Diak Mongeblad er Ngak

Betok el rak er a mla memong, Ak mle remei el ngara ureor e mlo mechas a renguk er ak ues a becheleleu el chesbereber el mla mechesbereber a rokui el tekoi— el ngara chutem, chesimer er a blil a mlai, me a bekerkard el chelades el blimam. Ak mlo ungil el omtab er tia el osongel e mocha medengei el kmo aika el chesbereber a dirkak dekims. A ultil a chesbereber a uldelid el bedul a rebai er a blai, me Ak ultirakl er ngii. Ngarsei, e Ak miltik er a eim a rekil ngelekek el sechal loba hake el ngara chimal, e oltoill er a chermam el bilis. A klebokel el chedelekelek el cheremam el Labrador a mla mechesbereber el mo becheleleu!

“Kau ke mekerang?” Ak ulker el kora ousisiangel a otto er a ngerek.

A ngelekek el sechal a mlo chelelakl, ulemes er ngak, e omes er a bilis, e omes er a hake el olchars a becheleleu el chesbereber, e melkinga, “Ng soak a bol ua aike loubebiduch a mechedelekel el bilis er a katsudo—ke medengei, sel 101 Dalmatians.”

Ng betik a renguk er ngkal cheremam el bilis. A kulmedasou el kmo kmal ungil, engdi tial sils ea ngelekek el sechal a mle ngodech a uldesuel.

A ongeru el cheldechedechak a iliuekl er a great-uncle Grover [okdemelel a demal a bechil], el ngii a kiliei er a blai er a honto, el mle cheroid er a beluu. Anko Grover a kmal chudelang. Aki ulemdasu el kmo a rengelekam a kirir el mo mesang er a uchei er a lemad. Me a, ta el iieta er a sils, e aki ulemekall el mo er ngii el meketeketa el blil. Aki dilengchokl el rokui e uleldingel e mocha ouchais er ngii er tirka el ngelekam. Ng diak el meketeket elki mchadecheduch, e tirka el ngelekam el sechal, el locha eim me a ellolem a rekrir, a sorir el mo rikl el mo milil.

Anko Grover, a ulerrenges aika el ongterir, e mocha nguu a medal el mo er a mederir. A medal a kmal mle chuodel e diak el lodengelii me tirka el sechal a mle telkib el medakt er ngii. Ngii a milekoi er tir, el ouskarister a otto er ngii, “Komo kerekikl—ng betok a skangk er sei.” Me sera ki mrengesii tiang, ea Lesa me a Ngak a kora kilbetiekl; a ki mle bekikl e le aikal skangk a mol chemold er tir. Tirka el sechal a tilobed el mo er rikl mete milil e kemam a milemolem el oldingel.

A uriul, er aki mngasech er a mlai el mo remei, e a kuleker er tirka el sechal, “Ko miles a skangk?” A ta er tir a melkinga, “Diak, dimlak kim ues a ngidi el skangk, e ng di aki milsa a chedelekelek el katuu el ou ullecheluches a becheleleu er a ulkel!”

Aika el cheldecheduch el kirir a rrau a rengrir el mekekekerei el ngalek el metik er a kmung ngera el tekoi el kirel a klengar me a klemerang a locha sebechel rullid el mo klikmechur, e ng di ng olechotel a lmuut el klou el uldasu.

Sel kot el cheldecheduch, ea ngelekam el sechal, a mla er ngii a cheremel bilis; meng uaisei, ngii a ngiluu a chesbereber e, obang a hake, e kmal mla rengii a rengul a mo meruul er tekoi el mlara uldesuel.

E se el ongerung el cheldecheduch, e tirka el sechal a mle bloket a rengrir el diak el lolchesuar el kirel a sebechel el kengaol sel bol chelbangel aikal skangk. Diak el sebechir el meral dongchii el kmo ngera te milsang, te chiliis er a techall el mo chuarm er a kmal metarchebesul el mo duubech. Aika a cheldecheduch el kirel a cheleuid el omelangch—el oukangkester el kirel a merang el tekoi el kmo ng diak. Ngara ika el omeruul, e a kekka er ngii a di mle mekekerei.

