Upo’oti’a i ni’a i te mau ha’atāfifira’a o te pure
Nāhea ’ia upo’oti’a i ni’a i te mau ha’atāfifira’a ’o tē ’ōpani nei ia tātou ’ia pure ?
Fa’ahōho’ara’a nā Andrew Bosley ’e Derek L. Smith
« Pure tāmau noa ». Tē hōro’a nei te Fa’aora i teie arata’ira’a e 10 taime i roto i Te Ha’api’ira’a Tumu ’e te mau Fafaura’a. ’Ua ta’a ia tātou ē, e hi’ora’a fa’ahōho’a te reira—e’ita tātou e nehenehe e tūturi noa nō te pure i te mau taime ato’a—i te tahi rā taime e mea fifi ato’a ’ia pure e piti taime i te mahana ! Nāhea tātou ’ia upo’oti’a i ni’a i te mau ha’atāfifira’a ?
Te ha’atāfifira’a : Te mo’era’a
E ta’ata tātou. E tupu te reira.
Te rāve’a e vai ra :
’Āpiti atu i tā ’oe mau pure i te tahi atu mea ’o tā ’oe e rave nei i te mau mahana ato’a, ’ia ti’a ho’i ia ’oe ’ia feruri ana’e i te hō’ē, e feruri ato’a ’oe i te tahi. Mai te mea tē ’ite ra ’oe ia ’oe e vare’a ta’oto ra nō te pure pāpū maita’i ’ia ara mai ’oe ’aore rā, hou ’oe ’a ta’oto ai, ’a ’āpiti atu i tā ’oe mau pure i te tahi ravera’a i te ao ’e i te pō e mea ara maita’i a’e ’oe, mai te pōrōmura’a i te niho ’aore rā te ravera’a i te rā’au. ’Aore rā te fa’atanora’a i te hora fa’aara i ni’a i tā ’oe niuniu !
Te ha’atāfifira’a : ’Aita e fa’aarara’a
E aha te parau i te po’ipo’i mai te peu te mau mea ato’a tā ’oe i rave mai taime o tā ’oe pure hope’a, ’o te ta’oto ïa ?
Te rāve’a e vai ra :
I te po’ipo’i, ’a ha’amāuruuru i te Atua nō tā ’oe mau ha’amaita’ira’a, tae noa atu te mau ta’ata tei ha’amaita’i i tō ’oe orara’a. ’A pure nō teie mau ta’ata. ’A parau i te Atua e aha tā ’oe i ’ōpua nō teie mahana ’e ’a ani i tāna arata’ira’a. I te pō, ’a fa’a’ite i te mea i tupu. ’A parau iāna i te mau mea ato’a tei tupu i te mahana tā’āto’a nō reira ’oe i māuruuru ai, te mea tā ’oe i ha’api’i mai, ’aore rā i fa’ahiahia.
Te ha’atāfifira’a : Te mau nīno’a mana’o au ’ore
Penei a’e e mana’o ti’a-mā ’ore tō ’oe nō ’oe iho nō te hō’ē ’ohipa tā ’oe i rave—’aore rā tā ’oe e ’ōpua ra e rave. Penei a’e ’ua riri ’oe i te Atua nō te hō’ē ’ohipa. Penei a’e ’aita ’oe e ’ana’anatae ra.
Te rāve’a : ’A pure noa
Noa atu te huru o tō ’oe mau nīno’a mana’o, e nehenehe te Atua e horomi’i i te reira. ’Aita roa e ta’ata e « ’ore e ti’a-mā » nō te pure, ’e ’o te diabolo tē hina’aro nei ’ia feruri ’oe mai te reira (hi’o 2 Nephi 32:8). Mea au a’e nā tō ’oe Metua e fa’aro’o i tā ’oe pure parauti’a ’ore ’e te tano ’ore—te huru pure ’a tūtava ai ’oe ’eiaha e fa’ahiti i te ’ohipa rahi ’o tā ’oe e ’ore e hina’aro e paraparau i teie taime—i te ’orera’a e fa’aro’o atu ia ’oe.