e ulengit a ngesou er a ringel el mla er ngii. Ng mle beot ongtil: “Rubak, a lungil er a rengum, e mrellak el mo ungil.”
Me a Osobel a mocha odersii a Chimal, rirtechii, e dilu el kmo, “Ngungiang; bo mungil.”
Kede subii el kmo a Osobel a blechoel soal lomekngeltengat er kid. A bebil er a klengeltengat a locha mereched el dengai, e a bebil a locha meoud, e a bebil a loch abo dengai ruriul er tial klengar, eng di a klengeltengat a mei er sel temel.
Meng uaia ngike el chebedes el chad, eng sebeched el metik er a klisiich me a ongelaod er tial klengar sel dekengei er sel Soal e dodengei el kmo Ngii a soal lomekngeltengat er kid. Ng sebeched el metik er a klisiich el mo obangel a bek longarm, luldimukl ongetikaik, e mo ungil medengei e outekangel a ikel chelbengeled. Ng klemerang, el chelsel sel kot el mle meringel el taem er a klengar Ngii, e a klisichel Osobel lultekangel a mlo dmolech er a Ledu er a Demal kmo, “Sel soam bol motaut.”
Ngike el chebedes el chad a dimlak el ko er a omulak lolengit malechub e lulngerechir. A tekingel ochotii a delemdemk reng, lobengkel a ngarbab el moktek eng di dirrek luldimukl er a blakereng er sel soal Osobel bol motaut. Tiaikid okesiu er a blekeradel el kired lobang sel dosiik el mo er a Kristo. Ng kired el mo er Ngii loba klaumerang el kmo sel kmal soal Osobel a blechoel mo klungioled er a chelechal klengar me sel diak a ulebengelel klengar. Ngii oba diak a ulebengelel moktek el kid a diak de blechoel lobang. Ng kired el mo er a Kristo loba meral blakereng el kmo a soad bo lultuil er sel ngii a soal a Chedam, el uai Ngii el mle uaisei. Tia kudmeklid el kirel a diak a ulebengelel klengar.
Ng meringel sel domtab er a ringel lulmekberaod er a bedengel me a rengul ngike el chebedes el chad el mlo er a Osobel. A rakt el chebedes a tomall a ngurd me a budel a bedenged, el mo sechudel e chitechut a chad. Osisiu, eng rulii a chad el uaia bol cheiitel er a rechad. A chad el smecher el chebedes a kirel mo cheroid er a rechad er a blil e di mo ngii el tang el kiei el cheroid er a beluu. A rechad el mle smecher el chebedes a uaia le kikiongel, a bedengir me a reng er tir. Tiaikid a uchul, e a llechul a Moses a kmo a rechebedes el chad oubail a teletat el bail e okedongall el, “Kikiongel!” sel lorael. Me te smecher e cheloit er a rechad, e a rechebedes a blechoel kiei aikel diak a delengchokl er ngii el blai malechub e ng olekull. Meng diak el meringel er kid el mesa ngika el chebedes el chad el mlo duum er a Osobel el kmo ng chebuul.
Bebil er a taem er a chelsel a bebil er a tekoi—kid me kede dirrek el mo omelchesiu smecher, a lomerelled a uchul malechub e ngomerellir a rebebil, lultuil er a teletael el sebeched malechub eng diak el sebeched el mekerang. Aikaikid el taem, eng sebeched lotilii a urunguled er a Chimal.
Sesei el rak ra memong, e a bechik er a, Zulma—ngkel ungil tebechedek—a ngilai a meringel el chais er a erul sandei ruchei er a merengel a chebechielel a tara ngelekam. Ng mla er ngii a kasinoma el mlara medal, e uaia di lurrael mo klou. A medal a merrael mo oburk, meng mle kirel mo er a mereched e chetituokel el botk. Betok el tekoi a siliseb er a uldesuel el kmal mlo beraod a rengul. Tial kasinoma ng mereched lomerk? Ng mekera bo lungil a bedengel? A medal ng locha mo ko er a sechudel? Ngkol uangera berredel a ringel? A medal ng locha di mereko ngarngii a llechul a telemall er ngii? Ng locha sebechel tial kasinoma lemuut a bo lungil? Ng locha sebechel mora merengel a chebechiil er a ngelekam el sechal? Me sera lengar chelsel a blil a botk, eng kmal ulemechesiu er ngii el telemall.