Ma le uaisei, ng te betok a olab a osisiu el mondai engdi meklou. Ng lohca diak el sal sebechir lungil lomes a lechub eng diak el mesa klemerang. Ng lemuut el uaisei, ngar ngii a klisiich er a chelechal taem el urerel a mengetikaik er kid el mo cheroid er a klemerang. Aika el ongeblad me a cheleblad el tekoi a mo chengelakl er a rrau el reng e cheleuid el olangch e oumesingd el ngar er ngii a klou, diak el mekekerei, el telemellel.

Diabelong, el demal a cheleblad e klou el mengeblad, a mo rullid el mo oker a betok el tekoi el ngii a meral ngii e locha mo oumechad er kid er a diak a ulebengelel el klemerang malechub eng mo melodech el mo kmung ngerang el ngii a soal a rengud. A Diabelong a meruul a mekemad lobengterir a re santo er a Dios e mla chemoit a betok el taem el melasm a klisichel mebo longesuseu er a rengelekel a Dios el mo oumerang el kmo a ungil a mekngit ea mekngit a ungil.

Ngii a mla remuul a singio el kirel el mo mengesuseu er a klechad el kmo skangk a di mengelekel a katuu me a lechub, e a se el omerellel a omengesbereber, e ng sebechem el ngodechii a Labrador el mo oubebiduch el Dalmatian!

Chelecha e me de obult el mo er a tal el ocholt er tia el osisechakl er a chelsel a chedaol llechukl, el Moses el profet er a Rubak a mle obengelii el tia el osisiu el teletael. A Moses a mlo er a ta er a kmal kedidai el rois mle kachuchau e milsang a Dios er medal, e milngedecheduch er ngii. A Dios a ulsisechakl er a Moses el kirel a diak a ulebengelel el olengchelel. Mal ta e a Moses a mle kiei er tial klengar e dimlak el cherrungel, a Dios ulsisechakl er a Moses el obengkel a Ditang el Ngelekel; e Ditang el Ngelekel a mo Osobel.

A kede lomesodel, tial meang el ues, e a Moses a milsa Dios, e silubii a klou a belkul suobel el kirel el kmo: ngii a meral ngelekel a Dios.

Bom ungil el llorenges el kirel a kmo ngera milkedmokl er a lemechesimer tia el mengasireng el ues er a ngar medad. “Meng mlei e lengakl … Diablong a milasem el mengetikaik er ngii, dilung, “Moses, ngelkel a chad, monguul er ngak!” A Moses a mle bekeu a rengul e ulenger: “Kau ke techang El uaisei, Ngak a ngelekel a Dios, el obengkel a Ditang el Ngelekel; ngar er ker a klebkellem, meng kirek el mengull er kau?”

Ngar er a ta er a omelekoi, ea Moses a milekoi: “Diak el sebechem el mengeblad er ngak, e le ak medengei el kmo ngak ak techang. Ngak a ulbeob el di uaia teletelel a Dios Ng diak moba Llemesel me a klebkellel. Me ng ngera uchul me ak mengull er kau me a lechub e ak obedikl er a ongeblad er kau?”

Bom ungil lomtab el kmo ng milkera a longer a Moses. Ng ulmeketakl el kmo bom ngai bedengem, e Diabelong; lak mongeblad er ngak.”

Ng kmal betok a sebeched el smuub er a kmal bekeu el nger er a Moses el kirel a ongetikaik er a cherarou. Ak siotai er kemiu el mo onger el ngara osisiu el teletael se el sekum e ke melechesuar el kmo ke ngara cheungel a ongetikaik. Bom molekoi er a cherreuel a delbengel el kmo: “Bom cheroid! Kau a diak a klebkellem. Lak mongetikaik me a lechub e mongeblad er ngak! E le ak medengei el kmo Ngak a ngelekel a Dios. E mo blechoel el omekedong er a Dios er ngak er a Ngelsuil.”

Cherarou, a uaisei, a diak el di lebeot er ngii a chemoit aike el omelemall el ngar er ngii er a rengul el mo mengeblad e mengebechobel er kid. Ngii a dimlak el sebechel el obengkel a Moses, e bai mle soal el mo meruul er a Moses el obes er se el diak a ulebengelel el olengchelel.

El uaia tolechoi se el abarer, “Diabelong a lilangel el klou a ngerel, e uleldiu el omtok er a le ngara beluulechad, e milekoi, el kmo: Ngak e a Ditang el Ngelekel, mongull er ngak.”

