Fa’a’ohipa i te buka arata’i
Pape pa’ari monamona, fa’ahoara’a, ’e te herera’a i tō ta’ata tupu
Te ha’apa’ora’a i te piti o te fa’auera’a rahi e ’ere ïa i te mea fifi, mai tā ’oe e mana’o ra.
Fa’ahōho’ara’a nā Valentina Vinci
’Ia fa’aruru ana’e te hō’ē hoa ’aore rā te hō’ē melo o te ’utuāfare i te hō’ē taime fifi mau, ’ua uiui a’ena ’oe ia ’oe iho nāhea ’ia fa’aātea ’ē i tō rātou mau fifi ? E au ra e mana’o maita’i te reira ’ia hi’ohia.
Terā rā ’a feruri na ē, tē ta’a ra nā metua o tō ’oe hoa. ’Aore rā tē hāmani-’ino-hia ra tō ’oe tuahine iti i te fare ha’api’ira’a. ’Aore rā tē ’aro nei tō ’oe pāpā rū’au i te ’aravī rahi. Nāhea i te fa’ati’ati’a i te reira ?
Te pāhonora’a poto, e’ita tā ’oe e nehenehe. ’E ’aita e fifi. I taua iho taime ra, e nehenehe noa ’oe e tauturu. ’E e maere paha ’oe ’ia ’ite ē nā roto noa i te hō’ē tauturu iti e nehenehe te mau mea e taui.
Te mau fifi rahi, hō’ē hāmani maita’i ’ōhie
’Ua pa’ari Foni P. i roto i te hō’ē ’utuāfare metua ’ōtahi. I tōna tamari’ira’a ’e tōna taure’ara’a, ’ua hi’o Foni i tōna māmā i te tūtavara’a nō te fa’a’amu e toru tamari’i ’ōna ana’e. Nō reira, ’ua fa’ananea Foni i te mau nīnoa mana’o ’ino nō tōna metua tāne. ’Aita i maoro a’enei, i muri a’e i te 19ra’a o tōna matahiti, ’ua ha’amata tōna metua tāne i te tāmata i te ha’afātata mai iāna.
« ’Ua riri roa vau », tē parau ra Foni. « Tō’u mana’o ’oia ho’i, ‘e 19 matahiti tāna nō te tomo mai i roto i tō’u orara’a, ’aita rā i nā reira. Nō te aha i teienei ? » Noa atu ’ua pure ’oia ’e ’ua feruri māite, ’aita ā i noa’a ia Foni ’ia ’ite mai te hau. ’Ua tauturu ri’i te paraparaura’a i tōna māmā ’e i tōna metua vahine fēti’i, terā rā ’ua vaiiho noa te reira iāna i roto i te tapitapi. I muri iho, ’ua tupu te hō’ē ’ohipa maere (te ’ōhie rā) : ’Ua ani manihini te hoa rahi o Foni iāna e haere rāua e ’amu i te pape pa’ari monamona ’e e ho’oho’o haere i te fare toa.
« E hi’o te rahira’a o te ta’ata i te reira ’e e mana’o e ’ere ho’i te reira i te ’ohipa rahi roa », ’ua parau Foni, « e aura’a rahi mau rā te reira ! ’Ua ’ite au te hihi mahana i ni’a i tō’u ’iri. Tē haere rā māua nā rāpae, ’e ’ua ’ite atu vau i te mau tumu rā’au. ’Ua ’ite au te tāhiri o te mata’i, ’e ’ua putapū vau i te Vārua i tē hō’ē ā taime. Mea fa’ahiahia mau ».
’Ua fa’ati’ati’a ānei teie tere ho’oho’o mana’o-’ore-hia i te fare toa i te mau fifi o Foni ? ’Aita roa ïa. Tē ha’apāpū nei Foni ē, tē fifi noa ra tōna aura’a ’e tōna metua tāne. Teie rā ravera’a o te hāmani maita’i a tōna hoa ’ua fa’ati’a ia Foni ’ia putapū fa’ahou i te Vārua Maita’i. ’Ua ti’a iāna ’ia fa’aruru maita’i a’e i tōna mau fifi ma te pūai rahi a’e. « ’Ua ’ite au ’ua fa’auruhia ’oia e te Vārua Maita’i ’ia ’āfa’i iā’u i rāpae i tō’u fare », tē fa’a’ite ra Foni.
’O vai tē hina’aro ia ’oe i teie mahana ?
I roto i te buka arata’i Nō te pūai o te feiā ’āpī tē anihia nei tātou ’ia « toro i te rima i te feiā e vai mo’emo’e ra, ’o tē vai ’ōtahi noa ma te rāve’a ’ore. ’A tauturu ia rātou ’ia putapū i te here o te Metua i te ao ra nā roto atu ia [’oe’ » (Nō te pūai o te feiā ’āpī : E arata’i nō te rave i te mau mā’itira’a [2022], 12). ’Ua tauturu teie ravera’a ’ōhie o te fa’ahoara’a ia Foni ’ia putapū i te here o te Atua i roto i te hō’ē tupura’a fifi. ’O vai tā ’oe e nehenehe e tauturu ’ia putapū i te hō’ē ā here i teie mahana ?