Tiaikid el taem, e a Chedaol Reng a mlengelulau er ngii el kmo ng kirel kongei er sel soal a Rubak. Tiaikid eng tilbir lotilii a klaumera er ngii er a Dios. Ng mle mesisiich lomelchesiu el kmo ngii di el ngera el duubech, e sel Soal a ungil mo er ngii. Di mle telkib eng mlo diak lodengelii a rengul e mocha er a botk.
A uriul, eng milluches er a babilengel kmo: “Sera kbora botk e a Kullau e Kongei er sel Soam, e mlo diak kudengelii a renguk. Ak mle medengei el kmo ng sebechek loumera er Kau, el medengei el kmo ng diak a mekngit el ngara Kau el mei.
Ng miltik er a klisiich me a ongelaod er a lodersii a soal el mo er sel soal a Chedam. Seikid el sils, e a Dios a kmal lulmekngeltengat er ngii.
Ngii di el teletael el dengar chelsel, eng sebeched el nguu a klaumera er kid lotilii er a Kristo e metik er a Dios el sebeched loumera er ngii. El ua tekingel a tara ngelekam, er a Gabriel, el milluches el kmo:
A profet a kmo, a medal a Dios a lmuut el dmiich er a sils.
e a Cheiul a lmuut el becheleleu er a yuki
e a oto er a Ngerel a uaia merrumk lomeuachel,
e a chad a kmal diak el ngera er Medal. …
Ng mechas a renguk el mo medengei el uase ng kmal diak ngerang.
E seikid e ngak a meluduus er a rolek el mo er a Dios el kumera er ngii.
E dirrek el seikid e ngak a metik er a Dios el kultuiul er ngii.
A Dios el sebeched loumera er ngi a smisiich a urunguled. Ng sebeched loumera er Ngii le Ngii a betik a rengul er kid e soal a ungil a lemei er kid er a chelsel a bek el teletael.
Ngike el chebedes el chad a mlei le ngii el uluumerang er a klisichel a urungulel. Ng dimlak a chad el msa nger, malechub e longelaod. A leuaisei, e a chimal Osobel el rirtechii a uaia letiliuii a rengul el rokir. Ng sebeched el mesa dmolech lomereng el saul er ngike el chebedes el chad er sel chimal Osobel el rirtechii, tokuni sera ledu el kmo “Ng uaisei; bo mungil.”
A cheldecheduch a kmo “ngika el chebedes el chad a di mle mereched el mo ungil.”
Kid meng dirrek el sebeched el melchesuar sel loubeltikereng, e omekungil chimal Osobel. Ng kol uangera el deureng, urunguled, me a omereng el saul er a rengud el medengei el kmo Ngii a soal lolngeseu er kid el mo ungil! Me sel de bo er Ngii, e a Dios a me sobecheklid, lomekungil er kid a lechub eng meskid a klisiich el obangel a ngii di el teletael.
A leuaisei, ea dekengei er sel ngii a Soal—ng diak el sel soad—e ngosukid el mo ungil medengelii a teletael el dengara chelsel. Ng diak a mekngit el ngara Dios el mei. Ngii a medengelii sel kot el ungil er kid. Ng locha diak di el mereched el choroid a berraod el dechellungel. Eng di bebil er a taem e Ngii a sebechel remuul aika el berraod el mo kebekakl, el ua sel Ngii a kildmeklii el mo er a Alma me a rechedal. E sel ngaruchei, e ngokiu a telbiil, e a berraod a mo mengai, el sebechel er tial klengar a lechub eng sel chedaol Okiis er a kodall el sils.