Deluut el omes. Ke rirengesis sel dirk dilii ngkei? “Ngak e a Ditang el Ngelekel. Mongull er ngak!”

A mesisiich el mengelblad a, dilu el kmo, “Lak ko bekikl; ng diak temellau—ng diak skangk; ngak a kedung el chedelekelk e becheleleu el ngelekel a katuu.

Me a Moses a ulemekedong er a Dios e ngilai a Chedaol el klisichel. Meng uaisei tial cherarou a rirebet me a beluulechad a mlo er ngii a desiu er ngii, Moses a dimlak el mesim. A otto er a ngerel a mle bleketakl e mechelings. Mngai bedengem er ngak, e Diabelong, ngii a milekoi, le ng ngii el di chimo el Dios a di ngii ak kungull er ngii, el ngii a Dios er a klebkall.

E merekong, e “ngii … a milrael el mo er cheroid er a bita er a Moses.”

A uriul er a Rubak a mlei e ulemekngeltengat er a Moses el kirel a otireklel, e a Rubak a milekoi:

Ngeltengat kau el, Moses, e kau a mo mesisiich er a betok el daob. …

E uaisei, Ngak a obengkem, el di merekmo el mo er a diak a ulebengelel.

Ultokengel a Moses er a cherarou a mesisiich e omekllomes el okesiu el me er kid er rokui, el diak el ior er a kmo ngera el dauch er a klechad a de ngar er ngii. Ng kmal mesisiich el cheldecheduch el le ko er kau—el mo medengei el kmo ngera kirem el meruul se el sekum ngii a melasem el mengeblad er kau. El kau, di uaia Moses, a mla mokngeltengat er a sengk er a ngesou er a babeluades.

Ke mekerang e kau a metik er tia el ngesou er babeluades, el di uaia Moses, e diak bo mecheblad me a lechub e ke kongei a ongetikaik? A mechellins el taoch er a chedaol ngeseu a mle moterkokl er tia el uriul el sils er a Rubak se er a Lolekoi: “A leuaisei, Ngak el Rubak, el medengei a kengaol el ngii a mo er a rekiei er a beluulechad, a ulemekedong er a mesiungek el Joseph Smith, Jun., e milngedecheduch er ngii er babeluades, e milsang a llechul.” Ousbech a di beot el omelekoi, e ng sebeched el melekoi el kmo a Rubak, el ngii a medengelii “a uchelel el mo er a ulebengel,” a medengei a ngodech el ringel er a sils er kid. Me a leuaisei, Ngii a mla rullii a rael el merkid el mo uchul e ng sebeched el otngakl a ringel me a ongetikaik, el betok el ngii a mekedmokl el uchul a ongeblad el omerellel a cherarou me a odelecheklel.

A rael a beot. Ng okiu a Remesiungel, e a Dios a mengedecheduch er kid, el Rengelekel, e meskid a llechul. Ng sebeched el muut el omeketakl aike el bades el, “Ngak el Rubak, … a mla omekedong er a mesiungek el [President Russell M. Nelson], e mengedecheduch er ngii er a babeluades, e msa a llechuk.” Tiang diak el kora kmal klebokel el klemerang?

Ak kuuchais a chedaol sioning el kmo a Rubak a meral milngedecheduch el mo er a Joseph Smith el mlara babeluades, el sel uchelel a klou el Kot el Ues. Ng dirrek el mengedecheduch er a President Nelson er a ika el temed. Ak olecholt er a klaumerang er ngak el kmo Dios a mengedecheduch er a re profet er a ngara mong el taem e milsterir a llechul el ngii a moktek er ngii a mo omekrael er a Rengelekel el mo ngara deureng er a tia el klengar me a klebkall er se el merael mei.

A Dios a melemolem el omesterir a llechul el mo er a ngar el profet er chelecha el taem. Ng betokk a okesiu—sel chedul a blai, odbechel-Ikelesia el ngara chelsel sel omesodel a ebangkelio; el metechir a osisecheklir a rodam me a oldingel e olisechakl loba omesiou; omengituuk a llechul a templo me a chedaol ruoll; me a sel beches el brokuram er a Rengalek me a Rengeasek. Ng mechas a renguk er a ungil omerellel me a klechubechub er a betik er a rengud el Demad er a Babeluades me a Ngelekel Sechal, Jesus Kristo, el ngii a liluut el olutii a Ikelesia er Ngii el mer tia el beluulechad e mla omekedong er a profet er a ika el klebesei er kid. A Oltel a ebangkelio er a Jesus Kristo a omtech a kengaol el taem el obengkel a cherrungel el taem.

Olngesenges a llechul a Dios el ngii a medung el mora profet a ngii a kiis el diak el di el ngii a mengeroid er a ongetikaik me a omengeblad er a cherarou ng dirrek el mo ngara diak a ulebengelel el deureng me a ungil a reng. Tia chedaol teletael a beot: llemalt, malechub eng keldung lotirekel a llechul a Dios, a uchul eng morngii a klengeltengat, ea klengeltengat a remuul a ungilreng, malechub eng deuelreng, el mera chelsel a klengar er kid.

E uaisei, el ngara osisiu el cherarou a melasem el mengeblad er a Moses, ngii a melasem el omedikl er kau. Ngii a mla blechoel el lekong kmung ngerang el ngii a diak el mera el ngii. Ngii a blechoel el melasm el omart er a kmo ng meral techang. Ng oumerang el kmo a olengesenges a mo rullii a klengar er kau el mo meringel e ngii a mo ngmai a techellem er a deureng.

Ng sebechem el omdasu el kirel a bebil er a uldesuel el mengeblad? Ta er a okesiu, ngii a ochotii aikel mengkit el teletelel a mekngit el kar me a omelim e dirrekl el melekoi el kmo mo ungil a rengum sel mngai. Ngii a otungid er a bekbedengel a mekngit el teletael el sebechel mo er ngii er a social media, ludimukl el omekesiu e oureng a soal a klechad. Osisiu, ngii a ochotid el mo er a bebil er a mekngit el omeruul el debetik, er a online el ngii a meskid a telemall malechub eng ringel, el uai a ues er a delboes el siasing, omecherabech er a rebebil lokiu sel cyberbullying, e olecholt a blulak el tekoi el uchul a rau el reng me a sebekreng el mera rengud me a uldesued. Ngii a kmal dachelbai el mengelulau, “Di moltirakl er ngak, e kau a mo ngara deureng.”

Aika el tekoi a milluches er a betok el dart el rak er a mla memong er a profet er a Babier er a Mormon e kmal tokubets el klou a ultutelel er a ika el klebesei er kid: A “Mekngit a diak el deulreng.” Mei me bol sebeched el dmangch a ongeblad er a Diabelong er a ike el mera el teletelel. Mei me lak de mesim e de ues a rokui el ongeblad me a ongetikaik er ngii el di tang el soal el melemall a delbenged e merechorech er kid a deureng me a klebkall er a ngar medal el taem.

Rodam me a rodos, ng kmal kired el melemolem el oba klaumerang e mo beiusech a medad, el uaisei e ng di ta el rolel e kede medengei a klemerang e rongesii a otto er a ngerel a Rubak el okiu a Remesiungel. E le Chedaol Reng a melekoi a klemerang e diak el loumulak. … Aikel tekoi a mo chemolt el mer kid el di bleketakl, el mo osebelel a reng er kid. … Le Dios a dirrekl el milengedecheduch el mo er tir el profets er a ngaramong.” Kid a re Santo er a Mesisiich el Dios, el oureng er a Israel! Kid kede mo ruebet? “Kede mo mengeroid me a lechub e kede olechib er tia el odechelakl? Diak! … El kirel a llechul a Dios, delbenged, rengud, me a chim, oba klaumerang e meral kid a di merekmo el dechor.”

Ak olecholt er a kmal tokubets el sioning er a Di ta el Chedaol er a Israel--el dirrek el ngara klel a Jesus Kristo. Ak kuuchais er a di ngar ngii el beltik el reng, klemerang, me a deureng er Ngii el mekedmokl el okiu a diak a ulebengelel el mlo chuarm er Ngii. Me se el dolngesenges a Llechul, e kid a mo blechoel el mukrael er se el melemalt el rael e diak de mecheblad. El ngara ngklel a Osobeled, el Jesus Kristo, amen.