A meral ngarngii er a reng lotireklii a Soal, lobengkel a klemedengei el kirel a chedaol teletelel a Osobeled, a ngosukid el mekdebechii a bedengel a klaumerang el ngike el chebedes el chad a ulechotii me nguchul eng mlo ungil. A Jesus Kristo a Dios er a beltikereng, e Dios er a urenguul, e Dios lomekungil, e Dios el soal lomekngeltengat er kid e ngosukid el mo ungil. Tiaikid sel mle Soal ruchei er a lemei er a beluulechad eng kilengei el mo sobecheklid sel derebet er a klengit. Tiaikid sel mle Soal er a lengara Gethsemane el Ngii a mlo chemau a diak a smodii el ringel el kirel a ngebetel a klengit. E tiaikid a Soal er chelechang sel Losebechakl er kid er medal a Chedam. Tiaikid a uchul e a Ngerel a dirk melekoi el kmo: “Mei er ngak, kemiu el chellungel a berraod me a ringel, me bok beskemiu a ulengull.”
Ngii a sebechel lomekungil er kid e sobecheklid le Ngii el meduch. Ngii a ngilai a rokui el ringel er a tech me a reng me luchul e Ngii bol mui er a chubechub el mo sebechel ngosukid er a rokui el tekoi e lomekungil er kid el sobecheklid el mo er bab. A tekingel a Isaiah, ledilung a Abinadi, a kmal lungil smodii:
“Ng mera el tekoi el ngii a mla remenges a lengeled, e otekau a kngtil a rengud. …
“… Ngii a mlo er a ringel el kirel a telmelled, e miltemall a bedengel kirel a kngtid; me a otuub el mlo er ngii a budech el mei er kid; me a chelebed el mlo er ngii omekungil er kid.”
Tial osisiu el tekoi a mosisechakl er tiakid lolachitnger:
“Ng daiksang el chad er a Nazareth,
Tial renguk, el meketeketa el telemall,
Tial klengar, el di mui er a cheliseksikd elmora ulebongel,
Ou, ng sebechem el sumechokl, kau el chad er a Daiksang?”
E ultuil er a bekokeuii e kldmokl el Chimal,
E a klebokel el klengar a mo selmechokl
A telemall el rengud a mo mesmechokl, el mo mesisiich
El Beches Luchelel—“el rokui el tekoi a mo beches.”
Alsekum e komelchesiu el kmo ng ua lak mklikiid, a omomelchesiu loberraod, e bo modengei el kmo ng sebechem el mo klikiid, e sebechem el mo ungil, le Ngii el betik a rengul er kau. Moumera el kmo ng diak a ngii di el mekngit el ngar er Ngii el mei.
Le Ngii el “mlo riou er a rokui el tekoi,” a uchul e Ngii a sebechel sumechokl a rokui el tekoi el mla metemall er a klengar kid, meng sebeched el mo tang lobengkel a Dios. Ngokiu Ngii, e a rokui el tekoi a mo mesmechokl, aikel ngara chutem me a ngara eanged, el uchul a “budech lokiu a rsechel mlechubel el kired.”
Mei e bo er a Kristo, el remuul aikel rokui el kired el meruul. E sel bo doruul uaisei, e bo doba sel blekeradel el kmo, “Rubak, a lungil er kau, e mrellak el mo ungil.” Sel bo deuaisei, eng sebeched el melchesuar sel chimal a Mastang lomekungil, lobengkel a klebokel el Tekingel kmo: “Ng uaisei; bo mungil.”
A Osobel a ngii a Dios el sebeched loumera er ngii. Ngii a Kristo, el Chimol Chedaol, el Mesiah, el ngii a kuuchais el kirel el ngara chedaol Ngklel, a Jesus Kristo, amen.